Asanahe be Agedihe

Ya Mo agu Zungahe Mangi Boro Ho fu Mbori Si Ninyenyehe Kurii Ni ti Aregbo Dũ?

Kuti sangba Ziazia Kekeapai, gu fugo Ebere i asaha nga zungahe, si nga kakaka kidohe fu Mbori, si tipa mangasunge fuko, fu motumo fuko, tona kparakpara sunge kaa mangaha fuko, watadu ka gino gu kura ahe angianga agu ahe andiko asogaha ya ono kina boro nitini naidi ka ginoho. Ziazia Kekeapai na apangbanga rogoho nga ga agu azungahe aboro amangihe nga gu nakodi ngbaanga ya i amanga gupai gumba yo pa mangaha ka Mbori mangi gupai mbata i aidaha beko. Nikpiapai, Ana, nangia navungu gu nebi nangia Samuere ‘azungahe ki ya, “Ako Yekova nga ga arimbasa ko, ka bangiro agónga ti ga kanga ya, mo ki fu gude fu ga kanga ni kumbagude, mi afú ko fu Yekova ti arago ungako dunduko, i akpénga mangeriko ni kperi te.” ’ (1 Samuere 1:11) Ziazia Kekeapai naringbisapa gu zungahe mangi boro ho fu Mbori ya si a nga gupai kina boro nisani aguari ka mangaha. Gu zungahe boro amangaha fu Mbori nga gu du paha rogo Ziazia Kekeapai, si nidingisoro ni mangihe da kuti gini regbo?

Bakindo Soromo, nga guko nazogo aYisaraere bakuru kusayo ayaa: ‘Ho zunga mo he ni fu Mbori, ka mo ímasinga pa mangaha ya.’ Ko agbia gupai kuti ni nga: ‘Mo fú guhe mo azungahe tipa ka fuhe. Gupai ngbaa nga, ka mo zunganga he ya ti gu nga ka zungahe tipa ka fuhe ka mo afunga ha ya.’ (Batungusipai 5:4, 5) Gu Ndiko i afuhe fu aYisaraere kube Mose ayaa: “Ho oni ka nikido kidohe ni fu Yekova gaoni Mbori, oni aninyomoro nga tipa fu he te; bambiko Yekova gaoni Mbori naida ha be roni ni rengo; ono si ka du ni ingapai fu roni.” (Pa Fu Rugute ni Ue he 23:21) Si ziazia tie nga, pa manga boro zungahe fu Mbori nga nyanyakipa pai. Si naida boro gumbapa gu zungahe re na wene ndu gumbaha, na si naida gu boro namanga gu zungahe re ka ni dunga na wiri kapa tipa zanga manga ni gupai zunga ni he tipa mangaha re ya. Ka si adunga wo ya, gu ngbaa nga ka ni manginga zungahe ya. Ono tie, ya mo azungahe dunduko naida boro digisihe fuo gumba ni pa mangaha kindi?

Ka si du nga boro amangi zungahe ka manga gupai bi ni he kusa ni kuo ga Mbori arugute, ginipai si aida ni mangihe? Ani ya si angia gu zungahe rengbe rogo kura gene ka koda wasiwasi kodaba kuti ndikidi irisombori? (Pa Fu Rugute ni Ue he 23:18) Si ziazia nga, ngbatunga gu zungahe re nidingisoro te. Kurii gure, tii ga Mose Ndiko, kumba anirengbe arengba ka gbataka gu zungahe wiriko ni dee watadu diako amangihe.—Pa Geda Aboro 30:3-15.

Oni berẽnga pa gupai a du tipa gu boro namangi zungahe fu Mbori ka nye ni bakuparanga ono pai narakpa ni awere. Nibi gupai nga, pa nye ni nibakuparanga wa ni akidohe namaa ni awere ngba asada ka kuo gu ga Mbori andiko du tipa ne wasiro. Ya mo si naida ni naamanga asadatise nyanyakii kindi kaa banda gani zungahe? Anga gu ngbaa nga ni mbupa banda gani mokido ki mangi rogatise ki banda tini ti gu wasiro nga ga kuo ga Mbori andiko na fuo mangi ni rogatise ni ki sana ko tipa ko mbupai funi tee? Kina ni nga gu boro si aida ni diberã tipa gipai re. Anga kura boro ho nika manga gu diaberã re tipa ni te.

Na ginipai tipa gu zungahe mangi boro ho ni kini mo ka ino gupai kusa nga ni agu agu sani? Ya mo si naida ni gbata gene kindi ka digisoho? Si adunga nitaatapai fu Yepeta ko mangi gu gako zungahe ko azungaha fu Mbori te, ono mbiko gako sangbakpotoyo, ko adigisihe. (Abasapungbanga 11:30-40) Pa kpa boro ti manga gupai ni azungahe ka mangaha rengbe ka sa Mbori ko ‘zingi’ ki gbarasipa agu apai ni amangihe. (Batungusipai 5:6) Bi boro pa digiso gu zungahe ni amangihe nitaatapai rengbe ka sa Mbori ko he manga ni rogo weneringise.

Yesu Kristo ayaa: “Fugoroni du ni kina, ‘Ii, ii;’ na ‘Oó, oó’; gu ka susi gere kina gbegberẽ he nga ha.” (Matayo 5:37, gu kekepai duni pigipigihe re, ani du pigihe.) Si aidanga Kristano naabakabangirini na kina pa manga gu zungahe ni azungaha fu Mbori sa te, ono si naida ni du nigu boro a rengbe aboro gbiati Mbori ka kido kuti ni rogo gani afugo dunduko. Ono ginipai ka mangi ka si du nga ni bi tini rogo rakparakpapai, nga i agi tiyo na boro riipa kurapai nga gupai nawiri si niwenehe ti tonatonaha ono fuo wisigo ni he awere wenengai, ni bihe ni pamungo ka mangaha? Si aidanga nibi ngbatunga agi apai re taata te. Ono mbiko kakaka sakapai dagba tiyo, gu kura boro re rengbe ka diaberã ka dia gi tindiro re kusayo rini, wo tee, si kindi ni gupai si aida ni mangihe amanga.—Atambuahe 15:4; Asanza 6:2, 3.

Nibipa azungahe gbiati kura apai dunduko, ginipai si aida singia gupai ani abakabangirani tipaha? Si naida ani gbata gene dedede ka banda wene pagume dagbarani na Yekova Mbori.

[Gu kpiahe du ti kpewaraga 30]

Ana adunga na ndundu ka manga gupai ri azungahe tipa ka mangaha te

[Gu kpiahe du ti kpewaraga 31]

Wa pa manga gako zungahe avura du nikpakarakpakaraha, Yepeta amangi gupai ko azungahe tipa ka mangaha