‘Oni Ta Sungo Kini Ngere Angera Kindi’!

‘Gupai mi agumbaha fu roni kinaha mi agumbaha fu aboro dũ, oni ta sungo kini ngére angera kindi.’—MARAKO 13:37.

1, 2. (a) Ginipai kumba aini he tipa pa banda boro gani ahe? (b) Ti vuro gu yugopai na kpiapai Yesu amangihe tipa iradii, ginipai wiriki ani he tipa ani ta sungo kini ngere angera?

KUMBA du rimoko nga Juan anabanda gako nyanyakipa ahe kpuko yo. Ko anabandaha tii barame yo, nga gu ba nadu bangiriko nigu rago ka i adinga he rogoho ya. Ono tie, rogo kura yuru sa, ho ko aara ara ni gbiati diako, iradii arimi gayo bambu rame. Wa gopai ayugoho, gi iradii re aima ino bara agu ahe ko aidaha. Ko arogodi gu kikiipa ahe dunduko nadu tii barame yo kodihe kuti gu marã Juan amoihe kurogo gu sanduki nadu tiivuru gako mbisa pati barame. Fuo girorago wiso, Juan abi gupai nga, i ima di ko. Bangiriko agonga ti imisiri gupai namangi ko re te, nga: Gu boro nara ara arengbanga ka banda gani ahe te.

² Kina gu bangisapai re rengbe ka manga tipa agu apai nga ga toro. Ani arengbanga ka banda gaani maabangirise gbiati gaani idapase ka ani ara ara te. Si du fugo Pauro angarasa rani ti ni niyaa: ‘Ka ani ranga wa aguyo ara ya, ono ani ningere angera na kini rugutirani na pa apai.’ (1 ATesaroniko 5:6) Tipa ka yugo nyakapa sungo kini ngere angera, Yesu amangisunge na gu kpiapai nga ga iradii. Ko afura tipa agu apai si adu nga si nika tona kaa manga daho ko ka ye ni ni Basapungbanga, fuo gure, ko ki za gako abawiriki i banda tiyo ki ya: “Oni ngére tie, bambiko oni aina nga ni gu uru gaoni Gbia ka ye te. Ono oni íni gere ya ka irakporo aini gu rago iradĩ ka ye ti ni, ka ni angere, ka ni aida nga i kuadi gani bambu ya. Si du oni mbákadi tironi a tie; bambiko Wiri boro naye ti gu saa oni aberã nga pa ha ya.” (Matayo 24:42-44) Iradii naatakanga pande gu regbo kumbatayo ni ka ye ti ni te. Ni namaabangirini ka ye ti gu regbo boro aberãnga pa ye ni ti ni ya. Teketeke a wa Yesu agumbaha, digido gi zegino re nika ye ‘ti gu saa ani aberãnga paha ya.’

“Oni Ngére, Oni Rú Nyanyaki Rogo Idapase”

3. Wai Yesu amangisunge na gu kpiapai nga ga agu amoyambu napido pa yego bairayo kporo pumbo diadee yo, ayugo nyakapa gupai nga, ani ta sungo kini ngere angera?

³ Rogo agu afugo Ruka akehe rogo gako buku Wene Pangbanga, Yesu aringbisi aKristano kuti agu akanga napido pa yego bairayo kporo pumbo diadee yo. Si naida i ta sungo kini ngere angera tipa wa ko ka da, i ki rengbe ka dia ko kugume mbiko i rame yo te. Teketeke wa kina gure, Yesu ayaa: “Oni mbákadi tironi a wo; bambiko Wiri boro naye ti gu saa oni aberã nga pa ha ya.” (Ruka 12:40) Bete agu aboro naima digo nimangisunge fu Yekova tipa dungu agarã rengbe ka rungbura ka i amanganga pai niipiipihe ya nibipa gu regbo ani araka rogoho awere re. I rengbe ka da a ti gu digisopai nga, digido gi zegino re kindi tuturũ kumbatayo. Ono tie, ngbatunga agu aberã re rengbe ka nyaga rani kusayo ti agu apai nga ga toro, ono ki aria rani ani moi agu asásá nga ga aũzegino, nga agu apai rengbe ka sa rani ani naayukuro ayukuro rogo toroyo.—Ruka 8:14; 21:34, 35.

4. Ginipai idi ani kuti ni nika sa rani ani ta sungo kini ngere angera, na wai Yesu ayugu gipai re?

⁴ Ani rengbe arengba ka wirika kurapai ti gu kpiapai Yesu ayuguhe re. Wa si avura du nga, agu akanga re ainonga gu saa si adu nga bairayo nika ye ti ni te, ono tie, si ziazia nga, i aima ino gu yuru ko ka ye rogoho. Ka si adu fuyo nikpakarakpakarapai i ta sungo kini ngere angera sasasa yuru, wa ka si adu nga i aaberãpa yega bairayo rogo kura yuru kia. Ono tie, i aima ino gu yuru ko ka ye rogoho, na gure nangia gupai nanyakasi yo tipa i ta sungo kini ngere angera. Rogo gu gene du teketeke wa kina gure, sangba agu anebi nga ga Ziazia Kekeapai yo nayugo gupai ziazia nga, ani naraka rogo yangara arame; ono si apenga pa gu uru na gu saa zegino ka digo ti ni te. (Matayo 24:36) Gu ida du ani nani nga digido zegino ima mbeda, naundo rani ani ta sungo kini ngere angera, ono ka ani idi gupai zanga kapa nga, ga Yekova uru ima mbeda nirengo, si ka ngarasi rani gbe ani ta sungo kini ngere angera.—Zefania 1:14.

5. Wai rengbe ani ka karagapai sa ga Pauro ngarasahe tipa ka sungo kini ‘ngere angera’?

⁵ Pauro, ho ko aakepai ni fu aKorindo, ko angarasi yo ki ya: “Oni ngére, oni rú nyanyaki rogo idapase.” (1 AKorindo 16:13) Ii, pa sungo ani kini ngere angera nikpamiakpamiaha kuti pa ru ani nyanyakii rogo gu idapase nga ga aKristano. Wai rengbe ani kita sungo kini ngere angera? Nimanga ani asadatise ka gbia dudunguro inohe rogo Fugo Mbori. (2 Timoteo 3:14, 15) Sidu tie, gu wene sino nga ga wisigopai nisase gbiati du pati adunguratise dedede naundo rani ani nyakasi gaani idapase, na pa maa ani ga Yekova uru ku berã rani yo nigu uru ima mbeda, nga nyanyaki papara gaani idapase. Sidu, ti kura aregbo, pa wisigo ani gu goapai nga ga Ziazia Kekeapai nga gu nayugo gupai nga, ani naraka mbembedii na digido gi zegino re nika undo rani ka bangirani gonga ti gu nyanyakipa arengo du tipa ye digido gi zegino re ya.a Si a ninyanyakipa pai ani rugutirani na agu apai namanga rogo zegino wa si adigiso sangba agu anebi nga ga Ziazia Kekeapai yo. Wirina Germani yo akepai ki ya: “Ti agu aregbo dunduko mi naagia apangbanga rogo terevizioni, nga apangbanga avura, abazigizo, azuũ, na pa birikosi kpotosende, si nayugo gupai fere nga, digido gi zegino re mbembedii.”

6. Gini yugopai na kpiapai Yesu amangihe ka yugo gupai nani nga, boro rengbe arengba ka ra rogo toroyo wa regbo nikaa ndu kumbatayo?

⁶ Rogo Marako kapita 13, ani nabi gu kura ga Yesu zungodihe yo fu apefuo ko tipa i ta sungo kini ngere angera. Kuti gupai du rogo gi kapita re, Yesu aringbisi gupai du tipa apefuo ko kuti gu babanda ngbadimo napido pa yego bairako gii ngbii yo nga guko namere koyo na nunguro. Gu babanda ngbadimo re ainongo gu saa bairako ka ye ti ni te. Si aidi ko nye kina kuti maabangiriko ku gene yo. Yesu afura tipa aregbo biama nibakiakia yuru nga gu rengbe bairako ka da vuruhe yo. Gu biama regbo angia gu regbo natona saa biata yuru da kuti saa sita wiso ho uru akura ni. Ti gu regbo re, si aturanga fu babanda ngbadimo ni ti ni rame te. I naya wee gu regbo ngba ti abanzengere gbe ka zubo avura yo nga gi regbo re mbiko i nika tunguo avurayo atunguo mbu yo ku rame yo. Teketeke a, ti gi regbo nga pangbanangbawiso re, nga gu aboro zegino ara ara rogoho rogo toroyo pati rani re, si rengbe ka du fu rani nikpakarakpakaraha kisusi ani ta sungo kini ngere angera. (ARomo 13:11, 12) Sidu, rogo ga Yesu yugopai na kpiapai, ko nangarasa apefuo ko kindi niyaa: “Oni bánda tironi . . . oni ngére angera. . . . Oni ngére a wo. . . . Gu pai mi agumba fu roni kina ha mi agumba fu aboro dũ, Oni [ta sungo kini] ngére angera [kindi].”—Marako 13:32-37.

7. Gini kerepai duho, na wa ani abi gipai tie re, gini ngarasahe ani naagedaha dedede rogo Ziazia Kekeapai?

⁷ Ti dungu aregbo ho Yesu anatungusapai ni na fuo zinga ko bekpio, ko anangarasa apefuo ko i ta sungo kini ngere angera kindi. Nirengo, ti agu aregbo dunduko Ziazia Kekeapai afura tipa digido gi zegino re, ani nabi gupai nga, si naza rani ani banda tirani kita sungo kini ngere angera kindi.b (Ruka 12:38, 40; Yugoti 3:2; 16:14-16) Si tie ziazia nga, pa yukuro boro rogo toroyo nga kerepai nirengo. Ani dunduko naida agu arugute re!—1 AKorindo 10:12; 1 ATesaroniko 5:2, 6.

Agu Amokedi Biata Naarengbanga ka Sungo Kini Ngere Angera Ya

8. Rogo gu ati i aayambaha nga Getesemane, wai ga Yesu amokedi biata akaragapai kuti gu ngarasa yo ko angarasi yo nani ya i ta sungo kini ngere angera zanga rame?

⁸ Tipa boro ta sungo kini ngere angera zanga rame, si naida wene ndupai duho nasa ni ni mangihe wo a wa ani ka bihe tipa gupai nadu tipa Petero, Yakoba, na Yoane. Agi akumba biata re angia agu akumba naima nyaka rogo toroyo na nanapeka fuo Yesu niruru mangaapai na ki duna bakere nyemuse tipa ko. Wa si avura du wo, rogo gu yuru nangia ga Nisana ti rameru 14, rogo gu garã nangia 33 ti Gaani Regbo, i ambunga rame kita sungo kini ngere angera te. Fuo guari yo kusayo rogo gu vurubambu nadu kuari yo, yo i amangi Pumbo Susiri ni, agi amokedi biata re agasi Yesu kurogo gu ati i aayambaha nga Getesemane. Yo Yesu aya ni fuyo wee: “Mbisimore nazinga gbe kina yo du kpio ni. Oni nyé erẽ, ani ngére na oni.” (Matayo 26:38) Yesu akpari kakaka fu Bako du ngbangbaturũ yo bara biata, na ki karaga tiko bara biata fuo abakureako ka bi kina gupai nga, i aara ara.—Matayo 26:40, 43, 45.

9. Gine si awira nangia bakere ndugupai amokedi ayukuro ayukuro ti ni?

⁹ Tipagine gi ruru akumba re afu gberarago ti ni fu Yesu rogo gu yuru re? Mbugo ti kpotose nangia nduhe. Regbo aima susa, isoke gu regbo re avura du fuo susa bebere yuru, “bambiko bangiriyo arõi arõa” na rame. (Matayo 26:43) Wa si avura du wo, Yesu aya fuyo wee: “Oni ngére ki nikpari, oni ka rima ku rogo asada. Mbisimoroni nakpi nyemu he ni rengo, [ono] bororoni anyaka nga ya.”—Matayo 26:41.

10, 11. (a) Wa Yesu avura duna mbugo, gine naundo ko ko ta sungo kini ngere angera rogo gu ati i aayambaha nga Getesemane? (b) Ginipai rengbe ani ka wirikaha be gupai namangi gu ga Yesu amokedi nadu biata fuo ngarasa ko yo i ta sungo kini ngere angera?

¹⁰ Zanga kapa, Yesu adu a na mbugo rogo gu nyanyakipa yuru re. Ono tie, kuba gupai nga ko ti nirame, ko adi gu nyanyakipa yangara aregbo ko adunga rogoho nizizi ko re ya tipa ka kparakpee kakaka. Mbata fu bete arame kusayo, ko angarasi apefuo ko i nikparikpee na kini ya fuyo wee: “Oni ngére dedede, ki nikpari, ya oni di be pai ka bata be agi apai nikamanga dunduko re, ki ru barangba Wiri boro.” (Ruka 21:36; AEfeso 6:18) Ka ani irisi ga Yesu arugute na ki pefuo gako wene kpiapai tipa kparakpee, Yekova undo rani aundo wa ani akpara fuko na ngbaduraniyo dunduko tipa ko undo rani ani naangera angera rogo toroyo kindi.

¹¹ Rengo ngaha nga, Yesu aima ruga tiko na gupai nga, fuo kina bete regbo, i nika zio ko na ki saringbanga ko sa kpio, nga gupai gako abawiriki aruganga tiyo nani ti gu regbo re tigayo ya. Si adu nga, i nika sarangbanga ko ki kenge ko kuti ngua-mbusa nga gu nafu bakere ima fuko gbe. Yesu aima pe agi apai re fu gako amokedi, ono i agianga rogo gupai yo ko aagumbaha fuyo te. Si du i ati ti ni nirame baraho ko angera angera ni kini kparikpee. (Marako 14:27-31; Ruka 22:15-18) A wa si adu nirengo tipa amokedi, kpotorani nirurungburaha, na kura apai kinaho kindi ani ata inongo ho ya. Wa vura duhe wo, ka bangirani go ti gi regbo ani araka rogoho re ya nga gu regbo si aida ani naamanga apai rogoho niipiipihe. Pai rengbe arengba ka manga rani ani ki ti nirame rogo gu gene nga ga toro. Kinagu ka ani moi bangirani fuo apai, si ka ani ta sungo ti ni kini ngere angera.

Nyanyakipa Asino Biata

12. Gini asino biata Pauro agbiaha kuti padu ani na rugatise?

¹² Wai rengbe ani ka nye kuti gu gaani sino nga ga mangapai niipiipihe? Ani ima bi nyakapa kparakpee na gupai nga si naida ani naamaa ga Yekova uru kindi ku berã rani yo. Kurii gure, Pauro afura tipa nyanyakipa asino biata nga gu si aida ani sonosihe. Ko ayaa: “Wa du ani ni ga haha rago yo, ani rúgu tirani, niukadi gu marã ngbaduse nga idapase na nyemuse; maabangirise tipa bata ki du ni gaani kpakpari vura.” (1 ATesaroniko 5:8) Niguruhe, ani wisiginga gupai idapase, maabangirise, na nyemuse amangaha rogo sa rani ani ta sungo kini ngere angera.

13. Ginipai idapase amangaha ka sa rani ani ta sungo kini ngere angera?

¹³ Ani du wa ka ani duna gu idapase awonga ya nga Yekova kina ti ni na kingia gu boro ‘nafu mosoro afu fu agu aboro nagbata ko.’ (AEbere 11:6) Gu bambata digisidigisi ga Yesu sangbanebi tipa digido gi zegino re nga gu namangi rogo bambata sa kama agarã nanyakasa gaani idapase kuti gu bakere digisidigisihe namanga ti gi gaani regbo re. Na gaani idapase nasa rani ani moi bangirani tipa ga Yekova uru, si kini sa rani a ani duna gu kido nga, “[gu yuguyugupai nga sangbanebi, si] ayé aye ni rengo, si aíma nga te.”—Abakuka 2:3.

14. Wai nyakipa maabangirise ka ani aida kaa sungo kini ngere angera?

¹⁴ Gu gaani ndikidi maabangirise du ani nani zanga wiri kapa kuti ni, si wa kina “ũzada mbisimo” nga gu naundo rani ani hi kpakarakpakaraapai ka si vura ida gupai berani nga ani sungudi kura digisidigisi ga Mbori akidohe vurũ. (AEbere 6:18, 19) Margaret, nga mbedimbedi wirinarani nitoro du garãri awere gii 90 yo nga guri naima zio bapatiza mbata fu agarã 70, nakusa gupai ri anaokaha aoka mbata niyaa: “Ho kumbaami aasamba ni be gu kaza nga kenisa rogo gu garã nangia 1963, mi aberẽ gupai nga, ka digido zegino ye niipo, si du niwenepai. Ono awere tie, mi bi gupai nga, mi aaberã gbe tipa kina agu apai nagba ti kina re. Ani adunga na wiri berã rirani yo tipa bakio wai gu sunge re nika du rogo zegino dunduko te. Zavura kina awere, dungu arago gu duho i natona kina tonatona sunge gbua rogoho. Sidu, mi na ngbarago mbiko Yekova nahipai kindi nigbangaha.” Afugo gu Mokedi nangia Pauro nakido rani niyaa: ‘Pa hi boro pai nasa gupai nga i idi na gani pai; pa ida yo na gani pai tigaha nasa ni ni duna maabangirise, ono gani maabangirise andunga na ni ka fu gberarago funi te.’—ARomo 5:3-5.

15. Wai nyemuse nika fõngbaduraniyo ka si wiri gupai nga ani aima digo nisungudi apai tipa gbanga regbo?

¹⁵ Gu nyemuse nga ga aKristano nigu sino susi akuraha mbiko si nafõngbaduraniyo sa agu apai dunduko ani amangaha. Ani namangasunge fu Yekova mbiko ani nakpinyemu ko, zanga bipa gako ringbisiringbisi regbo tipa mangaapai. Nyemu kura aboro nafõngbaduraniyo ani tungusi wene pangbanga nga ga Kindo ka Mbori vura mbu regbo tipaha nigbangaha wai vurũ, na ka ani vura dogoda bara wai kurogo bangisa akporo vurũ. A wa Pauro akehe, “awere idapase du ho na maabangirise, na nyemuse; agi apai biata re; gu kii [paha gbe] dagba ha nga nyemuse.” (1 AKorindo 13:13) Nyemuse nasa rani ani naahipai kindi na kini undo rani ani ta sungo kini ngere angera. ‘Nyemuse nasa boro ni naamaabangirini tipa apai dunduko, si nasa ni ni hi apai dunduko, si adiganga te.’—1 AKorindo 13:7, 8.

‘Oni Kakuti Gupai Totoroto Du Beroni’

16. Kuba gupai nga kaa nyomoro, gini sino berã si aida ani du nani?

¹⁶ Ani naraka rogo nyanyakipa aregbo ho agu apai namanga rogo zegino atingida rani ni na pa gupai nga, ani naraka rogo digido papara yangara arame. (2 Timoteo 3:1-5) Anga gi regbo re nga regbo nyomoro te, ono si nga regbo ‘ani kakuti gupai totoroto du berani.’ (Yugoti 3:11)

‘Niruga ani berã rani na kini sogima kpee’ na kini sonosi idapase, maabangirise, na nyemuse, si nga agu apai ka sa rani ani ima mbakada tirani tipa regbo asada. (1 Petero 4:7) Ani na bakere ga Gbia sunge berani ka mangaha. Pa zio ani tirani kuti gu mangaapai nga ga sinombori nika undo rani ani ta sungo kini ngere angera.—2 Petero 3:11.

17. (a) Tipagine si aidanga ti ni ani mbu agu agberarago ninaaye sa rani ti kura aregbo si zeresi kpotoraniyo ya? (Oni bi gu sanduki du ti kpewaraga 31.) (b) Wai rengbe ani ka wirika Yekova, na gini maku duho napido agu aboro nawirika ko?

¹⁷ Yeremaya akepai ki ya: “Yekova nga gi kparakpara he, si du mi amáa bangire ti ni ti ko. Yekova namanga apai ni wene he fu agu yo nasunguda ko, fu mbisimo gu ni nagbata ko. Gu pai ngba nga ka boro du na maabangirise ki nisungudi ga Yekova bata ni zera.” (Abia Kpenunga 3:24-26) Bete rani pidi gu regbo re gbua tipa guru regbo. Tipa dungu agarã, gu kura rani aima digo nipidi ka bi gu bata Yekova nakido pa fuhe. Ono gi sungudo regbo re gbua nikina wiri guruhe ka ani ringbisihe kuti gu nyenye regbo du kumbatayo barabangirani! (2 AKorindo 4:16-18) Wa ani apido ga Yekova ringbisiringbisi regbo, ani rengbe arengba ka sonosa gu wene asino nga ga aKristano na ki undo kura aboro i gbia mamu ti vuro ga Yekova zerangbaduse na ki di rengo kugume. Ani dunduko tie zinga tirani kuti gu sino nga, kita sungo kini ngere angera. Ani wiriki Yekova na ki duna zerangbaduse, na ki tambua ko tipa gu maabangirise fu ko ho fu rani. Na wa ani ata sungo kini ngere angera, ani zinga tirani ngutete kuti gu maabangirise nga ga gbia nyenye unga. Fuo duhe wo, agi kidohe nga ga sangbanebi naye re amanga tipa rani: “[Yekova] akíisa pa ro mo di kumbo ringara; ho i ka gbarasa gbegberẽ aboro ni, mo abí he.”—Atambuahe 37:34.

[Gu rukutu kekeapai du bandu kpewaraga yo]

[Sanduki ti kpewaraga 31]

“Boro Ngbarago Nga gu Boro Namaabangirini Tipa Pai Kumbatayo.”—Daniere 12:12, NW.

Oni moinga kpia gupai ku berã roni yo nga, babandarago ima kapa kuti gupai nga iradii nasogima ka di ahe rogo gu rago ko asinzirihe. Ho rago abiso ni, gu babandarago re nadegatuko wenengai tipa gu wiri woro rago nika yugopa da gu iradii re. Wa asaa asusa ko nazara abangiriko kaa ngera na kini degetuko nyanyakii. Si taata ani bi gupai nga, woro ahe dunduko rengbe ka nanga ko, wa woro be-angua wege niya nani watadu woro guhe pusu nasikoho ku sande.—Ruka 12:39, 40.

Ngbatunga pai wa kina gure rengbe ka manga agu aboro ‘nasungudo gu yugoti nga ga gaani Gbia Yesu Kristo.’ (1 AKorindo 1:7) Amokedi aberẽ gupai nga, Yesu nika ‘karaga ga aYisaraere kindo’ fuyo ngbutuko fuo zinga ko bekpio. (Amokedi 1:6) Kusa, fuo susa agarã, si aidi i tingidi agu aKristano nadu Tesaronike yo ya padu Kristo ho na ome kindo beko adu kindi kina kumbatayo. (2 ATesaroniko 2:3, 8) Wa si avura du wo, agu amaabangirise gu bambata apefuo Yesu adu nani ni agbaaha tipa ga Yekova uru re, asanga yo i mbu gu gene narengbe ka ndu na yo sa nyenye unga te.—Matayo 7:13.

Rogo gi gaani a’uru re a, si aidanga ani mbu gaani sunge sinziri mbiko gu gberarago ka zi rani mbiko digido gi zegino re nakeesa akeesa te. Wiri woro he rengbe arengba ka nanga gu babandarago namaabangiriko kini ngere, ono ko du wa ka ko aasinzirirago kindi! Si nga gako sunge. Kina gu bangisapai re du tipa aKristano.

Gaoni Karagapai Nga Gine?

• Wai rengbe ani ka nyakasa gu gaani kido nga digido gi zegino re ima mbeda?

• Ginipai rengbe ani ka wirikaha be gu kpiapai nga ga Petero, ga Yakoba, na ga Yoane?

• Gini asino biata rengbe ka undo rani ani ta sungo kini ngere angera

• Tipagine du gi regbo re ti ni nigu regbo si aida ani ‘zi tirani nyanyakii kuti guhe du berani’?

[Gu kpiahe du ti kpewaraga 29]

Du pati adunguratise, kparakpee, na gu wene sino nga ga wisigopai naundo rani ani ta sungo kini ngere angera