Ga Gbia Riahe Nga Ga Nyemu na Bakere Rogoyo ti ni Tipa Roni

YA MO Ga Gbia Riahe Nga ga Nyemu na nyanyakipaha tipa roni nga gu rengbe ka undo roni nyeanye kindi? Tipa ani rengbe ka ino ho, ani wisiginga gu rogoyo kina boro Yesu Kristo nitiko agumbaha tipa gi kparakparapai namangi re.

Rogo gu nyemu nadu rogo Nisana ti rameru 14, rogo gu garã nangia 33 ti Gaani Regbo, Yesu asungu na gako amokedi 12 rogo gu vurubambu nadu kuari yo Yerusarema yo ka manga Pumbo Susiri nga gu i anamangaha bara sa rogo garã. Fuo i ngbabe agu ariahe nangia ga Pumbo Susiri, gu basamungu nangia Yuda akuru ka ndu ka yamba akare tipa i ye ko kusi Yesu fuyo. (Yoane 13:21, 26-30) Fuo gure, Yesu akusi gu riahe i ayambaha nga “ga Gbia riahe [nga ga nyemu]” fu gu yangara amokedi nanye 11. (1 AKorindo 11:20) I nayambaha a nga Tingidapa Kpio Yesu, mbiko Yesu arugu apefuo ko ki ya: “Oni ta manga gere nitingidi pa re.” Gipai re nga gu yangara pumbo i azinahe fu aKristano i nitingidipaha.—1 AKorindo 11:24.

Rogo dungu aba, aboro name kpiahe tipa ka tingida nyanyakipa boro nani watadu ka kpara uru tipa ka tingida gu nyanyakipa pai rogoho namangi. Wa kina gure a, Yesu asigira pa gu riahe nika undo aboro i tingidipa pai, nga ka undo gako abawiriki i nye kuti tingidapa gu nyanyakipa apai namangi rogo gu nyanyakipa uru re. Tipa gu rikaaboro si adu nga i nikaa ye gizo, si adu nga ho i kaa nidu ni pati gi riahe re, gbe, nga agu ariahe ko amangisunge nani narukuba kurahe re, si nikaa nitingidi yo na gu nyanyakipa pai Yesu amangihe rogo gu yuru re. Gini kpiahe narukuba kurahe Yesu amangisunge nani, na ginipai si ayugoho? Ani wisiginga pangbanga gupai namangi rogo gu garã nangia 33 ti Gaani Regbo rogo gu yuru re a wa Ziazia Kekeapai atangaraha.

Gu Ziazia Ahe gu Kpiaahe re Arukubaha

“Ko . . . [a]di kpokuta, ho ko afu tambuahe ni tipa ha, ko ki kuadi he, ki fu he fu yo, niya, ‘Borore nga gere du ni fufu he tipa roni. Oni . . . [ta manga] gere nitingidi pa re.’ ”—Ruka 22:19.

Ho Yesu adi kpakuto ni na ki ya “borore nga gere [‘si nayugopa borore,’ NW ],” gupai ko aaberãha nga, gu kpakuto naadunga na agbooro rogoho re ya arukuba gu kpotoko naadunga na ingapai ya, nga gu ko afuhe “tipa gu unga nga ga aboro zegino dũ.” (Yoane 6:51) Wa vura duhe nga gu kura asasa-fugo Ziazia Kekeapai wa gu du kuari re naya “Borore nga gere [pa-Greek, es·tinʹ],” gu buku nga Greek-English Lexicon of the New Testament nga ga Thayer, si naya tigaha wee, rogo gu fugo yo re nga, “ka yugopa pai, ka rukuba kurahe.” Si nafu gu berã nga, he narukuba kuraha, watadu he nikpia kurahe.—Matayo 26:26.

Kina gu bangisapai re a Yesu agumbaha tipa gu inga nadu na imekakue rogoho. Ko ayaa: “Gi inga re, si nga vovo ndika rogo kurere, nga kina gu nauka tipa roni.”—Ruka 22:20.

Rogo gu pangbanga Matayo akehe, Yesu aya tipa gu inga re wee: “Gere nga kurere [‘si nayugopa kurere,’ NW ] nga ga vovo ndika, i niuka ha tipa roni na dungu aboro sa dia gbegberẽapai ti yo.” (Matayo 26:28) Yesu aamangasunge na gu imekakue nadu rogo gu inga re niguhe narukuba kureko. Si adu nga gu kureko nika uka re, nika maamburupai tipa “vovo ndika” tipa agu abawiriki duni mbedimbediyo nitoro, nga aguyo si adu nga i nika zogarago na ko ngbangbaturũ yo ni abakindo na kini mangisunge yo ni aboromotumo.—Yeremaya 31:31-33; Yoane 14:2, 3; 2 AKorindo 5:5; Yugoti 1:5, 6; 5:9, 10; 20:4, 6.

Gu imekakue du rogo inga natingida aboro a na gupai nga, gu kure Yesu nauka re nga mburupai tipa Mbori rengbe ka ‘mbupai fu aboro ti gayo ingapai,’ rogo gi gene re, si kini zakigene fu agu aboro nari gu kpakuto na kini mbiri gu imekakue re i yambu yo tipa gu raka nga ga ngbangbaturũ ni adikumbo na Kristo. Rurupai du tie si aida gupai ti ni nga, kina agu aboro i nayambu yo tipa nduge ku ngbangbaturũ yo, du bangeyo gbua nikina betehe re, ri gu kpakuto na kini mbiri gu imekakue du tipa Tingidapa Kpio Yesu.—Ruka 12:32; AEfeso 1:13, 14; AEbere 9:22; 1 Petero 1:3, 4.

Ono tie, ginipai tipa agu apefuo Yesu adunga rogo gu vovo mokido re ya? Agiyo re nga gu “kura avusende” nga ga Gbia yo, i na gu maabangirise nga ga gbia ngbarago be nyenye unga rogo paradiso auru kpotosende, angianga gu maabangirise nga ga zogarago na Kristo ngbangbaturũ yo ya. (Yoane 10:16, NW; Ruka 23:43; Yugoti 21:3, 4) Nidu yo nigu “bakere rimbasa aboro” nga ga ruru aKristano “namanga pa [Mbori] uru na yuru,” i na ngbarago tiyo ka duni gu iriiri adupati Ga Gbia Riahe Nga ga Nyemu kini bihe. Gayo afugo na gayo mangaapai natakapande gupai nga: “Gaani bata ye be gaani Mbori . . . [sungu] auru mbatabakindo, na be Wiri [Vusende] a!”—Yugoti 7:9, 10, 14, 15.

Bara Wai Si Aida I Dogodi Mangaha?

‘Oni nye kuti manga gipai re kini tingidi pare.’—Ruka 22:19.

Bara wai si aida i dogodi manga Tingidapa Kpio Kristo tipa ka bangirise gonga ti ni ya? Yesu aringbisanga pai tipa gipai re zukazuka te. Ono tie, wa duhe nga Yesu asigira Ga Gbia Riahe Nga ga Nyemu rogo Nisana ti rameru 14, rogo gu nyemu nangia ga Pumbo Susiri, nga gu pumbo aYisaraere anamangaha bara sa rogo garã, si ziazia nga, ko aida i naamanga Tingidapa Kpioko kina ngba gu bangisa gene re. Wa aYisaraere anamanga pumbo bara sa rogo garã, nga gu pumbo nanatingida yo na pa batasa yo be sunge akanga Ezipeta yo, aKristano naamanga pumbo bara sa a rogo garã, nga gu pumbo natingida yo tigayo na pa batasa yo be gu zio i adu rogoho kuti manga ingapai na kurogo kpio.—Gate 12:11, 17; ARomo 5:20, 21.

Anga gu berã nga ga tingidapa nyanyakipa pai bara sa rogo garã, nga gupai namangi kusayo, ni gupai aboro naamanganga ha ya te. Nikpiapai, ani makianga gupai arogotise naamangaha ho i naamanga pumbo tingidapa gu ramediwi ni i amangi gayo rogatise ti ni watadu ho rikaaboro naatingida pa gu nyanyakipa pai ni namangi rogo gayo kuru pangbanga. Dedede, i naatingidaha bara sa rogo garã ti gu ramediwi gupai re amangi ti ni. Tipa dungu akama agarã fuo kpio Kristo, i anayamba dungu agu aboro nasa tiyo ni aKristano ni Aboro Bawe-na-Biama, mbiko i anatingidapa kpio Yesu bara sa rogo garã, rogo Nisana ti rameru 14.

Taata Mangaapai Ono na Rogoyo ti Ni

Gu mokedi nangia Pauro asakirogoyo ya padu ga Yesu abawiriki pati Ga Gbia Riahe Nga ga Nyemu nika sa yo i ‘nye kuti takapande pa kpio Gbia.’ (1 AKorindo 11:26) Sidu, si adu nga gi tingidapa kpio Yesu re nika gbeberã aboro kuti gu nyanyakipa sunge kpioko amangihe rogo manga ga Mbori ringbisapai.

Nimanga Yesu Kristo kina ruruapai dati kpio, ko adi gbarasarimo kusayo ti rimo Yekova Mbori ki sa aboro i bi ko a wa du ko nigu Bakusiahe nga iratatamana duna nyemu aboro tiko na duni ruru Bakerepa Bakindo. Nimanga Yesu pai kia ti gu kitangbaangase nga ga Satana, na zanga ko du wa Adamu, ko ayugu gupai nga, aboro rengbe arengba ka nye niruru yo fu Mbori, zavura tii kere fudifudiapai kisusi vurũ.—Eyobo 2:4, 5.

Ga Gbia Riahe Nga ga Nyemu nasa gupai a nga ka bangiri aboro gonga ti tingidapa ga Yesu nyemuse nga gu ko amangihe nimbu ko pa gako apai tipa ka undo rani ya. Wa kere a’asada avura ye sa Yesu, ko anye kindi nigu gude nagi sangba Bako. Rogo gi gene re, ko arengbe tie ka fu gako rengberengbe unga ka dada gu banaru geno bape-ingapai Adamu agbehe. A wa Yesu nitiko asakirogoyo, ko aye “ka tumo dungu [aboro] ni ungako.” (Matayo 20:28) Si ki ta du were, agu aboro dunduko naida kuti Yesu, i rengbe ka mbupai fuyo ti gayo aingapai na i ki rengbe ka gbia nyenye unga a wa Yekova aringbisihe tipa ngbatunga aboro nigako bambata ringbisapai.—ARomo 5:6, 8, 12, 18, 19; 6:23; 1 Timoteo 2:5, 6.a

Agi apai re dunduko nanyakasapa ga Yekova bakere wene sino na gako weneringise arẽnga aboro tipaha ya, rogo mbakadapai tipa ngbatunga aboro rengbe ka gbia bata. Ziazia Kekeapai nayaa: “Gi i ayugu ga Mbori nyemuse tipa rani ti ni re, nga Mbori akedi bangisa Wiriko ku zegino, ani du ni ungarani mbiko ko. Gi nga nyemuse re, nga nyemu Mbori adu nga ti rani te, kina rani du nyemurani ti ko, ko akedi Wiriko ko du ni motumo gaani ingaapai.”—1 Yoane 4:9, 10.

Ako, nangbaa gu pumbo nga ga Tingidapa Kpio Yesu! Si ni gupai du taata ka mangaha na ki rengbe i mangihe rogo zegino dunduko na dagba gu dungu apai namanga, na si a ni gupai duna rogoyo ti ni na rengbe ka nye a aboro naatingida paha tipa gbanga regbo.

Gupai Si Ayugoho Tipa Roni

Gu pa kpio gaani Gbia nga Yesu Kristo nadu nimotumo re, genoho aima kio fuko gbe na fu Bako nga Yekova a. Nidu Yesu nirengberengbe boro, ko adianga kumbo kpio wa gu du tipa rani dunduko te. (ARomo 5:12; AEbere 7:26) Ko arengbe arengba kaa raka nyeanye kindi. Boro ho ka rengbe ka imo ko te, zavura ngbaome vurũ ka ko aidanga paha ya. Ko ayaa: “A nga boro sa ka di he [ungare] be re te, kina mi nazoga ha ni tire.”—Yoane 10:18.

Wa si avura du wo, Yesu ataino aino kini fu rengberengbe ungako nimotumo tipa wa ka “ko gbarasi gu ko rogo kpio yo, nadu na tandu kpio, nga bakitingbanga. Ko ki rengbe na batasa agu yo dunduko naara rogo ungayo ni zizi yo mbiko gunde kpio.” (AEbere 2:14, 15) Gu ga Kristo nyemuse nasa ko ko mbupa gako apai tipa ka undo rani niyuguyuguhe rogo gu ngbatunga kpio ko aidi ka kpihe. Ko aima ino wai nzunzu ko ka ima na wai ko ka kpi.—Matayo 17:22; 20:17-19.

Tingidapa Kpio Yesu natingida rani a na pa gu babakere nyemuse kisusi gu Barani du ngbangbaturũ yo nga Yekova ayuguhe fu rani. Nairiwo wai si agbere tiko, nga gu boro “[du]na bakere nunga ti ko, na bakere inapai,” ka gia “akpe na asarawati na nyanyaki akpe du na aume” nga ga Yesu rogo gu ati nangia Getesemane, na ka bi ko i nitaki ko, kini kenge ko kuti ngbunduru, na ka bi ko ko ni samba ka kpi fuo gbanga regbo. (Yakoba 5:11; AEbere 5:7; Yoane 3:16; 1 Yoane 4:7, 8) Kandara kina berẽberẽ paha gbua awere, fuo susa akama agarã, naba kina nunga ti dungu aboro.

Oni berẽnga pa wai Yekova Mbori gbiati Yesu Kristo atumo rirani nga aboro ingapai na bakere geno wa gure! (ARomo 3:23) Rogo a’uru nibasasa, ani naangera bangirani na sangbana gaani ingapai na gaani zangarengba. Ono tie, nidu ani na idapase riimburu gu motumo tumorii Yesu atumoho, ani rengbe ka sana Mbori tipa ko mbupai fu rani ti gaani aingapai. (1 Yoane 2:1, 2) Gi tumo rirani re nasa rani ani rengbe ka fura na Mbori zanga pai duho nakiso gene berani na si nasa rani a ani duna wene sangbakpotoyo. (AEbere 4:14-16; 9:13, 14) Kurii gure, ani rengbe ka duna ngbarago be berãpa raka nyeanye kindi rogo paradiso nga ga kpotosende. (Yoane 17:3; Yugoti 21:3, 4) Gipai re gbiati dungu gu kura amaku nga sangbana ga Yesu babakere mangaapai kisusi nga ga mbu ko pa gako apai ka undo rani.

Yugo Tambuahe Tipa Ga Gbia Riahe Nga ga Nyemu

Zanga kapa, Ga Gbia Riahe Nga ga Nyemu nga iiriwo yuguyugu ‘gu bakere weneringise nga ga Mbori arẽnga aboro tipaha ya.’ Na kurii gure, gu ga Yekova Mbori mbakadapai ko amangihe tipa motumo tumorii, nga gu namangi mbiko gu nyemuse nangia ga Yesu nasa ko ko mbu pa gako apai tipa ka undo rani, si nirengo nigu ‘gamahe adunga ba ringbisa paha ti ni ya.’ (2 AKorindo 9:14, 15, NW ) Ya mo gi ga Mbori gene yugo weneringise rogo Yesu Kristo yo re afõnga ngbaduroniyo oni duna tambuahe tipa gupai i amangihe re tee?

Si nafõ rani afõ nirengo. Sidu tie, ani nayamba roni na nyemuhe oni dungura tironi na aDezire Yekova kurogo ba ka du pati Tingidapa Kpio Yesu. I nika manga Tingidapa Kpio Yesu rogo gi garã re Rago Biata Sunge, rogo Zerekpe ti rameru 16 fuo ti uru. Agu aDezire Yekova du rogo gaoni dagbarago aduna ngbarago ka yugo gu ndikidi regbo na gu ba i ka manga gi nyanyakipa dunguratise re rogoho.

[Gu rukutu kekeapai du bandu kpewaraga yo]

[Sanduki ti kpewaraga 6]

“Borore Nga Gere” Watadu “Si Nayugopa Borore,” Ginigu Nga Ruruhe?

Ho Yesu ayani wee, “Mi nga ngbadimo” na “Mi nga ndikidi bakakue,” anga boro ho naberẽ pako nindikidi ngbadimo watadu nindikidi katakpa bakakue te. (Yoane 10:7; 15:1) Teketeke a, ho gu Ziazia Kekeapai du rimoho nga The New Jerusalem Bible afugö gu fugo Yesu ni berewe nga: “Gi inga re nga vovo mokido,” si asanga rani ani da kuti gu digisopai nga gu inga re nitihe angia ndikidi vovo mokido te. Teketeke a, ho ko ayani wee gi kpakuto re ‘nga’ borore, si ziazia nga, gu kpakuto re arukuba kpotoko. Sidu, gu sasa-fugo Ziazia Kekeapai nga ga Charles B. Williams nayaa: “Gi kpakuto re narukuba borore.”—Ruka 22:19, 20.

[Gu kpiahe du ti kpewaraga 5]

Gu kpakuto adunga agbooro rogoho ya na gu imekakue re ni agu ahe daada ka rukuba gu kpoto Yesu naadunga na ingapai ya na kuba gu kureko nauka

[Gu kpiahe du ti kpewaraga 7]

Tingidapa Kpio Kristo natingida rani na pa gu bakere nyemuse Yekova Mbori gbiati Yesu Kristo ayuguhe