Agu Adee Nasa Ngbadu Yekova Si Ngi

“Yekova tumo[nga] pa gu sunge mangi mo, Yekova . . . fu[nga] mosoro foro rengbe arengba.”—RUTA 2:12.

1, 2. Wai rengbe ani ka gbia undo be wisigo ani gu kpiaapai nangia ga agu adee nasa ngbadu Yekova si ngi?

GUNDE ti Mbori asa adee ue i basapa manga gupai Faro azinahe fuyo i mangihe. Idapase asa namangibäri na akumba tipa marã ri moi gari raka ngbapai ka banda agu abamoi nadu ue nangia aYisaraere. Ruru berã gbiati umbasitise ti regbo kerepai aundo dee ri batasi dungu aboro na ki batasi ga Yekova mbedimbedi kumba ti gbe-bape kure kuriko. Idapase kuti Yekova Mbori gbiati nyemu dia aboro kugume afõngbadu dekurugbo yo nangia nagude ri fu gu yangada riahe nadu beri fu ga Mbori nebi. Agi apangbangaa re gbua nga bete gu kpiaapai du rogo Ziazia Kekeapai tipa agu adee nasa ngbadu Yekova si ngi.

² Ga Yekova berã tipa ngbatunga agu adee re gbiati gu maku ko afuhe fuyo nayugo gupai nga, gupai ngbaa ti Yekova gbe kisusi gu kurapai dunduko nga agu asino nga ga toro du be boro, nga gu sino kiipaha, angianga padu ni ni kumba watadu ni dee ya. Rogo gu zegino du areme, nga gu aboro anyakasa kina pa agu apai nga ga borose rogoho, pa peresa boro agu apai nga ga toro kumbatayo nikpakarakpakarapai. Ono boro rengbe arengba ka maapa gu gani apai nga ga toro kumbatayo gu kpakarakpakarapai re ki vura du vurũ, a wa dungu adee ayugoho nga aguyo nagunde ti Mbori du nibakere papara bange ga Mbori aboro areme. Ngbatunga agu adee re nawirika manga gu idapase, gu ruru berã, gu dia aboro kugume, na gu kura wene asino agu adee nadu mbata amangihe nga aguyo nanagunde ti Mbori du payo rogo Ziazia Kekeapai. Rengo ngaha nga, agu aKristano nga akumba naida aida a ka wirika manga agu asino ngbatunga agu adee nadu mbata re amangihe. Tipa ani rengbe ka ino wai rengbe ani ka mangaha wo bakere gbe, ani wisiginga gu tangaratangaraapai na agu afutufutuhe du tipa agu adee gumba yo payo ti tonatona gi kekepai re.—ARomo 15:4; Yakoba 4:8.

Agu Adee Nabasa Faro

3, 4. (a) Tipagine aSifera na Pua aká ti ni ka irisa sangba Faro ho ko azinahe ni ya i iimi agu awiri aYisaraere dunduko nangia akumbagude i kaa vunga yo? (b) Wai Yekova afu mosoro fu agu anasamba nadu ue re tipa gayo wingbaduse na tipa gayo gunde ti Mbori?

³ Ti regbo gu gumba ngbangaa abasapungbangaa amangihe tingbafuo Ue Vura Nga ga Zegino Nuremberg yo du Germani yo, dungu agu aboro i agbarasingbangaa fuyo mbiko i aimi dungu aboro, a’asaditiyo ka kusagoyo kusayo rogo gupai re nigumba gupai nga wee, gayopai nangiaha te, kina gu zinahe nangia ga gayo abarumbatayo gbua i aairisaha. Awere tie, oni ringbisinga ga agi aboro pai re na ga agu anasamba ue nangia aYisaraere, rimo guri angia Sifera na rimo gu kurari kingia Pua, nga agu adee naraki Ezipeta yo ti rago gu Faro i ayambanga rimoko ya ono nangia gu Faro nagasi be gbegbere sino. Mbiko wa Faro aagunde agunde be pa zugo bange aEbere, ko arũndiko ya agu anasamba nadu ue re bi gupai nga, agu akumbagude dunduko i kaa vunga yo nga aEbere, i du wa ka i imi yo. Ginipai agi adee re amangihe kuti gu kere zinahe re? Ziazia Kekeapai nayaa: “I amanga nga wa bakindo aEzipeto arugu yo na ni . . . [te], ono i [a]abatasa akumbagude [abatasa], i ki nye ni ungayo.” Tipagine agi adee re azeranga ti ni be gunde be aboro ya? Mbiko “i anagunde ti [ndikidi, NW] Mbori.” (Gu kekepai duni pigipigihe re, ani du pigihe. Gate 1:15, 17; Bambata Pai 9:6)

⁴ Ii, agi anasamba re afu tiyo ku be Yekova, na ko tigako ki du “[ni]vurakube” fuyo kini banda yo be ga Faro zinga. (2 Samuere 22:31; Gate 1:18-20) Ono ga Yekova maku adiganga kina kuti gipai re fu aSifera na Pua te. Ko afu vungu fuyo a i du na agude beyo nigayo mosoro. Na ko afu irisa fu agi adee re a nisa ko arimoyo si du nikekehe rogo gu Fugo ko gako toro adu kugiipa kehe tipa rikaaboro gizo kumbatayo naagedaha, baraho rimo Faro tigaha aima go ni kusayo rogo zegino.—Gate 1:21; 1 Samuere 2:30b; Asanza 10:7.

5. Wai dungu agu adee nga aKristano areme ayugo kina gu bangisa sino berã nadu ti aSifera na Pua, na wai Yekova nika fu mosoro fuyo?

⁵ Ya mo adee ho areme du wa aSifera na Pua? Ii, i kina ti ni! Rogo agarã nibasasa, zanga gunde, dungu kutu ngbatunga agu adee re natungusa gu pangbangaa nga ga Ziazia Kekeapai nga gu nabatasa aboro rogo agu aringara “ga bakindo rugute” azahe rogoho ti sunge tungusapai, ki ta mangaha were kini moi gayo ranirii watadu kini boro gayo raka ngbapai. (AEbere 11:23; Amokedi 5:28, 29) Mbiko gu nyemu Mbori gbiati nyemu akurayo nafõyo ngbaduyo yo, ngbatunga agu adee duna wingbaduse re, ambunga boro ni rugusi yo ti pe gu pangbangaa nga ga ga Mbori Kindo fu kura aboro te. Nisangbana gupai re, dungu agu adee nga aKristano nasovura kuti gu sogote na kuti gu rungosi aboro arungosi yo nani. (Marako 12:30, 31; 13:9-13) A wa si adu tipa aSifera na Pua, Yekova ima rugatiko na pa gu bawene mangaapai kisusi nga ga gu wiwingbadu adee re, na ko nika yugo gako nyemuse ayugo fuyo nibanda ko arimoyo nikekehe rogo gako “waraga unga yo,” ka i hipai dati digido gayo raka watadu digido gi zegino re.—AFiripoio 4:3; Matayo 24:13.

Namangibäri na Akumba Tipa Marã Mbata, Asa Ngbadu Yekova Si Ngi

6, 7. (a) Gini apai Raba ainihe tipa Yekova na tipa gako aboro, na wai gi inohe re asa ri ri mangipai? (b) Wai Fugo Mbori afu irisa fu Raba?

⁶ Rogo gu garã nangia 1473 Mbata fu Gaani Regbo, gu dee nanakodaba na akumba tipa marã rimori angia Raba, aaraka rogo gu ga aKanano bakporo nangia Yereo. Wa gopai ayugoho, Raba angia gu dee naima gia pangbangaa agu apai naamanga ti gu regbo re na ki rugutiri nani wenengai. Ho agu abamoi ue nangia aYisaraere aye ni ku kpuri yo tipa ka gbu be avurayo, ri aima rengba ka fura fuyo tipa ga aYisaraere iiriwo Gate Ezipeta yo na gu kparakpara futufutuapai namangi dunduko, wa agu apai re avura manga bakuru kusayo mbata fu susa agarã 40 vurũ! Ri aima rugatiri a na pangbangaa gu mbembedi adiabevura aYisaraere amangihe kuti agu aBakindo aAmoro nangia Siona na Ogo. Oni kparianga gupai gu inohe re asa ri ri mangihe. Ri aya fu agu abamoi re wee: “Mi [ima ino] ya Yekova [a]fu gi ringara re [afu] fu roni, . . . bambiko Yekova gaoni Mbori, ko nga Mbori du ngbangbaturũ ari yo na ku sende no a.” (Yosua 2:1, 9-11) Ii, gupai Raba ainihe tipa Yekova na gako mangaapai tipa aYisaraere afõngbaduriyo na si ki sa ri ri du na idapase kutiko.—ARomo 10:10.

⁷ Ga Raba idapase asa ri ri guari ka mangapai. Ri adi agu aYisaraere nangia “abamoirago [re] ku gume ni zereda,” na ki irisi agu arugute i afuhe furi tipa batasa ri ho aYisaraere azubo Yereo ni. (AEbere 11:31; Yosua 2:18-21) Anga kapa ho nga, gu mangaapai nangia ga Raba re ahe fu ngbarago fu Yekova te, mbiko ko asa gu bawiriki nangia Yakoba ko moi rimori ku pati ga Abarayama, nangia bakurea Mbori, tipa wa ka gi gari mangaapai re du nikpiapai tipa aKristano wiriki mangapai wa ri. Yakoba akepai ki yaa: “Ati kina wo a i asapu ngbanga fu Raba nangia degbua mbiko mangaapi bambiko ri adi a[bakedi]sunge ku gume, ki . . . [kusi] yo ku zegi yo ngba kura gene akia?”—Yakoba 2:25.

8. Wai Yekova afu maku fu Raba tipa gari idapase gbiati giasangbaa?

⁸ Yekova afu mosoro fu Raba rogo dungu agene. Bambataha nga, ko abatasi ri ngba iiriwo gene gbiati agu aboro naye ka gbu kpuri yo, nangia “ga bari aborokporo dunduko, na agu ahe dunduko nadu be ri.” Fuo gure, ko ambu agi aboro re i “nye kindi [niunga yo] ku dagba aYisaraere yo,” aYisaraere kini biyo wa kina gayo aboro ringara. (Yosua 2:13; 6:22-25; Pa Amotumo 19:33, 34) Ono anga agu apai ko amangihe furi re adigi kina kuti gure te. Yekova afu kura irisa fu Raba a nga ri da nitita Yesu Kristo. Nairiwo gu yuguyugu mangaapai nga ga weneringise nga ga nyemuse Mbori ayuguhe fu gu dee nadu mbata ninairisi kpiaahe ringara Kanana yo re!a—Atambuahe 130:3, 4.

9. Wai rengbe gu sino berã nangia ga Yekova tipa Raba na tipa kura agu adee nangia aKristano rogo bambata sa kama agarã ka ngarasa bete adee areme?

⁹ Wa kina Raba, bete adee ni aKristano, natona rogo bambata sa kama agarã ki da kina boro kuti gi gaani regbo re, aima mbu wasiwasi gene raka tipa wa ka i fu ngbarago fu Mbori. (1 AKorindo 6:9-11) Zanga kapa, bete aguyo asono rogo agu arago du wa kina gu nangia ga Kanana, nga gu rago wasiro amoipai rogoho na aboro kini bihe wa gupai ngba angba tipa aboro naamangaha. Wa si avura du wo, i a’aria gayo agene raka, mbiko gu idapase nafõngbaduyo yo mburuhe adu rii ruru inohe rogo Ziazia Kekeapai. (ARomo 10:17) Sidu, ani rengbe arengba ka ya tipa agu adee re wee ‘zee amanganga Mbori tipa yo, wa i ayamba ko nigayo Mbori te.’ (AEbere 11:16) Nairiwo gu irisa ko afuhe fuyo re!

Gu Dee Mbori Afu Maku Furi Tipa Gari Ruru Berã

10, 11. Gini apai nadu dagba Nabara na Davide nasa Abigaira ri guari ka mangapai sani?

¹⁰ Dungu gu ruru adee nadu mbata anayugo gu sino nga ga ruru berã ngba iiriwo agene, na kingia agu aboro nanafu undo fu ga Yekova aboro. Dee sa dagba ngbatunga agu adee re angia Abigaira, nangia dia gu kumukokumuko Yisaraere rimoko angia Nabara nadu na bakere dagbangua beko. Ga Abigaira ruru berã afu bee ka batasa ga Nabara aborokporo na ki za Davide, nangia gu kumba Mbori aima sia ko tipa ko zogo aYisaraere gizo, ko he gbebape kure kuriko. Ani rengbe arengba ka gedapai tipa Abigaira rogo gu pangbangaa i akehe rogo 1 Samuere kapita 25.

¹¹ Gu pangbangaa re atona wa gere, Davide gbiati agu akumba nanapeka fuo ko azi bataya mbembedii na ga Nabara rimbasa anyaa, nga agu anyaa i aabanda ra uru na yuru zanga sanahe tipa Nabara tumo fuyo, ono i aabanda ra rogo weneringise fu gi kurayo nangia Yisaraere re. Ho ga Davide riahe aambeda ni ka nyasa, ko akedi paranga akumba bawe koyo du Nabara ni tipa ka hõ riahe beko. Ti gi regbo re, si angia mamu fu Nabara ko yugu gako tambuahe fu Davide na ka fu irisa fuko niga Yekova mbedimbedi boro. Ono tie, Nabara amangi gupai nadu kia ti gure. Rogo zinga, ko asenge Davide na ki do gu paranga akumba ko akedi yo re i ga na kina kubeyo. Ho Davide agi gipai ni re, ko adungura gako akumba 400 na aũvura beyo kini ngbe fuyo kumbatayo ka ndu ka irabape. Abigaira agi pa gu kere mangaapai kumbaari amangi agi aparanga re nani, fuo gure, ri kini mo ka guari niipo na nitatamana ka zungodi Davide nikeda ri dungu aũngbaa fuko. Na fuo gure, kina boro ri nitiri kini mo ka guari ka ndu fuo Davide.—Averesi tona ti gu 2 he ki da kodi gu 20 he.

12, 13. (a) Wai Abigaira ayugu gupai nga, ri aduna ruru berã na kini ra na gori fu Yekova na fu gako mbedimbedi boro? (b) Ginipai Abigaira amangihe ho ri akaraga tiri ni ku kpuri yo, na wai apai amangi furi fuo gure?

¹² Ho Abigaira agbia Davide ni, gari kpezungodihe rogo umbasitise tipa mbupai, ayugupa gari bakere irisa tipa ga Yekova mbedimbedi boro. Ri aya fuko wee: “Yekova anyakasa ngbatunga gi gbia [anyakasa] bambiko gi gbia naso gu vura nga ga Yekova,” na kini gbia gupai kuti ni nga, Yekova amaa Davide amaa nibarumbatayo fu aYisaraere. (Averesi tona ti 28 ki da kodi 30.) Ti kina gu bangisa regbo re, Abigaira ayugu bakere wingbaduse niya ri fu Davide wee ka ko akaraganga tiko ngba gu gene irabape ko andu ngbaha re ya, ko nika gbebape kure kuriko. (Veresi 26 gbiati 31) Ga Abigaira umbasitise, bakere irisa, na ruru berã asa Davide ko berẽ ruru berã berewe. Ko akaragapai niyaa: “I sámbua Yekova, ga aYisaraere Mbori, nga gu ko [nikedi] ro areme mo ye ka gbia re! Maku dú foro tipa ga tatamana, maku dú foro [za] re areme ti uka kure, naza re ti ira bape re ni tire!”—Veresi 32 gbiati 33.

¹³ Fuo Abigaira karaga tiri ku kporo yo, niwingbaduse, ri aida ka fura fu kumbaari tipa gari gamahe fu Davide. Ono tie, ho ri abi ko ni, ko “[aima kpi] imekakue bakere [gbe].” Sidu, ri apidi ko daho buda azia ni bangiriko ri kini mo ka gumbapaha fuko. Wai ko akaragapai sani? Fuo gia ko ho, rago agbere tiko kisusi, si ki sa ko nikaza, nga gu ngbatunga kaza nasa kpoto boro si yosora. Fuo susa arame bawe, Mbori ki imi ko. Ho Davide agi pakpio Nabara ni, ko asana Abigaira singia ri na nyemu ka diako nikumbaari, nga gu dee wa gopai ayugoho, Davide anabi ri nibawene sino dee na ki duna bakere irisa koyo du ri ni. Ri aidi nani.—Averesi tona ti 34 ki da kodi 42.

Oni Rengbe ka Du Wa Abigaira?

14. Gini asino Abigaira rengbe ani ka du na nyemu sonosaha nibakerehe?

¹⁴ Oni, nga akumba gbiati adee, oni nabi bete asino ti Abigaira nga gu oni aida ka sonosaha nibakerehe? Isoke oni vura du na nyemu ka mangapai rogo tatamana na rogo ruru berã ho kpakarakpakaraapai akura ni. Watadu oni naida kaa fura ngba zezeredi gene na ka fura na ruru berã ho du rago ni pati roni zanzika be agu aboro duna zinga. Kangia wo oni aidaha, tipagine ka oni afunga kpee ti ni fu Yekova tipa gupai re ya? Ko nakidohe ka fu tatamana, rugatinapai, na tandu berãpai fu agu aboro dunduko nye kuti “sána he ni idapase.”—Yakoba 1:5, 6; Asanza 2:1-6, 10, 11.

15. Ti regbo gini apai duhe gbe ninyanyakipa pai tipa agu adee nga aKristano niyugu agu asino nangia ga Abigaira?

¹⁵ Ngbatunga gu wene asino re na nyanyakipaha gbe tipa gu dee adunga kumbaari ti idapase na ri ya, watadu airisanga agu arugute nga ga Ziazia Kekeapai ya. Isoke si vura du nga ko nambira buda bakere gbe. Ani na gu maabangirise nga, ngbatunga agu akumba re a’aria gayo agene raka a’aria. Mbiko dungu kura akumba aima mangaha wo, dedede mbiko gu zezeredi sino, gu bakere irisa, na mbiko gu iriiri mangaapai nga ga adiayo.—1 Petero 3:1, 2, 4.

16. Ka kina gini apai vura du tipa dee kporo, wai si aida gu dee nga Kristano yugu gupai nga, gari pagume dagbari na Yekova ni gupai kiipaha gbe kisusi kura apai dunduko?

¹⁶ Ka oni vura kaa hi kina gini ngbatunga fudifudiapai kporo, oni tingidi gupai nga, Yekova gu du kinaho ti aregbo dunduko tipa ka songoda roni. (1 Petero 3:12) Sidu, oni mangi asadatise kakaka ka nyakasa tironi rogo toroyo. Oni kparikpee fu Mbori tipa ko fu tatamana fu roni gbiati zerangbaduse. Ii, oni mbedi gbe na Yekova susi gu nidu mbata rogo gu gene nga ga wisigo Ziazia Kekeapai dedede, kparakpee, berãkurii agu apai nga ga toro, na kodatise na akuaroni aKristano. Ga Abigaira nyemuse tipa Mbori na gari sino berã tipa gako mbedimbedi moyambu agberanga be ga kumbaari sino nga ga bi apai ngba gu gene nga ga borose te. Ri amangipai rii mburu gu ruru arugute adunga ngburungburu ya. Zavura rogo gu kporo du kumba rogoho nigu ga Mbori moyambu nga kpiapai, gu dee nga Kristano ima rugatiri na gupai nga, si naida ri mangi asadatise nyanyakii ka sonosa tiri rogo toroyo na ki nye kuti ni. Rengo ngaha nga, kumbaari nga gu boro du gu sunge beko nga ka ngera fuo ri rogo toroyo na ka ye na ahe furi, ono niyangaraha, si naida kina ri ‘mangipa gari bata nitiri kini gunde na kini kio.’—AFiripoio 2:12; 1 Timoteo 5:8.

Ri Adi gu “Mosoro [Nga ga] Nebi”

17, 18. (a) Gini ngbatunga asada nga ga idapase ninaamanganga dedede ya i a’asadi gu dekurugbo nangia boro Sarefata nani? (b) Wai gu dekurugbo re akaragapai sa gu sanahe Eriya asanaha, na wai Yekova afu mosoro furi tipa gari mangaapai?

¹⁷ Gu gene Yekova angere ngbaha fuo rungorungo dekurugbo ti rago gu nebi nangia Eriya, nayugo gupai nga, ko nabi agu aboro nasongoda ndikidi irisombori na kikii payo, nga agu aboro nafu tiyo ka manga gupai nibeyo si aida i mangihe na ka fuka ahe ka songodaha nani. Mbiko gu gbanga ugure nadu ti rago Eriya, dungu aboro naakoba be gomoro, nga gu nakodi gu dekurugbo naaraka Sarefata yo gbiati wiiri nangia kumbagude. Kina boro ho i ambedi ni ka rita gayo yangara riahe, geno ada fuo yo ku kporo, nangia gu nebi nangia Eriya. Ko asana gu dekurugbo re na gu sanahe aboro naasananga ha dedede ya. Wa ko avura ino pa gu rungo gu dee re adu rogoho, ko asanari ri “mangi wiri riahe” fuko na gu yangada nzeme gbiati gu fuo ngungo nanye beri. Ono ko agbia gupai kuti ni nga: “Bambiko wo poi Yekova nga ga aYisaraere Mbori, ‘Gu ngungo du pere yo si anyasa nga te, [na] gu nzeme du kambu yo si apaya nga a te, dati kina gu rago Yekova ka keda mai ku auru kpotosende.’”—1 Abakindo 17:8-14.

¹⁸ Wa ka i aya oni nangia gu dekurugbo re, wai ka oni akaragapai fu gu nebi re kuti gu sanahe ko asanaha re nga gu aboro naasananga ha dedede ya? Gu dekurugbo nadu Sarefata yo re, fuo ino ri gupai ziazia nga, Eriya angia ga Yekova nebi, ri “[a]ndu ki mangi he [a] wa Eriya agumba ha.” Wai Yekova akaragapai sa gari mangaapai nga ga dia gako nebi kugume? Ngba iiriwo gene, ko afu riahe furi, tipa wiiri, na tipa Eriya ti regbo gu ugure namangi re. (1 Abakindo 17:15, 16) Ii, Yekova afu gu “mosoro [nga ga] nebi” fu gu dekurugbo nadu Sarefata yo, wa ri avuranga du ni boro Yisaraere vurũ ya. (Matayo 10:41) Wiri Mbori afu irisa a fu gi dekurugbo re ho ko afura ni tipa ri nikpiapai fu agu aboro naadunga na idapase tiyo ya nadu Nazareta yo, nga gu gbata ko asono rogoho.—Ruka 4:24-26.

19. Rogo gini agene dungu agu adee nga aKristano areme ayugo gu sino du wa ga gu dekurugbo nadu Sarefata yo, na wai Yekova aberã tipa ngbatunga agi adee re?

¹⁹ Areme a, dungu agu aKristano nga adee nayugo gu sino du wa ga gu dekurugbo nadu Sarefata yo re. Nikpiapai, rogo aposo dunduko, zanga gbangbati, agu wirinarani ni adee nga aKristano, du dunguyo nga rungorungo aboro na ki duna aborokporo beyo i angera fuo yo, naadia agu ababiapai ninaata ata kugume na adiayo. Gu kurayo naayamba agu awirina natungusapai ti aregbo dunduko rogo gayo dagbarago ku kpuyo yo tipa i ngba be riahe na yo, kini undo airazingo, watadu ngba kura agene ka fu tiyo ka undo sunge na ka fu agu ahe du beyo si songodi gu sunge nga ga Kindo. (Ruka 21:4) Ya mo Yekova rugutiko na pa agu apai awirina ambu paha tipa ka undo akurayo re? Ii ko ima inoho nirengo! Mbiko Ziazia Kekeapai nayaa: “Mbori ni iraira ko te. Bangiriko ago nga ti gaoni sunge te, na ti gu nyemuse oni ayugu ti rimoko, na ti gu pai oni amangi fu gako aboro, a wa oni namanga pa yo awere kindi.”—AEbere 6:10.

20. Ginipai ani ka sakapai tipaha rogo gu papara kekepai naye fuo gere?

²⁰ Rogo bambata sa kama agarã, dungu agu adee nanagunde ti Mbori aduna mamu beyo ka ndusunge fu Yesu na fu gako amokedi. Rogo gu papara kekepai naye fuo gere, ani nika sakapai tipa wai agi adee re aye na ngbarago fu Yekova, na ani nika sakapai a tipa gu kpiapai nga ga agu adee du areme namangasunge fu Yekova na ngbaduyo yo dunduko, zavura ho du yo ni rogo kpakarakpakaraapai vurũ.

[Gu rukutu kekeapai du bandu kpewaraga yo]

• Wai agi adee du rimoyo kusende re asa ngbadu Yekova si ngi?

• Sifera na Pua

• Raba

• Abigaira

• Gu dekurugbo nadu Sarefata yo

• Wai rengbe pa berã ani kurii gu kpiaapai agi adee re amoihe ka undo kina boro rani nitirani? Oni yuguhe na kpiapai.

[Asanahe nga ga wisigopai]

[Gu kpiahe du ti kpewaraga 23]

Dungu agu adee nagunde ti Mbori aima mangasunge fuko “ga bakindo rugute” ki vura zahe ti mangasunge fu Mbori vurũ

[Gu kpiahe du ti kpewaraga 24]

Tipagine du Raba ti ni niwene kpiapai nga ga gu boro nadu na idapase?

[Gu kpiahe du ti kpewaraga 24]

Gini asino Abigaira ayuguhe oni aida ka wirika mangaha wa ri

[Gu kpiahe du ti kpewaraga 26]

Dungu agu adee nga aKristano areme nayugo gu sino nadu ti gu dekurugbo nadu Sarefata yo