Oni Bipa Kiopa Gaoni Gamunihe Nga Unga Nirurupai
‘Kure Kristo nagirisa sangbakpotoraniyo be kpikpi mangimangi apai, tipa ani mangi ziazia sunge fu unga Mbori.’—AEBERE 9:14.
1. Gini gopai duho nayugo gupai nga, ani nabi unga na kikiipaha?
KA I sana roni tipa oni moi geno gaoni unga, gine kangia gaoni karagapai? Ani nabi unga na kikiipaha, gu nga gaani na ga kura aboro. Nikpiapai tipa gupai re, ani rengbe ka ndu fuo munganga ho ani awoka ni watadu kaa ndu fuo amunganga dedede i naawisigo kpotorani. Ani naida ka nye niunga rani na kpotorani kidu niwasawasaha. Zavura gbinza aboro na gu gbarigbariyo, dunguyo aidanga ka kpi te; i naida ka nye nikina ungayo kindi.
2, 3. (a) Gini dingisoro du ani nani Asanza 23:22 anyakasapaha? (b) Wai rimisi Mbori tiko kurogo gu dingisoro du ani rogoho du paha rogo Asanza 23:22?
2 Pa wai oni abi unga, si namangapai amanga kuti gaoni pagume dagbaroni na kura aboro. Nikpiapai, Fugo Mbori naruga rani niyaa: “Mo dege turo fu bamo navungu ro, ka mo nipayasi nga namo ho ri nagbinza ni ya.” (Asanza 23:22) Pa ‘dega’ boro tuni nakoda kura apai susi gu gbua nga ka gia afugo; rogo gi sanza yo re nga ka giapai na ki mangihe. (Gate 15:26; Pa Fu Rugute ni Ue he 7:12; 13:18; 15:5; Yosua 22:2; Atambuahe 81:13) Gini ndupai Fugo Mbori afuhe tipa dega mo turo fu avunguro? Anga si gbua mbiko gupai nga bamu na namu ima sona tiro watadu mbiko i inihe kisusi ro te. Gu ndupai si ayugoho nga mbiko i “navungu ro.” Gu kura sasa-fugo Ziazia Kekeapai nasafugo gi veresi re nga: “Mo dege turo fu bamu nga gu boro nafu unga foro.” A wa du sino aboro, kangia oni nabi gaoni unga na kikiipaha, oni bihe abi nidingisoro ka mangapai fu gu boro gu unga re aenge tini.
3 Rengo ngaha nga, kangia ndikidi Kristano nga oni, oni nabi Yekova nigu yangara boro gaoni unga aenge beni. Oni ‘ho ti ni’ na ‘ni ungaroni,’ na kini ‘ta’ na kini mangiapai nigu boro duna berã; na ki rengbe ka berãpa raka kumbatayo na ka sogimaha a, kodihe na pa nyenye unga. Oni namanga agu apai re dunduko mbiko ko. (Amokedi 17:28; Atambuahe 36:9; Batungusipai 3:11) Nimanga ani pai na ngbanyaa kuti Asanza 23:22, ruhe aru ani ‘degeturani’ kuti Mbori ki gisangba ko, kidu na nyemu kakuti gako bipai na kini mangipai na ngbanyaa kuti gako bipai tipa raka kuba gu nga sia gu bipai tipa raka dukia ti gure.
Oni Yugu Irisa Tipa Unga
4. Ti tonatona ga aboro raka, wai gu ngbangaa du tipa irisa unga atona?
4 Ti kina tonatona ga aboro raka auru kpotosende, Yekova aima gumbaha ziazia ya ko ambunga aboro i naamangasunge na unga (watadu ka gbarasa paha) a wa i aidaha te. Mbiko gu kere kpihe nadu kpoto Kaina yo, ko aguari ki imi Ebere nangia wirinako zanga manga wirinako gbegberepai kutiko. Ya mo oni naberãha ya Kaina aduna rengo beko ka manga gu diaberã re tipa unga? Mbori abinga ha wo te. Ko ayambu Kaina ko karagapai tipaha. Ko asanako ki yaa: “Gini pai mangi mo? Kure wirinamo nakpara fere sande.” (Bambata Pai 4:10) Oni kparia gupai nga, kure Ebere auru kpotosende arukuba gako unga, nga gu unga wirinako adigisihe ngbaome niagbaha, na si aakpara fu Mbori tipa ko iribapehe.—AEbere 12:24.
5. (a) Gini zahe Mbori afuhe ti rago Noa, na si adu fu ada? (b) Rogo gini gene gu zahe re angia nyanyakipa tonapai tipa ka manga kurapai?
5 Tingbafuo Ime Akangbii, aboro gbua muambe natona vovo raka berewe. Rogo gu tingidapai nadu tipa aboro dunduko, Mbori ayugu dungu apai tipa gako bipai tipa unga na kure. Ko ayawee aboro rengbe arengba ka ri pasio anyaa, ono ko afu gi zahe re: “Agu ahe dunduko du ni unga ha nawo awo si adú ni riahe fu roni; mi fu he fu roni a wa mi afu iwo akpepasio dunduko a. Ono oni ari nga gu pasio du kure rogo ho nga unga ha te.” (Bambata Pai 9:3, 4) Bete aYuda nasakarogo gupai re ya gupai Mbori azahe ti ni nga ka aboro ringa pasio watadu kure gu nyaa du kindi ni ungaru ya. Ono tie, kusa fuo susa regbo, si adu ziazia nga, gupai Mbori azahe herẽ ti ni angia pa ri boro kure ka songoda gani raka nani. Kurii gure, gu ga Mbori andiko ko arũhe ki fuhe fu Noa angia nyanyakipa tonatona mangapai Mbori atonaha tipa ka manga Gako kikiipa ringbisapai nga gu du tipa kure, nga gu ringbisapai si adu nga si nika zaka gene fu aboro i rengbe ka gbia nyenye unga.
6. Wai Mbori anyakasipa gako bipai kungba Noa tipa gu unga nga ga aboro?
6 Mbori aafura kindi niyaa: “Mi ki iri bape kureroni ni rengo; nga ga ungaroni; mi aira bape he ti anya dunduko, na ti aboro a; mi aira bape ga gu boro unga ti kina wirinani. Gu ni ka imi boro, kina boro nikaimo ni; bambiko Mbori amangi boro ni kpiako.” (Bambata Pai 9:5, 6) Rogo gi nyanyakipa tingidapai Mbori agumbaha fu ngbatunga aboro dunduko re, oni rengbe tie ka bi gupai nga, Mbori nabi kure boro niguhe narukuba gani unga. Bakusiahe nga gu boro nafu unga fu boro, nga gu kure arukubaha, sidu, si aidanga kura boro digisi gu unga re beni te. Ka boro imi kurani wa gu Kaina amangihe, Bakusiahe na rengo beko ka ‘irabape’ gu unga re ti gu baimi boro re.
7. Tipagine si aida ti ni ani du na nyemu gu nyanyakipa tingidapai Mbori agumbaha fu Noa tipa kure?
7 Ni gi nyanyakipa tingidapai Mbori afuhe re, ko aaruga aboro i he ingamangasunge na kure. Oni abakinga bangironi tipa ndu gupai ko afu agu arugute re ti ni? Na fuo duhe tie wo, gine nangia ga Mbori bipai tipa kure? Nirengo, karagapai sa gi sanahe re nakoda nyanyakipa yugopai kisusi du rogo Ziazia Kekeapai. Si ti kina boro tarã gu pangbangaa nga ga aKristano, wa dungu akanisa navura diaberã ka basaha abasa vurũ. Gine nga gu yugopai re, na wai si akoda gaoni unga, adiaberã, na mangaapai kurogoho?
Wai Si Aida I Mangisunge na Kure?
8. Rogo ga Mose Ndiko, gini ngbanda Mbori amoihe ti mangasunge na kure?
8 Yekova afuku futufutuapai tipa unga na tipa kure ho ko afu aNdiko ni fu aYisaraere. Wa ko aafuhe, ko amangi kurapai berewe rogo digiso gako ringbisapai. Oni vura ino gupai nga, gu Ndiko re aida aboro naafuka agamahe fu Mbori, ngbatunga gu nadu wa zende ahe, anzeme, na imekakue. (Pa Amotumo 2:1-4; 23:13; Pa Geda Aboro 15:1-5) I anatumo atumo na anyaa a. Mbori aya tipa agu amotumo nangia anyaa wee: “Unga ahe du rogo kure he yo; mi fu he fu roni oni nifu he ri bamotumo ka manga pa dada ingapai tipa mbisimoroni; bambiko kure namanga pa dada ingapai tipa unga. Si du mi agumba ha [ti ni] fu awiri aYisaraere ki ya, Ka boro dagba roni yo ri nga kure wa sa ya.” Yekova agbia gu kurapai kuti gure ya, kangia boro ho nga bamangi-anyaa, watadu basopobino, ka imi nyaa tipa ka ri ru, si aniidi ni uka kure ru na ki dadihe na nvutu. Kpotosende nga gbada tipa ndu Mbori, sidu pa uka boro kure ku auruhe nayugo gupai nga, ni nakaraga unga fu Bafu-Unga.—Pa Amotumo 17:11-13; Yesaya 66:1.
9. Gine nangia gu yangara gene tipa mangasunge na kure du paha rogo ga Mose Ndiko, na gini ringbisapai nadu tipaha?
9 Gu ndiko re angianga kungbo gu mangaapai nga ga pambori zanga nyanyakipa pai du rogoho tipa rani te. Oni kparia ndu gupai si aidanga ti ni aYisaraere ri kure ya? Mbori ayaa: “Si du mi agumba ha [ti ni] fu awiri aYisaraere ki ya, Ka boro dagba roni yo ri nga kure wa sa ya.” Gine nangia nduhe? “Mi fu he fu roni oni nifu he ri bamotumo ka manga pa dada ingapai [nani] tipa mbisimoroni.” Oni nabi gupai nga, gi fugo re nakata mange tu boro yo tipa ndu gupai Mbori aza Noa ti ni ya ka aboro ringa kure ya? Bakusiahe asia kure ka bihe na nyanyakipaha kuari gbe, kini bandaha tipa bangisa mangasunge nani nga gu gene rengbe ka batasa dungu aboro. Si adu nga kure nika manga nyanyakipa sunge rogo dada ingapai. Sidu, tii ga Mose Ndiko, gu yangara gene sa Mbori aidipaha tipa mangasunge na kure angia rii bamotumo tipa ka dada ga aYisaraere ingapai nani, nga aguyo naagbata gene tipa Yekova mbupai fuyo.
10. Tipagine kure anyaa arengbanga ti ni ka sa Mbori ko mbupai fu aboro rogo apai dunduko ya, ono gini tingidapai agu amotumo i anafuhe kuti sangba ga Mose Ndiko anafuhe fu aboro?
10 Gi giarogopai tipa kure re ni gupai du tutuurũ kusayo ti gu pambori nga ga aKristano te. Wa gu mokedi nangia Pauro aafura tipa gi papara Ndiko Mbori ambakadipai tipaha re, ko akepai ki yaa: “I nagirisa ahe ni dungu he ni kure, wa du pa rugute, ka i auka nga kure ya, ka hepai adu nga te.” (AEbere 9:22) Pauro aima gumbaha ziazia ya agu amotumo i aidaha re asanga aYisaraere nirengberengbe aboro, watadu ni agu aboro zanga ingapai te. Ko akepai ki yaa: ‘Ono rogo agu amotumo re si anasa yo i naatingidapa ingaapai na agarã nibasasa. Bambiko kure abaabagara na ameme arengbanga ka dia ingaapai kusayo te.’ (AEbere 10:1-4) Wa si avura du wo, agu amotumo re aduna undo kina ti ni. Si anatingida aYisaraere na gupai nga, i angia aboro ingapai kidu rogo zingo tipa guhe ka i gbiaha si ki sa Mbori ko mbupai fuyo rogo apai dunduko. Ono tie, kangia gu kure nanarukuba gu unga nga ga anyaa arengbanga ka dada gu ingapai nga ga aboro naabaha te, ya mo kura kure adu kinaho ka dadihe?
Gu Mbakadapai Nga ga Bafu-Unga
11. Wai ani aino gupai nga, agu amotumo nangia kure anyaa i anatumo nani aayugopa kurapai?
11 Gu Ndiko re aatabee nzunzu kuti guhe nangba gbe tipa manga gupai Mbori akpinyemuhe. Pauro asanahe ki yaa: ‘Tipagine tie i afu rugute ti ni?’ Ko akaragapai ki yaa: “I amoi he ku ri he mbiko yugo ingaapai, da kina ho gu ngbatunga ka ye ni i akido pa ko fu Abarayama. I afu rugute vurube amaraika ku ngba azarõ [nangia Mose].” (AGaratio 3:19) Teketeke wa kina gure a, Pauro akepai ki yaa: “Rugute . . . [angia] kirima gu wene apai nikaye, angia nga ndikidi kpiaha ya.”—AEbere 10:1.
12. Nibipa kure, wai rengbe ani ka bi ga Mbori ringbisapai si nimangi?
12 Nigurusigurusipai, ani tingidinga gupai nga, ti rago Noa, Mbori arũndiko ya aboro arengbe arengba ka ri pasio anyaa tipa ka raka, ono si aidanga i ri kure te. Fuo bete regbo kusa, Mbori ayawee “unga ahe du rogo kure he yo.” Ii, ko asia gupai nga ka bi kure niguhe narukuba unga na ki yaa: “Mi fu [kure] fu roni oni nifu he ri bamotumo ka manga pa dada ingapai [nani] tipa mbisimoroni.” Ono tie, si adu nga, gu kura wenepai kinaho kumbatayo Mbori nika mangaha rogo gako ringbisapai. Ga Mose Ndiko aayugopa gu weneapai nadu kumbatayo naaye. Gini apai nangiaha?
13. Tipagine kpio Yesu adu ti ni ninyanyakipa pai?
13 Gupai nzunzu si arukubaha adu tipa kpio Yesu Kristo. Oni ima ino gupai nga, i arungosi Yesu na ki banga ko kuti ngua. Ko akpi wa gu boro nakuo ndiko. Pauro akepai tipa ko ki yaa: ‘Ho ani anyakanga ni ya, Kristo akpi ti ringbisiringbisi regbo tipa rani nga azangasinombori. Mbori amoi dezire gako nyemuse fu rani nikpi Kristo tipa rani mbu rani kindi ni aboro ingaapai.’ (ARomo 5:6, 8) Nikpi Kristo tipa rani, ko afu motumo tumorii ka dada gaani ingaapai nani. Gu tumorii re nga tarã gu pangbangaa nga ga aKristano. (Matayo 20:28; Yoane 3:16; 1 AKorindo 15:3; 1 Timoteo 2:6) Gine nakoda gipai re na kure gbiati unga, na wai du gaoni unga nirimisirimisihe kurogo gipai re?
14, 15. (a) Wai bete asasa-fugo AEfeso 1:7 anyakasapa pakpio Yesu? (b) Gini rengo rengbe aboro ka gu riihe du rogo AEfeso 1:7?
14 Gu kura akanisa nanyakasa gupai anyakasa nga Yesu akpi, agu aboro du rogo agu akanisa re kini gumba ngbatunga agu afugo du wa “Yesu akpi tipa re.” Ani makianga wai bete asasa-fugo Ziazia Kekeapai asa sangba AEfeso 1:7: “Mbiko ko na mbiko kpioko, si batasi yo rani ti ni, nga ka dia gaani tindiko kusayo tirani.” (The American Bible, gu sasaha nga ga Frank Scheil Ballentine, 1902) “I di pai kusayo rirani mbiko kpio Kristo, na i ki mbupai fu rani tipa gaani ingaapai.” (Today’s English Version, 1966) “Rogo Kristo yo na mbiko gu gako unga ko atumo nani, si du zaki yo rani ti ni, nga gu zaka rani du rogoyo nga i mbupai fu rani tipa gaani ingaapai.” (The New Testament, gu sasaha nga ga William Barclay, 1969) “Mbu yo pai fu rani ti gaani ingaapai na ki zaki rani mbiko kpio Kristo.” (The Translator’s New Testament, 1973) Oni rengbe ka bi gupai nga, rogo ngbatunga agu asasa-fugo re, i nanyakasapai rogoho tipa kpio Yesu. Bete aboro rengbe ka yawee, ‘Ono wa duhe nga kpio Yesu nirengo na nyanyakipaha, ginipai kpa koyo rogo agi asasa-fugo re?’
15 Ka pe rengo, kangia kina ngbatunga agu asasa-fugo Ziazia Kekeapai re du beroni zanga gu kuraha, oni rengbe arengba ka gurii nyanyakipa pai, na si rengbe ka umbasi gaoni giarogopaiyo tipa gu pangbangaa nga ga Ziazia Kekeapai. Ngbatunga agu asasa-fugo re nadada gu rengo du rogo AEfeso 1:7 rogo bambata kekehe rogo pa-Giriki du rogoyo nga “kure.” Sidu, dungu asasa-fugo Ziazia Kekeapai du kinaho nasaha nzunzu mbembedii kuti bambata fugoho, ngbatunga gu du wa gaani Ziazia Kekeapai rogo pa-Zande, si nayaa: “Bambiko tumori du fu rani rogo Kristo yo mbiko kureko vu rani ti tiandika, ku sangba gu ũkumuko yo nga ga Mbori undahe.”—Gu kekepai duni pigipigihe re, ani du pigihe.
16. Gine si aida pa fu yo “kure Yesu” tingidi rani na paha?
16 Gu sasa-fugo nga, “kureko,’ si na bakere rogoyo ti ni kini sa rani ani berẽ kura apai. Kura apai adu kinaho si aidaha susi kpio, zavura kpio gu rengberengbe kumba nangia Yesu vurũ. Ko adigisi gupai ga Mose Ndiko aayugopaha kumbatayo, gupai gbe nanamanga rogo Uru Dada Ingapai. Rogo gu kparakpara uru re, i anatumo na agu anyaa ga Mose Ndiko aida i tumo na ami. Fuo gure, gbiamotumo anidi kurera ka ndu nani kurogo Ziazia Ba Kisusi nanidu rogo bamburokoo nga ga irisombori watadu yekaru yo, yo ko anifuhe ni fu Mbori, si kidu wa fu yo ho barabangiri Mbori.—Gate 25:22; Pa Amotumo 16:2-19.
17. Wai Yesu adigisi gupai nadu rogo Uru Dada Ingaapai niyuguyuguhe kumbatayo?
17 Yesu adigisi gupai gu mangaapai Uru Dada Ingaapai aayugopaha kumbatayo a wa Pauro asakirogoyo. Nibambatapai, ko ayawee gbiamotumo anarimo kutii yekaru yo kurogo Ziazia Ba Kisusi bara sa rogo garã na kure ‘ka tumo nani tipa tiko, na tipa gu ingaapai nangia ga aboro.’ (AEbere 9:6, 7) Na ngbanyaa kuti gupai nanamanga rogo Uru Dada Ingaapai, fuo i zingisi Yesu ki fu gu unga fuko nga ga toro, ko andu kina boro ku ngbangbaturũ yo. Nitoro, zanga ko du na gu kpoto nga pasio na kure, ko arengbe ka kura kubarabangiri ‘Mbori tipa rani.’ Gine ko afuhe fu Mbori? Si angianga guhe ka i bihe abi nibangirise te, ono si angia nyanyakipa he. Pauro aafura kindi niyaa: ‘Ho Kristo ayeni ni gbiamotumo, ko arimonga na kure ameme na kure awiri abagara te, ono ko arimi na kureko, kurogo ziazia ba bara sa kindi, ki gbia nyenye tumorii tipa rani. Wa duhe nga kure ameme na kure abagara anagiriso aboro agiriso nibetehe, angbatika kure Kristo ngbaa ti ga anyaa, nga guko natumo nitiko fu Mbori rogo nyenye toro yo zanga biriko, sidu, kureko nika giriso gaani sangbakpotoyo be kpikpi mangimangi apai, tipa ani mangi ziazia sunge fu unga Mbori.’ Ii, Yesu afu geno gako kure fu Mbori.—AEbere 9:11-14, 24, 28; 10:11-14; 1 Petero 3:18.
18. Tipagine si aida gu gumbapai du rogo Ziazia Kekeapai tipa kure du ti ni ninyanyakipa pai areme tipa aKristano?
18 Gi rengo naye be Mbori re naundo rani ani girogo gu iiriwopai Ziazia Kekeapai agumbaha tipa kure, ndu gupai Mbori abihe ti ni wa gu ko abihe re, na wai si aida ani bihe tigaani, na ndu gupai si aida ti ni ani irisi agu arugute Mbori nafuhe tipa mangasunge na kure. Ho oni ka geda agu abuku ni du rogo gu papara Ziazia Kekeapai nga ga aKristano i ake bambata fugoho rogo pa-Giriki, oni nika kura akura bara dungu aba si nifura tipa kure Kristo. (Oni bi sanduki.) Agi apai re nafura ziazia ya si naida aKristano dunduko ‘idipa kure Yesu.’ (ARomo 3:25) Pa vu Mbori rani na ani ki gbia pazereda dagbarani na ko naye kina ‘mbiko gu kure [Yesu] nauka.’ (AKorosaio 1:20) Gipai re wo gbe tipa agu aboro Yesu amangi mokido na yo tipa i zogorago na ko ngbangbaturũ yo. (Ruka 22:20, 28-30; 1 AKorindo 11:25; AEbere 13:20) Kinawo a duhe tipa “bakere rimbasa aboro” areme, nga agu aboro nika bata ti regbo gu “bakere gberãngbi” naye na ki gbia ngbarago be nyenye unga rogo paradiso kpotosende. Ka pepai nisanza, i ima ‘zunda gayo arokoo rogo kure wiri kandoro.’—Yugoti 7:9, 14.
19, 20. (a) Tipagine Mbori adiberã ti ni ka maa ngbanda ti mangasunge na kure, na wai si aida ani berẽ tipaha? (b) Ginipai si aida ani du na nyemu inoho?
19 Si tie ziazia nga, kure niguhe du paha nikparakparaha bangiri Mbori. Kinawo a si aida si du bangirani. Bakusiahe, nga gu boro naberã aberã tipa unga, ko na rengo beko ka maa ngbanda tipa gupai rengbe aboro ka mangaha na kure. Rogo agu apai ko aberãha tipa gaani raka, ko akpara kure tipa ka mangasunge nani ngba nyanyakipa gene sa, nga gu bangisa gene nasa aboro i gbia nyenye unga. Gu gene re adu tipa gu kure Yesu duna nyanyakipaha. Nga gu tambuahe rengbe ani kadu nani mbiko Yekova Mbori amangi wenepai tipa rani nimanga ko sunge na kure Yesu si batasi rani! Na nga gu tambuahe si aida ani du nani a fu Yesu tipa uka ko kureko nimotumo ka tumo rani nani! Nirengo, ani rengbe awere tie ka giarogo agu afugo nunga gu mokedi nangia Yoane agumbaha ki yaa: “Gu ko nakpi nyemu rani, nizundu rani be gaani ingaapai ni kureko; ani du ni aboro ngbi ki du ni aboromotumo fu gako Mbori nga Bako; taarimo du fu ko na tandu nye anye kindi. Amina.”—Yugoti 1:5, 6.
20 Gu gaani Mbori nga iratatamana rogo apai dunduko na nga Bafu-Unga, ko aima duna pa gi sunge batasa aboro re bangiriko. Fuo duhe tie were, ani rengbe ka sanahe ki yaa, ‘Gini sangbanapai si aida gipai re mangihe na gaani adiaberã na gaani mangaapai?’ Gu papara kekepai naye fuo gere nika karagapai tipa gi sanahe re.
Gaoni Karagapai Nga Gine?
• Ginipai rengbe ani ka wirikaha tipa ga Mbori bipai tipa kure nibi gu pangbangaa du tipa Ebere na Noa?
• Rogo ga Mose Ndiko, gini ngbanda Mbori amoihe tipa kure, na tipagine?
• Wai Yesu adigisi gupai nadu rogo Uru Dada Ingaapai niyuguyuguhe kumbatayo?
• Wai rengbe kure Yesu ka batasa gaani raka?
GINI KURE RENGBE KA BATASA ABORO?
‘Oni bandatironi na agu akandoro ziazia toro asa roni ni ababandara, oni rigi ga Mbori kanisa nga gu ko angbehe nikure Wiriko.’—Amokedi 20:28.
“Gu susi asusa tie, si nga wa i nadi pai ri rani mbiko kureko, ani abáta abata be ga Mbori erã mbiko ko.”—ARomo 5:9.
“Oni adu nga na maabangirise te, ki zanga Mbori zegino. Ono awere rogo Kristo Yesu yo agu roni naturũ aturã mbata i mbedisi roni ni kure Kristo.”—AEfeso 2:12, 13.
“Mbori nga Bako akpi nyemu hibepai nye rogo ko yo; ka maa ngbanya dagba ko na ahe dunduko rogo ko yo a, ko nazeresi ahe mbiko kure gako wagiwagi ngua.”—AKorosaio 1:19, 20.
“Awirina, ani du na ngarã tigaani tipa rima ku rogo ziazia ba mbiko kure Yesu.”—AEbere 10:19.
“I atumo nga roni ni agu ahe nikagberã . . . be gu kungba apai oni agi ngba abaroni te; ono i atumo roni ni gu kikipa kure nga ga Kristo, wa gu wiri kandoro zerenge kpotoru azerenga, adu nga wiri he ti ru ya.”—1 Petero 1:18, 19.
“Ka ani ata rogo imarago, wa du ko rogo imarago, ngbanya du adu dagba rani, kure Yesu nga Wiriko ki nigirisi rani ti ingapai dũ.”—1 Yoane 1:7.
“Re mo are, na dia kitabu, ki niukua gu dikadika ahe du ti ni, bambiko i aimi ro, mo angbe aboro ni kurero fu Mbori dagba angbatungayo, na angbatunga afugoyo, na aboro, na arikaaboro dunduko.”—Yugoti 5:9.
“I aba bakitingbanga awirinarani ku sende yo, . . . I adi be ko mbiko gu kure nga ga Wiri Kandoro, na mbiko gu pai i agumba ni dezirehe.”—Yugoti 12:10, 11.
[Gu kpiahe du ti kpewaraga 10]
Rogo ga Mose Ndiko, Mbori afura yo ziazia ya ko namangasunge na kure ka vu aboro tipa gayo ingaapai nani
[Gu kpiahe du ti kpewaraga 11]
Dungu aboro rengbe ka bata mbiko kure Yesu