Ani Abatanga Mbiko Kina Mangapai Sa Te, Ono Mbiko Gu Weneringise Arẽnga Aboro Tipaha Ya
‘Oni abati mbiko idapase, mbiko mangapai te, gu boro ka abia tini.’—Aefeso 2:8, 9.
1. Wai du aKristano kia ti gu kura aboro dunduko nibipa gayo wene mangaapai wa du yo nibasasa, na tipagine duhe ti ni wa gure?
ABORO areme na bakere rukö tipa gu weneapai i amangaha, na dedede, i naa abiatise tipaha zanga keesa. Ono aKristano tigayo kia. I nane nyakasapai kisusi tipa gu weneapai i amangaha, zavura gu wene mangaapai du tipa ndikidi irisombori vurũ. Wa vura duhe nga, i na ngbarago be agu apai ga Yekova aboro amangaha wa du yo nibadona, i aperesanga pa gayo mangaapai wa du yo nibasasa kumbatayo rogo agi apai yo re te. I ima rugatiyo na gupai nga, rogo mangasunge fu Yekova, padu boro na wene ndu mangaapai nyakipaha kisusi pa gani wene mangaapai. Sidu, gu boro nika gbia nyenye unga ti yangara regbo, ni agbiaha, mbiko idapase gbiati be ga Mbori weneringise arẽnga aboro tipaha ya, ono angianga be gani wene mangaapai ya.—Ruka 17:10; Yoane 3:16.
2, 3. Gine Pauro asambuohe ti ni, na tipagine?
2 Gu mokedi nangia Pauro aima inopa gi rengo re wenengai. Fuo fuko kpee bara biata tipa zereda be ‘kiwe tii kpotoko yo,’ ko agbia ga Yekova karagapai nayaa: “Gimi undahe rengbe foro, bambiko gi tandu du ni mbakadimbakadi he ziazia rogo rungbura yo.” Pauro aidi ga Yekova diaberã niumbasitise ki yaa: “Mi asámbua he zaza ni ngbarago tie ti agu apai mi arungbura ti ni, ya gu ome nga ga Kristo du auru re.” Gu sino umbasitise nga ga Pauro duwa ka ani wiriki mangaha.—2 AKorindo 12:7-9.
3 Wa si avura du nga Pauro angia barikaka rogo manga gu sunge nangia ga aKristano, ko aima ino gupai nga gako wene mangaapai adunga mbiko gu kparakpara abirĩ nangia gako nitiko te. Nibayee sino, ko ayaa: “Pa re umba aumba susi kura ga Mbori aboro dũ, ono Mbori afu gi undahe fere re, mi tungusi pa gu gasigasi ũkumuko nga ga Kristo fu aGendiria.” (AEfeso 3:8) Anga gipai re nayugo gupai nga Pauro aakiisopa tiko watadu ko aduna rukö na kini berẽpa tiko niziazia boro kisusi kura aboro te. Ziazia Kekeapai nayaa: “Mbori naká fu aboro rekangose, ki nifu undahe fu agu yo naumbasi tiyo.” (Yakoba 4:6; 1 Petero 5:5) Ya mo ani napefuo ga Pauro kpiapai, kini berẽpa tirani niumbasitise ya parani kusende ti ga gu umbapa boro du dagba awirinarani yo?
“Guni ni Bérẽ Pa Kura Ni Rogo Umbasi Gani Berã Ya Ni Ngba Susi Ni”
4. Tipagine rengbe ani ti ni ti kura aregbo ka bihe nikpakarakpakarapai fu rani ka berãpa akuarani ya i kii payo ti gaani?
4 Gu mokedi nangia Pauro afu rugute fu aKristano ki yaa: “Ka oni mángi nga pai na vura na ruka wa sa ya, ono gu ni bérẽ pa kura ni rogo umbasi gani berã ya ni ngba susi ni.” (AFiripoio 2:3) Gere rengbe kadu niʹasada, gbe ka si du nga ani rogo gu ba nga ga ngerakurii kura aboro. Isoke gu kpakarakpakarapai re rengbe ka tona mbiko gupai nga, bete gu sino nga ga abaangira, nga gu ima maapai areme rogo zegino, si ima merafuo rani. Si rengbe arengba kadu a nga, ho ani aduni ni agude, i ayugupa manga abaangira fu rani dagbarani na atamerani watadu dagbarani na aunvurarani kpuraniyo, watadu na agu akuarani ani aduna yo rogo bangisa rika sukuru yo. Isoke i avura nizomia rani dedede tipa ani asadi tirani ka dati gu irisa nga ga bangbasia bangimbaro nga ga sukuru ni watadu nibambata gude rogo patatamana yo. Rengo ngaha nga, si nibeedipai ka manga gupai du niwenehe na omerani dũ. Wa vura duhe wo, aKristano amanganga gipai re gbua tipa ka gbe bangiri aboro kutiyo te, ono i namangaha tipa ka gbia gu undo naabaha rengbe yo ka gbiaha behe, na isoke tipa si fu undo a fu kura aboro tigayo. Ono tie, gupai nga boro naaʹasada tini ti aregbo dũ tipa i nitambua ni nibambata boro dagba akurani rengbe kadu nigbegberepai. Tipagine rengbehe kadu ti ni wo?
5. Ka oni mbu boro na gu sino nga ga abaangira zanga fu rugute funi tipa ni mbuhe, ginipai rengbehe ka ndu na ni sa ni?
5 Ka i mbu boro na gipai re zanga fu rugute funi, gu sino nga ga abaangira watadu gu berã nga ga kina-re-mbata rengbe ka sa boro ni da nigu boro zanga irisa na niirarukö. Fuo duhe were, ni rengbe kaa kpi kura aboro tipa gayo abirĩ na gayo amamu. Asanza 28:22 nayawee: “Iraringi naipisa tini fuo aũkumuko, ka ni aina nga ha nga zingohe aye ku ri ni ya.” Ni rengbe arengba a nigusapai ka berãpa mangasunge rogo gu ba angianga gani ya. Tipa ka rugusa ndu gi gani mangaapai re, ni rengbe ka tonaha na kpakanahe na kini bisirapa gu kura aboro, nga agu asino si aida aKristano nehe. (Yakoba 3:14-16) Ka gumba rengo, ni namaa tini ngbapai nga ga sonosa gu sino nga ga kina-re-mbata.
6. Wai Ziazia Kekeapai afu zahe tipa gu sino nga ga manga abaangira?
6 Sidu, Ziazia Kekeapai nazungadi aKristano kini yaa: “Ka ani mángi nga ruka, ka zingisa tirani [sa abaangira], ka kpi tirani ya.” (AGaratio 5:26) Gu mokedi nangia Yoane afura tipa kurako Kristano sa nga guko, wa gopai ayugoho, nati kurogo manga ngbatunga gi sino re. Yoane ayaa: “Mi ake pai fu kanisa, ono Dioturepe, nga gu ko nyemu du ni barumbatayo adu ti ko dagba yo yo ko adia nga rani ku gume te. Si du ka mi ye ti ni, mi ki tingidi gu gako apai ko namanga, nigumba pai menemene sa rani ni gbegberẽapai.” Nga gu gbegberepai fu Kristano ni mangihe!—3 Yoane 9, 10.
7. Gini apai duwa ka Kristano nehe rogo agu abasunge nga ga abaangira du areme?
7 Rengo ngaha nga, si arengbanga kadu nga Kristano rengbe ka ne agu apai dunduko naabaha naida sino abaangira te. Nikpiapai, gani kungbo sunge nga ga zegino rengbe ka kodapa agu abaangira nga ga bagaahe na gu kura aboro watadu agu abasunge nakusa kina gu bangisa ngbatunga ahe ni akusaha watadu namanga kina gu sunge ni amangaha. Ono tie, zavura rogo ngbatungaapai wa gure, Kristano duwa ka ni amanga gani sunge rogo gu sino nga ga irisa, nyemuse, gbiati wene berã watadu berãpa kura aboro. Ni nika ká gu mangaapai adunga kuti ndiko ya, watadu agu asino angianga ga aKristano ya, na ki ne sa tini nigu boro i naini ni gbe tipa gu sino abaangira nga ga kakaka berãpa kina-tini. Ni aberãnga gupai nga, kadu nibambata boro rogo apai yo dunduko nyakipaha kisusi rogo raka te. Ka singia gupai re nga rengo tipa gbata agu ahe nga ga zegino, nairiwo wai gbe duhe nirengo kisusi rogo gu ba du tipa irisombori!
‘Angianga Mbiko Ringbisaha na ga Kura Boro Ya’
8, 9. (a) Tipagine adunga agu aKristano namangasunge ni abaakumba rogo dungurati ti ni na ndupai tipa manga abaangira na akurayo ya? (b) Tipagine du sangba 1 Petero 4:10 ti ni tipa ga Mbori amoyambu dunduko?
8 Gu sino berã si aida aKristano du nani rogo gayo irisombori gi du nikekehe rogo agi afugo ga Mbori toro adu kugiipa kehe re: “Boro niásadi kina gani sunge, ni nikadu na gu pai ka ni tambua tini mbiko kina ha sa, mbiko kurani te.” (AGaratio 6:4) Wa ini agu abaakumba du rogo dungurati gupai nga i amanganga abaangira dagbayo te, i nakodatiyo kini mangisunge tibarayo dũ wa boro sa. I na ngbarago rogo gu sunge akurayo nibasasa amangaha tipa gu undo nga ga dungurati naabaha. Rogo gi gene re, i kini ne gu vunduvunduapai nga ga abaangira, na kini moi wene kpiapai rogo kodatise tipa dungurati naabaha.
9 Bambiko pa nge agarã yo, gayo inohe, watadu gayo abirĩ nga ga sino raka, kura abaakumba rengbe arengba kadu na inohe susi gu kurayo, watadu i rengbe kadu na dudungurobipai. Nisangbana gipai re, si du du abaakumba ti ni na asunge beyo nibakiakia rogo ga Yekova riigbu. Kuba gupai nga i niringbisipa gayo apai na ga akurayo, i namaa gu rugute ku berãyo yo nga: “Wa i agama he fu boro kina wo a ni mangi pa akurani na ni, wa wene babanda gu dungu agamahe nga ga Mbori.” (1 Petero 4:10) Nirengo, gi veresi re tipa ga Yekova amoyambu dũ, bambiko i dunduko naima gbia bete gu gamahe nga ga ruru inohe, na i dunduko nagbia ngbarago be gu mamu nga ga manga gu sunge tungusapai nga ga aKristano.
10. Rogo gini bangisa gene sa Yekova nika ida kuti gaani ziazia sunge ani amangaha fuko?
10 Gaani ziazia sunge nafu ngbarago fu Yekova kina ho sa ani amangaha ni na ngbarago gbiati ranigose fuko, angianga mbiko gupai nga ka tumbasipa tirani kuari kurii kura aboro ya. Sidu, si ni nyanyakipa pai ani duna ruru bipai tipa gaani mangaapai rogo songoda ndikidi irisombori. Wa vura duhe nga, anga boro ho sa rengbe ka ino pai tipa ga kurani ndu mangapai te, ono Yekova tigako “ninawisiga kpotoyo.” (Asanza 24:12; 1 Samuere 16:7) Sidu, si naida ani naasana tirani ti kura aregbo na gu sanahe nga, ‘Gimi ndu manga agu apai ani amangaha rogo ndusunge fu Yekova nga gine? ’—Atambuahe 24:3, 4; Matayo 5:8.
Ruru Bipai Tipa Gaani Sunge Nga ga Idapase
11. Gini asanahe du tipa gaani mangaapai rogo gu sunge nga ga tungusapai du niruruhe rengbe tipa wisigoho?
11 Kangia ndu mangapai nyakipaha kisusi tipa Yekova idi na gaani apai, sidu wai tie si aida ani berã nibipa gaani mangaapai nga ga idapase? A wa ani kaa manga gaani sunge tungusapai na gu ndu mangaha du niruruhe, ya mo daha ada nirengo ani bandapa agu apai ani amangaha nikekehe watadu ani banda wai du bakioho? Agi asanahe re nga wene asanahe, mbiko ani aidanga ka maa anamba kumbatayo fu agu apai ani amangaha rogo gu sunge nga ga Yekova te, watadu ka mbupa wene tingidapa sunge si du nigu bakerepai ani aberãpaha nibipa gu gaani sunge nga ga aKristano te.
12, 13. (a) Gine nga bete gu nduapai ani naabandapa tingidapa gaani sunge tungusapai ti ni nikekehe? (b) Gini nduapai duho berani tipa ani duna ngbarago ho ani abi gu tingidapa sunge ni nga ga gaani tungusapai naabaha?
12 Oni kparia gupai du rogo gu buku nga Organized to Do Jehovah’s Will [Mbakadatise ka Manga Gupai Yekova Akpinyemuhe] nayaa: “Agu apefuo Yesu nadumbata aduna nyemu tingidapa sona kumbatayo rogo sunge tungusapai. (Marako 6:30) Gu buku nga ga Ziazia Kekeapai nga Amokedi naya fu rani wee bange aboro aduwa 120 ho i auka ziazia toro ni kurii abawiriki rago Pendekote. Fuöho aturanga te bange abawiriki ki sono kuti 3000 na fuo gure si ki dati 5000. . . . (Amokedi 1:15; 2:5-11, 41, 47; 4:4; 6:7) Nga gu wene ngarasa aboro gu pangbangaa nga ga agi asona kumbatayo re afuhe fu agu abawiriki re! ” Tipa kina gu bangisa ndupai re, aDezire Yekova areme namanga asadatise ka banda pa agu asunge i amangaha rogo zegino dũ nikekehe ngba ruru gene nidigisidigisi agu afugo Yesu nga: “Gi wene pangbanga nga ga ngbi re i atungusa ha [atungusa] rogo zegino dunduko mbiko ndika fu arikaaboro dũ; ragoho ki digi adiga.” (Matayo 24:14) Ngbatunga agu atingidapai re si nayugo ndikidi kpia gupai namanga rogo zegino dunduko. Agi apai re si nayugo wari si aida undo ni na gini ngbatunga abuku gbiati bangehe si aidaha tipa ka sonosa gu sunge nga ga tungusapai kumbatayo.
13 Sidu, pa tingida ani pa gaani sunge tungusapai nasa gupai nga ani mangi gaani sunge tungusapa gu wene pangbangaa nga ga Kindo wenengai gbe. Kurii gure, ya mo si angarasanga rani ho ani agiapa agu asunge ni nga gu awirinarani amangaha rogo gu kura apapara zegino tee? Apangbangaa sona kumbatayo gbiati maapai nga ga ndikidi pambori rogo zegino dũ nafu ngbarago fu rani, kini fõngbaduraniyo ani mangisunge bakere, na si kidu nikidohe fu rani tipa ga Yekova maku. Nangbaa ino gupai nga kina boro gaani tingidapa sunge, si nikodikodihe kurogo gu tingidapa sunge nga ga zegino naabaha re! Gaani tingidapa sunge nitirani niumbaha ringbisihe kuti bakio agu asunge naabaha dunduko awirina amangaha rogo zegino, ono Yekova azanganga inopaha te. (Marako 12:42, 43) Oni tingidi gupai nga, na zingo gamo tingidapa sunge, gu tingidapa sunge nga ga zegino dũ arengbanga te.
14. Gini kura apai du nikodikodihe kuti tungusapai gbiati yugopai rogo gu iriso ani afuhe fu Yekova?
14 Rengo ngaha nga, bakere agu apai aDezire amangaha rogo manga yo gayo sunge ni agu amoyambu naima kparatiyo fu Yekova, si akuranga rogo gayo tingidapa sunge te. Nikpiapai, gu tingidapa sunge re akodanga pa gani geda Ziazia Kekeapai nisase dedede te, padu ni pati agu adunguratise nga ga aKristano naapa gu gani akaragapai ni afuhe ti regboho te, pa agu asunge nga ga dungurati ni amangaha te, pa gu undo ni afuhe fu agu akurani nga aidipase du rogo zingo te, pa gu marã niundo tipa gu sunge nga ga Kindo namanga rogo zegino dunduko ni afuhe te, gbiati gu kura apai. Sidu, wa duhe nga gaani tingidapa sunge tungusapai na nyanyakipaha, na kini undo rani ani du zaaza rogo gaani sunge tungusapai zanga nyomoro ti ni, ani duwa ka ani duna ruru bipai tipaha. Si aidanga ani naabihe wa si ni agu apai nga ga toro nazaka gene fu boro ni rengbe ka gbia nyenye unga te.
Du “Ngangara Tipa Manga agu Apai Ngba Angba”
15. Wa vura duhe nga mangaapai nisaha arengbanga ka batasa rani te, tipagine daha ada ti ni tipa ani naamangaha?
15 Wa vura duhe ziazia nga, kina mangaapai nisaha arengbanga ka batasa rani te, si ni gupai daada fu rani tipa mangaha. Si du nga ndu gupai i ayamba aKristano ti ni nga “gu rika aboro tipa ko du ni gako yo, . . . [du] ngangara tipa manga agu apai ngba angba” na si i angarasa rani ti ni ani “bérẽ pa akuarani ka nyakasa yo kuti nyemuse na [kuti] wene mangaapai.” (Tito 2:14; AEbere 10:24) Ka gumbapai ngburungburu, gu kura bake Ziazia Kekeapai nangia Yakoba ayaa: “Ka kpotose zanga toro si du ni kpikpi he, kina wo ka idapase zanga mangaapai si ki du ni kpikpi he a.”—Yakoba 2:26.
16. Gine nyakipaha gbe kisusi mangaapai, ono gine du ani wa ka ani bandatirani behe?
16 Wa vura duhe nga wene mangaapai rengbe kadu na nyanyakipaha, gu nduapai du tipa mangaha si nyakipaha kisusi. Sidu, si nipatatamana fu rani tipa ani naawisigo ndu gaani mangaapai ti kura aregbo. Ono tie, wa duhe nga anga boro ho ti ni rengbe ka ino ndu ga akurani mangaapai nzunzu te, si naida ani bandatirani ti sapangbangaa kura aboro. “Da nga mo nasapa ngbanga ga kura boro moyambu? ” wo i asana rani, na ziazia karagapai nga: “Ni nita ru fu kina gani gbia niti.” (ARomo 14:4) Yekova, nga Baira aboro dunduko, gbiati gako Basapungbangaa ko nasia ko nga Kristo Yesu, nika sapangbangaa rani, angianga kina riipa gaani mangaapai sa ya ono riipa gaani ndu mangaapai, gaani amamu, gaani nyemuse, gbiati gaani ranigose fu Mbori a. Kina Yekova sa gbiati Kristo Yesu nga agu aboro rengbe ka sarangbangaa niruruhe singia ani amangi agu apai i afuhe ni arugute fu aKristano i mangihe, du rogo agu afugo gu mokedi nangia Pauro nayaa: “Mo ké na mbakada pa tiro bangiri Mbori, ko idi pa ro wa gu mangisunge adu nga na zee ya, niyugu ga rengo pai nzunzu.”—2 Timoteo 2:15; 2 Petero 1:10; 3:14; gu kekeapai du nibibirihe na nikikindigihe re, ani du kehe wo.
17. Baraho ani amanga nyanyaki asadatise ni ka manga wenepai na omerani dũ, tipagine si aida ti ni ani banda fugo Yakoba 3:17 ku berã rani yo?
17 Yekova na ruru berã tipa agu apai ko aidaha berani. Kuti fugo Yakoba 3:17, “gu tatamana naye ari yo,” dagba kura apai, si “duna ruru berã.” (Oni ringbisinga ha na NW.) Ya mo si arengbanga kadu nipatatamana, na nindikidi wene mangapai tipa ani wiriki mangapai wa Yekova nibipa gipai re tee? Mbiko gi ndupai re, si aidanga gupai berani nga ani asadi ka maaberã tipa agu asásá du niirairaha na arengbanga ka manga ya tipa rani watadu tipa awirinarani te.
18. Gine rengbe ani kadu na maabangirise tipaha kumbatayo ho du ani ni na ruru bipai tipa gaani mangaapai na tipa ga Yekova weneringise arẽnga aboro tipaha ya?
18 A wa ani kaa banda ruru bipai kindi tipa gaani mangaapai nga ga idapase na tipa ga Yekova weneringise arẽnga aboro tipaha ya, ani abanda gaani ngbarago nga gupai nakpara ndikidi ga Yekova amoyambu ti kura aboro. (Yesaya 65:13, 14) Ani rengbe kaa ngi angi be gupai nga, Yekova nauka gako amaku kurii gako aboro wadu yo dunduko, zanga bi bakio gu sunge rengbe ani wadu ani nibasasa ka mangaha. Pa ndu ani kumbatayo kindi rogo “kpe na zungaditise ni tambuahe,” ani asana Mbori ko undo rani ani naamangasunge na omerani dũ. Sidu, zanga kapa, “gu zereda nga ga Mbori nagasi rugatinapai dunduko, si abánda [kpotorani] yo na [gaani] berã rogo Kristo Yesu yo.” (AFiripoio 4:4-7) Ii, ani rengbe kadu na wasa gbiati ngara be ino ani gupai nga, ani rengbe arengba ka bata mbiko ga Yekova weneringise arẽnga aboro tipaha ya, ono angianga mbiko kina mangaapai nisaha ya!
Oni Rengbe ka Sakarogo Ndu Gupai yo AKristano
• ane rekangose ti ni tipa ga boro mangaapai nitini?
• ane yugo gu sino ti ni nga ga manga abaangira?
• atingidapa gayo sunge tungusapai ti ni nga ga aKristano?
• ane sarangbangaa akurayo aKristano ti ni?
[Gu kpiahe du ti kpewaraga 27]
Abaakumba na ngbarago rogo gu sunge rengbe aboro nibasasa ka mangaha tipa gu ngbarago nga ga dungurati