Oni Ne Zire Irisombori!
“Wa du he were oni kúru dagba yo yo, ki kparaka, wo poi Gbia, ka oni zádi nga birikobiriko he ya, mi ki di roni adia kugume.”—2 AKORINDO 6:17.
1 Ginipai duho si aida dungu agu aboro nape rengo inihe tipa Mbori na gako ringbisaapai?
DUNGU agu aboro nape rengo ainonga gu ndikidi rengo du tipa Mbori gbiati gupai nika manga kumbatayo tipa ngbatunga aboro te. Wa i agbianga ndikidi akaragapai kuti agu asanahe nafuda yo nibi gu rengo du tipa Mbori na gupai nika manga ngbatunga aboro kumbatayo ya, i ima vundo tiyo dunduko na i na maabangirise rogo raka yo wagu tooni te. Badungu amirioni aboro areme futiyo ni akanga fu manga sangbaatoro, sunge vuga ahe na gu kura airisa nga gu naba kina gberarago ti Bakusirani. Si rengbe arengba kadu a nga, kura gaoni amurakporo kinaho idi kuti gupai nga he kinaho nga iferno nga gu ba nagbi ningariangariaha, Mbori nga tirinita, mbisimo niguhe zanga kpio, watadu gu kura iraira yugoapai berewe.
2. Ginipai abarumbatayo rogo pambori amangihe, na sangbanaha nga gine?
2 Tipagine zanga inopai tipa Mbori nagbataka ti ni na arago dũ? Si nairiwo airiwo ka ino gupai nga, apambori du saha si du wo. Ka gumbapai zukazuka, si nga agu ariigbu nga ga apambori na gaha abarumbatayo nga aguyo ninaayugo gupai du kia ti gu nga ga ndikidi Mbori. (Marako 7:7, 8) Nisangbana gipai re, i aima nanga dungu aboro i niberẽ gupai nga i na iriso ndikidi Mbori, baraho i aimisa ko aimisa ni nirengo. Ngburungburu, zire pambori du si aida i biraha tipa gipai naba rungo ti aboro re.
3. Da du nga bangbasia bagbaragi zire pambori ti gi gaani regbo re, na wai ringbisi yo pani rogo Ziazia Kekeapai?
3 Gu kura boro kinaho ka i abinga ni nibangirise ya, ni nga gu boro nasongoda zire pambori. Gu mokedi nangia Pauro afura tipa ni ki yaa: “Nga agu yo mbori gi zegino re akisi gayo aberã nga agu yo zanga idapase, ya ka gu imarago ahasa nga rago ku ri yo nga ga gu wene pangbanga nga ga gu taarimo nga ga Kristo, nga kpia Mbori, ya.” (2 AKorindo 4:4) Anga kura boro ho nga “mbori gi zegino re” fuo kina Satana Bakitingbanga te. Ko nga bangbasia bagbaragi iraira irisombori ti gi gaani regbo re. Pauro akepai tipa ko ki yaa: “Kina Satana a nambakada tiko ni maraika imarago. Anga bakere pai tie, ka gako amoyambu mbakadi tiyo a ni amoyambu rurupai [te].” (2 AKorindo 11:14, 15) Satana nambakada agu apai du nigbegberehe si du niwenehe bangiri aboro, na kini nangi yo i niidi agu apai angianga rengo ya.
4. Ginipai gu ga Mbori Ndiko nadu fu agu aYisaraere nadumbata agumbaha tipa zire anebi?
4 Si airiwonga tie te nga, Ziazia Kekeapai nabisirapa zire pambori abisira nyanyakii gbe! Nikpiapai, ga Mose aNdiko aza ga Mbori siasia aboro zukazuka tipa i bandatiyo ti zire anebi. Yekova arũndiko fuyo nga, ka boro du dagbayo nagbaraga iraira yugopai na kini sa aboro i irisi zire ambori, ‘i imi ni aimo mbiko pe ni pa samungu kuti Yekova.’ I azinahe fu aYisaraere i ‘ba guhe kusayo dagbayo yo nga gu nanidu nigbigbitaha.’ (Pa fu rugute ni ue he 13:1-5) Rengo du tie nga, Yekova nabi zire pambori nigbigbitaha.—Yezekere 13:3.
5. Gini zahe duho si aida ani irisihe ti gi gaani regbo re?
5 Yesu Kristo na gako amokedi ayugukpia wai Yekova abi zire pambori nibakerehe gbe. Yesu arugu gako abawiriki ki yaa: “Oni bánda tironi be airazire anebi, naye fuo roni na kpoto akandoro, ono kpotoyo yo du wa awaru nari ngbara.” (Matayo 7:15; Marako 13:22, 23) Pauro akepai ki yawee “ga Mbori zinga ni yuguyugu he ngbangbaturũ yo sa gu zangasinombori na irairapai dũ nga ga agu aboro nagbingbida rengo ni irairapai.” (ARomo 1:18) Si nibanyanyakipa pai fu aKristano i irisi agi arugute re na ki bandatiyo ti agu aboro dunduko nakiso gene be gu rengo nga ga Mbori na irairapai, watadu na urugo iraira yugopai fu kura aboro.—1 Yoane 4:1.
Oni Kuru Kusayo Rogo “Babera Duna Bakere Ome Ti Ni”
6. Waigu ringbisi yo pa “Babera duna Bakere Ome ti ni” rogo Ziazia Kekeapai?
6 Oni makianga wai gu buku du rogo Ziazia Kekeapai nga Yugoti aringbisapa zire pambori. Si naringbisaha kuti gu debari kpibuda nga guri duna ome kurii dungu akindo na gaha aboro. Gi dee narukuba kurapai re namanga meteka na abakindo zegino na ri kpi kure ndikidi airisimbori. (Yugoti 17:1, 2, 6, 18) Rimori nikekehe ti ngbandia kpakpuri nga gu nafura tipa gari wasiwasi mangaapai gbiati gu sinori du nibirikobirikoho. Rimori nga “Babera du ni bakere he [“Babera duna Bakere Ome ti ni,” NW], na agu adebari na gu gbegberẽpai nga ga kpotosende.”—Yugoti 17:5.
7, 8. Waigu zire pambori amangi bäri, na sangbanaha nga gine?
7 Ho Ziazia Kekeapai afura ni tipa Babera duna Bakere Ome ti ni, si nayugopa agu apambori dunduko du rogo zegino, nga agu ayugonga rengo tipa Mbori ya. Wa vura duhe nga agu akutu apambori du areme rogo zegino akodanga tihe kurogo riigbu sa te vurũ, ono nirengo, agu apai si ayugoho na kini mangihe dunduko, si akparanga te. A wa ringbisi yo paha rogo Yugoti kuti gu dee namanga wasiwasi mangaapai, zire pambori na bakere ome kurii azogarago dunduko. Wa kina gu dee adunga niruru ri kuti gari zungahe nga ga rogatise ya, zire pambori asatihe wa debari nizio ho bakure timburu kuraha na agu aira-ome nga ga birĩ zogarago yo. Gu bawiriki nangia Yakoba akepai ki yaa: “Ako adebari, oni aruga nga tironi na ni ya ngbanya na zegino si nga sogote fu Mbori, te? Si du gu ni ka kpi nyemu du ni badia zegino ni sa tini ni vura Mbori.”—Yakoba 4:4.
8 Gi kodatise du dagba zire pambori na abazogo re akusi badungu arungo fu aboro kisusi. Kumba nga Dr. Xolela Mangcu, nga bawisigi agu apai nga ga birĩ zogarago rogo Afirika arugutiko na gupai nga, “gu kuru apangbangaa du tipa zegino, si hi be apangbangaa imo rimbasa aboro nga gu namanga mbiko pa koda apambori tihe na agu apai nga ga birĩ zogarago.” Bambeda kusayo, kura waraga pangbangaa sa atingidipai ki yaa: “Gu bakere uka kure na gu kere tagbagaapai du dagba aboro rogo zegino areme re, . . . si naenga ti kina apambori.” I aima digo niimi badungu aboro rogo agu avura kina apambori asongodaha. Babera duna Bakere Ome ti ni aima digo nirungosi ga Mbori ndikidi amoyambu na kini imi yo, ka gumbapai nisanza, si kpi kure nga ga ga Mbori ndikidi amoyambu.—Yugoti 18:24.
9. Wai yugu yo pa gu gene Yekova abi zire pambori ngbaha rogo gu buku nga Yugoti?
9 Gu gopai duho nayugo gupai nga Yekova aidanga na zire irisombori te, si niyuguyuguhe gbaiga rogo gupai Ziazia Kekeapai agumbaha ya si nika manga Babera duna Bakere Ome ti ni fuo rago ngbutuko. Yugoti 17:16 nayaa: “Gu gbangaru mo nibi he bawe, na nyarinde a, si nikasoga debari, ki gbarasi ri ni kundiriri, ki riti pasiori, ki zokodi ri ni we dunduko.” Nibambatapai, baiiriwo nyarinde nika gburadi ri, ki imi ri na ki riti pasiori. Fuo gure, gu yangada papara ri nika nye, i azoho naabaha dunduko niwe. Teketeke a, fuo bete regbo, agu azogarago nga ga zegino nika guari kuti zire pambori kinawo. Mbori du nika fõngbaduyo yo tipa i guari kuti zire pambori. (Yugoti 17:17) Babera duna Bakere Ome ti ni, nga ngbii zire apambori, i ima sarangbangaa kuti ni tipa gbarasaha. “I abí nga ha berewe wa sa te.”—Yugoti 18:21.
10. Waigu si aida ani nibi zire pambori?
10 Waigu si aida ndikidi airisimbori naabi Babera duna Bakere Ome ti ni? Ngba gu gene du niziaziaha, Ziazia Kekeapai nazinahe kini yaa: “Oni kúru yo du ri ni, gimi aboro, ka gaoni ngbanya dú nga na gari ingaapai ya, oni ka dia gari gberãngbi.” (Yugoti 18:4) Agu aboro naida ka bata, si naida i kuru rogo zire pambori mbata fu regbo susi beyo. Ho Yesu Kristo aduni auru kpotosende no, ko afura tipa pai kumbatayo ki yawee rogo yangara arame, dungu aboro nika ya gbua auru ngbayo wee i nga apekefuoko. (Matayo 24:3-5) Ono ko aya fu gi ngbatunga aboro re wee: “Mi aína nga roni wa sa te; oni gúari pati re, amangi irairapai.” (Matayo 7:23) Gu bakindo mai yo ko awere nga Yesu Kristo, ko aidanga na zire pambori te.
Waigu Rengbe Ani ka Ne Zire Irisombori?
11. Ginipai si aida ani mangihe tipa ka ne zire irisombori?
11 Ndikidi aKristano nane zire irisombori na kini sogo gaha iraira yugoapai dunduko. Bara sa kindi boro nakuru yo, si aidanga ni naadegatuni kuti gaha aringbisapai rogo radio watadu kaa bihe rogo terevizioni te, kodihe na geda agu awaraga pambori nga gu ayugonga rengo tipa Mbori na fugoko nga Ziazia Kekeapai ya. (Atambuahe 119:37) Na si rengbe a kadu nipatatamana furani tipa ka ani kodinga tirani kupati agu adunguratise na kuti gu mangaapai dunduko nafu wasa nga gu gu riigbu du nikodikodihe na zire pambori asongodaha ya. Kurii gure, si aidanga ani songodi zire pambori kandara tooni te. (1 AKorindo 10:21) Pa ne ani agi apai re nabanda rani, ‘boro ka gbarasa rani na gani nyemu tatamana na kungba nangahe, wa du pa aboro, na gu tata pai nga ga zegino, wa pa Kristo te.’—AKorosaio 2:8.
12. Wai rengbe boro ka ne koda tini na gu riigbu nga ga zire pambori?
12 Ginipai ka gu boro mangihe naida kadu ni Dezire Yekova, ono rimoni kidu awere nikekehe rogo gu kanisa nga ga zire pambori? Dedede, si naida ni ye na waraga be gani aboro pambori nga gu nikadu nigopai nga, ni aidanga aboro nibi ni berewe nigu boro du rogo zire pambori te. Si ninyanyakipa pai gbe nga, gu boro re mangi ruru diaberã tipa ka ni abirikosinga tini berewe na zire pambori ya. Si naida gu mangaapai nga ga gu boro naida kadu ni Dezire re du gbaiga fu gani aboro pambori, nafu agu aboro dunduko nikaa bi ni tipa i ini gupai nga kodatise dagba ni berewe na gu riigbu nga ga gu pambori re te.
13. Gini rugute Ziazia Kekeapai afuhe nibipa ne ani zire irisombori?
13 Gu mokedi nangia Pauro akepai ki yaa: “Ka i kpamia nga roni na azangaidapase wa si arengba nga ya ya, bambiko gini kpamiatise ka du dagba rurupai na irairapai? na gini ngbanya ka du dagba imarago na bitimo? Na gini zereda ka du dagba Kristo na gbegberẽ sino aboro? na gini pai ka du dagba idipase na zangaidapase? Na gini pai rengbe dagba ga Mbori yekaru na kpiaahe? . . . Wa du he were oni kúru dagba yo yo, ki kparaka, wo poi Gbia, ka oni zádi nga birikobiriko he ya.” (2 AKorindo 6:14-17) Ani nairiso agi arugute re ho ani ane zire irisombori ni. Ya mo gi ga Pauro arugute re na kpinyemu gupai nga ani kpara tirani ti agu aboro du rogo zire pambori ki zanga kodatise naayo kandara tooni?
‘Oni Naata Nitatamana’
14. Ya mo si naida gupai nga, ka ani kodinga tirani na agu aboro du rogo zire irisombori wagu tooni ya? Oni sakinga rogoyo.
14 Ya mo si naida gupai nga, ka ndikidi airisimbori kodinga tiyo na agu aboro du rogo zire irisombori kandara tooni ya? Ya mo si naida gupai nga ani mangi tirani ya parani kia ti agu aboro adunga na ani ti idapase ya? Oó, si wo te. Gu ue bakerepa rugute nga: “Mo nikpí nyemu kuaro wa mo akpi nyemu tiro.” (Matayo 22:39) Nirengo, ani nayugo gaani nyemuse fu akuarani nindu ani ka tungusa gu wene pangbangaa nga ga Kindo fuyo. Na ani nayugo gaani nyemuse fuyo a ti gu regbo ani awirika Ziazia Kekeapai naayo na si ki sa yo i kuru kusayo rogo zire irisombori.
15. Rogo gu fugoyo nga ‘aboro zegino nga ani te’ nga gine?
15 Wa vura duhe nga ani natungusa wene pangbangaa fu akuarani, wa ani apefuo Yesu, ani ni “aboro zegino” te. (Yoane 15:19) Gu fugo Yesu agumbaha herẽ nga “zegino” re, si narukuba gu rikaaboro naima kparatiyo kusayo ti Mbori. (AEfeso 4:17-19; 1 Yoane 5:19) Ani nipapara zegino te mbiko ani nane gaha asino, gaha afugo, na agu asino mangaapai du rogoho nga gu nafu gberango fu Yekova. (1 Yoane 2:15-17) Kurii gure, na ngbanyaa kuti gu bangua arugute nga “gbegberẽ kpamiatise nagbarasa wene sino,” ani nane zio dawedawe bakure na agu aboro arakanga kuti agu andiko nga ga aKristano ya. (1 AKorindo 15:33) Ka zanga du nipapara zegino nga ‘ka birikoho dunga tirani ya.’ (Yakoba 1:27) Sidu, anga pa zanga du ani nipapara zegino nayugo gupai nga ani zanga koda tirani na kura aboro te.—Yoane 17:15, 16; 1 AKorindo 5:9, 10.
16, 17. Waigu si aida aKristano mangi fu agu aboro ata ruganga tiyo na agu arengo du vuru Ziazia Kekeapai yo ya?
16 Wai tie si aida ani mangi fu agu aboro ataruganga tiyo na gu rengo du rogo Ziazia Kekeapai yo ya? Pauro akepai fu gu dungurati nadu Korosai yo ki yaa: “Oni tá ni tatamana pati agu yo du zegi yo, nidungura rago tipa mangapai. Oni fúra na undahe dedede, si ki hii na tikpo, si du oni ka ina ti ni ya wãi oni ka karaga ha fu akuaroni.” (AKorosaio 4:5, 6) Gu mokedi nangia Petero akepai ki yaa: “Oni kpára Kristo kpotoroni yo ni gaoni Gbia. Oni ki mbakadi tironi dedede tipa karaga pai fu agu yo dunduko ka sana roni tipa gu pai du maabangirise ti roni mbiko ho, ono ni zera na irisa.” (1 Petero 3:15) Pauro afu rugute fu aKristano ki yawee “ka i gúmba nga gbegberẽpai tipa boro wa sa ya, ka i dú nga ni akpiki pai ya, i dú yee, niyugu zera dunduko fu aboro dũ.”—Tito 3:2.
17 Wa du ani ni aDezire Yekova, si aidanga ani du arakaya watadu na rukö koyo du kura aboro ni te. Si aidanga ani gumba agu afugo duwa kina sengahe ho ani afura ni tipa agu aboro du gayo apambori kia te. Kuba gure, ani duna rubangirise ka si vura du nga irakporo, akuarani, watadu gaani abadiasunge namanga furani gbegbere watadu i nagumba gbegbere afugo furani vurũ.—AKorosaio 4:6; 2 Timoteo 2:24.
“Mo Ká Kuti Kpia gu Weneapai”
18. Gini gbegbere sino mangaapai agu aboro nakaragatiyo kurogo zire irisombori berewe agbiatiyo na ni?
18 Nairiwo wai duhe nipa rungo, ka gu boro naima wirika gu rengo du rogo Ziazia Kekeapai karaga tini berewe kurogo zire irisombori! Ziazia Kekeapai naringbisapa gu kere sangbanapai rengbe gu boro namanga ngbatunga gu diaberã re ka gbia tini nani, ho si ayani: “Bambiko ka si du wa i abati be gu gberã nga ga zegino mbiko ina pa Gbia nga Batasi Yesu Kristo, fuo ho i ki du ni zizi yo rogo ho berewe, si ki di be yo, yangada gayo pai ki du ni gbegberẽ he susi gu nadumbata. . . . Gu pai amangi yo nga gu du rogo ruru sanza, nga gu naya, Ango akaraga tiru berewe fuo gu he u asuku, gu namukuru nazundu tiru ki karaga tiru berewe ku rogo dogoro.”—2 Petero 2:20-22.
19. Tipagine duhe ti ni ninyanyaki pai tipa kaa ngera angera kindi tipa guhe rengbe ka maa rani ngbapai rogo toroyo?
19 Si naida ani naangera angera tipa guhe rengbe ka maa rani ngbapai rogo toro. Mbiko dungu apai duho rengbe ka maa rani ngbapai rogo toroyo. Gu mokedi nangia Pauro afu rugute ki yaa: “Toro nagumba ha zukazuka ya rogo kusa rago agu yo nikati ku sa yo ti idapase, niidi pa agu atoro nga airanangahe, na gu yugopai nga ga adaimona.” (1 Timoteo 4:1) Ani du na raka ‘rogo gi kusa rago re.’ Agu aboro atakuranga rogo zire irisombori ya, i ‘nikaa wo kubani niya ni ayuge yugoapai dunduko, be ga aboro biriki, ninangahe, ku sangba birĩingapai yo.’—AEfeso 4:13, 14.
20. Wai rengbe ani ka bandatirani be gu ome nga ga zire pambori nga gu rengbe ka gbarasa parani rogo toroyo?
20 Waigu rengbe ani ka banda tirani ti gu ome nga ga zire pambori nga gu rengbe ka gbarasapa rani rogo toroyo? Oni makianga pa agu apai dunduko Yekova nambakadihe. Ani na Fugo Mbori berani nga Ziazia Kekeapai. (2 Timoteo 3:16, 17) Yekova ima mbakada ariahe nga ga toro kpaima rogo gu gene nga ga “kangara moyambu.” (Matayo 24:45) Wa ani kaa sona rogo toroyo, ya mo ani arengbanga ka sonosa nyemu gu ‘nyanyaki riahe du tipa sosono aboro,’ na ki sonosi nyemu dunguratirani na akuarani kupati agu adunguratise nga ga aKristano, ka wirika agu arengo nga ga toro tee? (AEbere 5:13, 14; Atambuahe 26:8) Ani diberã tipa ka mangasunge na agu ambakadapai nga ga Yekova nimamu, mbiko si rengbe ka undo rani tipa ani “ká kuti kpia gu weneapai.” (2 Timoteo 1:13) Pa manga ani agi apai re nika undo rani ani ne zire irisombori.
Ginipai Wiriki Oni He?
• Gine nga “Babera duna Bakere Ome ti ni”?
• Ginipai si aida ani mangihe tipa ka kura rogo zire pambori kusayo?
• Gini kereapai duho tipa du ani nyanyaki rogo toro yo si aida ani nehe?
[Gu kpiahe du ti kpewaraga 14]
Oni ini ndu gupai i aringbisapa “Babera duna Bakere Ome ti ni” kuti gu dee namanga wasiwasi mangaapai?
[Gu kpiahe du ti kpewaraga 15]
I ima sarangbangaa kuti “Babera duna Bakere Ome ti ni” tipa gbarasaha
[Gu kpiahe du ti kpewaraga 17]
Ani nayugo “zera na irisa” koyo du agu aboro ni adunga na ani ti idapase ya