‘Oni Ndu Ki Sa Aboro Ni Abawiriki, Kini Bapatizi Yo’
“Oni ndú tie, ki sa arikaaboro dunduko ni abawiriki, ki nibapatizi yo . . . ki nirugu yo a i niká kuti agu apai dunduko mi arugu roni kuti ni.” —MATAYO 28:19, 20.
1. Gini diaberã gu rikaaboro nangia aYisaraere amangihe tiimburu Bagangara Sinai yo?
AGARÃ susi awere wa 3,500 kusayo, ho gu rikaaboro naabayo dunduko, nangia aYisaraere, amangi mozunga ni na Mbori. Wa i adunguratiyo tiimburu Bagangara Sinai, i anyakasipai kini yaa: “Agu apai dunduko Yekova nigumba ha ani amánga kina ha.” Tona ti gu regbo re ka ndu kumbatayo, aYisaraere angia agu aboro nakparatiyo fu Mbori, kingia gako “wene ũkumuko.” (Gate 19:5, 8; 24:3) I aamaabangiriyo tipa ko naabanda yo na kini raki gu rikaaboro kita kpiko aguyo kini di bayo rogo gu ringara nadu “na mamuanya na nzeme anyege kpaima.”—Pa Amotumo 20:24.
2. Gini ngbatunga ngbanyaa na Mbori rengbe aboro ka gbia ngbarago behe areme?
2 Ono tie, a wa gu bake apapara Atambuahe nangia Asafa aidi kuti ni, aYisaraere “aka nga kuti ga Mbori zungahe te, ono i aka pa ta ku sangba gako rugute yo.” (Atambuahe 78:10) I abandanga gu mozunga atitayo amangihe fu Yekova te. Niyangaraha, gu rikaaboro re kini mo ka gbarasapa gu kparakpara ngbanyaa nadu dagbayo na Mbori re. (Batungusipai 5:4; Matayo 23:37, 38) Si kita du wa gere, Mbori kini mo ka “[ndu] koyo du aGendiria ni . . . ka roga aboro dagba yo sa rimoko.” (Amokedi 15:14) Na rogo gi yangara arame re, ko nadungura “bakere rimbasa aboro, ka boro ageda nga yo wa sa ya, dagba rika aboro dunduko, na angbatunga yo, na aboro, na angbatunga afugo dunduko,” nga agu aboro naida kuti gupai na ngbarago nga: “Gaani bata ye be gaani Mbori nasunga auru mbatabakindo, na be Wiri Kandoro a!”—Yugoti 7:9, 10.
3. Ginipai si aida boro mangihe tipa ka gbia ngbarago be gani pagume dagbani na Mbori?
3 Tipa boro du dagba aguyo duna gu wene ngbanyaa dagbayo na Mbori re, ni duwa ka ni kpara gani raka fu Yekova na ki yuguhe gbaiga nizio ni bapatiza rogo ime. Gipai re nga mangapai nigiasangbaa kuti gu ga Yesu zinahe du ngburungburu nayaa: “Oni ndú tie, ki sa arikaaboro dunduko ni abawiriki, ki nibapatizi yo ku rogo rimo Mbori nga Ba na [ti rimo] Wiri na [ti rimo] Ziazia Toro; ki nirugu yo a i niká kuti agu apai dunduko mi arugu roni kuti ni. Oni ngere, mi na oni ti arago dũ, ki da ti digida zegino.” (Matayo 28:19, 20) AYisaraere adegetuyo kuti gupai i aagedaha rogo “kitabu mokido.” (Gate 24:3, 7, 8) Si ki ta du were, i kini mo ka rugatiyo naapa gu gayo asunge si aida i naamangaha fu Yekova. Teketeke a wa kina gure areme, ruru inohe tipa gupai Mbori akpinyemuhe a wa duhe rogo Fugoko, nga Ziazia Kekeapai, ninyanyakipa pai mbata fu boro berẽpa zio bapatiza.
4. Ginipai si aida boro mangihe tipa ka rẽ tipa bapatiza? (Oni kodihe na gu kekeapai du kuari rogo sanduki re.)
4 Si tie ziazia nga, Yesu aaida gako abawiriki sigira nyanyaki mburupai tipa gayo idapase mbata i nika zio bapatiza. Ko afu arugute fu apefuoko nga ka i ndunga ka sa kina sasa aboro gbua ni abawiriki ya, ono i duwa ka i rugu agi abawiriki re tipa ‘i kakuti agu apai ko aruguyo kuti ni.’ (Matayo 7:24, 25; AEfeso 3:17-19) Sidu tie, agu aboro rẽ ka zio bapatiza, i dedede nga agu aboro ima wisigo Ziazia Kekeapai tipa adiwi watadu tipa garã sa watadu agarã ue, tipa ka i agunga agu sa gayo diaberã ya, ono si kidu nigupai i aima gia tiiworoho wenengai. Ti regbo bapatiza nitihe, agu aboro naida ka zio bapatiza, i nikaragapai nga “ii” kuti bangua asanahe ue. Wa duhe nga Yesu anyakasipai ya ‘gaani Ii ngia kina Ii, na gaani Oó, kingia kina Oó,’ si adu niwenepai furani ani fugu nyakapa agi asanahe nga ga bapatiza du ue re.—Matayo 5:37.
Saberã Gbiati Kparatise
5. Gini nyanyakipa bangua mangaapai ue gu bambata sanahe nga ga bapatiza anyakasapaha?
5 I naasana boro na bambata sanahe nga ga bapatiza tipa ka ino singia ni ima sa gani berã ti gani kuru mangaapai na ki kpara gani raka fu Yekova tipa ka manga gupai ko akpinyemuhe. Gi sanahe re nanyakasapa bangua mangaapai ue nga gu si aida boro mangihe mbata fu zio ni bapatiza, nga saberã gbiati kparatise fu Mbori.
6, 7. (a) Tipagine du pa saberã ti ni ninyanyakipa pai fu agu aboro naida ka zio bapatiza? (b) Gini ariapai si aida boro mangihe fuo sa ni gani berã?
6 Tipagine si aida ti ni boro sa gani berã mbata ni nika ndu ka zio bapatiza? Gu mokedi nangia Pauro asakirogoyo ki yaa: ‘Ani adu dagbayo yo dunduko mbata na gu nyemuhe nga ga bororani.’ (AEfeso 2:3) Mbata fu ani ini ruru inohe tipa gupai Mbori akpinyemuhe, ani anaaraka na ngbanyaa na agu apai nga ga zegino, kuti gaha sino mangaapai na gaha andiko. Gaani gene raka adu kutii gu ome nga ga Satana, nga mbori gi zegino re. (2 AKorindo 4:4) Ono tie, fuo ye ani ki ini gupai Mbori akpinyemuhe, ani adiberã ka zanga ‘manga gu nyemuahe nga ga aboro, ono ka manga sangba Mbori.’—1 Petero 4:2.
7 Gi vovo gene raka re naye na dungu amaku fu boro. Nibambatapai, si nazaka gene fu boro tipa ni gbia nyanyakipa ngbanyaa na Yekova, nga gu Davide aringbisipaha kuti rimo kurogo ga Mbori “bamburoko” na kurii “ziazia bagangara” yo, nga gupai du nibakere mamu nirengo. (Atambuahe 15:1) Si nirurupai nga, Yekova arengbanga ka yamba aboro dunduko te, ono ko nayamba kina aguyo ‘nata nzunzu, kini mangi rurupai, kini gumba rengo kpotoyo yo.’ (Atambuahe 15:2) Nibipa agu apai nadu tipa rani mbata fu ani wiriki rengo, pa manga ani agi apai re aidi ani mangi kura aʹariapai, rogo gaani raka na rogo asino rani yo. (1 AKorindo 6:9-11; AKorosaio 3:5-10) Saberã nga guhe nafõngbadu boro yo ni mangi ngbatunga agu aʹariapai re, nga padu boro na bakere gberarago tini tipa gu gani sino raka nadumbata na kidu na nyanyaki nyemu fu ngbarago fu Yekova. Gipai re nandu na boro ni sa gani berã rogo apai dunduko, ki mbu gu sino raka nga ga zegino, nga ga gbangbati, ono kini ndu ngba gu gene nafu ngbarago fu Mbori.—Amokedi 3:19.
8. Wai ani amanga kparatise fu Mbori, na gini kodatise du dagbaha na bapatiza?
8 Ue papara bambata sanahe nga ga bapatiza nasana agu aboro naida ka zio bapatiza singia i aima kpara gayo raka fu Yekova tipa ka manga gupai ko akpinyemuhe. Kparatise fu Mbori nga gu nyanyakipa pai si aida boro mangihe mbata fu zio ni bapatiza. Ani namangaha rogo kparakpee fu Yekova, kini gumba gupai ani akpinyemuhe nga ani naida ka fu gaani raka fuko rogo Kristo yo. (ARomo 14:7, 8; 2 AKorindo 5:15) Fuo manga ani he were, Yekova kini da ni Bairarani, na wa kina Yesu, ani na ngbarago tirani ka manga gupai Mbori akpinyemuhe. (Atambuahe 40:8; AEfeso 6:6) Ani namanga gi mozunga nga ga kparatise re kina bara sa gbua fu Yekova. Ono tie, wa duhe nga ani namanga gu kparatise re nisarani ka aboro ainonga pai tipaha ya, pa taka ani pandehe gbaiga rogo uru bapatiza nasa aboro dunduko i ini gupai nga, ani ima manga gi mozunga re fu gu Barani du ngbangbaturũ yo.—ARomo 10:10.
9, 10. (a) Gine pa manga boro gupai Mbori akpinyemuhe akodaha? (b) Wai kina boro agu abamangisunge nangia ga aNazi yo ainipai tipa gaani kparatise?
9 Gine pa pe ani fuo gu kpiapai nga ga Yesu ka manga gupai Mbori akpinyemuhe akodaha? Yesu aya fu gako abawiriki wee: “Gu ni ka akpi nyemu peka re, ni mbú gani apai, ki di gani wagiwagi ngua [“ngbunduru ngua rungosi,” NW], ki nipeke re [“kindi,” NW].” (Matayo 16:24) Herẽ, ko afura tipa apai biata si aida ani mangihe. Bambatapai nga, ani ‘nambu gaani apai.’ Ka pehe rogo kura afugo, ani naká fu gu nyemuapai du tirani nga ga kpakpa borose, duna gbangbati na ani ki idi ka manga ga Mbori arugute. Uepai nga, ani ‘nadia gaani ngbunduru ngua rungosi.’ Ti rago Yesu, ngbunduru ngua rungosi angia guhe nanaarukuba zee na kuba rungosi. Wa du ani ni aKristano, ani ima idapa agu arungosi ka gbia rani wa ani atakapande wene pangbangaa. (2 Timoteo 1:8) Wa vura duhe nga zegino rengbe ka sawia rani watadu ka gbarasarimo rani, ani ‘nabasapa zee’ abasa wa kina Kristo, kidu na ngbarago mbiko ani ini gupai nga, ani nafu ngbarago fu Mbori. (AEbere 12:2) Niyangaraha, ani napeka Yesu “kindi.”—Atambuahe 73:26; 119:44; 145:2.
10 Si ni gupai nagbeberã rani nga, zavura bete asogo rani, i ima kparia gu kparatise aDezire Yekova namangihe fu Mbori tipa ka mangasunge fuko na ngbaduyo yo dunduko. Nikpiapai, rogo gu bataya zizi aboro nadu Bechenwald yo Germani yo ti regbo gu vura nangia ga Nazi, i aya fu agu aDezire naaidanga ka mbu gayo idapase ya i moi fuöbeyo ti gupai irangbii akehe na masini nga gu nayaa: “Mi kindi nigu boro fu tini ni Bawisigi Ziazia Kekeapai na mi akuonga gimi ngbaanga mi amangihe fu Yekova te.” Nirengo, gipai re nayugo gu sino berã nga ga gu ga Mbori ruru amoyambu naima kparatiyo fuko!—Amokedi 5:32.
I Naino Ni Niboro Sa Dagba ADezire Yekova
11. Gini amamu naye fu gu boro zii bapatiza?
11 I naasana boro na ue sanahe nga ga bapatiza tipa ka ino singia ni inihe ya gani bapatiza nika sa ni aboro naabi ni niboro sa dagba aDezire Yekova. Fuo rindosi yo boro kutii ime yo, ni nada nigu bamangisunge fu Yekova du rimoko rini. Si tibaraha ue nga bakere mamu na ninyanyakipa sunge. Si namaa ndu gu boro a naida ka zio bapatiza re ngbagene nyenye unga, ka ni nye niruru ni kindi fu Yekova.—Matayo 24:13.
12. Gini sunge nandu sa na gu irisa nga ga du boro na rimo Yekova rini?
12 Nirengo, si nga iiriwo irisa tipa ani duna rimo Yekova kuri rani, nga gu Mbori Duna Tanduapai Dũ. Gu nebi nangia Mika ayaa: “Aboro dunduko ata ni ba sa sa na rimo gayo mbori, ono ani atá na rimo Yekova gaani Mbori nye anye kindi.” (Mika 4:5) Wa vura duhe wo, sunge kinaho du kupati gi irisa re. Ani duwa ka ani mangi asadatise nyanyakii tipa ka raka ngba gu gene nika ye na irisa fu ira gu rimo du kuri rani re. A wa Pauro atingidi agu aKristano nadu Roma yo, ka boro amanganga gupai ni atungusaha ya, aboro “[nika gberã] ngbayo yo [agbera] ti rimo Mbori,” watadu ka gbarasa rimoko.—ARomo 2:21-24.
13. Tipagine du gu ga Yekova amoyambu ti ni naima kparatiyo fuko na sunge beyo nga ga manga dezirepai tipa ko?
13 Ho boro asa tini ni niguni sa dagba aDezire Yekova, ni nadia gu sunge ku beni a nga ga manga dezirepai fu aboro tipa gani Mbori. Yekova ayambu gu rikaaboro nangia aYisaraere i du nigako adezire tipa ka takapande pako ninyenye Mbori. (Yesaya 43:10-12, 21) Ono tie, gi rikaaboro re akpa ti manga gipai re, na niyangaraha, ka i agbianga ga Yekova weneringise wagu tooni ya. Areme, pa ndikidi aKristano niʹiriʹirihe mbiko gu mamu nga ga rimo Yekova du kuriyo. Ani namangaha wo bambiko ani nakpinyemu ko na kidu na nyemu i ziasi rimoko. Wai rengbe ani ka onga aonga ho ani naima ino rengo ni tipa gu Barani du ngbangbaturũ yo na tipa gako ringbisapai? Ani naberã wagu gu mokedi nangia Pauro aberẽ ho ko ayani: “I moi dingisaro ti re; bambiko rungo du fere ka mi atungusa nga wene pangbanga ya.”—1 AKorindo 9:16.
14, 15. (a) Gini sunge ga Yekova riigbu amangaha rogo sonosa rani rogo toroyo? (b) Gini ambakadapai duho tipa ka undo rani rogo toroyo?
14 Gu ue sanahe natingida gu boro naida ka zio bapatiza naapa gu gani sunge si aida ni naamangaha rogo gu ga Yekova riigbu gako toro anungusaha. Anga ani nisarani tingba gu sunge ani amangaha fu Mbori re te, ono ani tingbaha na “awirina” nga aguyo ani aida undo, songodahe, gbiati ngarasahe beyo. (1 Petero 2:17; 1 AKorindo 12:12, 13) Ga Mbori riigbu namanga nyanyakipa sunge rogo sonosa rani rogo toroyo. Si nakusa dungu abuku furani du mburuhe rii Ziazia Kekeapai nga gu naundo rani ani sono rogo ruru inohe, ani mangiapai rogo tatamana ho du ani ni rogo kpakarapai, na ani sonosi dawedawe pagume dagbarani na Mbori. Wa kina gu naagude narugatiri na gupai nga ri nariga wiiri ariga na kini ngerefuo ru wenengai, ‘ruru kangara moyambu’ nafuka agu ariahe nga ga toro furani kpaima tipa ani naasona kumbatayo rogo toroyo.—Matayo 24:45-47; 1 ATesaroniko 2:7, 8.
15 Ti regbo agu adunguratise i naamangaha rogo aposo nibasasa, ga Yekova aboro naagbia gu wirikapai gbiati gu ngarasahe si aida i gbiaha tipa i du niga Yekova ruru aDezire. (AEbere 10:24, 25) Gu Sukuru Nga ga Siokrasia nayugopai furani tipa wai ka fura barabangiri dungu aboro, na gu Dunguratise Nga ga Sunge tigaha naraba rani tipa ani ini wai ka fura wenengai. Ti regbo gaani adunguratise na rogo gaani wisigopai nisase rogo agu abuku du mburuhe rii Ziazia Kekeapai, ani rengbe arengba ka bi ga Yekova toro wa si amangasunge kini yugu gene fu gako riigbu. Rogo gu gene nga ga gi mbakadapai re, Mbori naza bangirani kuti kereapai, kini raba rani ani kuru niwene abamangisunge fu Mbori , na kini undo rani ani nye kaa ngera angera kindi rogo toroyo.—Atambuahe 19:7, 8, 11; 1 ATesaroniko 5:6, 11; 1 Timoteo 4:13.
Gupai Nafõngbadu Boro yo Ni Guari ka Zio Bapatiza
16. Gine nafõngbaduraniyo ani kpara gaani raka fu Yekova?
16 Agu asanahe du ue nga ga bapatiza re natingida gu boro naida ka zio bapatiza naapa nyakapa zio boro bapatiza rogo ime gbiati pa gu sunge si aye nani. Gine tie si aida si fõngbaduniyo ni guari ka zio bapatiza? Ani azionga bapatiza mbiko boro du sosodi rani sani te, ono ani nazioho mbiko Yekova ‘gbe’ rani koyo du ko ni. (Yoane 6:44) Wa duhe nga “Mbori nga nyemuse,” ko nazoga haurago ninyemuse, angianga niʹome ya. (1 Yoane 4:8) Agu asino Yekova nga ga weneringise, gbiati agu agene ko amangasunge ngbaha, si naye na ani koyo du ko ni. Yekova afu gako bangisa Vungu furani na ko napepa fu bawene raka a berewe kumbatayo furani. (Yoane 3:16) Tipa rani tigaani, gipai re nafõngbaduraniyo ani kpara gaani raka fuko.—Asanza 3:9; 2 AKorindo 5:14, 15.
17. Ginihe ani akparanga gaani raka tipaha ya?
17 Ani nakpara gaani raka fu kina boro Yekova angianga tipa ka orafuo pai watadu tipa ka mangasunge ya. Gu sunge Mbori nikaa fuhe fu gako aboro nikadu adu nibakiakia, ono gayo kparatise akparanga te. Nikpiapai, gu sunge ko afuhe fu Abarayama ko mangihe adu kia ti gu ko afuhe fu Yeremaya ko mangihe. (Bambata Pai 13:17, 18; Yeremaya 1:6, 7) Ono wa si avura du wo, i dunduko namangi gu kparakpara asunge Mbori afukuhe fuyo re bambiko i akpinyemu Yekova na kini idi ka manga gupai wenengai ko akpinyemuhe. Rogo gi yangara aregbo re, agu apefuo Kristo dunduko naima zio bapatiza namanga asadatise ka irisa ga Kristo zinahe nga gu du tipa tungusa wene pangbangaa nga ga Kindo na ka sa aboro ni abawiriki. (Matayo 24:14; 28:19, 20) Pa manga ani gu sunge re na ngbaduraniyo dunduko nigu bawene gene rengbe ani ka yugo gaani nyemuse ngbaha tipa gu Barani du ngbangbaturũ yo na ki yugu gupai nani a nga ani ima kpara gaani raka fuko nirengo.—1 Yoane 5:3.
18, 19. (a) Ginipai ani agumbaha gbaiga rogo gu gene nga ga gaani bapatiza? (b) Gine ani ka wisigoho rogo gu papara kekepai naye fuo gere?
18 Zanga kapa, bapatiza nazaka gene tipa dungu amaku, ono anga si nga gupai si aida boro bihe na taatapaha te. (Ruka 14:26-33) Si nayugopa gu diaberã mangi ani he nga gu nyakipaha susi kura apai dunduko. (Ruka 9:62) Ho ani nizi bapatiza ni, boro gupai nzunzu ani nigumbaha gbaiga nga: “Gi Mbori re, nga gaani Mbori nye anye kindi. Ko adu ni gaani bangbembatayo nye anye kindi.”—Atambuahe 48:14.
19 Gi papara kekepai naye fuo gere re, si nika wisigopai tipa agu asanahe rengbe ka kura nibipa bapatiza yo boro rogo ime. Ya mo wene ndupai ho rengbe kadu tipa boro mbu zio bapatiza? Garã boro naidaha funi watadu si naká naapa zio ni bapatiza? Wai rengbe aboro dunduko ka kodabee si fu irisa ti regbo bapatiza?
Oni Rengbe ka Sakarogoyo?
• Tipagine si aida gupai ti ni nga aKristano nibasasa sa gayo berã mbata fu zio yo bapatiza?
• Gine pa kpara boro tini fu Mbori akodaha?
• Gini asunge nandu sa na gu irisa du boro nani mbiko padu rimo Yekova rini?
• Gine si aida si fõngbaduraniyo ani mangi diaberã ka zio bapatiza?
[Gu kpiahe du ti kpewaraga 20]
Agu Asanahe Du Ue Nga Ga Bapatiza
Riimburu ga Yesu Kristo motumo tumorii, oni ima sa berã ti gaoni ingaapai na ki kpara gaoni raka fu Yekova tipa ka manga gupai ko akpinyemuhe?
Oni rugutironi na gupai nga, gaoni kparatise gbiati bapatiza nayugo roni nigu boro du dagba aDezire Yekova rogo gu ga Mbori riigbu gako toro anungusaha?
[Gu kpiahe du ti kpewaraga 21]
Kparatise fu Yekova nga gu mozunga boro amangaha fuko rogo kparakpee
[Gu kpiahe du ti kpewaraga 23]
Gaani sunge tungusapai nayugopa gaani kparatise fu Mbori