Aparangaa, Oni Tona Kaa Mangasunge Fu Yekova
“Oni sía gu ni areme oni ka amanga pa ni.”—YOSUA 24:15.
1, 2. Gini iraira gene duho i aima digo nifu bapatiza ngbaha fu aboro rogo gu pambori du kina rimo aKristano gbua riihe?
GU BAKEAPAI nangia Turuturia akepai ti digido gu ue kama agarã F.B.K. ki yaa: “Si naida [agude] sono mbata ki da ti gu regbo rengbe yo ka ino Kristo i kini mo ka bapatiza yo.” Ko aasoga gupai nga ga bapatiza fogo agude, nga gupai akanisa atona kaa mangaha ti rago ko. Gu bayugu pambori nangia Agusitino aidanga na gupai Turuturia agumbaha na gu du rogo Ziazia Kekeapai te. Ko ayawee gu bapatiza nga ga fogo agude, si nadia gu ingapai kusayo ani adihe ti atitarani, na agu agude nakpiko zanga i bapatizi yo, i nika ndu ku iferno yo. Ngbatunga gu ida re asa gupai nga i niibapatizi fogo agude ngbutuko fuo i batika yo.
2 Dungu agu aboro du rogo gu pambori du kina rimo aKristano gbua riihe, i nabapatizi rukutu agude kindi. Kurii gure, ringbisihe kuti kuru apangbangaa, abazogo na abarumbatayo rogo pambori nga aguyo nanaaya tipa tiyo i nga aKristano, i anaazio “apagano” azio tipa kaa fu bapatiza fuyo. Ono Ziazia Kekeapai afuranga tipa gu bapatiza i afuhe fu rukutu agude gbiati gu i azio sosono aboro azio tipaha te.
Aboro Akparanga Tiyo Areme Zanga Inohe Te
3, 4. Ginipai rengbe ka undo agu agude du avunguyo ni aKristano i kparatiyo nitiyo fu Mbori?
3 Ziazia Kekeapai nayugo gupai nga, Mbori nabi rukutu agude niziazia yo ka boro sa du dagba avunguyo yo niruru Kristano. (1 AKorindo 7:14) Ya mo gupai re nayugo gupai nga, ngbatunga agu agude re nga kina ga Yekova amoyambu a? Oó, wagusa te. Ono tie, agu agude du avunguyo niga Yekova amoyambu, avunguyo naraba yo si ki sa yo i guari nisayo ka kpara gayo raka fu Yekova. Gu tatamanatatamana Bakindo nangia Soromo akepai ki yaa: “Ako wire, mo ká kuti sangba bamo, ka mo mbú nga gu yugopai nga ga namo ya. . . . Ho mo ka ta ni, si nika ngbe foro kumba ta yo, ho mo ka ra ni, si nikabanda ro, ho mo ka zinga ni rame yo, si nikafura na mo. Bambiko sangbayo wa ima baro, yugopai ki du wa imarago, gu zapai nga ga rugapai si nga gene unga.”—Asanza 6:20-23.
4 Agu arugute nga ga agu aKristano nga avunguagude rengbe arengba ka banda agude ka si du nga i nika ndu kuti agu arugute re. Soromo ayaa: “Tatamana gude nafu ngbarago fu bani, ono mumungo wiri de nga pa rungo fu nani.” “Ako wire, mo gi he, ki du ni iratatamana, ki nirugu berã ro rogo pai.” (Asanza 10:1; 23:19) Ii, rukutu agudee, ka oni aida ka gbia wenepai ti gu rabahe nga ga avunguroni, oni gi agu arugute na gu zahe i afuhe furoni. I abatikanga roni na tatamana te, ono oni rengbe arengba ‘kadu ni airatatamana’ na kini ndu nitironi ngba “gene unga.”
Gine Nga Rugahe?
5. Gini arugute Pauro afuhe fu avunguagude gbiati agude?
5 Gu mokedi nangia Pauro akepai ki ayaa: “Agude, oni gí sangba avunguroni agia rogo Gbia, bambiko gi ru re. ‘Mo írisi bamo na namo’ (si nga bambata rugute na kidohe), ‘mo ki du adu wenengaĩ, mo ki ima aima gbe ri kpotosende.’ Oni, aba[agudee], ka oni wí nga ngba awironi i zingi ya, kina mbu ti yo ni ga Gbia rabahe na rugahe.”—AEfeso 6:1-4.
6, 7. Ginipai nakodapa ‘raba agude rogo gu rugapai yo nga ga Yekova,’ na tipagine si ayugonga gupai ti ni nga i namaapai amaa kuriyo ngbaome ya?
6 Ya mo agu aKristano nga avunguagude namaapai kurii awiriyo ngbaome watadu ka gbarasa riyo yo ho i araba yo ni rogo “ga Gbia rabahe na rugahe”? Oó, wagusa te. Gini boro rengbe ka bira avunguagude tipa gupai nga i nayugopai fu awiriyo tipa rurupai na wene mangaapai? Agu aboro naya Mbori ti ni te, aboro abiranga yo tipa gupai i ayugoho fu awiriyo ya Mbori ti ni te te. AKatoriko na gu sunge beyo nga ka raba awiriyo rogo gayo idapase nga ga aKatoriko, na aboro abiranga yo tipa gupai i amangaha re te. Teketeke a, si aidanga i bira aDezire Yekova ya i namaapai kurii awiriyo yo baraho i araba yo ni tipa i duna gu berã nga ga Yekova tipa gu banguapai nga ga rengo na kuti gu ndiko nga ga ruru mangaapai te.
7 Kuti kura buku sa nga ga sakarogo afugoyo, nga gu nasaka rogo gu fugo Giriki yo i asaha nga “rugahe” rogo AEfeso 6:4, si nayugopa “gbata gene tipa ka mbakada berã, tipa ka mbakada gupai arunga ya na tipa ka mbakada gu bipai nga ga toro.” (Theological Dictionary of the New Testament) Rengo ngaha nga, paranga boro rengbe arengba ka ká agu arugute nga ga avunguni mbiko gu soapai nga ga akurani, tipa ka manga gupai akurani amangaha. Ka singia wo duhe, da rengbe yo ka bira ni tipa sosoda gude, avungu gu gude re watadu agu akurani ni ata naayo? Ka singia abakurea agude nasosoda yo i di kere angua kutii kpotoyo yo, i naambira buda na kini mangi wasiwasi mangaapai, ya mo i rengbe ka bira avunguagude mbiko i naida ka banda awiriyo be gbegbere asangbana ngbatunga gu mangaapai re?
8. Ginipai nakodi pa sakapai na Timoteo tipa ko nye rogo agu apai ko awirikihe “ki ini he ni rengo” tipa kadu na idapase?
8 Gu mokedi nangia Pauro akepai fu Timoteo ki yaa: “Mo nyé rogo agu apai mo awiriki ki ini he ni rengo, niini agu aboro mo awiriki he be yo; ho mo adu ni ni gude, mo atona ina gu Ziazia Kekeapai rengbe na fu tatamana foro sa bata, mbiko gu idapase du rogo Kristo Yesu yo.” (2 Timoteo 3:14, 15) Natona ho Timoteo aduni nigude, navunguko gbiati titako aima digo ninyakasi ko tipa ko duna nyanyaki idapase kuti Mbori, nga gu mburuhe adu rii gu inohe nga ga Ziazia Kekeapai. (Amokedi 16:1; 2 Timoteo 1:5) Kusa, ho navungu ko gbiati titako adani ni aKristano, i azionga ko azio ngbaome tipa ko duna idapase te, ono i aundo ko aundo tipa ko nye rogo agu apai ko awirikihe “ki ini he ni rengo” rogo gu gene sakapai mburuhe adu rii gu inohe nga ga Ziazia Kekeapai.
Yekova Nayamba Roni sa Sunge
9. (a) Wai Yekova afu iriso fu agu aboro ko akusiyo, na tipagine? (b) Wai bangisa Wiri Mbori amangisunge na gako ranirii?
9 Yekova arengbe arengba ka mbakada aboro wa masini nga gu namangasunge ringbisihe kina kuho i aida si mangisunge kuhoni ka si arengbanga ka manga gupai dukia ya. Kuba gure, ko afu irisa fuyo nimbakada ko yo i duna ranirii ka siapai. Mbori naida gupai nga boro fu tini afu ka mangasunge fuko. Ko na ngbarago ka bi agu aboro ko akusi yo, sosono aboro gbiati rukutu agude, i nimangisunge fuko mbiko i nakpinyemu ko. Gu wene kpiapai nga ga futise fu Mbori na ngbarago tipa ka manga gupai ko akpinyemuhe, si nga ga gu bangisa Wiri Mbori nga guko Mbori aya tipa ko wee: “Wire du re, nyemuko namanga re, ngba ko ti re gbe.” (Matayo 3:17) Gi bambata Wiri Mbori re aya fu bako wee: “Ako gi Mbori, rago ngba ti re ka amanga gu pai ngba angba ti ro; ii, ga rugute du kpotore yo.”—Atambuahe 40:8; AEbere 10:9, 10.
10. Gine nga ndu gupai ani amangasunge ti ni fu Yekova ngba gu gene ko akpinyemuhe?
10 Yekova naida gupai be agu aboro namangasunge fuko tiibe gu rugapai nga ga Wiriko nga, i yugu kina gu bangisa ranigose re tipa ka manga gupai Ko akpinyemuhe. Ka gumbapai nisangbanebi, bake apapara Atambuahe abibia ki yaa: “Gamo aboro afú tiyo foro zaza rago ngbe mo ku mbata yo fu gamo rimbasa aborosovura, ni ukadiukadi tiyo na kparakpara ziazia roko. Pa parangaro adu wa uru ho uru nakura ni wiso.” (Atambuahe 110:3) Gu ga Yekova riigbu du ngbangbaturũ yo na gu du auru kpotosende, si namanga gupai ko akpinyemuhe mbiko gu ranigose ninyemuse du aboro ho nani fu Mbori.
11. Gini siapai si aida rukutu agude mangihe nga aguyo avunguyo asonosi yo?
11 Sidu, rukutu agudee, si naida oni ini gupai nga, anga avunguroni watadu agu aKristano nga abaakumba du rogo dungurati, i nika zio roni ngbaome tipa oni zi bapatiza te. Si naida gu nyemupai nga ga mangasunge fu Yekova ye ngbaduroniyo nitironi. Yosua aya fu aYisaraere wee: ‘Oni mangipa [Yekova] nindikidi rengo na rurupai. Oni sía gu boro areme oni ka manga pani.’ (Yosua 24:14-22) Wakina gure a, si naida kina roni nitironi siapai tipa ka manga kparatise fu Yekova na ki fu tironi tipa ka manga gupai ko akpinyemuhe.
Oni Tindi Kina Gaoni Tindiro
12. (a) Wa vura duhe nga avunguagude rengbe arengba ka raba awiriyo, ginipai ka i arengbanga ka mangaha fuyo ya? (b) Ti gini regbo gude narengbe ka tinda gani tindiro barangba Yekova tipa gu siapai mangi ni he?
12 Rukutu agudee, regbo ayeaye ho padu avunguroni niruru yo nika rengbanga ni ka banda roni ya. (1 AKorindo 7:14) Gu bawiriki nangia Yakoba akepai ki yaa: “Gu . . . [boro] ini ka manga wenepai, ka ni amanga nga ha ya, si nga gbegberẽpai fu ni.” (Yakoba 4:17) Avunguagude arengbanga ka mangasunge fu Mbori tipa awiriyo te, a wa agude arengbanga ka mangasunge fu Mbori tipa avunguyo ya. (Yezekere 18:20) Ya mo oni ima wirikapai tipa Yekova na tipa gako akidohe? Ya mo oni awere nigu boro ima ngara rengbe arengba ka giarogo gupai yo oni nawirikihe na ki tona ka sonosa wene pagume dagbaroni naako? Ya mo si arengbanga kadu nigupai ruaru ka berã gupai nga, Mbori nabi roni awere nigu boro rengbe arengba ka manga diaberã tipa ka mangasunge fuko tee?
13. Gini asanahe si aida gu paranga aboro atazionga bapatiza ya sana tiyo nani?
13 Ya mo mo nga gu paranga boro atazionga bapatiza ya du avunguro ni aKristano, nigu boro ninaandu kupati agu adunguratise nga ga aKristano na kini tungusipa gu wene pangbangaa nga ga Kindo? Ka si duwo, mo sana tiro na agi asanahe re: ‘Ginipai mi amanga gipai re ti ni? Ya mo mi nandu kupati adunguratise na kini mangisunge tungusapai bambiko avungure naida mi naamanga agi apai re watadu mi namangaha wo bambiko mi nakpinyemu ka sa ngbarago ti Yekova?’ Ya mo mo kparianga pa “gu he nga ga Mbori nyemu he [nga gu] du ni wene he, nzunzu, ni ziazia ha”?—ARomo 12:2.
Tipagine Oni Akeesa ti Ni?
14. Gini kpiaapai nga ga Ziazia Kekeapai nayugo gupai nga, si aidanga boro naamanga ndundu tipa ka zio bapatiza te?
14 Fuo boro Etiopia wirikipai tipa Yesu ya ko angia Masiya, na ka fuoho ataturanga ya, ko asana gu batungusi wene pangbangaa nangia Firipo ki yaa: “Gine naza re ti bapatiza?” Ono tie, gu boro Etiopia re aima duna inohe nga ga Ziazia Kekeapai nga gu nasako ko takipande gako diaberã gbaiga ya tona ti gu regbo re kaa ndu kumbatayo, ko nikaa mangasunge fu Yekova nipapara gu dungurati nga ga aKristano, na gipai re aye na bakere ngbarago fuko. (Amokedi 8:26-39) Wakina gure a, dee rimori angia Rudia, nga guri Yekova ‘aza kpotori yo, ri di agu apai Pauro agumba kugume,’ “i abapatizi ri” nikina ipo gbiati gari aborokporo. (Amokedi 16:14, 15) Wakina gure a, gu babandarago nadu Firipoi yo adegetuko wenengai kuti Pauro na Sira ho i ‘agumba pa Gbia ni fuko’ na i ‘ki bapatizi ko, ko na gako aboro dunduko nibasa.’ (Amokedi 16:25-34) Sidu tie, ka singia oni na gu bangua inohe nga ga Yekova na tipa gako aringbisapai, na kidu na ndikidi nyemu ka manga gupai ko akpinyemuhe na rimoroni kidu niwenehe rogo dungurati, na kingia gu boro nandu andu kupati adunguratise yo na aregbo dunduko na kini tungusi gu wene pangbangaa nga ga Kindo, tipagine tie oni aidanga ti ni ka zio bapatiza ya?—Matayo 28:19, 20.
15, 16. (a) Gini iraira sakapai berãse yo rengbe ka sa agude ka i zingo bapatiza ya? (b) Wai rengbe kparatise fu Mbori gbiati bapatiza ka banda agude?
15 Ya mo si rengbe kadu nga oni namanga ndundu tipa ka dia gu nyanyaki diaberã re mbiko gunde ya i ka sarangbanga roni ka oni mangi gbegberepai? Ka si duwo, oni berẽnga tipa gipai re: Ya mo oni rengbe ka ká tipa ka dia waraga asiahe tipa ka gbe tarambiri na gu nduhe nga oni nagunde agunde oni ka ndu ka manga béno nani? Wagusa te! Si aidanga oni du dindikodindiko tipa ka zio bapatiza ka si du nga oni ima rengba tipaha te. Ka gumba rengo, ka oni kpara gaoni raka fu Yekova na oni ki ima ida ka manga gupai ko akpinyemuhe, si nika fõngbaduroniyo oni sovura nyanyakii kuti manga irairapai. (AFiripoio 4:13) Rukutu agudee, ka oni berẽnga gupai nga, pa ká oni ka zio bapatiza nika sa roni oni he karagapai fu Mbori tipa agu apai oni kaa mangaha ya. Ho oni nada ni ni agu agude bangiriyo naimaha na ki ima giarogopaiyo, oni akaragapai akaraga fu Yekova tipa agu apai oni amangaha ka si vura du nga oni ima zio bapatiza watadu oni azionga ho te vurũ.—ARomo 14:11, 12.
16 Dungu aDezire rogo zegino dunduko naberã gupai nga, gu diaberã i amangihe tipa ka zio bapatiza mbuyo rukutu aundo yo bakere gbe. Nikpiapai, Dezire Yekova sa du Putu yo ku Dioyo du garãko nga 23 atingidipai ki yawee pa dia ko bapatiza mbu garãko nga 13 nangia gupai nafõngbadukoyo ko naamanga apai na rubangirise tipa ka he merafuo ga ‘aparanga gbegbere nyemuahe.’ (2 Timoteo 2:22) Mbu ko kindi tooni, ko adiberã tipa ka mangasunge tungusapai ti aregbo dũ. Areme, ko namangasunge na ngbarago rogo gu biroo nga ga gu be-basunge nga ga aDezire Yekova. Bakere amaku nasunguda rukutu agude dunduko, kodihe kuti ro a, bambiko mo ima diaberã ka mangasunge fu Yekova.
17. Ngba gini agene rengbe ani kaa kparia ‘gupai Gbia akpinyemuhe’?
17 Kparatise gbiati bapatiza nga tonatona gu raka ani natonaha ka manga gupai Yekova akpinyemuhe rogo gaani raka yo dunduko. Pa digiso ani gaani kparatise fu Mbori nakodapa ‘ngbe regbo’ tipa tirani. Wai rengbe ani ka manga gipai re? Ani rengbe ka mangaha nikpara ani gu regbo ani naamanga gaani kungboapai rogoho tipa ka fu omerani dũ rogo yo tipa ka wisigo Ziazia Kekeapai sirisiri, na kini ndu kupati adunguratise yo dunduko na kini tungusi “wene pangbanga nga ga ngbi [kindo].” (AEfeso 5:15, 16; Matayo 24:14) Gaani kparatise fu Yekova gbiati nyemu ka manga gupai ko akpinyemuhe nika manga ariapai rogo gaani sino raka yo dunduko, kodihe kuti wai ani amangasunge na gaani aregbo ongoda, pa ri riahe, mbirahe, na gu ngbatunga manzigo ani agiaha. Tipagine ka oni asianga gu ngbatunga ambaro ti ni nga gu oni nikaa gbia ngbarago behe rogo gaoni raka yo dunduko ya? Dungu agu agude duna ngbarago nga aDezire Yekova rengbe arengba ka gumba gupai furoni nga, dungu agene kinaho rengbe oni ngbaha ka gbia ngbarago wa oni amanga ‘gupai Gbia akpinyemuhe.’—AEfeso 5:17-19.
‘Ani Nika Ndu na Oni’
18. Gini asanahe rengbe rukutu agude ka sana tiyo nani?
18 Natona rogo gu garã nangia 1513 M.B.K. ka da kurogo gu garã nangia 33 F.B.K., Yekova aima duna aboro beko auru kpotosende, nangia agu aboro ko asiayo tipa i naairisako na i kidu nigako aDezire. (Yesaya 43:12) Agu aYisaraere nangia rukutu agude, i anaabatika yo niga Mbori aboro. Natona ti regbo Pendekote, Yekova aduna vovo “ngbatunga aboro” beko auru kpotosende nga agu aYisaraere nga ga toro yo, ni agu aboro ko asia yo “sa rimoko.” (1 Petero 2:9, 10; Amokedi 15:14; AGaratio 6:16) Gu mokedi nangia Pauro ayawee Kristo aima giriso “rika aboro tipa ko i du ni gako yo, nidu ngangarã tipa manga agu apai ngba angba.” (Tito 2:14) Oni paranga aboro, oni rengbe arengba nitironi ka ino bara wari du agu aboro re ni. Ada du areme nga gu “ruru rikaaboro nga agu yo naka kuti rengo” na kini raki na ngbanyaa kuti gu bangua arugute nga ga Ziazia Kekeapai re, na kini mangipai niruru aDezire fu Yekova na kini takipande gako Kindo nigu bangisa maabangirise duho fu aboro zegino dunduko? (Yesaya 26:2-4) Oni bingo agu aKanisa i aya tipaha wee si nga ga aKristano gbiati kura apambori, na oni ki wisiginga gayo mangimangiapai kuti gupai Ziazia Kekeapai aidaha be ndikidi amoyambu nga ga Mbori yo.
19. Ginipai amirioni aboro naidi kuti ni rogo zegino dunduko?
19 Dungu amirioni aboro areme rogo zegino dunduko, kodihe kuti rukutu agude ima ida kuti gupai nga, gu yangara mbedimbedi aKristano nga aDezire Yekova, i du nga gu “ruru rikaaboro” re. I naya fu agi aYisaraere nga ga toro yo re wee: ‘Ani nika ndú na oni, bambiko ani gihe ya Mbori du na oni.’ (Zekaraya 8:23) Ani na maabangirise na kini kparikpee ya oni rukutu agude, oni diberã tipa kadu dagba ga Yekova aboro na tipa ka “sía unga,” nga nyenye unga rogo ga Yekova vovo zegino.—Pa Fu Rugute ni Ue he 30:15-20; 2 Petero 3:11-13.
Fugöpai
• Ginipai nakodapa ruga berã?
• Gini ngbatunga sunge Yekova aida nani?
• Gini siapai du barabangiri rukutu agude nga aguyo du avunguyo niga Yekova amoyambu?
• Tipagine si aidanga ti ni boro duna ndundu tipa ka zio bapatiza ya?
[Gu kpiahe du ti kpewaraga 28]
Da mo nika giasangba ni?
[Gu kpiahe du ti kpewaraga 30]
Wai kparatise gbiati bapatiza narengbe ka banda roni?
[Gu kpiahe du ti kpewaraga 31]
Ginipai naká na oni ti zio bapatiza?