‘Oni Du Na Ngbarago Kpaima’

“Oni anika kuti pa manga pumbo fu Yekova . . . oni ki du na ngbarago kpaima.” —PA FU RUGUTE NI UE HE 16:15.

1. (a) Gini angbangaa Satana akusihe? (b) Ginipai Yekova afura tipaha kumbatayo tingbafuo ga Adamu samungu na Eva?

HO Satana asa Adamu na Eva ni i samungu kuti Bakusiyo, Satana akusi nyanyaki angbangaa ue. Nibambatapai, ko abisirapa ga Yekova rengo naapa ru gako gene zogarago. Niuepai, tiiworo ga Satana afugo ayugu gupai ngawee aboro namangasunge fu Mbori tipa kina gu weneapai i agbiaha beko. Satana akusi gu ue ngbangaa re ziazia ti regbo Eyobo. (Bambata Pai 3:1-6; Eyobo 1:9, 10; 2:4, 5) Wa si avura duwo, Yekova aguari niipo ka mbakada gupai nagbere re. Zavura ho Adamu na Eva aduni kindi ati Edene yo, Yekova aima fura tipa wai ko nika mbakada gupai re. Ko afura tipa paye ‘tita dee’ ki yawee, fuo i mburu gido gi titari re, ko ambura ri Satana na ki imiko.—Bambata Pai 3:15.

2. Wai Yekova asakirogo wai yo ko nika digiso gu sangbanebi du nikekehe rogo Bambata Pai 3:15?

² Wa regbo aandu, Yekova aasakarogo gu sangbanebi re fu aboro, kini yugu gupai ngawee gu sangbanebi re aenga manga te. Nikpiapai, Mbori aya fu Abarayama wee gu ‘tita dee’ Ko akidohe tipa ko re nikadu dagba angbatunga ko yo. (Bambata Pai 22:15-18) Gu tita Abarayama nangia Yakobo, ko ada nitita agu angbatunga aYisaraere nadu 12. Rogo gu garã nangia 1513 M.B.K., ho agu angbatunga re adani ni rikaaboro, Yekova afu andiko fuyó nga gu nakodi agu apumbo i anaamangaha bara sa rogo garã. Gu mokedi nangia Pauro ayawee agu apumbo re angia “kpia agu ahe nikaye.” (AKorosaio 2:16, 17; AEbere 10:1) Agu apumbo re aduna mboimboi digisidigisi ga Yekova ringbisapai rogoho tipa gu Tita dee ko akidohe tipa ko re. AYisaraere aduna bakere ngbarago baraho i anaamanga agu apumbo ni re. Pa wisigo ani he kandara niguruhe nika nyakasa gaani idapase kuti agu akidohe Yekova afuhe furani.

Tita Dee Akuru

3. Da nangia gu Tita dee i akidohe tipa ko, na wai i amburu gidoko?

³ Gu Tita dee Yekova akidohe tipa ko re akuru fuo susa agarã susi 4,000 tingbafuo gu regbo Yekova agumba pako. Gu Titari re angia Yesu. (AGaratio 3:16) Wa duhe nga Yesu angia rengberengbe boro, ko akakuti gako ruru mangaapai dati kpio na ki yugu ga Satana akitangbaangase niziree. Kurigure, wa si adu nga Yesu adunga na ingapai tiko te, kpioko angia gu motumo paha akii gbe. Mbiko gu motumo re, Yesu azakigene tipa ka batasa agu atita Adamu na Eva namanga rurupai be ingapai na kpio. Kpio Yesu ti ngbunduru ngua-rungosi angia ‘mbura gido’ gu tita dee i akidohe tipa ko.—AEbere 9:11-14.

4. Wai gu motumo Yesu afuhe aima du niyuguyuguhe mbata kusayo?

⁴ Yesu akpi rogo gu diwi nangia Nisana ti rameru 14, rogo gu garã nangia 33 F.B.K.a Rogo gu ringara aYisaraere nadumbata, Nisana ti rameru 14 angia rago ngbarago nga ga Pumbo Susiri. Rogo agarã nibasasa rogo gu uru re, aborokporo anaari riahe nga gu naanikodi pasipasi gu wiri kandoro séro aadunga tiru ya. Rogo gi gene re, i anaatingidapa gupai kure wiri kandoro amangihe rogo batasa bambata awiri aYisaraere ho gu maraika nga ga kpioko aimi bambata awiri aEzipeto ni rogo Nisana ti rameru 14 rogo gu garã nangia 1513 M.B.K. (Gate 12:1-14) Gu wiri kandoro nangia ga Pumbo Susiri ru re aayugopai tipa Yesu, nga guko gu mokedi nangia Pauro afura tipa ko ki yaa: “I atumo ni gaani kandoro susiri a, nga Kristo.” (1 AKorindo 5:7) Wakina kure gu wiri kandoro nangia ga Pumbo Susiri ru, kure Yesu nabatasa dungu aboro.—Yoane 3:16, 36.

‘Makawa agu Aboro Nara Ara’

5, 6. (a) Gini regbo i azingisi Yesu bekpio, na wai si adu niyuguyuguhe rogo ga Moize Ndiko? (b) Wai ga Yesu zingabekpio adigisi sangba Bambata Pai 3:15?

⁵ I azingisi Yesu bekpio rogo biata uru tipa ko fu ome gako motumo fu Bako. (AEbere 9:24) Gako zingabekpio aima du niyuguyuguhe rogo kura pumbo. Nisana 15 angia uru tonatona gu Pumbo nangia ga gu Kpakuto Naadunga na Agbooro ti Ni Ya. Rogo gu uru nanaaye fuo gure nangia Nisana 16, aYisaraere anaaye na vodivodi arii keke ahe nga amakawa watadu bambata aũati fu boromotumo ko yaha kubani na kubani barabangiri Yekova. (Pa Amotumo 23:6-14) Nairiwo wai ruhe nga Yekova atapa ga Satana burõ kina boro rogo gu uru re rogo gu garã nangia 33 F.B.K., nga gu burõ Satana ataha tipa ka ongosa Yesu “nga ndikidi [ga Mbori] dezire ni irarengo”! Rogo Nisana 16 rogo gu garã nangia 33 F.B.K., Yekova azingisi Yesu bekpio ki fu gu unga fuko nga ga toro zanga kpio.—Yugoti 3:14; 1 Petero 3:18.

⁶ Yesu ada ‘nimakawa agu aboro nara ara.’ (1 AKorindo 15:20) Yesu adukia ti agu aboro i azingisi yó mbata, ko tigako akpinga berewe te. Kuba gure, ko aga ku ngbangbaturũ yo ki sungu pati kumbabe Yekova, nga gu ba ko asungu rogoho daho Yekova amoiko ni ni bakindo gako Kindo ngbangbaturũ yo. (Atambuahe 110:1; Amokedi 2:32, 33; AEbere 10:12, 13) Natona ho i amoi Yesu ni ni Bakindo, ko ima mbakada tiko awere ka mbura rii gu kere vurako nga Satana re, nga ka imoko nyeanye kindi na ka imo tunga ko a.—Yugoti 11:15, 18; 20:1-3, 10.

Kura Aboro Dagba Ngbatunga Abarayama

7. Gine nangia gu Pumbo Nangia ga aPoso?

⁷ Yesu nangia gu tita dee i akidohe tipa ko Edene yo na ko Yekova nika mangasunge naako ka ‘gbarasa ga bakitingbanga mangaapai.’ (1 Yoane 3:8) Ono tie, ho Yekova afura ni fu Abarayama, Ko aya fuko wee ‘ngbatunga ko’ nika nge ange angianga boro sa gbua ya. Ko aya bangeyo nikadu “wa kina akerekuru ngbangbaturũ yo na wa kina ngume pangba baime.” (Bambata Pai 22:17) Gu kura pumbo i anaamangaha kusayo ayugupai kumbatayo tipa gu kura aboro du rogo gu ‘ngbatunga’ re. Arame 50 fuo Nisana 16, aYisaraere anaamanga gu Pumbo Nangia ga aPoso. Gu ndiko nadu tipaha ayaa: “Wa gedigedi uru 50, tona ti gu girarago du fuo saba sabiti; si du oni ki ye na motumo riahe nga ga vovo zende ahe fu Yekova. Oni aniye na udiudi akpokuta ue kpuroni yo i wo ti ni, i animangi he na fufurũ ngungo wa aritere saba; i anizo ho na agbooro, ni makawa fu Yekova.”b—Pa Amotumo 23:16, 17, 20.

8. Gini nyanyakipa pai namangi rago Pendekote rogo gu garã nangia 33 F.B.K.?

⁸ Ho Yesu aduni auru kpotosende, i anaayamba gu Pumbo Nangia ga aPoso re nga Pendekote (nga pa-Giriki du rogoyo nga “gu bisue-bawe he”). Ti rago Pendekote rogo gu garã nangia 33 F.B.K., gu Gbiamotumo nangia Yesu Kristo, ko auka ziazia toro kurii gu tooni badona abawiriki nadunguratiyo Yerusarema yo bangeyo adu nga 120. Rogo gi gene re, agu abawiriki re kini mo kada nimbedimbedi awiri Mbori na ni awirina Yesu Kristo. (ARomo 8:15-17) I ada nivovo rikaaboro, nga “ga Mbori Yisaraere.” (AGaratio 6:16) Tona ti gu bangeyo nadu tooni re, si adu nga bange gu rikaaboro re nika kio ki da ti 144,000.—Yugoti 7:1-4.

9, 10. Wai rago Pendekote anaayugopai kumbatayo tipa gu dungurati nga ga mbedimbedi aKristano?

⁹ Agu akpakuto nadu ue na agbooro rogoho re nga gu i anaayakaha kubani na kubani barabangiri Yekova ti regbo aPendekote dunduko, si aayugopa gu dungurati nga ga mbedimbedi aKristano. Padu gu kpakuto re na agbooro rogoho nayugo gupai nga, mbedimbedi aKristano nikadu kindi na gu ingapai tiyó i adihe ti Adamu. Wa si avura duwo, i arengbe arengba kindi ka kparakpee fu Yekova riimburu ga Yesu motumo tumorii. (ARomo 5:1, 2) Tipagine agu akpakuto re adu ti ni ue? Si rengbe kadu nga si aayugopa dungura awiri Mbori rogo abadona ue, nga dagba ndikidi aYuda na dagba aGendiria.—AGaratio 3:26-29; AEfeso 2:13-18.

¹⁰ I anaambakada agu akpakuto nadu ue i anaafuhe ti regbo Pendekote re rogo makawa watadu bambata zuzu nganu. Wakina gure a, i nayamba agu aKristano i avunguyo nitoro nga “makawa dagba asabeko yo.” (Yakoba 1:18) I nga gu bambata aboro i ambupai fuyó ti gayó ingapai riimburu gu kure Yesu nauka, na si kini zaki gene fuyó i fu gu unga fuyó zanga kpio ngbangbaturũ yo, nga gu ba i ka zogarago rogoho na Yesu rogo gako Kindo. (1 AKorindo 15:53; AFiripoio 3:20, 21; Yugoti 20:6) Bambeda kumbatayo, i nika guari rogo gu bayo re ka ‘zoga [arikaaboro] ni ngbondo marã’ na ki ‘sisimbi Satana ninduyo.’ (Yugoti 2:26, 27; ARomo 16:20) Gu mokedi nangia Yoane ayaa: “Agi yo re nga agu yo naapeka Wiri Kandoro ku ho ko andu ku ho ni dunduko. I atumo agi yo dagba aboro yo re, i du ni amakawa fu Mbori, na fu Wiri Kandoro a.”—Yugoti 14:4.

Gu Uru Nanyakasipa Bata

11, 12. (a) Gine nanaamanga rogo Uru Dada Ingapai? (b) Gini undo aYisaraere anaagbiaha be agu amotumo i anaagamaha rogo Uru Dada Ingapai?

¹¹ Rogo gu bawe uru nangia ga gu diwi nangia Etana,c aYisaraere anaamanga gu pumbo nanaayugopa wai aboro nika gbia undo be ga Yesu motumo tumorii. Rogo gu uru re, gu rikaaboro re naabayo dunduko anaadunguratiyo kurogo aba tipa Uru Dada Ingapai tipa i fu amotumo tipa yó ka dada gayó ingapai nani.—Pa Amotumo 16:29, 30.

¹² Rogo Uru Dada Ingapai, gbiamotumo aniyere goro bagara yo nga wiri-bara, na ki migidi kureru bara saba barabangiri pipi Sanduki mokido rogo Ziazia Ba Kisusi, rogo gi gene re, si kini du nga ko nafu gu kure re nimotumo fu Yekova. Gu motumo re anidu tipa ka dada gu ingapai nani nangia ga gbiamotumo na ga “gako aborokporo,” na ga aboromotumo gbiati ga aRevi. Fuo gure, gu gbiamotumo re anirogodi ameme ue. Ko aniyere goro guru sa tipa “ga aboro” ingapai. Ko animigidi kureru a barabangiri pipi Sanduki mokido rogo Ziazia Ba Kisusi. Fuo gure, gbiamotumo animoi beko rii gu ue meme na ki kusi gu ingapai nangia ga awiri aYisaraere ku riru. Fuo gure, ko anigasi gu meme re ku ngbakungbo yo u ga na gu ingapai nangia ga gu rikaaboro re ku nvuo yo.—Pa Amotumo 16:3-16, 21, 22.

13. Wai agu apai nanaamanga rogo Uru Dada Ingapai ayugupai kumbatayo tipa Yesu?

¹³ A wa agu amangapai re anaayugopaha kumbatayo, Yesu, nga bakerepa Gbiamotumo, namangasunge na gu ome du ti kureko ka mbupai nani fu aboro ti gayo aingapai. Nibambatapai, ko namangasunge na gu ome du ti kureko tipa gu “bambu toro” nga mbedimbedi aKristano du bangeyo nga 144,000, si kini sa gupai nga Mbori takipande yó niruru aboro na i kini ru tie gigirii barabangiri ko. (1 Petero 2:5; 1 AKorindo 6:11) Gi mangimangipai re adu niyuguyuguhe kumbatayo rogo gu motumo i anaamangaha na babagara. Rogo gi gene re, gene kini zaki fuyó tipa i gbia gu mosoro nga ga raka ngbangbaturũ yo. Niuepai, i namangasunge na gu ome du ti kure Yesu tipa kura dungu aboro nga aguyo duna idapase kuti Yesu, a wa pa tumo na meme anaayugoho. I nika fu nyenye unga auru kpotosende fu agi aboro re nigayo maku, nga gu ũkumbo Adamu na Eva agbarasipaha. (Atambuahe 37:10, 11) Yesu nadia gu ingapai kusayo nga ga ngbatunga aboro na gu kureko nauka, a wa unga meme anaadia gu ingapai kusayo nangia ga aYisaraere ku ngbakungbo yo.—Yesaya 53:4, 5.

Oni Duna Ngbarago Barabangiri Yekova

14, 15. Ginipai nanaamanga ti regbo Pumbo Abasura, na gine si anaatingida aYisaraere nani?

¹⁴ Fuo Uru Dada Ingapai, aYisaraere anaamanga Pumbo Abasura, nangia gu pumbo nga ga ngbarago kisusi fu aYuda rogo garã. (Pa Amotumo 23:34-43) I anaamanga gu pumbo re tona ti rame Etana 15 ki dakuti rameru 21 na i kini digisihe na bakere dunguratise ti rameru 22. Si angia regbo yangara ke ahe na regbo fu tambuahe fu Mbori tipa gako wene sino rogo gamaahe kpaima. Sidu Yekova azinahe ti ni fu agu aboro nanaamanga gu pumbo re ki yaa: “Yekova gaoni Mbori afú maku fu roni rogo gaoni zugazuga ahe, na rogo agu asunge nga ga beroni, oni ki du na ngbarago kpaima.” (Pa Fu Rugute ni Ue he 16:15) Nairiwo gu regbo ngbarago nangiaha re!

¹⁵ Ti regbo gu pumbo re, aYisaraere anaaraka tii abasura tipa arame saba. Pa raka yó tii abasura wa gere anaatingida yó na gupai nga i aima raka mbata tii abasura ho i aduni ngbakungbo yo. Gu pumbo re afu bakere regbo fuyó i berẽkurii ga Yekova weneringise wa ko anaangerafuo yó wa bayo. (Pa Fu Rugute ni Ue he 8:15, 16) Na wa si adu nga aYisaraere dunduko, gu kumukokumuko yó, na gu rungorungo yó, anaaraka tii abasura tipa agu arame saba re, si anaatingida yó na gupai ngawee nibipa gi pumbo re, payo adu kina sa dunduko.—Nemaya 8:14-16.

16. Gine Pumbo Abasura aayugopaha kumbatayo?

¹⁶ Gu Pumbo Nangia ga Abasura angia pumbo ke ahe, nangia pumbo dungura ahe na ngbarago, na si anaayugopa gu ngbarago kumbatayo du rogo dungura agu aboro duna idapase kuti Yesu Kristo. Gu sunge dungura aboro re atona rago Pendekote rogo gu garã nangia 33 F.B.K. ho i ambedi gu ga Yesu abawiriki ni na ziazia toro bangeyo adu 120 tipa i da nipapara “ziazia aboro motumo.” A wa aYisaraere anaaraka tii abasura tipa kina bete arame gbua, kinawo a duhe tipa mbedimbedi aKristano, i ima ino gupai nga i gbua nga “nungunungu aboro” kurogo gi zegino zanga sino Mbori re. I namaabangiriyo tipa ka raka ngbangbaturũ yo. (1 Petero 2:5, 11) Sunge dungura mbedimbedi aKristano nambeda kuti digidoho rogo gi ‘yangara arame’ re, nga gu regbo i adungura yangara mbedimbedi aKristano du dagba aguyo du bangeyo dunduko nga 144,000.—2 Timoteo 3:1.

17, 18. (a) Gine nayugo gupai nga gu kura aboro kinaho kupati mbedimbedi aKristano nika gbia undo be ga Yesu motumo? (b) Ada areme nagbia undo be gu sunge Pumbo Abasura aayugopaha kumbatayo, na gini regbo gu pumbo nga ga ngbarago re nika digo ti ni?

¹⁷ Si ni gupai nagbeberã rani nga, i anaafu abaabagara 70 ti regbo agi apumbo abasura i anaamangaha mbata re. (Pa Geda Aboro 29:12-34) Gu namba nga 70, si nga 7 bara 10, nga agu anamba rogo Ziazia Kekeapai nayugopa rengba he ngbangbaturũ yo na auru kpotosende no. Sidu, gu ngbatunga aboro dunduko naenge ti agu atita Noa nadu 70, i nika gbia undo be ga Yesu motumo. (Bambata Pai 10:1-29) Na ngbanyaa kuti gupai re, gu sunge dungura aboro re ima kio ki kodi aboro dagba rikaaboro dunduko nga aguyo duna idapase kuti Yesu na kidu na maabangirise ka raka rogo paradizo kpotosende.

¹⁸ Gu mokedi nangia Yoane aima bi gi sunge dungura aboro re rogo yuguyugupai. Nibambatapai, ko agi fugo i nitakipande sigira rimo gu yangara aboro du dagba aguyó du 144,000. Fuo gure, ko abi “bakere rimbasa aboro, ka boro ageda nga yo wa sa ya,” i rundu barabangiri Yekova na barabangiri Yesu, “akpe mbira ki du be yo.” Agi aboro re “[akuru] rogo bakere gberãngbi” ki rimi kurugo vovo zegino. I nasungo a rogo gi kuru zegino re tipa bete regbo gbua, na i namaabangiriyo naa kido nga “Wiri Kandoro, . . . adú ni babanda yo, ko angbé ko mbata yo fu yo koyo du agugaabi aime unga ni.” Ti gu regbo re “Mbori awéga aume dunduko ti bangiriyo.” (Yugoti 7:1-10, 14-17) Gu sunge nga ga dungura aboro, nga gu Pumbo Abasura aayugopai tipaha kumbatayo, si nika digo ho i, gbiati agu aboro i ka zingisa yó nika da ni ti rengba ti digido ga Kristo Zogarago Tipa Agarã Kutu.—Yugoti 20:5.

19. Wai ani agbia undo be wisigo agu apumbo aYisaraere anaamangaha?

¹⁹ Ani a wo, ani rengbe arengba ‘kadu na ngbarago’ wa ani aberãkurii gupai gu pumbo nga ga aYuda re aayugopaha. Si nafu kina ngbarago furani ka bi gupai nga Yekova aima fu mboimboipai tipa wai gu gako sangbanebi ko agumbaha Edene yo nika digo, na si nafu kina ngbarago furani a wa ani abihe si nidigi tooni tooni. Gupai ini ani he areme nga gu tita dee Mbori akidohe tipa ko re aima kura na i ki ima mbura gidoko. Ko awere nga Bakindo ngbangbaturũ. Kurigure, dungu agu aboro du bangeyo nga 144,000 aima yugo gupai nga i nga ruru aboro ki da ti kpio. Gini kurapai du koyo kindi? Wai gu sangbanebi re nika digo naabaha dunduko bambeda? Ani nika wisigo agi apai re rogo gu papara kekepai naye fuo gere.

[Gu rukutu kekeapai du bandu kpewaraga yo]

Oni Rengbe ka Sakarogoyo?

• Gine gu kandoro nangia ga Pumbo Susiri ru anaayugopaha kumbatayo?

• Gini sunge dungura aboro gu Pumbo Nangia ga Pendekote aayugopaha kumbatayo?

• Gini papara Uru Dada Ingapai nanaayugopa wai i ka mangasunge na ga Yesu motumo tumorii?

• Rogo gini gene Pumbo Abasura aayugopa sunge dungura aKristano?

[Gu kpiahe du ti kpewaraga 24]

Gupai Namangi: Gupai Si Aayugopaha:

Pumbo Susiri Nisana 14

(Nisana 15-21) tipa Pumbo Susiri

↑

50 Arame

↓

Pumbo Nga ga Fu zende Yesu afu bambata

Aposo (Pendekote) Sivano 6 ahe nigamahe mbedimbedi awirinako fu Yekova

I azingisi Yesu bekpio

Fu akpakuto ue nigamahe

Uru Dada Ingapai

Etana 10

Fu babagara sa na ameme ue

Yesu afu kureko tipa ngbatunga aboro

Pumbo Abasura Etana 15-21 AYisaraere aaraka Dungura

(Dungura aboro, tii abasura na mbedimbedi

Banye) kidu na ngbarago, aKristano

ngbarago ti regbo gbiati

ke ahe, ki fu “bakere rimbasa

abaabagara 70 nigamahe aboro”

[Gu kpiahe du ti kpewaraga 23]

Wakina kure gu wiri kandoro nangia ga Pumbo Susiri, gu kure Yesu nauka nabatasa dungu aboro

[Gu kpiahe du ti kpewaraga 24]

Gu makawa nzunzu ahe i anaafuhe rogo Nisana ti rameru 16, si aayugopa ga Yesu zingabekpio

[Gu kpiahe du ti kpewaraga 25]

Agu akpakuto ue i anaafuhe ti rago Pendekote anaayugopa gu dungurati nga ga mbedimbedi aKristano

[Gu kpiahe du ti kpewaraga 26]

Pumbo Abasura aayugopa gu ngbarago du rogo sunge dungura mbedimbedi aKristano gbiati “bakere rimbasa aboro” dagba rikaaboro dunduko