Wai Rengbe Oni Kadu Nyanyakii Rogo Toroyo?

GU MOKEDI nangia Pauro akepai ki yaa: “Gu berã nga ga borose si nga kpio, ono gu berã nga ga Toro si nga unga na zereda.” (ARomo 8:6) Nibi agi afugo re, gu mokedi nangia Pauro ayugu gupai nga, padu boro nyanyakii rogo toroyo nga gupai nabi kina boro nitini watadu gaani dakutipai te. Nirengo, si nga gupai du bangbanda unga na kpio. Rogo gini gene tie rengbe gu boro du nyanyakii rogo toroyo ka gbia “unga na zereda”? Ringbisihe kuti Ziazia Kekeapai, ngbatunga gu boro re rogo pazereda awere, na kidu na pazereda na Mbori, nyenye unga kini sungudi ní kumbatayo. (ARomo 6:23; AFiripoio 4:7) Si du Yesu aya ti ni wee: “Aboro ngbarago nga agu aboro inipa gu gayó azingo nga ga toro”!—Matayo 5:3, NW.

Pa geda oni gi magazini re nayugo gupai nga, nyemu agu apai nga ga toro kina tironi, na gure nga gu bawenepai si aida boro mangihe. Wa vura duhe wo, gu bipai du aboro nani tipa gu boro du nyanyakii rogo toroyo, si nibadunguhe. Sidu, si rengbe ka iriwo tironi nga: ‘Gini ngbatunga boro nga guni du nyanyakii rogo toroyo? Ginipai boro amangaha kadu nyanyakii rogo toroyo?’

“Ga Kristo Berã”

Fuo fura Pauro tipa pa nyakapa berãpa agu apai nga toro, na agu aundo du ti ni, ko aduna apai kindi ngbako ka gumbaha tipa gu boro naberãpa agu apai nga ga toro. Ko asakirogo ho fu agu aKristano nadu Korinda yo tipa ka kparakapai dagba gu boro nga ga borose ní; nga gu boro namera kina gene agu apai yo nga ga borose, na gu boro nyaki rogo toroyo, ní nga gu boro nabi agu apai nga toro na nyanyaki paha. Pauro akepai ki yaa: “Boroboro [gu boro nga ga borose ní] adianga agu apai nga ga ga Mbori Toro te; bambiko si du ni mumungo pai fu ni.” Ono tipa Pauro tigako, ko ape gupai nga i naino gu boro nyaki rogo toroyo ti gu “ga Kristo berã” du ní nani.—1 AKorindo 2:14-16.

Padu boro na “ga Kristo berã,” rogoho yo nga ‘kadú na gu berã nadu rogo Kristo Yesu yo.’ (ARomo 15:5; AFiripoio 2:5) Ka pehe rogo gu kura fugo, gu boro nyaki rogo toroyo, gani aberã wakina ga Kristo, na ní napeka kina fuoko. (1 Petero 2:21; 4:1) A wa ani kaa pekafuo Kristo, kinawo a ani kaa nyaka rogo toroyo na kini mbedi kupati “unga na zereda.”—ARomo 13:14.

Wai Rengbe Ani ka Ino “ga Kristo Berã”

Ono tie, tipa ani du na ga Kristo berã, si naida ani ini wai Kristo anaaberã. Sidu tie, gu bambatapai si aidaha tipa kadu nyanyakii rogo toroyo nga ka ino ga Kristo berã. Ono wai rengbe boro ka ino berã gu boro naima raka bakuru kusayo auru kpotosende agarã naima susa awere tingbafuoho wa 2000? Ani dinga kpiapai. Ya mo oni awirikinga pangbangaa tipa boro sa rogo gaoni ringara nga guni naraki bakuru kusayo? Si rengbe kadu nga pa geda oni pangbangaa tipa ní nasa gupai nga oni inipai tipa ní. Teketeke a, pa geda oni gu pangbangaa du tipa Yesu nigu nyanyakipa pai si aidaha tipa ka ino gako aberã.—Yoane 17:3.

Nibipa Yesu, abuku wene pangbangaa kinaho biama nga gu Matayo, Marako, Ruka, na Yoane akekehe nafura tipa ko. Pa geda oni agi apangbangaa re sirisiri nika undo roni oni inipai tipa gu gene Kristo anaaberã ngbaha, na gupai nafõ ngbadukoyo ko niimangi apai. Ho oni adia regbo ni ka berãkurii agu apai oni agedaha tipa Yesu, gure nga oni nawisigopa gini ngbatunga boro nangia ko. Ka si vura du vurũ nga oni nabi tironi nga oni aima da nipefuo Kristo, gu ngbatunga gedapai na berãkuriipai re nika undo roni oni naasona asona kindi ‘rogo gu undahe nga ga gaani Gbia nga Batasirani Yesu Kristo.’—2 Petero 3:18.

Niberã ani kurii gipai re, ani wisigingo bete agu apai du rogo abuku Wene Pangbangaa ka inongo ginihe nasa Yesu ko du nyanyakii rogo toroyo. Fuo gure, ani ki sananga tirani na gu sanahe nga, wai rengbe ani ka wirika gu kpiapai Yesu ambuhe furani re?—Yoane 13:15.

Nyaka Rogo Toroyo Gbiati “Zuzu Toro”

Gu bake Wene Pangbangaa nangia Ruka ape gupai nga, ga Mbori ziazia toro azoro kurii Yesu ho i abapatiza ko ni, na ti gu regbo re, “Yesu ki . . . hi be Ziazia Toro.” (Ruka 3:21, 22; 4:1) Tipa Yesu tigako, ko ayugupai fu apefuoko tipa wai nyakipa mbugene fu ziazia toro watadu “ga Mbori Toro” si naayugo gene fuyó. (Bambata Pai 1:2; Ruka 11:9-13) Tipagine nyaki gupai re ti ni? Mbiko ga Mbori toro na ome ti ni tipa ka aria ga boro berã, si natona ka aria berã boro si du wakina ga Kristo. (ARomo 12:1, 2) Ziazia toro nasa boro ní du na agu asino nga “nyemuse, ngbarago, zereda, hipai, mangapase, weneringise, du ngangarã, zera, na rugatise.” Ziazia Kekeapai nayamba agi asino re nga “zuzu Toro,” si i aino ti ni nga boro nyanyakii rogo toroyo. (AGaratio 5:22, 23) Ka gumbaha ngba kura gene, gu boro naberã agu apai nga ga toro, ní nga gu boro nasa ga Mbori toro si ngbe funi mbatayo.

Yesu anaayugo zuzu toro rogo gako sunge tungusapai yo naabaha. Agu asino duwa nyemuse, weneringise, gbiati wene sino, aboro anaabihe abi gbaiga rogo gu gene ko anaamanga fu agu aboro ngbaha payo adu kusende dagba boro. (Matayo 9:36) Nikpiapai, oni kparianga gu pangbangaa gu mokedi nangia Yoane agumbaha. Ani nagedaha kini yaa: “Wa Yesu asusa, ko ki bi kumba i avungu ko na vurari.” Ga Yesu abawiriki aima bi gi kumba re a, ono i abi ko wa boro ingapai. I asana Yesu ki yaa: “Bayugupai, watadu gi kumba re, na avunguko, da namangi gbegberẽpai?” Zavura gako amurakporo, i anaabi ko abi, ono i aini ko nikina bahõ ahe. I asana tiyó niyaa: “A nga ko du re nasungu ki nio he te?” Ono tie, Yesu tigako abi gi kumba re nigu boro si aida i undo ní. Ko afura na gi kumba re na ki husi ko.—Yoane 9:1-8.

Gine gipai re ayugoho furoni tipa agu aberã nga ga Kristo? Bambatapai nga, Yesu aazanganga berãpa agu aboro payo adu kusende te, ko anaamanga payo ninunga. Uepai nga, ko angia bambata boro tipa ka guari ka undo gu kura aboro. Ya mo oni nabi tironi ni agu aboro napefuo gu kpiapai nga ga Yesu? Ya mo oni naabi aboro wa gu Yesu anaabiyo, kini fu gu undo fuyó i aidaha tipa ka undo gayó raka na tipa si fu mamu fuyó i raki kumbatayo? Watadu oni nga ngbatunga agu aboro ninaamanga kina pa agu aboro kii payo, zanga berẽpa agu aboro akionga payo ya? Ka si du nga oni nabi aboro wagu Yesu anaabiyo, gure tie nga oni namanga wenengai nipeka oni fuo gu kpiapai nga ga Yesu.—Atambuahe 72:12-14.

Nyaka Rogo Toroyo Gbiati Kparakpee

Abuku Wene Pangbangaa nayugo gupai furani nga, Yesu anaakpara dedede fu Mbori. (Marako 1:35; Ruka 5:16; 22:41) Ti regbo ga Yesu sunge auru kpotosende ane, ko anaakpara regbo akpara tipa kaa kparakpee. Gu gako bawiriki nangia Matayo akepai tipa ko ki yaa: “Fuo asia ko rimbasa aboro, ko ki kpara ni sa ko ka ndu ku ri bagangara yo ka kparayo.” (Matayo 14:23) Ti agu regbo ko anaandu kurogo gu ba adunga na waawaa rogoho ya tipa ka fura na Bako, Bako anifu ome afu fuko. (Matayo. 26:36-44) Areme, agu aboro naberãpa agu apai nga ga toro, kinawo a i naagbata gene tipa ka fura na Mbori, bambiko i ini gupai nga, gupai re rengbe ka nyakasa gayó pagume na Bakusiyo na ki undoyo i du na kina ngbatunga agu aberã nga ga Kristo.

Yesu anaadia gbanga regbo dedede kuti kparakpee. (Yoane 17:1-26) Nikpiapai, mbata fu ko sia agu akumba nadu 12 nigako abawiriki, ko ‘akuru ki ndu ku [rii] bagangara yo ka kpara yo; ko ki nikpari akpara fu Mbori yuru sasasa.’ (Ruka 6:12) Wa vura duhe nga si nidingisoro furani ani kpari yuru sasasa te, ono agu aboro naberãpa agu apai nga toro napekafuo gu kpiapai nga ga Yesu. Mbata fu manga yó bakere diaberã rogo gayó raka, i nadia regbo tipa ka kpara fu Mbori, kini gbata gene tipa ziazia toro undoyo i mangi gu diaberã nika nyakasa yó rogo toroyo bakere gbe.

Rogo ga Yesu kpee yo, ko ayugu wai furani nzunzu si aida ani wiriki ko rogo gaani akpee. Oni kparianga gupai gu bake Wene Pangbangaa nga Ruka akehe nibipa wai Yesu akparikpee rogo gu yuru nadumbata fu kpiko. Ko akehe ki yaa: ‘Imisiripai ki mangiko ko ki kpari akpara kakaka gbe; gako randimo kidu wakina bakere togoro kure nitotogo kusande.’ (Ruka 22:44) Yesu aima kpara kakaka mbata, ono bara gere, fuo gbia ko tiko na nyanyaki asada rogo gako raka auru kpotosende, ko akpari “kakaka gbe” na Mbori ki gi gako kpee. (AEbere 5:7) Agu aboro naberãpa agu apai nga ga toro, i napeka kina fuo gu kpiapai nga ga Yesu. Ho i agbiatiyó ni na agu aʹasada du nikerehe, i nakpara “kakaka gbe” fu Mbori tipa gako ziazia toro undoyo na ki ngbe fuyó mbatayo.

Wa duhe nirengo nga Yesu angia gu kumba nanaakparakpee dedede, iiriwopai ngaha te ka bi gupai nga gako abawiriki aaida ka peka kina fuoko rogo gi bangiriba re. Ti kura regbo, gako abawiriki asanako ki yaa: “Gbia, mo raba rani ani kpari.” (Ruka 11:1) Wakina gure areme a, agu aboro nabi agu apai nga ga toro na nyanyakipaha, kini kpinyemu gupai nga ga Mbori ziazia toro ngbe fuyó kumbatayo, i napekafuo gu kpiapai nga ga Yesu rogo kparakpee yo. Pa nyaka boro rogo toroyo gbiati kparakpee, si nandu kina sa.

Nyaka Rogo Toroyo Gbiati Tungusa Wene Pangbangaa

Rogo gu buku Wene Pangbangaa Marako akehe, ani nageda pangbangaa yo nga Yesu ahusi dungu aboro tona uru da ku yuru. Rogo gu wiso nadumbata fu gure ho ko aakparakpee ni nisako, gako abawiriki aye fuoko ki ya fuko wee dungu aboro napido ko, isoke i avura kaa pidoko ko husi yó be gayó akaza. Ono tie, Yesu aya fuyó wee: ‘Ani ndú kurogo kura akporo, mi tungusipai yo a.’ Fuoho, Yesu asaki ndu gupai ko ya ti ni fuyó i ndu ka tungusapai rogo gu kura akporo, ki yaa: “Si du i akedi re tipa ha.” (Marako 1:32-38; Ruka 4:43) Wa vura duhe nga pa husa aboro aima du ninyanyakipa pai fu Yesu, tungusa gu wene pangbangaa du tipa ga Mbori Kindo nangia bambatapai fuko.—Marako 1:14, 15.

Areme, fura na aboro tipa ga Mbori Kindo nga gupai i aino agu aboro ti ni duna ga Kristo berã. Agu aboro dunduko naida kadu niga Yesu abawiriki, ko azinahe fuyó ki yaa: “Oni ndú tie, ki sa arikaaboro dunduko ni abawiriki, . . . ki nirugu yo a i niká kuti agu apai dunduko mi arugu roni kuti ni.” (Matayo 28:19, 20) Kurigure, Yesu ayaa: “Gi wene pangbanga nga ga ngbi re i atungusa ha [atungusa] rogo zegino dunduko mbiko ndika fu arikaaboro dũ; ragoho ki digi adiga.” (Matayo 24:14) Wa duhe nga Fugo Mbori nayugo gupai furani nga, gu sunge tungusapai du rogo zegino dunduko, si nisongodisongodihe mbiko ga Mbori ziazia toro, pa koda ani tirani kuti gi sunge re nayugo gupai nga, ani naberãpa agu apai nga ga toro.—Amokedi 1:8.

Tungusa gu pangbangaa nga ga Kindo fu aboro rogo zegino dunduko naida gupai nga amirioni aboro kodi beyo ka manga gu sunge re. (Yoane 17:20, 21) Agu aboro narimiso tiyó kurogo gi sunge re, si aidanga i naaberã kina pa agu apai nga ga toro sa te, ono si naida i mbakaditiyó kurogo riigbu nga gu namangasunge rogo zegino dunduko. Ya mo oni rengbe ka ringbisapa agu aboro oni abiyo i nipekefuo ga Yesu kpiapai na kini tungusi gu wene pangbangaa nga ga Kindo rogo zegino dunduko?

Oni Namanga agu Apai Nga ga Toro?

Rengo ngaha nga, gu kura apai kinaho nayugo gu boro naima nyaka rogo toroyo, ono wai rengbe oni ka ino singia oni namanga agu apai amanga ani nafura tipaha re nga gu rengbe ka undo roni oni nyaki rogo toroyo? Tipa ka inoho, si naida oni sana tironi na agu asanahe nga: ‘Ya mo mi naageda Fugo Mbori dedede nga Ziazia Kekeapai, na kini berẽkurii gupai mi agedaha? Ya mo mi nayugo agu asino nga ga zuzu toro rogo gimi raka? Ya mo mi nigu boro ninaakpara dedede? Ya mo mi nigu boro ninaaida ka koda tire na agu aboro natungusa gu wene pangbangaa nga ga ga Mbori Kindo dedede?’

Ngbatunga gi wisigotise re rengbe ka undo roni oni ini wai du oni rogo toroyo. Ani nazungadi roni oni diberã kina awere tipa “unga na zereda” du nigaoni.—ARomo 8:6; Matayo 7:13, 14; 2 Petero 1:5-11.

[Gu kpiahe du ti kpewaraga 5]

AGU APAI NAYUGOPA NYAKA ROGO TOROYO

◆ Padu boro na nyemu Fogo Mbori

◆ Yugo agu asino nga ga zuzu toro

◆ Kparakpee fu Mbori dedede na ngbaduseyo dunduko

◆ Tungusa gu wene pangbangaa nga ga Kindo fu kura aboro