Ya Mo Oni ‘Kumuko Fu Mbori’?

“Wo du gu ni naiga gani ũkumuko tigani, ka ni akumuko nga fu Mbori ya.”—RUKA 12:21.

1, 2. (a) Gine badungu aboro naambupa kura apai ka mera genehe yo? (b) Ginipai rengbe kadu fu Kristano nikerepai na nikpakarapai?

ROGO dungu aringara rogo zegino, badungu aboro aima digo nimangisunge nibakerehe bambiko i aaida ka gbia bakere aũkumuko. Nikpiapai, rogo gu bawe-na-ribua kama agarã, aboro akoto bara dahabu sendeyo rogo agu aringara nga Australia, South Africa, Kanada, na United States. Si asa gupai nga aboro mbu akpuyo na gayo aboro rogo kura aringara tipa ka ndu kurogo agu aringara i ainongo pai tipaha ya, nangia gu kere aringara dahabu adu rogoho re tipa ka gbia bakere marã. Nirengo, badungu aboro namaa gayo raka ngbapai na ki mbupa kura gayo apai tipa ka gbia agu aũkumuko i akpinyemuhe.

² Wa vura duhe nga dungu aboro areme ameranga gene gbata aũkumuko wa gu namangi ti gu regbo nadu kusayo re te, i namangasunge amanga kakaka tipa ka raka. Tipa ka manga gupai re rogo gi sino raka du awere re, si rengbe kadu nikpakarakpakarapai, na kina ome boro nabata behe. Si nitaatapai boro nibakibangirini tipa kina riahe, rokoo gbiati kporo, bangirini ki go ti gu kura nyanyakipa apai. (ARomo 14:17) Yesu agumba gu sanza nafura nzunzu tipa gi sino du ti aboro re. Gu sanza re nikekehe rogo Ruka 12:16-21.

3. Oni gumbanga gu pangbangaa Yesu agumbaha nga gu du nikekehe rogo Ruka 12:16-21.

³ Yesu agumba gu sanza re ti kina gu bangisa regbo ko azahe ti diangbiti ahe, nga gupai ani awisigihe rogo gu papara kekeapai du mbata fu gere. Fuo Yesu zahe ti diangbiti ahe, ko afura tipa gu kumba rago aangbanga tiko na gu gako asoro nahiki be wene ahe ya, ko ki diberã ka gbandakaha kusayo dunduko ki dudua kura akikindigihe kubaha tipa ka hiisoho na aũkumuko. Wa ko aaberãha tie nga ko nika sungo gbua kita ririahe kini mbirihe, Mbori aya fuko wee ko nika kpi na kura boro kia ki rogodi gi gako wene ahe re. Fuo gumba Yesu gipai re, ko adigisi fugoko na gupai nga: “Wo du gu ni naiga gani ũkumuko tigani, ka ni akumuko nga fu Mbori ya.” (Ruka 12:21) Ginipai rengbe ani ka wirikaha be gi sanza re? Wai rengbe gupai re ka undo rani rogo gaani raka?

Gu Kumba Pai Aafuda Ko

4. Gini ngbatunga kumba du Yesu afura tipa ko re?

⁴ Gu sanza Yesu agumbaha re, badungu aboro naima inoho wenengai. Ani nabi gupai nga Yesu atona gu pangbangaa re niya ko wee: “Gu bino nga ga kumukokumuko kumba nazuku gbe.” Yesu aayanga wee gu kumba re agbia gako aũkumuko mbiko biriki te. Ko aangianga gbegberẽ boro watadu iradii te. Gupai Yesu agumbaha re nayugo gupai nirengo nga, gu kumba re amangisunge amanga nibeko tipa ka gbia agu ahe nadu beko re. Ko angia gu boro naberẽ wenengai, ki mangisunge tipa gako raka du niwenehe kumbatayo, ka gako aborokporo arungongo ya. Ko angia gu kumba naamangasunge wenengai tipa ka ngerafuo gako aboro, bambiko ga kumba sunge du ngaha.

5. Ginipai naafuda gu kumba Yesu agumba pako rogo gako sanza?

⁵ Yesu ayawee kumukokumuko boro du nangia gu kumba re, si kini yugu gupai nga ko aima duna ahe beko nibakerehe mbata fu ko sopo gu bino ahe aidi rogoho nibakerehe re. Ono tie, a wa Yesu agumbaha, pai kinaho naafuda gu kumba re. Agu ahe ko aruhe rogo gako ati, si aidi nibakerehe gbe susi wai ko aaidaha, na ka asoro adunga ka ko moihe kurogoho ya. Ginipai tie ka ko amangihe?

6. Gini akpakarapai badungu ga Yekova amoyambu naagbiatiyo nani nga gu si naaida i diberã tipaha?

⁶ Badungu ga Yekova amoyambu areme nagbiatiyo na apai wakina gu nadu tipa gu irakumuko re. Ndikidi aKristano naʹasada tiyó kaa mangasunge kakaka, kini mangihe sirisiri, na ka i adunga ni airabiriki ya. (AKorosaio 3:22, 23) Singia kura boro du i amangasunge funi, watadu kina gayo sunge du nitiyo i amangaha, i namangaha dedede na zuzuhe ti ni, na kini mangihe a wenengai gbe. Ho boro aida ni ka dia yó tipa sunge watadu ka tumbasi payo kuari, gu regbo re gu si aida i mangi diaberã. Ya mo si naida i idi na gupai re tipa kaa gbia bakere marã? Kinawo a, badungu agu aDezire Yekova nga paranga aboro, i nasusa asusa wenengai rogo wirikapai sukuru yo. Nisangbanaha, i rengbe ka dia yó tipa i ndu ka wirikapai rogo kura kikii sukuru sa zanga i tumo marãha. Ya mo si naida i guari gbua ki idi na gu gamahe i nafuhe fuyó re, zanga i berẽ mbata wenengai?

7. Ginipai gu kumba Yesu agumba pako re amangihe sa gupai naafuda ko?

⁷ Ani karaganga tirani berewe kuti ga Yesu sanza. Ginipai gu kumba re amangihe ho gako ahe aidi ni ka asoro na agbamu adunga tipaha ya? Ko adiberã tipa ka gburuwa gu gako asoro naduho mbata tipa ka dudua akikindigihe tipa gako ahe ki rengbe rogoho dunduko. Gupai ko adiberã ka mangaha re, si adu bangiriko wa si nika mbakada bako, ka hee adunga ho berewe ko aidaha ya. Si du ko aya ti ni wee: “Mi ki ya fu mbisimore, Mbisimore, dungu ahe be ro ni igiigi he rengbe na dungu agarã; mo súngu gbua, ki ta ri he, ki nimbiri he, ki ningi angi.”—Ruka 12:19.

Ko Angia “Iramungo”

8. Gini nyanyakipa pai gu kumba Yesu afura tipa ko re aamaanga berãko tipaha ya?

⁸ Wa gu kumba re aaberãha nga gako ahe nika mbakada bako, si aadunga wo tie te. Gako ahe arengbe arengba ka mbakada bako, ono gupai naakpa koyo angia nyanyakipa pai. Si nga ga Mbori pai aadunga rogokoyo te. Ko aaberã tipa kina tiko, naapa wai ko nika sungo zezeredii, kita rihe, kini mbirihe, na kini ngi. Ko aberẽ gupai tigako nga, wa du ko na “dungu ahe” beko, kinawo a ko nika raka tipa “dungu agarã.” Ono tie, ko aakido ku korokoro mangu yo. A wa Yesu aima gumbaha mbata ki yaa, “i aringbisa nga ungaboro na gani ahe te.” (Ruka 12:15) Nikina gu yuru re, gu kumba re akpi, ki mbu gako ahe, bambiko Mbori aya fuko wee: “Iramungo nga mo! I adía mbisimoro adia ni gi yuru re; agi ahe mbakadi mo ho re, iraha nikangia da?”—Ruka 12:20.

9. Tipagine Mbori ayambu gu kumba Yesu afura tipa ko re ti ni nga iramungo?

⁹ Ane gudu memepai ni rogo ga Yesu sanza. Mbori ayambu gu kumba re nga iramungo. Buku sakarogo afugoyo sa nayawee gu fugo Giriki i asaha kurogo pa-Zande nga “iramungo,” si nayugopa “gu boro adunga na rugatinapai ya.” (Exegetical Dictionary of the New Testament) Si nayawee rogo gi sanza Yesu agumbaha re, Mbori ayambu gu kumba re nga iramungo mbiko gu “zanga rugatinapai ko adu nani wa ko aso kua gude mburu ku vuse yo.” Gu fugo nga iramungo re, anga si tipa gu boro nga boro zirĩ berã te, ono si tipa “gu boro aaidanga kaa kido kuti Mbori ya.” Gupai Yesu agumbaha tipa gu irakumuko re natingida rani na gupai ko agumbaha berewe kusa fu agu aKristano nadu Raodikiya yo ki yaa: “Ya mo, Mi kumuko, ki dungura ũkumuko, zingohe amanga nga re te; ka mo aina nga ha ya rungorungo boro nga mo gbe, adu nga na he be ro ya, nga iravurari, nga kundiri boro a, ya.”—Yugoti 3:17.

10. Tipagine si aidanga boro kido ti ni kuti gu “dungu ahe” du beni ki ya si nika sani ní raki tipa “dungu agarã” ya?

¹⁰ Si naida ani berẽkurii gupai re wenengai. Ya mo si naida ani duwa gu kumba re, kini mangisunge kakaka tipa ka gbia “dungu ahe,” ono ka ani amanganga gupai si aida ani mangihe tipa ka raka tipa “dungu agarã” ya? (Yoane 3:16; 17:3) Ziazia Kekeapai nayaa: “Kumuko au nga ti uru dingidingi ngbaduse te,” na “gu ni nakida kuti kina gani aũkumuko apáya apaya.” (Asanza 11:4, 28) Sidu tie, Yesu adigisi gako sanza ki yaa: “Wo du gu ni naiga gani ũkumuko tigani, ka ni akumuko nga fu Mbori ya.”—Ruka 12:21.

11. Tipagine duhe ti ni nikungbopai tipa boro nikido kuti gani aũkumuko?

¹¹ Ho Yesu ayani wee “wo du gu ni . . . ,” gupai ko aagumbaha nga gupai namangi tipa gu kumukokumuko kumba re, kinaha nika manga tipa agu aboro dunduko nakido kina kuti gayo aũkumuko na kini moibangiriyo kina kuti ni. ‘Igo aũkumuko tipa tise,’ irairapai ngaha te, ono gupai gberẽ nga ka zanga ‘kumuko fu Mbori.’ Gu bawiriki nangia Yakoba afu rugute wakina ngbatunga gure ho ko akepai ni ki yaa: “Oni rú nga, agu roni naya, ‘Ani andú ku rogo gu bakporo watadu areme na gba, ki nye yo ti garã sa, ki nibagi ahe, ki nidungura ũkumuko.’ Ono oni aina nga gu pai nikamanga gba te. Gine nga ungaroni?” Ginipai tie si aida i gumbaha? “Gi ka oni gumba re, ‘Ka Gbia idi he, ani ata du ni ungarani, ki nimangi gere na gure.’” (Yakoba 4:13-15) Ka boro vura du nikere irakumuko vurũ, regbo kinaho agu ahe re nikaa dunga na sunge ti ni ya, kinagu ka ní kumuko fu Mbori. Ono gu fugo nga ‘kumuko fu Mbori,’ rogoyo nga gine?

Kumuko fu Mbori

12. Pa manga ani ginipai nika sa rani ani kumuko fu Mbori?

¹² Fugo Yesu nayugoho nga, bakere kparakparapai du bangbanda pa kumuko boro fu Mbori naapa dungura ní aũkumuko tipa kina tiní. Si ki tadu were, gupai Yesu aagumbaha nzunzu nga, gupai si aida ani naabakabangirani tipaha rogo raka yo nga pa dungura aũkumuko, kita sungo kini rihe kini mbirihe te. Ono gupai si aidaha nga, ani mangisunge na agu ahe du berani tipa ka nyakasa gaani pagume na Yekova. Ka ani mangihe wo, si nika sa rani ani kumuko fu Mbori, bambiko si nika zaka ngbadimo furani tipa ani gbia gako amaku. Ziazia Kekeapai naya furani wee: “Gu maku nga ga Yekova nakumukosi boro, ko nagbia nga rungo kuti ni te.”—Asanza 10:22.

13. Wai ga Yekova maku ‘akumukosi boro’?

¹³ Ho Yekova afu agamahe ni fu gako aboro, ko nafu kina gu ngbaa kisusi. (Yakoba 1:17) Nikpiapai, ho Yekova afu ringara ni fu aYisaraere, gu ringara re “adu na mamuanya [rogoho] na nzeme anyege kpaima.” Wa vura duhe nga Ezipeta aduadu a na mamuanyaa rogoho na nzeme anyege kpaima, kurapai kinaho nasa gu ringara Yekova afuhe fu aYisaraere si dukia ti Ezipeta. Moize aya fu aYisaraere wee gu ringara re, ‘Yekova nga gayo Mbori du nabandaha.’ Ka gumbaha ngba kura gene, ka gayó ahe aazugo bambiko Yekova du kaa ngerafuo yó. Ti agu aregbo dunduko aYisaraere adu niruruyo fu Yekova, Yekova afu maku fuyó nibakerehe gbe, na i kini raki gu raka nadu nibawenehe susi gu raka nangia ga agu arikaaboro dunduko naaraka patiyo. Nirengo, gu maku nga ga Yekova, si “nakumukosi boro”!—Pa Geda Aboro 16:13; Pa Fu Rugute ni Ue he 4:5-8; 11:8-15.

14. Gini weneapai namanga fu agu aboro nakumuko fu Mbori?

¹⁴ Gu fugo nga ‘kumuko fu Mbori,’ kura rogoyo a nga “kumuko bangiri Mbori.” (Today’s English Version) Agu aboro kumuko rogo borose yo, i nabakabangiriyo naapa wai rengbe yó kadu bangiri aboro. Gipai re nayugotihe rogo gayo gene raka. I naida ka gbeberã aboro koyo du yó ni na guhe Ziazia Kekeapai ayambaha nga “gu ũmosangi enda nga ga unga.” (1 Yoane 2:16) Ono tipa agu aboro tigayo kumuko fu Mbori, Mbori naida naayó, kini yugu gako weneringise tipa yó nibakerehe gbe, na i kidu na dawedawe pagume naako. Padu yó rogo bangiriba wa gure nasa ngbarago tiyó, na i kini bihe nga i nibandabanda yó. Nga gupai aũkumuko arengbanga ka mangaha fu boro ya. (Yesaya 40:11) Gu sanahe nakura tie nga, Ginipai si aida ani mangihe tipa ka kumuko bangiri Mbori?

Kumuko Bangiri Mbori

15. Ginipai si aida ani mangihe tipa ka kumuko fu Mbori?

¹⁵ Rogo gu sanza Yesu agumbaha, gu kumba re amangisunge nyanyakii tipa kadu na badungu ahe beko, na Mbori aya tiko wee iramungo nangia ko. Ono tie, tipa ka kumuko fu Mbori, si naida ani mangi asadatise tipa kaa mangasunge nyanyakii na kini mangi agu asunge wenengai kiipaha bangiri Mbori. Sunge sa dagba agi asunge re nga gu Yesu azinahe furani tipaha ki yaa: “Oni ndú tie, ki sa arikaaboro dunduko ni abawiriki.” (Matayo 28:19) Ka ani mangisunge na gu regbo du berani, omerani, gbiati gaani tatamana tipa ka undo sunge tungusapa ga Mbori Kindo na sunge sa aboro ni abawiriki, angianga tipa ka mbakada gaani raka ya, gure wa ka i ya ani naigo marã ku beenge yo. Agu aboro namangihe wo, i aima gbia mosoro nibakerehe be Yekova, a wa agu apangbangaa du kusende re ayugoho.—Asanza 19:17.

16, 17. Oni gumbanga agu apangbangaa nayugopa gu generaka nasa boro ní kumuko bangiri Mbori?

¹⁶ Oni bingo gupai nadu tipa kura Kristano sa Asia yo. Ko aamanga gu sunge nga ga mbakada akompiuta, na i kini fu bakere marã fuko. Ono tie, gako sunge asa gupai nga ka regbo dunga beko tipa kura apai ya, na si ki sa ko ko du nirungorungo boro rogo toroyo. Niyangaraha, kuba gupai nga ko asaditiko ka sona kina kumbatayo rogo gako sunge, ko ambu gu sunge re, ki tona kaa baga riahe (ice cream) bangiri gene tipa wa ka ko rengbe kadu na bakere regbo beko tipa agu apai nga ga toro. Agu akurako i aamangasunge naayó mbata, i aasawia ko. Ono ginipai nangia sangbana gako diaberã? Ko ayaa: ‘Nirengo, mi aduna marã bere susi gu naadu bere ho mi aamangasunge ni na akompiuta. Mi na ngbarago awere bambiko berãre nifudifudihe berewe wa gu si adu mbata te. Gbe, mi nabi tire awere mbembedii koyo du Yekova ni.’ Gi ariapai gi Kristano amangihe re asa gupai nga ko tona mangasunge ga Mbori Kindo ti aregbo dũ, na ko namangasunge awere rogo gu be-basunge nga ga aDezire Yekova du rogo gako ringara. Nirengo, ga Yekova maku “nakumukosi boro” akumukosi.

¹⁷ Gu kura kpiapai berewe tigaha, si tipa gu dee avunguri anaabi bakere wirikapai na nyanyakipaha gbe. Ri amangi gu bakere sukuru nga universite France yo, Mexico yo, na Switzerland yo, na si kidu nga ri nika gbia wene sunge-marã bambeda. Ri ayaa: ‘Mi aduna diabese; aboro kini irisire wenengai, na kini mangi weneapai fere. Ono hee aadunga bere rogo toroyo te.’ Fuoho, ri awirikipai tipa Yekova. Fugori nayaa: “Wa mi aasona rogo toroyo, padu mi na nyemu ka sa ngbarago ti Yekova na ka manga bete wenepai fuko wa ko amangi weneapai a fere asa re mi bi gu gene nzunzu si aida mi ndu ngbaha, nga gu gene nga ga tungusapai ti aregbo dũ.” Ri ambu gu sunge ri aamangaha kini zi bakere marã, na fuo bete regbo tooni, ri ki zi bapatiza. Rogo agu agarã 20 susi kusayo re, ri naamangasunge tungusapai ti aregbo dũ na bakere ngbarago. Ri nayaa: ‘Kura aboro naberãha nga mi agberesi gimi inohe agberesa gbua, ono gupai i abihe nga mi na bakere ngbarago, na i na ngbarago ka bi gu gene mi araka ngbaha. Mi naakpara na aʹuru dunduko fu Yekova tipa ko undo re mi duna umbasitise tipa wa ka ko idi na mi.’

18. A wa Pauro amangihe, wai rengbe ani ka kumuko fu Mbori?

¹⁸ Wene sunge adu kinaho naapido Saura, nga gu kumba nada kusa nigu mokedi nga Pauro. Ono tie, ko akepai kusa ki yaa: “Ni rengo, ahe dunduko si adu nga bangire ni he te mbiko gu wene pai nga inida Kristo Yesu gi Gbia.” (AFiripoio 3:7, 8) Tipa Pauro, agu aũkumuko ko agbiaha mbiko Kristo, si aima susa agu aũkumuko dunduko rengbe boro ka gbiaha rogo gi zegino re. Teketeke a, ka ani mbupa gu kura gaani apai ki umbasipa tirani, kini pekefuo gu raka nga ga sinombori, ani rengbe arengba ka raka gu raka nasa boro ní kumuko bangiri Mbori. Fugo Mbori nakido rani kini yaa: “Gu mosoro nga ga umbasitise na gunde ti Yekova nga aũkumuko na irisa na unga.”—Asanza 22:4.

Oni Rengbe ka Sakarogoyo?

• Ginipai naafuda gu kumba Yesu agumba pako rogo gako sanza?

• Tipagine Mbori ayambu gu irakumuko Yesu afura tipa ko re ti ni nga iramungo?

• Gine nga kumuko fu Mbori?

• Wai rengbe ani ka kumuko fu Mbori?

[Gu kpiahe du ti kpewaraga 30]

“Gu maku nga ga Yekova nakumukosi boro”