Oni Duna Agu Asino Rengbe Ka Undo Roni Oni Sa Aboro Ni Abawiriki
“Oni ndú . . . ki sa arikaaboro dunduko ni abawiriki.”—MATAYO 28:19.
1. Gini abirĩ-sunge gbiati asino si aidi bete gu ga Yekova amoyambu nadumbata du nani?
SI NAAIDA gupai ti kura aregbo nga, ga Yekova amoyambu wiriki agu abirĩ-sunge awirika gbiati agu asino rengbe ka undoyo i mangi gupai ko akpinyemuhe. Nikpiapai, Abarayama na Sara ambu gu kumukokumuko ringara nangia Ura si kini idi i du na agu asino rengbe ka sa yó i naaraka tii abamburokoo. (AEbere 11:8, 9, 15) Tipa Yosua ngbembatayo fu aYisaraere kurogo Ringara Mokido, si aidi ko du na wingbaduse, na kini kido kuti Yekova na ki ini gako aNdiko a. (Yosua 1:7-9) Na ka si vura du nga aBasarere na Oriaba aima du mbata na birĩ-sunge tiyó, ga Mbori toro akiisihe tipa i rengbe ka mangasunge dua banye wenengai na kini ngerekurii sungehe.—Gate 31:1-11.
2. Gini asanahe ani ka wisigoho nibipa sunge sa aboro ni abawiriki?
2 Fuo dungu akama agarã kusa, Yesu Kristo afu sunge fu apefuoko ki yaa: “Oni ndú . . . ki sa arikaaboro dunduko ni abawiriki, . . . ki nirugu yo a i niká kuti agu apai dunduko mi arugu roni kuti ni.” (Matayo 28:19, 20) Anga regbo ho i afu sunge fu aboro wa gi Yesu afuhe re te. Gini asino si aida boro du nani tipa ka mangasunge sa aboro ni abawiriki? Wai rengbe ani kadu na agu asino re?
Oni Duna Bakere Nyemu Mbori
3. Gu sunge du berani nga ga sa aboro ni abawiriki, si nafu gini momu furani?
3 Tipa ani rengbe ka fura na aboro na kini zomia yó i naairiso ndikidi Mbori, si naida ani duna bakere nyemuko tirani. AYisaraere arengbe ka yugopa gayo nyemu Mbori nindu yó kuti gako andiko, kini fu agu amotumo ko anaaida nani, na kini tambuako rogo abia yo. (Pa Fu Rugute ni Ue he 10:12, 13; 30:19, 20; Atambuahe 21:13; 96:1, 2; 138:5) Wangia ani agu aboro nasa aboro ni abawiriki, ani nandu a kina kuti ga Mbori andiko, na ani nayugo gaani nyemuse tipa Mbori a nifura ani tipa ko fu aboro na tipa gako aringbisapai. Si naida ani fura ngba gu gene nika sa aboro i idi na gupai ani agumbaha, kini siaka afugo asiaka tipa ka gumbapa gaani aberã tipa gu maabangirise Mbori nafuhe furani.—1 ATesaroniko 1:5; 1 Petero 3:15.
4. Tipagine Yesu agbia ngbarago ti ni mbiko yugo ko pai fu aboro tipa Yekova?
4 Wa Yesu adu na bakere nyemu Yekova tiko, ko anaagbia bakere ngbarago mbiko furako tipa ga Mbori aringbisapai, ga Mbori Kindo, gbiati ndikidi irisombori. (Ruka 8:1; Yoane 4:23, 24, 31) Yesu agumba gupai nirengo nga: “Gi riahe nga manga kina gu pai gu ko akpi nyemu he nakedi re, mi nyasi gako sunge.” (Yoane 4:34) Gupai bake apapara Atambuahe agumbaha, si adu tipa Yesu. Ko ayaa: “‘Ako gi Mbori, rago ngba ti re ka amanga gu pai ngba angba ti ro; ii, ga rugute du kpotore yo.’ Mi ataki pande pa ga rurupai, dagba bakere rimbasa agu aboro; mo ngere, mi akisa nga ngbare te, Ako Yekova mo ini he.”—Atambuahe 40:8, 9; AEbere 10:7-10.
5, 6. Gini bangua sino si aida boro du nani tipa ka sa aboro ni abawiriki?
5 Ti kura aregbo, nyemu Mbori nasa gu vovo aboro wiriki gu rengo nga ga Ziazia Kekeapai barambeda i fura tipa Ko na gako Kindo ngba gu gene nasa aboro i idi aida ka wisigo Ziazia Kekeapai. (Yoane 1:41) Nyemu Mbori nga gu banguapai nafõngbaduraniyo ani mangisunge sa aboro ni abawiriki. Sidu tie, si naida ani mbu gu nyemuse re si du niungaha ti aregbo dunduko nigeda ani Fugo Mbori dedede na kini berẽkuriihe.—1 Timoteo 4:6, 15; Yugoti 2:4.
6 Boro ho rengbe ka ti kango na gupai nga nyemu Yekova du nasa Yesu Kristo ko du nizaaza bayugupai te. Ono anga kinaha sa nasa gupai nga gako tungusapai tipa Kindo kusi wene asangbanaha te. Ono gini kurapai tie nasa Yesu ko du na diabese rogo sunge sa aboro ni abawiriki?
Oni Berẽpa Aboro
7, 8. Wai Yesu anaabi aboro?
7 Yesu anaaberãpa aboro aberã, na kini yugu gako nyemuse tipa yó. Zavura ti gu regbo ko adu kindi ngbangbaturũ yo niga Mbori “bangbasia boro sunge,” rago aangba tiko mbiko awiri aboro. (Asanza 8:30, 31) Wa ko aye ku kpotosende no niboro, ko adu na nunga aboro tiko, kini fu ongoda fu aguyo naaye koyo du ko ni. (Matayo 11:28-30) Yesu adu na kina gu bangisa nyemuse gbiati nunga du ti Yekova, na gipai re nagbe aboro i ye ka iriso bangisa ndikidi Mbori. Aboro ngba arikayo dunduko anaaye koyo du Yesu ni ka gia gupai ko anaagumbaha bambiko ko ayugu gako nyemuse tipa yo, na kini berẽpa agu apai nafuda yó.—Ruka 7:36-50; 18:15-17; 19:1-10.
8 Ho kumba asana Yesu ni tipa gupai ka ko mangihe ka gbia nyenye unga, ‘Yesu atabi ko, nikpinyemu ko.’ (Marako 10:17-21) Ani nagedapai tipa gu kura aboro Yesu ayugupai fuyó Betania yo kini yaa: “Yesu anakpi nyemu Marata akpi, na wirinari, na Razaro.” (Yoane 11:1, 5) Yesu anaaberãpa aboro bakere gbe, sidu, ko kini di regbo ka yugopai fuyó, zavura ho si anaaida gupai ni nga ko ongodi vurũ. (Marako 6:30-34) Ngbatunga gu bakere nyemuse tipa aboro re nasa Yesu ko du na diabese susi aboro dunduko rogo gbe aboro kurogo ndikidi irisombori.
9. Gini sino Pauro adu nani wa ko aamangasunge sa aboro ni abawiriki?
9 Gu mokedi nangia Pauro anaaberã a nyanyakii tipa agu aboro ko anaatungusapai fuyó. Nikpiapai, ko aya fu agu aboro nada ni aKristano Tesaronike yo wee: ‘Ani akpinyemu roni akpi, anga pa fu kina ga Mbori wene pangbangaa furoni nangba tirani sa te, ono mbisimorani a, bambiko oni aye ka ngba tirani gbe.’ Gu nyemuse Pauro adu nani re asa kura aboro Tesaronike yo i ‘sa tiyó ti kpiaahe koyo du Mbori ni.’ (1 ATesaroniko 1:9; 2:8) Ka ani aberãpa aboro a wa aYesu na Pauro adu, ani gbia gu ngbarago agbia i agbiaha ho i abi wene pangbangaa ni si nirimi ku ngbadu agu aboro yo “nadu na nyemu gbia nyenye unga.”—Amokedi 13:48, NW.
Ani Mbupa Kura Gaani Apai Ambu
10, 11. Tipagine si aida ani mbupa kura gaani apai ambu ti ni ho ani aida ni ka sa aboro ni abawiriki?
10 Agu abatungusipai duna diabese rogo sunge sa aboro ni abawiriki, i nambupa kura gayo apai ambu. I abingo pa dungura aũkumuko nigu bambatapai nyakipaha te. Nirengo, Yesu aya fu gako abawiriki wee: “Kpakara rima ku rogo ga Mbori ngbi yo akparaka fu agu yo kumuko akumuko gbe!” Gipai re airiwo airiwo ti gako abawiriki, ono Yesu agbia gupai berewe kuti ni nga: “Agude na kpakara rima ku rogo ga Mbori ngbi yo fu agu yo nafu tiyo ku be ũkumuko! Ka kameri kuru rogo yaro mbereke yo si ka ipi ti rima kumukokumuko boro ku rogo ga Mbori ngbi yo.” (Marako 10:23-25) Yesu ayawee si niwenepai gako abawiriki niraki taata raka, tipa i ki rengbe ka maaberã yo wenengai sa sunge sa aboro ni abawiriki. (Matayo 6:22-24, 33) Wai pa mbu ani kura gaani apai aundo rani ani sa aboro ni abawiriki?
11 Tipa ka yugo agu apai dunduko Yesu ayuguhe fu gako abawiriki, si naida bakere asadatise. Gu boro naida ka sa aboro ni abawiriki, ní naʹasada tiní ka nungusa wisigo Ziazia Kekeapai rogo aposo dunduko na gu boro du nyemu rengo ti ni. Gu kura atakipande Kindo kinaho naima zora ti gu sunge-marã boro amangaha tona wiso ki da ku nyemu, ki tona gu boro amangaha tipa kina bete asaa gbua, tipa regbo rengbe kadu beyo nibakerehe i gbia agu aboro duna nyemu rengo tiyó. Badungu akutu aKristano wiriki fugo kura aboro tipa ka gbia kura ngbatunga aboro rogo gayo ringara na wene pangbangaa. Kura abatungusipai aima mbu akpuyo ki ga kurogo kura arago watadu kurogo kura aringara tipa ka mangasunge ke ahe bakere gbe. (Matayo 9:37, 38) Agi apai re dunduko naida boro mbupa kura gani apai ambu. Ono tie, badungu apai si aidaha tipa kadu na diabese rogo sunge sa aboro ni abawiriki.
Oni Duna Zerangbaduse, Ono Ka Oni Gberesinga Regbo Ya
12, 13. Tipagine nyakipa zerangbaduse ti ni rogo sunge sa aboro ni abawiriki?
12 Zerangbaduse nga gu kurapai naundo rani ani sa aboro ni abawiriki. Gu pangbangaa du ngbarani nga ga aKristano si naida ani tungusihe niipo, ono si nadia bakere regbo tipa ka sa aboro ni abawiriki, na si naida zerangbaduse. (1 AKorindo 7:29) Yesu aabatarianga kuti wirinako nangia Yakoba te. Wa si avura du nga Yakoba aima rugatiko wenengai naapa gu sunge tungusapai Yesu aamangaha, apai kinaho nadingiso ko tipa gbanga regbo ka ko adanga ni bawiriki ya. (Yoane 7:5) Wa gopai ayugoho, ti kina gu wiri guru regbo nadu bangbanda kpio Yesu na Pendekote rogo gu garã nangia 33 F.B.K., Yakoba ada nibawiriki, bambiko Ziazia Kekeapai nayugo mboimboi gupai nga i adunguratiyo na nako, awirinako, gbiati amokedi tipa kpara fu Mbori. (Amokedi 1:13, 14) Yakoba asono kumbatayo wenengai rogo toroyo, kidu na badungu asunge beko kusa rogo gu dungurati nga ga aKristano.—Amokedi 15:13; 1 AKorindo 15:7.
13 Wakina abasopobino, aKristano narũ agu ahe ninaasona yee, nga giarogo Fugo Mbori yo, nyemu Yekova, gbiati gu sino duwa ga Kristo. Gipai re naida zerangbaduse, watadu hipai. Yakoba akepai ki yaa: “Oni hí pai, awirina, daho Gbia ka yega ni. Oni ngère, babandaati [“basopobino,” NW] nasunguda wene zuzu kpotosende, ki nihi pai pati he gbe, daho bambata mai ka nada ha ni na yangara ha a. Oni hi pai a tigaoni; oni nyákasi ngbaduroni, bambiko rago yega Gbia nambeda.” (Yakoba 5:7, 8) Yakoba azungodi akurako aidipase i ‘hipai daho gbia ka ye ni.’ Ho ga Yesu abawiriki anaagianga rogo gu kura apai yo ni ya, ko anisakirogoyo fuyó nizerangbaduse. (Matayo 13:10-23; Ruka 19:11; 21:7; Amokedi 1:6-8) Awere tie wa duhe nga Gbia aima ye na ome Kindo beko, si naida ani du na kina gu bangisa hipai re wa ani aʹasada tirani ka sa aboro ni abawiriki. Agu aboro nada ni apefuo Yesu ti gi gaani regbo re, si naida i yugupai fuyó nizerangbaduse.—Yoane 14:9.
14. Wa vura duhe nga si naida ani duna zerangbaduse, wai si aida ani mangisunge na gaani regbo nitatamana wa ani asa aboro ni abawiriki?
14 Ka ani vura du na zerangbaduse, ga Mbori pai akusanga zuzuhe ngbadu badungu agu aboro yo ani natona wisigo Ziazia Kekeapai naayó te. (Matayo 13:18-23) Fuo manga ani bakere asadatise tipa ka undo ngbatunga agu aboro re, ono ka i asonanga kumbatayo wa gu tooni ya, si naida ani mbu dia regbo naayó ki ndu ka gbata agu aboro nika bi gu rengo nga ga Ziazia Kekeapai na kikiipaha. (Batungusipai 3:1, 6) Zavura agu aboro nabi gu rengo abi nga ga Ziazia Kekeapai na kikiipaha, i naida kura undo aida berewe tipa ka aria gayo aberã, asinoyó, gbiati agu apai i naperesipaha mbatayo rogo gayo raka. Ani na zerangbaduse, a wa Yesu adu nani koyo du gako abawiriki ni naadunga na ruru bipai niipo ya.—Marako 9:33-37; 10:35-45.
Oni Duna Birĩ Yugopai
15, 16. Tipagine du gumbapai ziazia gbiati wene mbakadatise ti ni ninyanyakipa apai ho ani asa aboro ni ni abawiriki?
15 Nyemu Mbori, berãpa aboro, mbupa kura apai, gbiati zerangbaduse, si nga gu nyanyakipa apai si aidaha tipa kadu na diabese rogo sunge sa aboro ni abawiriki. Ono si naida ani duadu a na abirĩ yugopai, bambiko si nika sa rani ani sakirogo apai yo fu boro ziazia ngba taata gene. Nikpiapai, badungu apai gu Bawene Bayugupai nangia Yesu Kristo agumbaha na si kidu na bakere ome ti ni bambiko si adu taata tipa ka giarogoyo. Si nawira gupai nga, oni ima tingidapa agu apai Yesu apehe ki yaa: “Oni dúngura ũkumuko ni gaoni ku ngbangbaturũ yo.” “Ka oni fú nga gu he du ni ziazia ha fu aango ya.” “I asapa ngbanga fu tatamana mbiko sabehe.” “Agu ahe nga ga Kaisara . . . oni nifú kina ha fu Kaisara; agu ahe nga ga Mbori oni nifú kina ha fu Mbori.” (Matayo 6:20; 7:6; 11:19; 22:21) Ono anga Yesu aagumba apai nikina guruguruhe te. Ko anaafura ziazia, na kini sakirogo apai yo ho si aniidi ni ko mangihe wo. Wai rengbe oni ka pekafuo ga Yesu gene yugopai?
16 Mbakadatise wenengai rengbe ka sa boro fugo ní du nitaataha na kidu ziazia. Gu batungusipai ambakadanga tiní wenengai ya, ní nafura nibakerehe gbe. Ní rengbe ka gumba memeapai ki kodi gu kura badungu apai kurogoho, kini gumba agu apai dunduko ní nainihe tipa gupai i awisigoho re. Ono tipa gu boro mbakadi tiní wenengai, ní naberã tipa gu boro ní afura na ní, ki berẽkurii gupai i afura tipaha, na ki gumba kina gupai si aidaha nzunzu ngba gu gene ní nika giarogoyo agia. (Asanza 15:28; 1 AKorindo 2:1, 2) Ní naberãpa agu apai gu boro re naima inoho, ki bi gu si aida ní nyakasihe ti regbo gu wisigopai re. Gu batungusipai re rengbe arengba ka ino badungu kura wene apai tipa gupai i awisigoho re, ono tipa gani fugo du ziazia, si naida ní di kura apai adia kusayo.
17. Wai rengbe ani ka undo aboro i berẽkurii agu apai du rogo Ziazia Kekeapai?
17 Yesu asa aboro a i berẽkurii apai, angianga kinako nigumba arengo fuyó ya. Ti kura regbo sa, ko asana Simona ki yaa: “Gini pai mo aberã Simona? Agbia zegino nadia gayo marã be da? watadu be awiriyo na be kungba aboro?” (Matayo 17:25) Si rengbe kadu nga ani nidu na nyemu ka saka rogo Ziazia Kekeapai wenengai gbe, si kini idi gupai nga ani zatirani aza tipa ka mbu regbo fu gu boro ani awisigo Ziazia Kekeapai na ní re ní gumba agu apai du ngbani, watadu ní sakirogo agu apai ani nawisigihe na ní. Si aidanga ani batasi ome aboro na asanahe te. Ono kuba gure, si naida ani mangisunge nibirĩ, kini gumba wene akpiapai, na kini sasana wene asanahe tipa ka undo aboro i girogo gu memeapai du rogo gu gaani awaraga du mburuhe rii Ziazia Kekeapai.
18. Gini apai “birĩ yugopai” akodaha?
18 Ziazia Kekeapai nafura tipa “birĩ yugopai.” (2 Timoteo 4:2, NW; Tito 1:9, NW) Ngbatunga gu yugopai re nakoda badungu apai, angianga kina gu sa nga ka undo boro ní niitingidi agu apai ní nawirikihe ya. Si naida ani asadi ka undo gu boro ani awisigo Ziazia Kekeapai na ní ní rugutini na gu kparakparapai du bangbanda rengo na ziree, wenepai na gbegberẽpai, tatamana na mungo. Ka ani mangihe wo, na kini asadi ka undo gu boro re ní du na nyemu Yekova, ní nika ino gupai aino si aida ní gisangbako ti ni.
Oni Du Zaaza Rogo Sunge Sa Aboro Ni Abawiriki
19. Wai aKristano dunduko akodatiyo ka sa aboro ni abawiriki?
19 Gu dungurati nga ga aKristano nga gu riigbu nasa aboro ni abawiriki. Ho vovo boro adani nibawiriki, gu Dezire Yekova nagbia ní na ki undo ní ní wiriki agu apai Ziazia Kekeapai ayugoho, anga kina ní sa duna ndupai beni ka ngi na ngbarago te. Ho aboro nidunguratiyo ni ka ta tipa gu gude ingi, kina bangisa boro gbua nindu ki koto bara ru. Ono ho i niye na gu gude re ni fu avunguru, agu aboro dunduko ninaata tipa ru nadu na ngbarago. (Ruka 15:6, 7) Teketeke a, sunge sa aboro ni abawiriki nga gu sunge dungu aboro amangaha. AKristano dunduko nakodatiyo ka ta tipa agu aboro rengbe kada niga Yesu abawiriki. Na ho vovo boro atona nduge ni ku Bambu Kindo yo, agu aKristano dunduko du rogo gu dungurati re naundo ní tipa ní kpinyemu ndikidi irisombori. (1 AKorindo 14:24, 25) Si ki tadu were, aKristano dunduko si aida i duna ngbarago mbiko gupai nga badungu akutu vovo abawiriki nakura na agarã dunduko.
20. Giniapai si aida oni mangihe ka oni aida ka yugo gu rengo nga ga Ziazia Kekeapai fu aboro?
20 Badungu aKristano rengbe kadu na nyemu ka yugopai fu boro tipa Yekova gbiati ndikidi irisombori. Ono si rengbe kadu nga, wa i navura manga bakere asadatise tipa ka mangaha wo, i amanganga ha te. Ka si du nga wo duhe tipa roni, oni ninyakasi gaoni nyemuse tipa Yekova kindi, kini berẽpa kura aboro, ki mbupa kura gaoni apai, kidu na zerangbaduse, na ki gbata gene ka mbakada gaoni abirĩ yugopai. Nibambatapai, si naida oni kpari fu Mbori tipa ko undo roni oni yugu rengo fu kura aboro. (Batungusipai 11:1) Oni gbia wasa mbiko gupai nga, agu apai dunduko oni amangaha rogo ga Yekova sunge yo, si nasongoda sunge sa aboro ni abawiriki, na gi sunge re nafu taarimo fu Mbori.
Oni Rengbe ka Sakarogoyo?
• Wai sunge sa aboro ni abawiriki ayugopa gaani nyemuse tipa Mbori
• Gini asino si aida boro du nani tipa ka sa aboro ni abawiriki?
• Ginipai “birĩ yugopai” akodaha?
[Gu kpiahe du ti kpewaraga 20]
AKristano nayugopa gayo bakere nyemuse tipa Mbori nisa yó aboro ni abawiriki
[Gu kpiahe du ti kpewaraga 22]
Tipagine si aida ti ni abatungusipai duna nyemu aboro?
[Gu kpiahe du ti kpewaraga 23]
Gini bete asino si aida boro du nani tipa ka sa aboro ni abawiriki?
[Gu kpiahe du ti kpewaraga 24]
AKristano dunduko nadu na bakere ngbarago ka bi sangbana sunge sa aboro ni abawiriki