Wai Rengbe Kpio Yesu Ka Batasa Roni

AGARÃ ima susa awere wa 2000 kusayo tona ti gu regbo gu kumba naamanganga gbegberẽpai ya akpi tipa ka batasa aboro. Ko akpi ti regbo gu ga aYuda Pumbo Susiri namangi rogo gu garã nangia 33 Fuo Batika Kristo (F.B.K.) Gini Kumba nangia ko? Yesu boro Nazareta du. Ada rengbe ka gbia undo ti gi bawene mangapai ko amangihe re? Ngbatunga arikaaboro dunduko. Veresi sa rogo Ziazia Kekeapai aboro nainihe wenengai nafura niguruhe tipa gu motumo ko afuhe tipa gaani raka re. Si nayaa: “Mbori akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.”—Yoane 3:16.

Wa vura duhe nga dungu aboro ima ino gu veresi re ngbariyo, kina beteyo gbua girogo gupai nzunzu gu veresi re agumbaha. I nabakabangiriyo na gupai nga: ‘Tipagine ani aida ga Kristo motumo ti ni? Wai rengbe kpio bangisa boro ka batasa ngbatunga aboro dunduko be nyenye kpio?’ Ziazia Kekeapai nafu ziazia akaragapai kuti agi asasanahe re nga gu rengbe ka rugusapai bangiri boro ka ba tikango adunga ti ni ya.

Wai Kpio Atona Kindo Kurii Aboro

Gu kura aboro ima ida kuti gupai nga i akusi aboro i raki tipa bete regbo auru kpotosende, ki susi rogo fudifudiapai, kidu na ngbarago nibetehe, na niyangaraha fuo kpioyo i ki ga kurogo bawene ba. Ngbatunga gu berã re nayugo gupai nga kpio nga papara ga Mbori ringbisapai tipa aboro. Ono tie, Ziazia Kekeapai nayugo gupai nga gu kura ndupai kia aboro akpiko ti ni. Si nayaa: “Wa gbegberẽpai akuru ku zegino mbiko boro sa, kpio ki du mbiko gbegberẽpai; si du kpio andu andu ti ni sa aboro dũ, bambiko i aingi ainga dũ.” (ARomo 5:12) Gu veresi re nayugo gupai nga aboro nakpiko nisangbana ingapai. Ono tie, da nga gu “boro sa” naye na kpio kurii ngbatunga aboro dunduko?

Buku sa du rimoho nga, The World Book Encyclopedia nape gupai nga aboro-birĩ-inohe ima ida kuti gupai nga boro kinaho aboro dunduko aenge tiní, na Ziazia Kekeapai nayugo gu “boro sa” re. Ani nagedapai rogo Bambata Pai 1:27 niyaa: “Mbori ki fu boro ni kpiako, kpia Mbori Mbori afu ko ni; kumba na de ko afu yo.” Rogo gi gene re, Ziazia Kekeapai nafura tipa bambata aboro ki ya i nangia gu bawene ahe nangba kisusi agu ahe dunduko Mbori Duna Tanduapai Dũ akusihe ku auru kpotosende.

Gu pangbangaa du rogo Bambata Pai nasakapai furani futufutu tipa gu raka nangia ga gu bambata aboro Yekova akusiyo re. Gu nyanyakipa pai si aida ani inihe nga, rogo gu pangbangaa re naabaha dunduko, Mbori afuranga yo tipa kpio wagu tooni te. Si fura sa tipaha nikina sangbana basapai. (Bambata Pai 2:16, 17) Ko aaida aboro raki rogo bawene paradizo auru kpotosende, kidu na ngbarago na wene kpotoyo nyeanye kindi. Ko aaidanga i rungo be sangbana gbinza ki kpiki niyangaraha te. Wai tie, kpio adibe ngbatunga aboro dunduko?

Bambata Pai kapita 3 nafura tipa wai bambata aboro adiberã niwia tipa ka basasangba gayó Bafu-Unga nga Yekova Mbori. Si ki tadu were, Mbori kini ru ka sarangbanga yó kina kuti gupai ko aima gumbaha fuyó ti gu regbo ko akusiyo. Ko aya fu kumba wee: “Mo nga kina nvutu, kina ku nvutu yo mo ka karaga tiro ku ho ni.” (Bambata Pai 3:19) A wa fugo Mbori aima gumbaha nirengo, gu aira basasangba re araki i ki kpiki.

Ono tie, gu kpio re aadigongo kina kutiyó sa te. Gu gayó basasangbaa re aima gbarasapa bawene raka a be awiriyo. Yekova aima rimiso agu aboro i atavunganga yo ya kurogo gu ringbisapai re ho ko ayani fu Adamu na Eva wee: “Oni zúga azuga, ki nge ange, ki hisi kpotosende berewe ki zogo ho; ki nikindo auru agu atĩo du baime yo na auru azire ari na gu unga anya dunduko nawo awo auru kpotosende.” (Bambata Pai 1:28) Si adu nga fuo bete regbo kusa, aboro nika batika na ki hiisi kpotosende, na i kini raki wene raka zanga kpio. Ono gu bambata bayo nangia Adamu, nga gu “boro sa” gumbayo pani rogo ARomo 5:12, ko abagi yó ni akanga fu ingapai, na gu kpio adunga ba nehe ti ni ya. Gu mokedi nangia Pauro nga tita gu bambata kumba re akepai ki yaa: “Ono mi tigimi du ni borose, ki du ni zizi boro fu ingapai.”—ARomo 7:14.

Nimanga Adamu ingapai, ko agberesi gu baiiriwo sabe Mbori ko akusihe nga aboro, kina wai bakuodiahe naagbarasapa gu nyanyakipa ahe boro arengbanga ka gbiaha niipo ya. Awiri Adamu adu na kina awiriyo ti ni, fuoho, i kidu na atitayo, na si kini ndu kumbatayo wakina gure. I dunduko nanibatika awiriyo, awiriyo ki sono na ki batika agude na niyangaraha i ki kpiki kusayo. Tipagine i akpiki ti ni dunduko? Bambiko i dunduko naenge ti Adamu. Ziazia Kekeapai nayaa: “Dungu aboro akpiki mbiko ga gu boro tindika sa.” (ARomo 5:15) Akaza, gbinza, na nyemu manga ingapai, na kpio nga gu gbegberẽ asangbanapai Adamu akusihe kurii awiriko. Agu awiri Adamu re nga ani a dunduko.

Rogo gu ga Pauro waraga ko akehe fu agu aKristano nadu Roma yo, ko afura tipa gu rungo nga ga kpakpa aboro kodihe na ko a, na wai i aʹasada tiyó nyanyakii ka sovura kuti asangbana ingapai. Ko apoi kuari ki yaa: “Ako, rungorungo boro nga mi! Da ka batasi re ti gi boro kpio re?” Ya mo wene sanahe nga gi sanahe re tee? Da narengbe ka batasa Pauro be du nikanga fu ingapai na kpio, na ki batasi agu aboro a nakpinyemu ka kura be gu sunge akanga nga ga ingapai na kpio re? Kina Pauro nisako nafu karagapai ki yaa: “Mi natambua Mbori mbiko Yesu Kristo gaani Gbia.” (ARomo 7:14-25) Ii, kina rengo du nga, Bakusirani ima manga mbakadapai tipa ka kusa rani be ingapai na kpio mbiko gu Wiriko nga Yesu Kristo.

Ga Yesu Sunge Rogo ga Mbori Ringbisapai Tipa Ka Batasa Aboro

Yesu afura tipa gu sunge ko amangaha nga ka batasa aboro be gu sunge kanga nga ga ingapai na kpio ki yaa: “Wiri boro aye . . . ka tumo dungu yo ni ungako.” (Matayo 20:28) Wai kpio Yesu arengbe kadu nimotumo tumorii? Na wai ani agbia undo ti kpioko?

Ziazia Kekeapai naringbisapa Yesu ya “ko adu nga na ingapai te,” na ko adu “ni kparakpara ko ti aboro ingapai.” Rogo ga Yesu raka yo naabaha, ko anaairisa ga Mbori arugute dunduko. (AEbere 4:15; 7:26) Sidu tie, Yesu aakpingo mbiko sangbana ingapai na basasangbaa wa si adu tipa Adamu te. (Yezekere 18:4) Nirengo, Yesu aidi ka akpi gu kpio naarẽnga ko kpihe ya, ono ko amangihe wo tipa ka digiso gupai Bako akpinyemuhe nga ka batasa aboro be ingapai na bekpio. A wa ani niima fura tipaha mbata, i aaziongo Yesu azio tipa ko ye “ka tumo dungu yo ni ungako” te. Gu bakere nyemuse nadu ti Yesu kura boro adunga nani tona wa rago aenge ya, si asa ko ko idi ka “hia kpio tipa aboro dunduko.”— AEbere 2:9.

Gu ga Yesu unga ko atumo nani, si adu teketeke wakina gu unga Adamu agberesipaha ti gu regbo ko amangi ingapai. Sangbana ga Yesu kpio angia gine? Yekova aidi na gu motumo re nigu “motumo [du] tipa aboro dũ.” (1 Timoteo 2:6) Gure wa ka i ya, Mbori amangisunge na ga Yesu unga tipa ka ngbe rani, watadu ka kusa rani ti gu sunge kanga nga ga ingapai na kpio.

Ziazia Kekeapai fura bara dunguhe tipa gu bakere nyemuse nga ga Bakusirani re. Pauro atingidi aKristano na gupai nga i ‘angbe yo nimosoro.’ (1 AKorindo 6:20; 7:23) Petero ape gupai a nga, Mbori aamanganga sunge na dahabu watadu feda tipa ka batasa aKristano be gu zio nga ga kpio kurogo unga te, ono ko amangisunge na kure Wiriko. (1 Petero 1:18, 19) Ga Kristo motumo tumorii nasa gupai nga Yekova batasi aboro be nyenye kpio.

Ya Mo Oni AGbia Undo Be ga Kristo Motumo?

Gu mokedi nangia Yoane akepai tipa gu bakere undo du ti ga Kristo motumo tumorii ki yaa: “[Yesu Kristo] nga motumo gaani ingaapai; tipa gaani sa te, tipa zegino a dunduko.” (1 Yoane 2:2) Ii, ga Kristo motumo tumorii tipa aboro dunduko. Ya mo gure nayugo gupai nga gu kurapai ho berewe si aida boro mangihe te, mbiko wa Kristo aima kpi tipa aboro? Oó. Oni tingidinga pa agu aboro nabati du payo rogo gu papara kekepai ye mbata fu gere. Agu aboro naidi ka batasa agu akumba ime akengedi yó kusendeyo re, i azogo pio-marã kusendeyo, ono si aidi agu akumba nadu sendeyo re asaditiyo nitiyo ka rimo kurogo gu pio-marã re tipa ka bata. Wakina gure a, agu aboro naida ka gbia undo be ga Kristo motumo tumorii, si aidanga i sungu ka ngera kina koyo du Mbori ni ko fu maku fuyó te. Si naida i mangipai amanga.

Ginipai Mbori aida aboro mangihe re? Yoane 3:36 nagumbapa gupai re furani niyaa: “Gu ni ka idi pa Wiri nyenye unga du adu be ni; ono gu ni ka gia nga sangba Wiri ya, ni bi nga unga te, kina ga Mbori zinga nye ri ni.” Mbori naida gupai berani nga ani du na idapase kuti gu motumo tumorii nga ga Kristo. Gu kurapai kinaho berewe ko akpinyemuhe. ‘Ka ani ka kuti ga Yesu rugute si ka ani ini ti ni ya ani ini ko.’ (1 Yoane 2:3) Si tie ziazia nga, gu banguaapai rengbe ka undo rani ani bati be gu zio nga ga ingapai na kpio, si nga kadu na idapase kuti ga Kristo motumo tumorii na kini ka kuti gako arugute.

Nyanyakipa gene dagba agu akuraha rengbe ani ngbaha ka yugopa gaani idapase kuti ga Yesu motumo tumorii nga ka yugo gaani tambuahe fuko nindu ani kupati tingidapa kpioko a wa ko azinahe tipaha. Mbata fu Yesu kpi Yesu, ko afu riahe fu gako abawiriki naayugopa kpioko, na ki rugu yó niyaa: “Oni mangi gere nitingidi pa re.” (Ruka 22:19) ADezire Yekova nabi gayó pagume na Wiri Mbori na nyanyakipaha, na i nairisa gu gako zinahe re kindi. Rogo gi garã nga 2008 re, Tingida Pakpio Yesu nika manga Rago Nzengu rogo Marungu ti rameru 22 tingbafuo ti uru. Ani nayamba roni na ngbarago oni ye kadu na ani pati gu dunguratise re tipa ka yugo gaani giasangbaa tipa ga Yesu zinahe. Agu Adezire Yekova du rogo gaoni dagbarago rengbe ka yugo gu ba i nika manga gi dunguratise rogoho, na gu saa i nika mangaha ti ni. Ti regbo gu dunguratise re, oni nika wirika dungu apai berewe tipa agu apai rengbe oni ka mangaha tipa gu motumo tumorii nga ga Kristo batasi roni be sangbana gu ingapai nga ga Adamu.

Kina bete aboro gbua nayugo gayó tambuahe tipa gu bakere motumo Bamangiyo gbiati Wiriko amangihe tipa ka batasa yó be gbarasa yó. Agu aboro duna idapase kuti gu motumo re, i nagbia gu ngbarago gu kura aboro agbianga ha ya. Petero akepai fu akurako aKristano ki yaa: “Ono wa idi oni pa ko oni nangi angi na bakere ngbarago susi gu ka boro gumba paha, ki hiki na taarimo; bambiko oni nadia gu digida he nga ga gaoni idapase, nga batasa mbisimoroni.” (1 Petero 1:8, 9) Ka oni sonosi gaoni nyemuse tipa Yesu Kristo na kidu na idapase kuti gako motumo tumorii, oni rengbe arengba ka gbia ngbarago awere na kini ngere kumbatayo tipa ko batasi roni be ingapai na kpio.

[Gu kpiahe du ti kpewaraga 6]

Yesu afu ungako si dadi ga Adamu ingapai

[Gu kpiahe du ti kpewaraga 7]

Tingida Pakpio Yesu nikadu Rago Nzengu, rogo Marungu ti rameru 22 tingbafuo ti uru