Mo Ainongo Pa Ginigu Nika Ida Te!
“Mo rũ ga tunga wiso, ka mo mbú nga rũ he nyemu ya; bambiko mo aina nga pa gini gu nikaida te.”—BATU. 11:6.
1. Tipagine duhe ti ni niʹiiriwopai na niwenepai ka bi wai he akura?
SI NAIDA basopobino du na hipai. (Yak. 5:7, NW) Fuo rũ ni tunga, si naida ní sungudihe tipa si kuru sende yo na ki tona ka sona. Ho du rago ni niwenehe, guhe ní arũhe re natona ka kura. Si nasona ki zu. Guhe re ki zamu, baira ati ki ndu ka dungura gani ũati. Iiriwopai du ngaha nirengo ka bi wai ahe akura! Si a nibawenepai ka inopa gu boro ahe akura mbiko ní. Ani rengbe arengba ka rũhe. Ani rengbe arengba a ka tudaha. Ono kina Mbori sa rengbe ka saha si kuru kini sono.—Oni ringbisinga ha na 1 AKorindo 3:6.
2. Ginipai Yesu agumbaha tipa gu sona nga ga toro du rogo agu asanza du rogo gu papara kekeapai du mbata fu gere?
2 A wa duhe rogo gu papara kekeapai ye mbata fu gere, Yesu aringbisi sunge tungusapa Kindo kuti mi tunga. Rogo gu sanza du tipa ngbatunga asende nibakiakia, Yesu anyakasi gupai ngawee, ka bamitunga vura mi wene tunga, ngbadu aboro yo nika yugo singia gu tunga re asona watadu si asonanga te. (Mk. 4: 3-9) Rogo gu sanza du tipa gu bamitunga nara, Yesu anyakasi gupai nga basopobino ainongo wai nzunzu tunga asona te. Si wo mbiko gupai nga, tunga nasona mbiko ome Mbori, angianga mbiko ome boro ya. (Mk. 4:26-29) Ani wisigingo gu kura ga Yesu asanza biata, nga gu sanza du tipa tunga musutada, gudu tipa agbooro, na gudu tipa pio atĩo.a
Gu Sanza Nga ga Tunga Musutada
3, 4. Gine gu sanza nga ga tunga musutada ayugoho tipa gu pangbangaa nga ga Kindo?
3 Gu sanza nga ga tunga musutada du nikekehe rogo Marako kapita 4, si nanyakasapai tipa apai ue: bambataha nga, iiriwo bange agu aboro nadia gu pangbangaa nga ga Kindo kugume; uehe nga, gu bandahe agu aboro agbiaha nadia gu pangbangaa nga ga Kindo re kugume. Yesu ayaa: “Ani aringbisa ga Mbori ngbi kuti gine? Ani yugu he rogo gini sanza? Si wa tunga musutada, gu tunga nidu ni toni he ti atunga rogo kpotósende dũ, ho i nimi he ni; ono ka i mi he si sono asona, ki susi nvuo dũ, ki nikparaka kikindigi abehe; si ki ta du wa gere agu azire du ari ami ki nisusungu nzeremehe.”—Mk. 4:30-32.
4 Gupai yuguyo ho ane re, si nga wai “ga Mbori ngbi” asona a wa pa gbandaka gu pangbangaa nga ga Kindo ayugoho, naapa zugo gu dungurati nga ga aKristano natona rago Pendekote rogo gu garã nangia 33 F.B.K. kaa ndu kumbatayo. Tunga musutada nga wiri tooni zende ngua rengbe yó ka yugopa guhe nani du niwiri tooni. (Oni ringbisinga ha na Ruka 17:6.) Niyangaraha, tunga musutada nasona ki da ningua basonaha natona ti amitiri 3 ki dati amitiri 5.—Mt. 13:31, 32.
5. Wai gu dungurati azugo nga ga agu aKristano nadu rogo bambata sa kama agarã?
5 Gu zugo nga ga gu dungurati nga ga aKristano atona nitoonihe rogo gu garã nangia 33 F.B.K. ho i abapatizi abawiriki ni 120 niziazia toro. Ono tie, fuo guru regbo gbua, gi tooni dungurati re atona kadu na dungu akutu aboro rogoho. (Oni gedi Amokedi 2:41; 4:4; 5:28; 6:7; 12:24; 19:20.) Fuo susa agarã 30, bange abatungusipai ange gbe si ki sa gupai nga Pauro ya fu gu dungurati nadu Korosai yo wee, i ima ‘tungusa [wene pangbangaa] rogo arago dũ tii ngbangbaturũ yo.’ (Koro. 1:23) Si aima zugo nirengo!
6, 7. (a) Gini zugo natona ka manga rogo 1914? (b) Gini zugo nika manga kumbatayo?
6 Natona rogo 1914, nga gu garã i asigira ga Mbori Kindo rogoho ngbangbaturũ yo, abe “ngua” musutada ima kparaka susi wai aboro aberẽhe nga si nika manga. Ga Mbori aboro ima bi digisidigisi gu sangbanebi nayaa: “Gu umba pa boro adú wa ngbatunga kutu sa, gu toni ni ki ngia nyanyaki rikaaboro.” (Yes. 60:22) Areme, aDezire Yekova du bangeyo wa amirioni saba natungusapa Kindo rogo aringara susi 230. Gu tooni badona mbedimbedi aKristano naatungusapa Kindo rogo 20 kama agarã, i aainongo nga wo gu sunge re nika kio areme wa gu duhe re te. Gure nga iiriwo zugo, wakina gu tunga musutada Yesu afura tipaha.
7 Ya mo zugo digi kina ku ane? Oó. Regbo ayeaye aboro dunduko auru kpotosende nikangia avuru ga Mbori Kindo. Ti gu regbo re, i aima imo asogo ga Mbori aboro dunduko. Anga boro nika manga gipai re te, ono gu Bakerepa Bakindo zegino dunduko nga Yekova Mbori, ko nika mangaha. (Oni gedi Daniere 2:34, 35.) Ti gu regbo re, ani kini mo ka bi digisidigisi kura sangbanebi Yesaya agumbaha niyaa: “Kpotosende ahí be ina pa Yekova wa aime nahisa gango baime.”—Yes. 11:9.
8. (a) Ada agu azire du rogo ga Yesu sanza arukuba yó? (b) Gine du ani nibandabanda rani behe zavura kina awere?
8 Yesu ayawee azire arengbe ka sungo nzereme gi ngua re, nga Kindo. Anga agi azire re nga avura Kindo naʹasada tira ka rita wene tunga, wa agu azire Yesu agumba para rogo gu sanza du tipa bamitunga te. (Mk. 4:4) Kuba gure, agu azire du rogo gi sanza re, ami narukuba agu aboro duna ruru ngbaduyó yo nagbata bagbuko rogo gu dungurati nga ga aKristano. Zavura kina awere, agu aboro re nagbia gu bandahe nga ga toro be gu gbegberẽ mangaapai du rogo gi gbegberẽ zegino re. (Oni ringbisinga ha na Yesaya 32:1, 2.) Wakina gure a, Yekova aringbisi gu Kindo nga ga Masiya kuti ngua na ki yaa: “Ri basosono bagangara nga ga aYisaraere mi ka rũ he ni, ya si kusi abehe ki nizuku, ki sa tihe ni bawene kedara; arika anya aráka tii he yo; azire ni ngbatungara ni ba sa sa adúa gaami bambu ti abehe rogo nzereme.”—Yeze. 17:23.
Gu Sanza Nga ga Agbooro
9, 10. (a) Ginipai Yesu anyakasipaha rogo gu sanza du tipa agbooro? (b) Rogo Ziazia Kekeapai, gine agbooro naaru gbe kubaha, na gini sanahe du tipa agbooro ani ka wisigoho?
9 Aboro naabingo wai ahe naasona te. Yesu anyakasi giapai re rogo gu kura gako sanza. Ko ayaa: “Gu ngbi nga ga ngbangbaturũ si wa kina agbooro, de adi he, ki oko ho ku rogo ringbisiringbisi ngungo biata, daho si angbi ni rogo ho dunduko.” (Mt. 13:33) Gine gi agbooro re arukubaha, na gini pagume du dagbaha na gu zugo nga ga Kindo?
10 Rogo Ziazia Kekeapai, i namangasunge gbe na agbooro ka yugopa ingapai. Pauro afura tipa agbooro ngba gi gene re ho ko aafura ni tipa gu mangapai nga ga gu boro-ingaapai nadu rogo dungurati Korinda yo. (1 Kor. 5:6-8) Wa duhe tie were, ya mo Yesu aafura tipa gu sona nga ga gbegberẽpai?
11. Wai aYisaraere anaamangasunge na agbooro?
11 Mbata fu ani karagapai sa gu sanahe du kuari re, si naida ani kparia apai biata. Bambataha nga, wa si avura du nga Yekova aaidanga na agbooro ti regbo Pumbo Susiri te, ti kura aregbo, ko anaaida aida na agu amotumo nadu na agbooro rogoho. I anaamangasunge na agbooro rogo fu amotumo zereda, nga gu boro aniguari nitiní ka fu gamahe tipa ka yugopa gani tambuahe nani fu Yekova tipa agu amaku ní nagbiaha beko. Gi riahe re anaaye na bakere ngbarago fu agu aboro naanidu pati ni.—Pa Mot. 7:11-15.
12. Ginipai ani awirikaha ti gu gene Ziazia Kekeapai aringbisapa ahe ngbaha kuti akuraha?
12 Uepai nga, ka i vura fura tipa he rogo Ziazia Kekeapai tipa ka yugopa gbegberẽ he nani, kura regbo kinaho rengbe kina gu bangisa he re ka yugopa wene he. Nikpiapai, i nafura tipa Satana rogo 1 Petero 5:8 ni bahu, si kini yugupa gu kere sinoko duwa ga bahu. Ono rogo Yugoti 5:5, i naringbisapa Yesu kuti bahu a, nga “gu Bahu nga ga ngbatunga aYudo ru.” Tipa Yesu, i naringbisa ko kuti bahu bambiko ko na wingbaduse ka sarangbangaa niruruhe.
13. Gine gu ga Yesu sanza du tipa agbooro ayugoho tipa wai boro asa tiní nibawiriki?
13 Biatapai nga, rogo ga Yesu sanza, ko aayanga wee agbooro agbarasi putaputa ngungo naabaha dunduko ka sunge adunga berewe ti gu ngungo re ya te. Gupai ko aafura tipaha gbua nga wai i naaudo kpakuto na agbooro rogoho. Dee ataino aino kini uka agbooro kurogo putaputa ngungo tipa si fuko. Gu agbooro re anidu niokõokõho rogo putaputa ngungo. Si ki tadu were, ka gu dee re ainongo wai agbooro asa putaputa ngungo si fuko ya. Gipai re natingida rani naapa gu kumba nami tunga kini ndu ka ra yuru. Yesu ayawee “tunga ki ta kura nisono, ka ni aina nga pa sona ha ya.” (Mk. 4:27) Gure nga taata gene ka ringbisapa gu gene ngbaha boro asa tiní nibawiriki. Si rengbe kadu nga ani abingo gu sona re ti tonatonaha te, ono niyangaraha, si nada ziazia.
14. Gine gupai ayugoho nga, agbooro asa ngungo dunduko si ngbi?
14 Gi sona re niʹokõokõho ti bangiri aboro, na si namanga rogo zegino dunduko. Gere nga gu kurapai nyakasi yó ho rogo gu sanza nga ga agbooro. Gu agbooro re asa putaputa ngungo si ngbi naabaha dunduko, nga “ringbisiringbisi ngungo biata.” (Ruka 13:21) Wakina agbooro, sunge tungusapa Kindo sa gupai nga badungu aboro da ni abawiriki, na i natungusaha awere rogo dungu aringara ki da ku “digida sende yo.” (Amo. 1:8; Mt. 24:14) Kodabee kuti gi sunge nga ga Kindo namaapai kina kumbatayo re nga sunge irisa nirengo.
Gu Sanza Nga ga Pio Atĩo
15, 16. (a) Oni gumbanga gu sanza niguruhe du tipa pio atĩo. (b) Gine pio atĩo arukubaha, na gini papara sona nga ga Kindo si ayugoho?
15 Ngbanya sino agu aboro nayawee i nga ga Yesu abawiriki yó nyakipaha ti bangeyo. Yesu afura tipa gi papara sona nga ga Kindo re ho ko agumba kura sanza ni nga gu du tipa pio atĩo. Ko ayaa: “Gu ngbi nga ga ngbangbaturũ du wa kina pio atĩo, i are he baime yo, i ki zi ngbatunga atĩo dunduko.”—Mt. 13:47.
16 Pio atĩo narukuba sunge tungusapa Kindo. Si nazio ngbatunga atĩo dunduko. Yesu asusi kumbatayo na fugo kini yaa: “Ho pio ahi ni, i ki gbe he ku pangba ime; i ki sungu, ki rogodi wene atĩo ku pere yo [watadu ku baga yo], ono agu ra nga gbegberẽ ra, i ki bafu ra. Kina wo si ka du ho zegino ka nyasa ni [“ho gi zegino re nika mbeda ni ka digo,” NW]; amaraika akúra, ki kpara gbegberẽ aboro ti wene yo, ki bafu yo ku gbigiwi we yo, yo kpe ka du ni na ri ngba rinde.”—Mt. 13:48-50.
17. Ti gini regbo gu sunge kparaka aboro gumbayo paha rogo gu sanza nga ga pio atĩo amanga?
17 Ya mo gi kparaka gbegberẽ aboro ti wene yó re nayugopa gu yangara sapangbangaa nga ga akandoro na ameme nga gu Yesu ayawee ko nika mangaha ho ko nika ye ni rogo gako taarimo? (Mt. 25:31-33) Oó. Yangara sapangbangaa nika manga ho Yesu nika ye ni ti regbo bakere gberangbii. Ono gu kparaka aboro gumbayo paha rogo gu sanza nga ga pio atĩo, si adu nga si nika manga tigaha “ho gi zegino re nika mbeda ni ka digo.”b Gi regbo re du ani araka awere rogoho, nga gu regbo nika ndu ki dati tonatona bakere gberangbii. Sidu tie, wai sunge kparaka aboro amanga were?
18, 19. (a) Wai sunge kparaka aboro amanga awere? (b) Ginipai si aida agu aboro duna ruru ngbaduyó yo mangihe? (Oni bi gu rukutu kekeapai du ti kpewaraga 29.)
18 Dungu aboro naye kurogo ga Yekova dungurati ti gi gaani regbo re. Gu kurayo naaye aye kupati gu dunguratise du tipa Tingida Pakpio Yesu, gu kurayo naaye aye a kupati gaani adunguratise, na gu kurayo nawisigo Ziazia Kekeapai na ani. Ono ya mo i naabayo dunduko nga ndikidi aKristano? Ka gumbapai nimasaku, i ‘nagbe yó agbe ku pangba ime’ yo, ono Yesu aya furani wee kina “wene yo” i arogoda yó ku pere yo, nga gu dungurati nga ga aKristano. I nabafa gbegberẽ yó kusayo, tipa ka bayo niyangaraha kurogo gbigiwi we, nga gu nayugopa nyenye kpio.
19 Ani furanga berewe tipa gbegberẽ atĩo. Dungu agu aboro naawisigo Ziazia Kekeapai mbata na aDezire Yekova aima mbuhe, i kini du wakina gbegberẽ atĩo. Gu kurayo kinaho i avungu yó kina kurogo rengo yo, ono ka i aidanga nzunzu kadu nindikidi apefuo Kristo ya. I aidanga ka diaberã ka mangasunge fu Yekova te, watadu i aima manga gu diaberã re, ono i ki mangisunge fu Yekova tooni gbua i kini mbuhe.c (Yeze. 33:32, 33) Ono tie, si ninyanyakipa pai agu aboro duna ruru ngbaduyó yo du rogo adungurati mbata fu yangara sapangbangaa ye na i ki nye yó nibandabanda yó.
20, 21. (a) Gini apai wiriki ani he awere rogo gu ga Yesu asanza du tipa sona ahe? (b) Ginipai oni nadiberã ka mangaha?
20 Sidu tie, gini apai wiriki ani he awere rogo gu ga Yesu asanza du tipa sona ahe? Bambatapai nga, bakere bange aboro di gu pangbangaa nga ga Kindo kugume, nga gu nasona wakina tunga musutada. He ho rengbe ka rugusa ga Yekova sunge te! (Yes. 54:17) Kurigure, agu aboro nagbata gene ‘ka susungo nzereme’ ngua musutada, i nibandabanda yó be Satana na gako gbegberẽ zegino. Uepai nga, kina Mbori nasa he si sono. Wakina agbooro rogo ngungo, anga aregbo dunduko aboro abi gi sona re ziazia watadu ka rugatise naapa wai si amanga te, ono si namanga amanga! Biatapai nga, anga agu aboro dunduko nadia gi pangbangaa re kugume nada nindikidi aKristano te. Gu kura yó nadu wakina gu gbegberẽ atĩo Yesu afura tipa ra rogo gako sanza.
21 Si nangarasa rani angarasa nirengo wa ani abi dungu wene aboro i niye fuo Yekova! (Yo. 6:44) Sangbanaha nga iiriwo bange abawiriki rogo aringara nibasasa. Yekova Mbori nga gu boro taarimo andu funi tipa gipai re. Fuo bi ani gipai re wadu ani nibasasa, si naida ani irisi gu rugute i aima kehe bakuru kusayo ki yaa: “Mo rũ ga tunga wiso, ka mo mbú nga rũ he nyemu ya; bambiko mo aina nga pa gini gu nikaida te, watadu ga wiso watadu ga nyemu, watadu si ue nikaida aida dũ.”—Batu. 11:6.
[Gu rukutu kekeapai du bandu kpewaraga yo]
a Agi apai ani ka wisigoho re, si nga vovo sakarogopaiyo tipa agu apai nakuru rogo agu aNgbaõbambu Sinziri nangia ga Banzinga 15, 1992 kpewaraga 17-22, na ga Tanvuo 1, 1975 kpewaraga 589-608.
b Wa vura duhe nga Matayo 13:39-43 nafura tipa kura papara sunge tungusapa Kindo kia, gu regbo sangbaha amanga, si kina sa na gu regbo sangba gu sanza nga ga pio atĩo amanga, nga “ho gi zegino re nika mbeda ni ka digo.” Sunge kpakara aboro nga gu sunge nandu kina kumbatayo, a wa sunge mi tunga na sunge ke ahe andu kina kumbatayo kindi vuru gi regbo re.—Ngbaõbambu Sinziri, Tanvuo 15, 2000, kpewaraga 25-26; Worship the Only True God, kpewaraga 178-181, genewaraga 8-11.
c Ya mo gipai re nayugo gupai ngawee, agu aboro nambu wisigopai na aDezire Yekova, watadu ka mbu kodatise naayó, amaraika ima bafa yó kusayo? Oó! Ka boro aida nirengo ka karaga tiní fuo Yekova, ngbadimo nikina zakizakihe funi.—Mara. 3:7.
Gaoni Karagapai Nga Gine?
• Ginipai gu sanza nga ga tunga musutada ayugoho furani tipa gu zugo nga ga Kindo na tipa padu aboro nibandabanda yó be Satana na gako gbegberẽ zegino?
• Gine gu agbooro du rogo ga Yesu sanza arukubaha, na gini rengo du tipa gu sona nga ga Kindo Yesu anyakasipaha na gi sanza re?
• Gini papara sona nga ga Kindo du niyuguyuguhe rogo gu sanza nga ga pio atĩo?
• Ginipai ka ani mangihe ani ki rugutirani na gupai nga, ani ima nye dagba agu aboro ‘rogodi yó yó ku pere yo’?
[Gu kpiahe du ti kpewaraga 26]
Ginipai gu sanza nga ga tunga musutada ayugoho furani tipa gu zugo nga ga Kindo?
[Gu kpiahe du ti kpewaraga 27]
Ginipai ani awirikaha rogo gu sanza nga ga agbooro?
[Gu kpiahe du ti kpewaraga 29]
Ginipai pa kparaka wene atĩo ti gbegberẽ ra ayugoho?