Oni Duna Gu Bipai Nga Ga Ziazia Kekeapai Tipa Ngerafuo Kpotose

“Mo kpi nyemu Gbia nga ga Mbori . . . na ga berã dũ, na omero dũ.”—MK. 12:30.

1. Gine nangia ga Mbori ringbisapai tipa aboro?

GA Yekova ringbisapai tipa aboro aadunga naapa kaza rogoho gbiati kpio te. Mbori amoi Adamu na Eva ati Edene yo, watadu ati ngbarago, i “nisópo ho ki nibanda ha,” angianga tipa agarã gbua 70 watadu 80 ya, ono nyeanye kindi. (Bam. P. 2:8, 15; Tam. 90:10) Wa ka i anye niruruyo fu Yekova na kini biko nigu boro rẽ ka zoga yó, ka i awokingo, ki gbinza na ki kpiki te.

2, 3. (a) Wai ringbisiyo pa gbinza rogo gu Kitabu nga Batungusipai? (b) Gini boro gu kpio ani adihe be Adamu aenge tiní, na wai i ka diaha kusayo?

² Batungusipai kapita 12 nafura tipa “gbegberẽ arago” nga gu gbinza aboro agbia tiyó ti ni. (Oni gedi Batungusipai 12:1-7.) I naringbisa nvue kuti mbumbudo “anzari.” I naringbisa andue kuti “nyanyaki aboro” nga aguyo ima nugo na omeyo ki bati. Agu adee nandu kupati bangiri bambu yo tipa imarago nabi kina bitimo yo, si nigu ringbisapai daada tipa gu bangirise du tataita. Wa duhe nga rindi sosono aboro nikina betehe, i naringbisapaha kuti ‘asaahe mbu sa ahe bambiko nge nga yo te.’

³ Agu andue nakio, agu abangirise du tataita, na agu arinde naima kuadi kusayo, si ni agu apai Mbori aaidaha tipa aboro te. Kurigure, kpio nga “ga bakitingbanga mangaapai” naye sa rani mbiko gu ingapai Adamu amangihe. Wiri Mbori nika diaha kusayo barambeda ho ko kaa zogarago ni nibakindo. Gu mokedi nangia Yoane akepai ki yaa: “I ayugu Wiri Mbori tipa gi pai re, nga ko gbarasi ga bakitingbanga mangaapai.”—1 Yo. 3:8.

Daha Ada Boro Berẽ Tipa Kpotoni

4. Tipagine ruhe aru ti ni ga Yekova amoyambu naabakabangiriyo tipa pa kpotoyo, ono ginipai si aida i rugutiyo nani?

⁴ Wa du rago re, kura ga Yekova amoyambu na gu fudifudiapai nga ga wokote na gbinza nga agu apai namanga aboro dunduko. Daha ada ani berẽ tipa kpotorani ho du apai ni wa ngbatunga gure tipa rani. Anga ani nakpinyemu ka mangasunge fu Yekova ‘na omerani dũ’ tee? (Mk. 12:30) Ono wa ani aʹasada tirani ka sa kpotorani si du wenengai, si naida ani du na ruru berã na ki ini gupai nga, ani rengbe ka gbiso regbo gbinza rani kumbatayo gbua tooni, na ani arengbanga ka bandatirani be akaza dunduko te.

5. Ginipai rengbe ani ka wirikaha ti gu gene ga Mbori amoyambu ahi akaza ngbaha?

⁵ Badungu gu ga Yekova amoyambu nadumbata aima hi dungu awokote. Epafuradita nga guni sa dagbayó. (Frp. 2:25-27) Gu bakurea Pauro nangia Timoteo anaawoka awoka dedede vukoyo, Pauro ki ya fuko wee ko mbiri “bete imekakue” tipa ka hu. (1 Tim. 5:23) Zavura Pauro a, ko adu na ‘kiwe tii kpotoko yo,’ isoke si angia kaza bangirise du naamanga ko watadu gu kura ngbatunga kaza nga gu ko aabingo ziga tipaha ya. (2 Kor. 12:7; Gara. 4:15; 6:11) Pauro azungodi Mbori bara dunguhe tipa ko di gu “kiwe” kusayo nadu ‘tii kpotoko yo’ re. (Oni gedi 2 AKorindo 12:8-10.) Mbori aadianga gu “kiwe” re kusayo te. Ono gupai Mbori amangihe nga, ka fu ome fu Pauro ko hi gu kaza re. Si ki tadu wo, ga Mbori tandu kini du niyuguyuguhe rogo ga Pauro rungbura yo. Ya mo ani rengbe ka wirikapai ti gipai re?

Ka Oni Bakingo Bangironi Tipa Kpotoroni Susi Ya

6, 7. Tipagine si aidanga ti ni ani naabakabangirani tipa kpotorani susi ya?

⁶ A wa ini oni he, aDezire Yekova naaida aida na dungu angbatunga husa akaza. Gu gaani magazini nga Awake! nidu na apai rogoho nafura tipa pa akaza. Wa vura duhe nga ani atambuanga gu kura ngbatunga husa akaza sa ya si susi agu akuraha te, ani nafu tambuahe afu fu agu amunganga duna bakere inohe. Ani ima ino ya, boro arengbanga ka raka zanga wiri kaza nimangi ní te. Sidu tie, ani ini gupai nga, si aidanga ani naabakabangirani abaka gbe tipa kpotorani te. Si naida gaani bipai dukia ti ga agu aboro adunga na “maabangirise” ya, nga aguyo naberãha ya, yangara raka nga kina gi du awere re, sidu, si naida i idi na angbatunga husa akaza dunduko. (Ef. 2:2, 12) Ani aidanga ka gberesapa gaani pagume na Yekova tipa ka batasa tirani awere te, bambiko ani ini gupai nga, ka ani nye niruru rani fu Yekova, ani “nye anye na gu unga nga ndikidi unga,” nika ngia nyenye unga rogo vovo zegino.—1 Tim. 6:12, 19; 2 Pet. 3:13.

⁷ Kura ndupai kinaho berewe si aidanga ti ni ani naabakabangirani susi tipa kpotorani ya. Ka ani abakabangirani susi, si rengbe ka sa gupai nga ani naaberã kina pa tirani. Pauro afura tipa gipai re ho ko aya fu aFiripoio ni wee ka i ‘berẽnga pa kina gayó pai ya, ono i berẽpa ga akurayó apai a.’ (Frp. 2:4) Si ruaru ani naaberãpa kpotorani rengbe arengba, ono ka ani aberãpa awirinarani naapa agu aboro ani andu na gu “wene pangbanga nga ga ngbi” fuyó, si nika sa gupai nga ka ani naaberãnga kina pa kpotorani kindi ya.—Mt. 24:14.

8. Ka ani aberãpa kpotorani susi, si rengbe ka sa rani ani mangi ginipai?

⁸ Ka Kristano aberã kina pa kpotoni gbe, si rengbe ka sa gupai nga ka ni naaberãnga pa agu apai nga ga Kindo gbe ya. Ka ani aberãpa kpotorani kisusi, si rengbe ka sa rani ani sí gaani aberã kurii aboro yo nibipa gu riahe si aida i nirihe, gu ziga si aida i dihe, na gu bakio riahe si aida i nirihe. Nibi gipai re, oni bingo gu bangua rugute du rogo gu fugo Pauro agumbaha ki yaa: “Oni rugutironi naapa agu apai duna nyanyakipaha gbe; oni ki du ziazia ki zanga gu pai ka i rugu roni kuti ni ki zanga sa kura aboro i koto dati rago Kristo.”—Frp. 1:10, NW.

Ginipai Nyakipaha Gbe?

9. Gini nyanyakipa pai sa si aidanga bangirani go ti ni ya, na tipagine?

⁹ Ka ani aberãpa agu apai nyakipaha gbe, ani fu tirani afu sa sunge husa aboro rogo toro yo. Ani namanga gi sunge re nitungusa ani Fugo Mbori fu aboro na kini yuguhe. Gu wene sunge re naundo rani na kini undo agu aboro a ani ayugo Fugo Mbori fuyó. (Snz. 17:22; 1 Tim. 4:15, 16) Agu amagazini nga Ngbaõbambu Sinziri na Awake! nidu na apangbangaa rogoho nafura tipa agu awirinarani nga aKristano duna kere akaza tiyó. Agu apangbangaa re naafura afura a ti kura aregbo tipa agu apai agu awirinarani re naamangaha na gayó akaza watadu tipa wai i nidi berãyo kusayo tooni ti berãpa gayó akaza ki ndu ka undo aboro i inipa ga Yekova akidohe.a

10. Wai duhe nga, gu sunge husa kaza ani asiaha, si rengbe arengba ka fu ngbarago fu Yekova watadu ka sa gberarago tiko?

¹⁰ Gu Kristano naima sona, si naida ní ‘tindi kina gani tindiro’ nga gu du tipa sia gu sunge husa kaza ní aidaha. (Gara. 6:5, NW) Gu sunge husa kaza ani asiaha, si rengbe arengba ka fu ngbarago fu Yekova watadu ka sa gberarago tiko. A wa pa irisa ani gu bangua arugute nga ga Ziazia Kekeapai asa rani ani “ne . . . kure,” kinawo a si aida gaani irisa tipa Fugo Mbori sa rani ani neke agu asunge husa akaza rengbe ka gbarasa parani rogo toro yo watadu ka gbarasa gaani pagume na Yekova. (Amo. 15:20) Gu kura asino wisigopai tipa akaza gbiati sunge husa akaza nakoda gupai akoda kurogoho nga ga sangbaatoro. Yekova aaidanga na agu aYisaraere nasamungu kuti ndikidi pambori ki tona ka manga “irairapai” watadu sangbaatoro te, watadu sangbaatoro. Ko ayaa: “Ka oni yé nga na kungba gamunihe berewe ya; fuõngua ki du bangire ni kere gbegberẽ he. Pumbo fogo diwi na arago sabiti na yamba adunguratise – mi aida nga na ni te, si nga irairapai [“sangbaatoro,” NW] na irisiirisi gbuu.” (Yes. 1:13) Ho du ani ni na kaza, anga si nga regbo ani mangi gupai nika sa gupai nga ka Mbori ginga gaani kpee ya te watadu ka gbarasa gaani pagume na Mbori.—Kpe 3:44.

Si Daada Ani Duna “Rugatise”

11, 12. Wai “rugatise” aundo rani ani sia gu sunge husa kaza daada?

¹¹ Ho du ani ni na kaza, si aidanga ani berẽ gupai nga Yekova nika husa rani ngba iiriwo gene te, ono ani rengbe ka kpara fuko tipa ko fu tatamana furani ani sia gu sunge husa kaza rengbe ka husa rani. Si naida ani mbu gu bangua arugute nga ga Ziazia Kekeapai si yugu gupai furani si aida ani siaha. Kangia gaani kaza nikerehe, si naida ani biki dungu abangbasia amunganga ka si du nga gene berani ka mangaha wo. Wo Asanza 15:22 agumbaha. Si nayaa: “Yo adu nga rugapai ni ya, apai yo na kina gberarago, ono bambiko rimbasa aboro rondo apai ni nyakasinyakasi he wenengai.” Gu mokedi nangia Pauro angarasi akurako aidipase i “nidu na rugatise, na rurupai, na sinombori, rogo gi zegino du awere re.”—Tito 2:12.

¹² Dungu aboro nabi tiyó wakina gu dee nadu na kaza ti rago Yesu. Marako 5:25, 26 nayaa: “De, kureri anaga garãha ki du bawe na ue, ri aimi be dungu amunganga gbe, ri ki bagi agu ahe naadu be ri dũ, ka ri ahu nga wa sa ya, ono kaza ki zi ri azia bakere ti gu naadu mbata.” Yesu ahusi gu dee re na ki mangi ri ninunga. (Mk. 5:27-34) Ho apai anyasa ni ti kura aKristano, i nasia gu sino wisigopa kaza watadu gu sunge husa kaza andunga kuti gu bangua arugute nga ga Ziazia Kekeapai ya.

13, 14. (a) Gini sino husa akaza ka ani siaha Satana ki bi momu ti ni ka sa rani ani he manga rurupai? (b) Tipagine si aida ti ni ani ne agu apai dunduko duna sangbaatoro rogoho?

¹³ Satana nika manga agu apai dunduko du ku vuru beko ka aria berã rani kusayo ti ndikidi irisombori. A wa ko amangasunge na wasiwasi kodaba gbiati nyemu aũzegino ka sa kura aboro i koto, kinawo a ko amanga asadatise ka sa kura aboro i mbu manga rurupai nirimiso yó tiyó kurogo gu sino husa akaza duna sino sangbaatoro rogoho. Ani nakpara fu Yekova ko batasi rani be gu “gbegberẽpai” nga ga Satana na “be irairaapai dunduko.” Sidu, si aidanga ani mbedi na ga Satana mangaapai te nga gu nakoda sangbaatoro.—Mt. 6:13; Tito 2:14.

¹⁴ Yekova aima za aYisaraere ti soroka na manga ngua. (Pa Rug. 18:10-12) Pauro afura tipa “soroka” ya si dagba “agu apai borose amanga.” (Gara. 5:19, 20) Kurigure, “airasoroka” adunga rogo ga Yekova vovo zegino te. (Yugo. 21:8) Si tie ziazia nga, Yekova aidanga na agu apai dunduko duna sangbaatoro rogoho te.

“Aboro Ini Roni Dunduko Ni Bayee Aboro”

15, 16. Tipagine si aida ti ni ani naangera fuo kpotorani nitatamana, na gini rugute gu riigbu bipasunge nadu rogo bambata sa kama agarã afuhe?

¹⁵ Nibi gupai gumba ani he kuari re, ka singia ani nakapa akapa kuti kura asino wisigopai tipa kaza watadu sino husa kaza, si adu nipatatamana ani mbuhe ambu. Anga si ngawee, ka ani ainongo wai ziga amangasunge ya, gure nga si na pai dagbaha na sangbaatoro te. Tipa ani du na gu bipai nga ga Ziazia Kekeapai tipa kpotorani, si naida tatamana gbiati ruru berã. Asanza kapita 3, na gi rugute re rogoho: “Mo kída kuti Yekova na kpotoro yo dunduko, ka mo nikída nga kuti gamo rugatinapai ya. Mo rá fu ko rogo gamo apai dunduko, Ko arúga gamo apai foro nzunzu. . . . Mo ká kuti ndikidi tatamana na sia pa pai; . . . si du si akadu ti ni ni unga fu mbisimoro.”—Snz. 3:5, 6, 21, 22.

¹⁶ Ho ani amanga asadatise ni ka nye na kpotorani niwenehe, si naida ani du na rugatise ka zanga manga gupai nika sa Mbori ka ko idinga na gaani apai ya. Nibipa agu apai du tipa ngerafuo kpotose, a wa ani naamangaha tipa kura apai, si naida ‘aboro dunduko ini rani nibayee aboro’ wa ani araka ringbisihe kuti gu bangua arugute nga ga Ziazia Kekeapai. (Frp. 4:5) Gu riigbu bipasunge nadu rogo bambata sa kama agarã ake waraga fu aKristano i ne irisokpiaahe, kure, na meteka. Gu waraga re aduna gipai re rogoho: “Ka oni banda tironi ti agi apai re, oni adú wenengaĩ. Oni dú yo nyanyaki.” (Amo. 15:28, 29) Rogo gini gene?

Ngerafuo Kpotose Ngba gu Gene Daada

17. Wai ani nagbia undo mbiko irisa ani gu bangua arugute nga ga Ziazia Kekeapai?

¹⁷ Ani dunduko si aida ani sana tirani ki yaa, ‘Ya mo mi kparia gu undo mi nagbiaha mbiko irisa mi gu bangua arugute nga ga Ziazia Kekeapai nga gu nabipa ne kure na meteka?’ Ani berẽnga pa gu undo gbia ani he mbiko ani amangi asadatise ka ‘giriso tirani ti meteka dunduko nga ga borose na ga toro.’ (2 Kor. 7:1) Dungu akaza aziongo rani ya wa ani amanga agu arugute du rogo Ziazia Kekeapai tipa girisotise. Kpotorani niwenehe mbiko ani avungo gundö te watadu ka dia kere angua te, nga agu ahe nagbarasa kpoto boro na kini gbarasipa gani pagume na Mbori. Ani kparianga gu kura wenepai a naye furani ho ani arihe ni rengbe arengba na kini mbiri ahe rengbe arengba. (Oni gedi Asanza 23:20; Tito 2:2, 3.) Wa vura duhe nga ongoda ti sunge gbiati mangonvo naundo kpotorani si du wenengai, guhe undo rani gbe ti kpotorani na rogo toro yo nga agu arugute du rogo Ziazia Kekeapai.

18. Ginipai si aida ani moiberã rani fuoho gbe, na gini digisidigisi sangbanebi si aida ani moibangirani tipaha?

¹⁸ Nibambatapai, si naida ani ngerefuo tirani rogo toro yo na ki nyakasi gaani pagume na Barani du ngbangbaturũ yo, nga baenge “gu unga du awere, na gu nikaye” rogo gu gako zegino ko nakidohe tipaha. (1 Tim. 4:8; Tam. 36:9) Rogo ga Mbori vovo zegino, aboro ahu rogo toro yo na ti kpotoyo mbiko Mbori ambupai fuyó riimburu gu motumo tumorii Yesu afuhe. Ga Mbori Wiri kandoro nga Yesu Kristo, ko nika yugo gene furani sa “agugaabi aime unga,” na Mbori awega aume kusayo ti bangirani. (Yugo. 7:14-17; 22:1, 2) Fuo gure, ani abi digisidigisi gi sangbanebi re: “A nga boro kporo sa ayá, ‘Mi nawoka’ te.”—Yes. 33:24.

19. Ho ani angera ni fuo kpotorani ngba ruru gene, gine ani amaabangirani tipaha?

¹⁹ Ani akapanga kuti gupai nga regbo batasa rani ima mbeda te, ani napido gu regbo Yekova nika dia akaza kusayo gbiati kpio. Ono tie wadu rago re, ani na gu kido nga gu Barani nga boro nyemuse nika undo rani ani hi agu aima namanga rani mbiko ‘ko nangera angerafuo rani.’ (1 Pet. 5:7) Sidu tie, ani nangera angera fuo kpotorani ono na ngbanyaa kuti agu arugute du rogo Fugo Mbori!

[Gu rukutu kekeapai du bandu kpewaraga yo]

Fugöpai

• Da naye na akaza kuti aboro, da nika diaha kusayo?

• Wa duhe nga daha ada ani ngerefuo kpotorani ngba ruru gene, gine si aida ani nehe?

• Wai duhe nga, gu sunge husa kaza ani asiaha, si rengbe arengba ka fu ngbarago fu Yekova watadu ka ba gberarago tiko?

• Nibipa kpotorani, wai rengbe ani ka gbia undo niirisa ani gu bangua arugute nga ga Ziazia Kekeapai?

[Gu kpiahe du ti kpewaraga 24]

Mbori akusanga aboro i naawoka na kini gbinza te

[Gu kpiahe du ti kpewaraga 26]

Wa ga Yekova aboro navura du na awokote, i nagbia ngbarago agbia rogo sunge tungusapai