Ga Maria Sunge Rogo ga Mbori Ringbisapai

TI REGBO ga Yesu sunge auru kpotosende, dee aguari dagba rimbasa aboro ki poi na fugori kuari gbe niyaa: “Maku ti gu rukumbu nabatika ro na gu mai mo aha[ha].” Wa ka si adu nga Yesu aaida i naairiso nako wa Mbori, gu fugo gu dee re agumbaha, si ka fu momu fuko ko gumba gupai nga, si naida i naairiso ri airiso wo. Kuba gure, ko ayaa: “Aboro maku nga agu yo . . . nagia ga Mbori pai, ki nika kuti ni!”—Ruka 11:27, 28.

Yesu aidanga i naafu kparakpara iriso fu nako te; na ko ayanga fu gako abawiriki i naairiso ri a te. Gini ngbanya du dagba gipai re na gu iriso Maria aboro amangaha kini berẽ gupai nga si ruaru? Ani makianga gu bete ayugopai du tipa navungu Yesu rengbe na arago dunduko na ani ki ringbisinga ha na gupai Ziazia Kekeapai agumbaha tipa ri.

‘Garasia Tiro Naabaha,’ ‘Iri Mo Gbe Dagba Adee’

Gu maraika nga Gaburere agumbapa ga Maria sunge furi rogo ga Mbori ringbisapai. Ho ko ayeni fuo ri, ko apoi kuti ri ki yaa: “Ako, mo gu Gbia du na mo, ki fu maku foro.” (Ruka 1:28) Gu kura sasa gu fugo re nga: “Ako, garasia tiro naabaha, Gbia gu du na mo.” Fuo gupai re ngbutuko, Erizabeta apoi kuti Maria ki yaa: “Irisiirisi boro nga mo dagba ade, irisiirisi he nga zuzu rukumburo!” (Ruka 1:42) Ya mo agi afugo re ayugongo gupai nga si naida i naairiso Maria wagu i airiso Mbori tee?

Ka pe rengo, si wo te. Wa vura duhe nga i akodi agi afugo re kurogo agu akpee aKatoriko naagumbaha fu Maria, Ziazia Kekeapai ayanga wee aboro naakpara furi te. Gaburere na Erizabeta aima ida kuti gupai nga Maria na momu beri ka batika Masiya, ono Ziazia Kekeapai avotanga wiripai ya si naida aboro naakpara furi te. Kuba gure, ho ga Yesu abawiriki asanako ni tipa ko yugu wai fuyó rengbeyó ka kparakpee, ko ayugu gupai fuyó nga, si naida i naakpara fu kina Bako sa. Nirengo, gu ga Yesu kparakpee aboro nainipai tipaha rogo zegino dũ, si natona nga: ‘Barani du ngbangbaturũ yo.’—Matayo 6:9.

Ya Ri Nga Boro Sa Dagba Abazogo

Gu kurapai aboro agumbaha tipa Maria ngawee ri nga “Nakindo paradizo.” Ono tie, Ziazia Kekeapai afunga gu rimo re furi te. Ono si nayugo gupai nga ba kina beri ngbangbaturũ yo. Gini ba du ngaha?

Yesu aima yugo gupai nga, gu kura gako ruru abawiriki kinaho nika zogarago naako rogo gako Kindo. (Ruka 22:28-30) Yesu nika fu pagbia fu agu aboro ko nasia yó i mangisunge ni “aboromotumo tipa gaani Mbori; i ki nizogo rago auru kpotosende.” (Yugoti 5:10) Ziazia Kekeapai nayugo gupai ziazia nga, i aima fu irisa fu Maria nikodayo ri ku dagba agi aboro re. Tipagine gumba ani he ti ni wo?

Oni vura tingida gupai nga fuo kpio Yesu, Maria “animongo nikpari kina ku bani sa kindi” na ga Yesu abawiriki gbiati awirinako. Aboro wa 120 nadu pati gu kparakpee re kodihe na bete “ade.” (Amokedi 1:12-15) Ziazia Kekeapai nayaa: “Ho rago Pendekote ada ni i nadungura tiyo kina ku rogo gu ba sa,” Mbori auka gako ziazia toro kuriyó i ki tona fura rogo agu afugo i aawirikanga ha awirika ya.—Amokedi 2:1-4.

Wa duhe nga Maria adu kina dagba agi adee nagbia maku ngba gi gene re, si nayugo gupai nga, ri gbiati gu kura adee nagbia ziazia toro re, i nika zogarago na Yesu ngbangbaturũ yo. Sidu, badungu nduapai du berani ka ida kuti gupai nga, Maria sungu awere na Yesu ngbangbaturũ yo. (ARomo 8:14-17) Oni bingo bete agu amomu Maria nika gbiaha gbiati gu kura aboro nika zogarago na Yesu tipa ka manga gupai Mbori akpinyemuhe.

Aboro Nika Gbia Badungu Amaku Mbiko Yó

Rogo gu kitabu nga Yugoti, i gumbapa aboro du bangeyo nga 144,000 i nika zingisa yó bekpio tipa i mangisunge na Yesu ngbangbaturũ yo ni aboromotumo, ni abasapungbanga, na ni abakindo. (Yugoti 14:1, 4; 20:4, 6) Wa i nikangia aboromotumo, i nika mangasunge na ga Yesu motumo tipa ka sa aboro i du ziazia rogo gayó pagume na Mbori, rogo gayó mangaapai, na ti kpotoyo. (Yugoti 21:1-4) Nga gu wene momu nikangiaha fu agu aboro dunduko du niruruyo fu Yekova tipa ka bi gu bawene regbo re!a

Maria aima manga papara ga Yekova sunge nivungari Yesu, na ri namangasunge a kindi. Wa ri adu na umbasitise, idapase, giasangbaa, na wai ri ambu na Yesu, gbiati gari gbanga hipai rogo asada, ri rẽarẽ ani pekefuo gari kpiapai. Si naida ani naafu irisa furi bakere gbe tipa gari sunge nivungari Masiya nga gu naye na nyenye amaku fu ngbatunga aboro dunduko, na tipa gu sunge ri amangaha ngbangbaturũ yo.

Ono tie, gu nyanyakipa pai ani awirikaha be Maria nga, ri gbiati gu kura ga Mbori ruru amoyambu, i kpatagara kindi kuti iriso kina Yekova sa. Maria, Yesu, gbiati gu kura aboro i nika zogarago naayó, i napaa na fugoyo kuari kini yaa: “I fu maku, na irisa, na taarimo, na ngbi, fu gu ko nasunga auru mbatabakindo [nga Yekova Mbori], na fu Wiri Kandoro [nga Yesu Kristo], nye anye kindi!”—Yugoti 5:13; 19:10.

[Gu rukutu kekeapai du bandu kpewaraga yo]

[Gu kpiahe du ti kpewaraga 4]

Si rẽarẽ ani wiriki ga Maria umbasitise, idapase, na giasangbaa