Ya Mo Mbori na Rimoko ti Ni?

Agu akaragapai aboro naafuhe nga:

▪ “Rimoko nga Gbia.”

▪ “Ndikidi rimoko ti ni te.”

Ginipai Yesu agumbaha tipa gipai re?

▪ “Barani du ngbangbaturũ yo, Ani írisi rimoro airisa.” (Matayo 6:9) Gupai Yesu agumbaha re, si nayugo gupai nga, rimo Mbori kina ti ni.

▪ “Mi yugu rimoro fu yo, mi ayúgo ho ayugo; ya gu nyemuse mo nakpi nyemu re na ni, si du rogo yo yo, mi ki du rogo yo yo.” (Yoane 17:26) Gipai re nayugo gupai nga Yesu aima yugo rimo Mbori fu aboro.

▪ “Oni abi nga re berewe te, daho oni ka ya ni, ‘Mbori fu maku fu gu ko naye ni rimo Gbia [“Yekova,” NW]!’” (Ruka 13:35; Atambuahe 118:26) Yesu anaayamba Mbori ayamba ti rimoko.

MBORI nitiko nayugo rimoko fu rani. Fugoko nayaa: “Mi nga Yekova, gere nga rimore.”a (Yesaya 42:8) Gu rimo Mbori afuhe fu tiko, i nayambaha rogo pa-Zande nga Yekova. Gu rimoko re, si rogo pa-Ebere. Si niʹiiriwopai ka bi gupai nga, gu kparakpara rimo Mbori du rogo pa-Ebere re, si wa bara akutu rogo gu Ziazia Kekeapai i akehe nibee. Nirengo, gu rimoko re ima nge rogo Ziazia Kekeapai kisusi gu kura arimo dunduko.

Ka oni sana aboro na gu sanahe nga, “rimo Mbori nga da?” aguyo rengbe ka karagapai furoni ki yaa, “rimoko nga Gbia.” Ka pe rengo, gupai re akatanga mange tu boro yo te. Si wakina gu karagapai du tipa gu sanahe nga, “Da nadĩ ahe?” gaha karagapai kingia, “iradĩ.” Si nga wene karagapai te, mbiko agu afugo nga “Gbia” na “iradĩ,” anga arimo ngaha te.

Tipagine Mbori ayugu rimoko ti ni furani? Ko amangihe wo tipa ani iniko wenengai. Ani yugungo ho na kpiapai. Agu afugo nga Gbia, Baramu, Buba, watadu Tita, i nayamba boro nani nibipa gu ngbatunga boro nga ní. Sidu, agi afugo re naringbisapai tipa pani. Ono rimo boro natingida rani na agu apai dunduko ini ani he tipa gu boro re. Teketeke a, agu arimo nga Gbia, Bairahe, Buba, na Bakusiahe, si nasa rani ani berẽkurii agu apai dunduko Mbori amangaha nibakiakia. Ono gu rimoko nga Yekova, si natingida rani na agu apai dunduko ini ani he tipa ko. Wai rengbe ani ka yawee ani ini Mbori baraho ani ainongo rimoko ni ya?

Anga gu nyanyakipa pai sa si aida ani mangihe nga ka ino rimoko te, ono si naida gupai aida a nga ani mangisunge na gu rimoko re. Tipagine? Bambiko Ziazia Kekeapai naya furani wee: “Gu ni ka kpari ni rimo Gbia [Yekova] ni bati abata.”—ARomo 10:13; Yoere 2:32.

[Gu rukutu kekeapai du bandu kpewaraga yo]

[Gu kpiahe du ti kpewaraga 6]

I rengbe ka yamba boro na agu arimo nga Gbia, Baramu, Buba, watadu Tita nibi gupai du tipa ní. Ono rimo ní natingida rani na agu apai dunduko ini ani he tipa ní.