Ani Nayamba Roni Na Nyemuhe

ONI avura susa pati ga aDezire Yekova Bambu Kindo (nga gu bambu i naairisombori rogoho) rogo gaoni dagbarago na ki sana tironi tipa wai i naairisombori tii gu gayó bambu re. Ya mo oni ini gupai nga gu gayó adunguratise i naamangaha na aposo dunduko re, si tipa aboro dunduko? Aboro dunduko i adia yó adia kugume tipaha.

Ono tie, si rengbe kadu nga asanahe kina ngbarago tipaha, du betehe nga: Tipagine aDezire Yekova naadungura tiyó ti ni? Gini apai i naamangaha ti regbo agu adunguratise re? Na ginipai agu aboro ninaandu koyo angianga aDezire Yekova ya naagumbaha tipa agu adunguratise re?

“Oni Dúngura Aboro”

Aboro aima digo nidunguratiyo tipa irisombori na tipa ka wirikapai tipa Mbori. Agarã wa 3,500 kusayo, i aya fu aYisaraere wee: “Oni dúngura aboro, akumba na ade na rukutu agude, na gaoni kungba aboro nga agu yo du kpuroni yo, i nigí he, ki niwiriki he, ki nigunde ti Yekova gaoni Mbori, ki niberẽ pa manga agu apai nga ga gi rugute re dunduko.” (Pa Fu Rugute ni Ue he 31:12) Sidu, i anaayugopai fu agude gbiati sosono aboro tipa i taʹirisombori kini mangi agu apai ko agumbaha.

Kusa, fuo sigirayo gu dungurati nga ga aKristano, adunguratise adu kindi ninyanyakipa papara ndikidi irisombori. Gu mokedi nangia Pauro akepai ki yaa: “Ani bérẽ pa akuarani ka nyakasa yo kuti nyemuse na wene mangaapai. Ka ani hé nga dungura tirani na akuarani, wa du sino agu yo ya, ono ani rúgu akuarani aruga.” (AEbere 10:24, 25) A wa ramukporo anyaka ho aborokporo asungo ni sa, kinawo a gu nyemuse du dagba aKristano anyaka wa i adunguratiyo tipa irisombori.

ADezire Yekova namangapai na ngbanya kuti gipai aKristano anaamangaha mbata re. I nadunguratiyo bara ue rogo poso tii gayó Bambu Kindo yo tipa irisombori. Agu adunguratise re naundo agu aboro nandu kupati ni i girogo gu bangua arugute nga ga Ziazia Kekeapai na kini mangihe. Ho apai anduni dunduko wenengai, gu mbakadapai du tipa gu dunguratise re kina sa rogo arago dunduko rogo zegino, na si nibasasa dunduko na gaha asásá nibakiakia. Agu aboro nandu kupati agu adunguratise re nagbia “wasa” dagbayó mbata fu dunguratise na tingbafuoho. (ARomo 1:12) Gini apai ninaamanga ti regbo agi adunguratise re?

Gumbapai

Gu bambata dunguratise dungu aboro naandu tipaha, si nga gu nidu tipa gu gumbapai du tipa aboro dũ, i naamangaha dedede ti digido poso. Wo Yesu anaamanga gumbapai fu dungu aboro, na gu sa dagbaha yo nga gu ko amangihe rii bagangara yo. (Matayo 5:1; 7:28, 29) Gu mokedi nangia Pauro amangi gumbapai fu agu aboro nadu Atenai yo. (Amokedi 17:22-34) ADezire Yekova napefuo gu kpiapai ko amoihe re kini mangi agu agumbapai du tipa aboro dũ kodihe na aguyo naima digo niye kupati gayó adunguratise.

ADezire Yekova naatona gu gayó adunguratise re na abia i adiaha rogo bukubia du rimoho nga Sing Praises to Jehovah (Ani Bibia Atambuahe fu Yekova).a Agu aboro gene nidu beyo tipa ka ru kuari, i naaru kuari tipa ka bibia. Fuo kparayo kpee niguruhe, gu wirina duna inohe naguari ka manga gumbapai tipa aminiti 30. (Oni bi gu sanduki du riihe nga, “Agu Agumbapai Du Tipa Aboro Dũ.”) Mburu gu gumbapai re rii Ziazia Kekeapai. Gu bagumbapai re naasana aboro i naazara agu averesi ko aida ka gedaha tipa i naapefuoko nani. Mbiko wa du wo tie duhe, si naida oni ye na gaoni Ziazia Kekeapai watadu ka sana boro sa dagba aDezire Yekova ní fu gu furoni mbata fu dunguratise tona.

Wisigo Ngbaõbambu Sinziri

Rogo dungu adungurati nga ga aDezire Yekova, Wisigo Ngbaõbambu Sinziri i naamangaha fuo nyasa gu gumbapai du tipa aboro dũ. Si nga gu sakapai nga sanahe na karagapai du mburuhe rii Ziazia Kekeapai na si nadia saa sa. Gi dunguratise re nangarasa agu aboro du pati ni i naapefuo gu kpiapai nangia ga agu aboro nadu Beroya yo ti rago Pauro, nga agu aboro ‘nadipai wenengaĩ ka berãha, niwisigi Ziazia Kekeapai.’—Amokedi 17:11.

Wisigo Ngbaõbambu Sinziri natona na bia. Agu apai i awisigoho gbiati agu asanahe banungusihe asanaha, si nakura rogo gi waraga nga Ngbaõbambu Sinziri re. Oni rengbe ka gbia wirina gi magazini re be boro sa dagba aDezire Yekova. Agu apai i asakipai tipaha barambeda kusayo nakoda agere: “Avunguagudee, Oni Raba Awironi Rogo Nyemuse,” “Ka Oni Karaga nga Gbegberẽpai fu Boro ku ba Gbegberẽpai Wa Sa Ya” na “Ndu Gupai Mbori Nika Digiso Arungo Dunduko ti ni Bambeda.” Wa vura duhe nga i nanungusa gu sakapai re ngba gu gene nga ka fu sanahe na aboro kini karagapai kuti ni, i aziongo boro azio ní karagapai te, na dedede, agu aboro nakaragapai kuti agu asanahe re nga agu aboro naima geda gu papara kekepai mbata gbiati agu averesi du rogoho yo. Gu dunguratise re nadigo na bia gbiati kparakpee.—Matayo 26:30; AEfeso 5:19.

Gu Wisigo Ziazia Kekeapai Nga ga Dungurati

Rogo nyemu sa rogo poso, aDezire Yekova nadunguratiyo kutii Bambu Kindo yo tipa gu irisombori duna apaparaha biata nadia regbo nga saa 1 na aminiti 45. Gu bambataha nga Gu Wisigo Ziazia Kekeapai Nga ga Dungurati nadia aminiti 25. Si naundo agu aboro du pati ni i inidi tiyó na Ziazia Kekeapai, na tipa i aria gayó berã na ka mbakada asinoyo niga Kristo abawiriki. (2 Timoteo 3:16, 17) Wakina Wisigo Ngbaõbambu Sinziri, i nanungusa gi dunguratise re nga ka fu sanahe na aboro kini fu akaragapai kuti ni du mburuhe rii Ziazia Kekeapai. Kina boro nitiní naida ka karagapai, i aziongo boro azio kuti ni te. Dedede, gu waraga i naamanga gi sakapai re rogoho ningia buku watadu burosua aDezire Yekova akusihe.

Tipagine i amangasunge ti ni na agu awaraga du mburuhe rii Ziazia Kekeapai? Ti agu aregbo i aakeka Ziazia Kekeapai ti ni, anga kina geda Ziazia Kekeapai naanirengbe kuho te. Ziazia Kekeapai nayawee fuo gedayo pai rogoho, ‘i aniyugupaha, sidu aboro ki rugu tiyó na gupai i nagedihe.’ (Nemaya 8:8) Vuru agu agarã susi bambeda kusayo, aboro arugutiyo na agu apai du rogo agu abuku nga Yesaya, Daniere gbiati Yugoti ti regbo gi dunguratise re mbiko agu awaraga i akusihe nasakarogoyo.

Sukuru Nga ga Siokrasia

Gu Sukuru Nga ga Siokrasia nangbe tifuo Gu Wisigo Ziazia Kekeapai Nga ga Dungurati. I ambakadi gi sukuru re tipa si undo aKristano i ini birĩ “yugopai.” (2 Timoteo 4:2) Nikpiapai, wironi watadu kura boro asananga roni na sanahe tipa Mbori watadu tipa Ziazia Kekeapai ka si adunga furoni taata oni karagapai sani ya? Gi sukuru re rengbe ka undo roni oni ini wai ka fu gu karagapai nangarasa boro du mburuhe rii Ziazia Kekeapai. Si atadu were, ani ki rengbe ka fugö agu apai gu nebi nangia Yesaya agumbaha ki yaa: “Gbia Mbori fu gu mirãse fere wa ga agu yo i ayugu pai fu yo, ya mi ini waĩ ka mi songodi gu ni nambu ni wene fugo.”—Yesaya 50:4.

Gu Sukuru Nga ga Siokrasia natona na gumbapai du mburuhe rii papara Ziazia Kekeapai, nga gu papara Ziazia Kekeapai i aima ngarasa aboro rogo gu poso susi i gedihe. Fuo nyasa bagumbapai na gako gumbapai, ko nasana agu aboro du pati dunguratise i fura niguruhe tipa agu apaparaha i agbia undo behe rogo gu paparaha i akparaha tipa gedaha rogo gu poso re. Fuo nyasa gi sakapai re, agu aboro nakeke arimoyo rogo gi sukuru re kini mo ka manga agu agumbapai i afukuhe fuyó.

I nafu sunge fu agi abawirikipai re i gedi papara Ziazia Kekeapai rii tambara yo watadu ka yugo wai rengbe yó ka yugopai rogo Ziazia Kekeapai fu boro. Fuo nyasa gu gumbapai re, gu wirina duna inohe natambua gu bawirikipai re tipa gupai mangi ní he wenengai. Mburu gi tambuahe ní afuhe re rii gu buku nga Benefit From Theocratic Ministry School Education. Kusa, ní rengbe ka ngarasa gi bawiriki re nisani giiragoyo tipa wai rengbe ní ka mbakada gani gumbapai.

Gi papara dunguratise boro aimanga aima nani re ya, i ambakadihe tipa si undo bawiriki gbiati agu aboro du pati dunguratise tipa i ini gedapai, fura wenengai, na abirĩ yugopai. Fuo nyasa gu Sukuru Nga ga Siokrasia, i nabibia du mburuhe rii Ziazia Kekeapai tipa ka zakagene fu Gu Dunguratise Nga ga Sunge.

Gu Dunguratise Nga ga Sunge

Gu yangara mbakadapai du rogo gi irisombori re nga Gu Dunguratise Nga ga Sunge. Agu apai du rogoho nga agumbapai, yugopai na kpiapai, yamba aboro kurii tambara yo ka sana yó, na karagapai be agu aboro susungu. Ndu manga agi apai re nga ka undoyo i ini ka yugo Ziazia Kekeapai wenengai. Mbata fu Yesu kedi gako abawiriki ku gene tungusapai yo, ko ayambu yó ki fuku arugute fuyó na agu afutufutuhe. (Ruka 10:1-16) Fuo i mbakadi tiyó tie were tipa sunge tungusa wene pangbanga, i andu ki gbia ngbarago be gu dungu apai namangi fuyó yo. Kusa, i aye na apangbanga fuko. (Ruka 10:17) Agu abawiriki re anaapeka agu apangbanga dagbayó namangi fuyó gene sunge tungusapai yo.—Amokedi 4:23; 15:4.

Gi Dunguratise Nga ga Sunge re, si nadia aminiti 35 na i naye nani rogo gu waraga i ayambaha nga Gaani Sunge Nga ga Kindo. Agu apai ani asakipai tipaha bambeda kusayo akodi agere: “Agu Aborokporo Nairiso Yekova,” “Gupai Nasa Rani Ani Karaga Tirani Berewe Fuo Aboro,” na “Oni Pekefuo gu Kpiapai Nga ga Kristo.” Gu mbakadapai re nanyasa na bia, wirina sa ki fu yangara kpee.

Agu Apai Aboro Agumbaha Nga Aguyo Naye Kutii Bambu Kindo Yo

Agu aboro du rogo dungurati namanga asadatise ka dia agu aboro dunduko kugume naye fuoyo. Nikpiapai, kumba nga Andrew agi dungu gbegberẽ apai bara aDezire Yekova. Ono ho ko ayeni nibambata regbo kupati dunguratise, kina ngbako nazere wa i adiko kugume wenengai gbe. Ko ayaa: ‘Si angia wene ba mi du rogoho. Kina ngbare nazere ka bi wai aboro amangire rogo pabakure na kidu na nyemure tiyó. Degude nga Ashel ayaa: “Gu dunguratise mi andu kupati ni aima ngba! Si adu fere taata ka giarogoyo.”

Kumba nga José naraka Brazil yo angia kere boro-wingbaa rogo gako dagbarago. Wa apai avura duwa gere tipa ko, awirina ayambuko ko ye kutii Bambu Kindo yo. Ko ayaa: “Wa agu aboro nadu Bambu Kindo yo avura ino pai tipa asinore wenengai, i adire kugume wenengai.” Atsushi naraka Japan yo ayaa: “Ka pe rengo, mi aagunde agunde ho mi andu ni ti bambata regbo ku dagba aDezire Yekova. Ono tie, mi akparia gupai nga i wakina kura aboro. Mi amangi asadatise ka sa ngbarago tire.”

Ani Nayamba Roni

A wa agu afugo du kuari re ayugoho, pa ndu boro kupati adunguratise tii Bambu Kindo yo nga wenepai. Oni nika wirikapai yo tipa Yekova Mbori na ko nika ‘yugopai furoni tipa si undo roni.’—Yesaya 48:17, NW.

Aboro atumongo atumo tipa ka rimo ku ba agu adunguratise nga ga aDezire Yekova te, na i arogodanga marã be aboro a te. Ya mo oni aduna nyemu ka ndu kupati kura dunguratise nga ga aDezire Yekova du rogo gaoni dagbarago? Ani nayamba roni na nyemuhe oni ye.

[Gu rukutu kekeapai du bandu kpewaraga yo]

[Gu kpiahe du ti kpewaraga 30]

Agu Agumbapai Du Tipa Aboro Dũ

Agu agumbapai du tipa aboro dũ nga gu i naasiaka agumbapai dagbaha, bangehe ima susa 170. Rii agu akuraha gere:

◼ Wari Aboro Aenge Ni?

◼ Ga Mbori Bipai Tipa Kodaba na Tipa Rogatise

◼ Gbarasa Kpotosende Naye na ga Mbori Zinga

◼ Diabe gu Kpakarapai Du Rogo Raka

◼ Ya Mo Gi Raka Ani Arakaha re, Si Nga gu Yangara Raka Duho?

[Gu kpiahe du ti kpewaraga 30]

Gu gumbapai du tipa aboro dũ

[Gu kpiahe du ti kpewaraga 30]

Wisigo “Ngbaõbambu Sinziri”

[Gu kpiahe du ti kpewaraga 31]

Gu Wisigo Ziazia Kekeapai Nga ga Dungurati

[Gu kpiahe du ti kpewaraga 31]

Gu Sukuru Nga ga Siokrasia

[Gu kpiahe du ti kpewaraga 32]

Gu Dunguratise Nga ga Sunge