Ya Mo Apambori Dunduko Du Niwenehe?

ANI naraka rogo gu zegino hii be dungu apambori. Gu wisigopai i amangihe barambeda kusayo ayugu gupai nga, bangua apambori ho rogo zegino dunduko nga 19 na gu kura arukutuhe kidu nga 10,000. Pa nge apambori wa gere nasa aboro i siaka agu apambori i aidaha, nga gupai naadunga mbata ya. Ya mo gu pambori du mi rogoho, si niwenehe?

Kura aboro nape gupai nga, apambori wakina gu dungu agene nandu kurii bagangara yo. I abingo gu kparakparapai duti gu gene sia yó ho te mbiko agu agene re dunduko nandu kina kurogo bangisa rago. I nabihe nga wa duhe nga gu Mbori Duna Tanduapai Dũ ko kina sa, si tie ziazia nga apambori dunduko nandu kina koyo du ko ni.

Ya Mo Apambori Dunduko Nandu na Aboro Koyo Du Mbori Ni?

Ginipai Yesu Kristo, nangia gu bakere bayugupai nga ga pambori ko agumbaha tipa gipai re? Ko agumba gupai fu gako abawiriki nga: “Oni rími rogo pangipangi ngbadimo.” Tipagine ko agumba gupai re ti ni? “Bambiko gu ngbadimo na gu gene nangbe koyo du kpio ni, si du ni kikii he, ni basisi he, dungu aboro narima koyo. . . . [Ono] gu ngbadimo na gu gene nangbe koyo du unga ni, si du ni pangipangi he, ni fitikiri he, aboro nabi he ni kina umba yo.”—Matayo 7:​13, 14.

Ya mo boro rengo du Yesu agumbaha nga kura apambori “nangbe koyo du kpio ni”? Watadu gupai ko aayugoho nga kina agu aboro aidanga kuti Mbori ya, i nandu ngba gu gene du nikikiihe, ono agu aboro idi kuti Mbori ka i vura du kina rogo gini pambori vurũ, i tigayo du ngba gu pangipangi gene nandu koyo du unga ni?

Fuo gumba Yesu gupai nibasa nga agene gu duho ue, ko ape gupai nga: “Oni bánda tironi be airazire anebi, naye fuo roni na kpoto akandoro, ono kpotoyo yo du wa awaru nari ngbara.” (Matayo 7:15) Ko agumba gupai kusa nga: “Agu yo naya ti re, ‘Gbia, Gbia,’ i aríma nga ku rogo gu ngbi nga ga ngbangbaturũ dunduko te; kina gu ni namanga wa Buba akpi nyemu he du ngbangbaturũ yo.” (Matayo 7:21) Ka si du nga boro nayamba tiní nga nebi, watadu ní nata ngbaduni ya Yesu nga gani “Gbia,” ngbaha angba ani ya ní nga vuru Mbori, angianga pagano ya. Si ziazia tie nga, Yesu azahe nga, anga apambori dunduko du niwenehe te, na anga abayugu pambori dunduko si aida aboro kido kutiyó a te.

Ya Mo Si Nitaatapai Boro Ini gu Pangipangi Gene Re?

Wa duhe nga anga apambori dunduko nandu koyo du Mbori ni te, wai rengbe ani ka gbia gu ndikidi gene nandu koyo du unga ni dagba agu akutu agene nga ga apambori du awere re? Oni makianga gi kpiapai re: Oni berẽnga gupai nga, oni ingi rogo bakere gbata sa. Oni kini sana boro tipa ní yugu gene furoni. Gu kura boro bi tiní nga ní ini gene ki pe gupai furoni nga, oni ndu na gu gene nandu ku uroyo. Guni ki pe gupai furoni nga oni ndu na gu gene du ku dioyo. Gu kurani ki pe gupai berewe furoni nga, oni sia kina gu gene ngba tironi. Niyangaraha, gu kura gaoni badianunguro nadia gbakigbaki kpiarago nga gu nayugopa gu ndikidi gene si aida oni ndu ngbaha. Gu boro re fu gu gbakigbaki kpiarago re furoni tipa si naayugo gene furoni wa oni ka ndu. Ya mo oni dunga na bakere kido nga oni nika daada rogo gu ba oni andu kurogoho tee?

Teketeke wakina gure a, ho ani aida ka sia gu nzunzu gene ni nga ga pambori, si naida ani du na kina boro gu nzunzu gbakigbaki kpiarago berani nika sa rani ani ini gu nzunzu gene rengbe ani ka ndu ngbaha. Ya mo gu gbakigbaki kpiarago re ho areme? Ii, si kinaho, si nga Ziazia Kekeapai mbiko si nayaa: “Ziazia Kekeapai dunduko si aye be ga Mbori Toro si ki rengbe tipa yugopai, tipa zapai, tipa ruga aboro, na tipa raba aboro rogo rurupai.”—2 Timoteo 3:⁠16.

Si nawira gupai nga, Ziazia Kekeapai nikina sasaha kurogo fugoroni nga gu rengbe oni ka mangasunge nani tipa si ngbe furoni kumbatayo sa ndikidi irisombori. Agu aboro kusi gi waraga re nga aDezire Yekova, i ima kusa wene sasa fugo nga ga Ziazia Kekeapai rogo pa-Ngirisi du rimoho nga New World Translation of the Holy Scriptures. Ono tie, ka si du nga Dezire Yekova nga oni te, oni rengbe arengba ka mangasunge na kura sasa fugo nga ga Ziazia Kekeapai tipa si undo roni oni ini gu pambori du niwenehe watadu gu du nigbegberẽhe.

Wa oni kaa geda gu papara kekepai naye re, si naida oni ringbisi gupai ini oni he na gu Ziazia Kekeapai agumbaha. Oni moi afugo Yesu ku berãroni yo nibipa wai rengbe oni ka kpara wene pambori ti gbegberẽhe. Ko ayawee: “Wene ngua nazu wene rinde; ono gbegberẽ ngua nazu gbegberẽ rinde. Ka wene ngua zu nga gbegberẽ rinde te, ka gbegberẽ ngua zu nga wene rinde te.” (Matayo 7:​17, 18) Oni makianga apai biata tipa gu zuzu rindingua nayugopa “wene ngua” nga gu Ziazia Kekeapai afura tipaha.

[Gu kpiahe du ti kpewaraga 3]

Ziazia Kekeapai wakina gu gbakigbaki kpiarago naundo boro ní ini gu ruru gene nandu sa ndikidi irisombori