Gu Kumuko Naye be Mbori

KA SI du nga oni niruru roni fu Mbori, ya mo ko funga aũkumuko furoni tee? Isoke, si rengbe arengba kadu wo, ono angianga gu ngbatunga aũkumuko oni aberãpaha ya. Ani makianga gu kpiapai nangia ga Maria na Yesu. Ho gu Maraika nangia Gaburere ayugu tiko ni fu Maria, ko aya furi wee Mbori “fu maku” furi na ri nika batika Wiri Mbori. (Ruka 1:28, 30-32) Ono wa si avura duwo, ri angianga irakumuko te. Ho Maria afu motumo ni fuo batika ri Yesu, ri aye na “ambipo ue watadu paranga agbungu ue,” nga agu azire kina airarungo anaafura fu Yekova nimotumo.​—Ruka 2:24; Pa Amotumo 12:8.

Ya mo padu Maria nirungorungo ri nayugo gupai nga Mbori afunga maku furi tee? Kuba gure, ho ri andu ni ka bi gu gumeri nangia Erizabeta, ‘Erizabeta ahi be Ziazia Toro. Ri ki poi kuari nibakere fugo, ki yaa, “Irisiirisi boro nga mo [Maria] dagba adee yo, irisiirisi hee nga zuzu rukumburo!” ’ (Ruka 1:41, 42) Maria aduna gu momu beri nga kadu ni navungu gu Wiri Mbori ko akpinyemuko gbe.

Yesu nitiko adunga niʹirakumuko te. I avunguko rogo gu rago nadu nirungorungoho na ki sonosiko rogo gu dagbarago kumuko adunga rogoho ya, na ko angia rungorungo boro ti regbo gako raka naabaha dunduko. Ko ape gupai fu gu kumba naaida kadu nigako bawiriki nga: “Anya nasunga rogo yaro, azire ari yo ki sungu rogo angua; ono ba adu nga be Wiri boro ka ko pi auru he wa sa te.” (Ruka 9:57, 58) Wa si avura duwo, paye Yesu Kristo ku auru kpotosende no asaha fu gako abawiriki taata i gbia bakere aũkumuko. Gu mokedi nangia Pauro akepai ki yaa: “Ko asa tiko ni boro rungo tipa roni, ya oni ye ka du ni aira ũkumuko mbiko gako rungo.” (2 AKorindo 8:9) Gini ngbatunga aũkumuko Yesu afuhe fu gako abawiriki? Na gini ngbatunga aũkumuko du berani areme?

Gini Ngbatunga Aũkumuko Du Berani Areme?

Aũkumuko dedede nasa aboro i naakota rogo idapase yo, mbiko airakumuko nakido kuti gayó aũkumuko kisusi wai i akido kuti Mbori. Yesu ayaa: “Kpakara rima ku rogo ga Mbori ngbi yo akparaka fu agu yo kumuko akumuko gbe!” (Marako 10:23) Si ziazia tie nga, anga agu aũkumuko Yesu afuhe fu apefuoko si angianga aũzegino te.

Nirengo, badungu agu aKristano nadu rogo bambata sa kama agarã angia kina airarungo. Ho gu kumba i avunguko nigbarigbariko asanahe ni tipa marã, Petero akaragapai fuko ki yaa: “Marã be re te; gu he du be re si mi afu foro. Ni rimo Yesu Kristo nga boro Nazareta; mo nitá.”​—Amokedi 3:6.

Afugo gu bawiriki nangia Yakoba nayugo gupai nga, agu aboro nadu rogo gu dungurati nga ga aKristano, badunguyo angia kina rungorungo aboro. Ko akepai ki yaa: “Oni gí he, abadiangbare; a nga Mbori nasia agu aboro du ni rungorungo yo rogo pa zegino i du ni kumukokumuko yo rogo idapase yo, i rogo gu ngbi ni gayo a, ko akido pa ha fu agu yo nakpi nyemu ko, te?” (Yakoba 2:5) Kurigure, gu mokedi nangia Pauro ape gupai nga, anga ‘airatatamana wa du pa borose’ watadu “agu yo nga bahe” watadu “agu yo nga irisiirisi yo” i ayambu yó i ye kadu nipapara gu dungurati nga ga aKristano te.​—1 AKorindo 1:26.

Ka si du tie nga gu ũkumuko Yesu afuhe fu apefuoko angianga aũzegino te, gini ngbatunga aũkumuko ko afuhe fuyó? Rogo gu waraga Yesu akedihe fu gu dungurati nadu Semuruna yo, ko ayaa: “Mi ini pa ga gberãngbi, na ga rungo, ono mo na ũkumuko.” (Yugoti 2:8, 9) Wa vura duhe nga agu aKristano nadu Semuruna yo angia airarungo, i aima du na agu aũkumuko beyo paha anyaki gbe kisusi feda na dahabu. I adu ni airakumuko mbiko gayó idapase naapa du yó niruruyo fu Mbori. Idapase nitihe nga nyanyakipa he mbiko ‘anga aboro dunduko duna idapase te.’ (2 ATesaroniko 3:2) Agu aboro adunga na idapase ya, i bangiri Mbori ni airarungo.​—Yugoti 3:17, 18.

Agu Aũkumuko Naye be Idapase

Rogo gini agene du idapase na nyanyakipaha? Agu aboro duna idapase kuti Mbori, i nagbia undo be gu “ũkumuko nga ga gako weneringise na zera na hipai.” (ARomo 2:4) I na ngbarago mbiko i ‘vu yo ti gayó tiandika’ mbiko gu idapase du yó nani kuti gu motumo tumorii nga ga Yesu. (AEfeso 1:7) Kurigure, i na gu tatamana beyo “ga Kristo pai” aye nani fu agu aboro duna idapase. (AKorosaio 3:16) Wa i akpara fu Mbori rogo idapase yo, “gu zereda nga ga Mbori nagasi rugatinapai” nabanda kpotoyo yo na gayó aberã na kini sayo i rengbe be kina agu ahe du beyo na kini fu ngbarago fuyó.​—AFiripoio 4:7.

Kuri agi amaku re dunduko, agu aboro duna idapase kuti Mbori rogo wiriko nga Yesu Kristo, i na bawene maabangirise tipa ka raka nyeanye kindi. Afugo Yesu nayugoho gbaiga nga: ‘Mbori akpinyemu aboro akpi zegino dũ, wa ko afu bangisa Wiriko, ya guni ka idi pako ní kpingo te, ono nyenye unga du adu beni.’ (Yoane 3:16) Boro nanyakasa gu bawene maabangirise re ho ní agbia gu ndikidi inohe ni du tipa Mbori na Wiriko, mbiko Yesu ayaa: “Nyenye unga nga gere, nga i ini ro nga bangisa ndikidi Mbori, na gu ko mo akedi ko, nga Yesu Kristo.”​—Yoane 17:3.

Wa vura duhe nga, Mbori nafu agu amaku fu aboro nga ga toro, ko naundo yó aundo rogo nunga yo na rogo borose yo a. Ani bingo gu kpiapai du tipa Dalídio du Brazil yo. Mbata fu ko gbia gu ndikidi inohe du tipa ga Mbori ringbisapai, ko angia kere bambiri. Gipai re aima duna gbegberẽ sangbanaha kurii gako aborokporo. Kurigure, ko anaabingo marã dedede te. Fuani, ko atona ka wirika Ziazia Kekeapai na aDezire Yekova na ki aria asinoko.

Agu apai Dalídio awirikihe rogo Ziazia Kekeapai asako ko mbu gu gbegberẽ mangaapai ko anaamangaha mbata. Ko asono kumbatayo rogo toro yo na si ki sako ko yaa, “Mi anaambira buda kini ta tipaha rogo akporo nibasasa, ono awere mi natungusapai kini tanga nani ti akporo.” Ko ima da awere nigu bamangisunge natungusa Fugo Mbori ti aregbo dũ. Anga gi ariapai re ambakadi kina kpotoko sa te, ono si aima banda gako marã a. Dalídio ayaa, “Gu marã mi anaagbarasaha mbata tipa kina mbira buda, mi namangasunge awere nani tipa ka undo agu aboro du rogo zingo na ka ngbe agu ahe mi aidaha.” Ko ima gbia dungu ndikidi abakure mbiko kodako tiko na agu aboro duna gu bangisa maabangirise nga ga toro du ko nani. Dalídio ima gbia zereda awere berãko yo, na ko awere na ngbarago kisusi gu ko adu nani mbata fu iniko Mbori.

Gu kura boro nagbia undo mbiko ni adu na idapase kuti Yekova Mbori nga Renato. Ho boro abi kpakpuko yo ni na kina mongo ti aregbo dunduko, si nikpakarapai ka ino gupai nga ko aima gbiatiko ti akpakarapai rogo gako raka. Ho ko aduni nifogo gude, nako agindigoko. Nako ambuko rogo mangu tii kanaba yo pangba gene, kpotoko kidu nimburukumburukuhe dunduko na giri mbukuseko kidu kindi tiko. Adee ue naandu ngba gayó gene abi mangu tii kanaba yo si niwo awo. I aberẽhe tigayo nga boro du nambu wiri pusu rogo gu mangu re. Ho i abihe ni nga fogo gude du, i adiko ki oro naako kurogo gu bambungua nadu barambeda tipa i ngere fuoko.

Dee sa dagba agu adee re angia Dezire Yekova, na ri apepa gu gude re fu Rita nangia kura Dezire Yekova. Badungu agude nanaati ti Rita, kina degude ki nye beri sa. Sidu, ri aduna nyemu kumbagude, ri kini mo ka diberã ka dia Renato tipa ka sonosa ko.

Rita aima gumbaha fu Renato mbuko kindi tooni ya anga ndikidi nako nangia ri te. Oni ri amangi ome tipa ka ngerafuoko rogo nyemuse yo na ki bihe nga si naida ri rimisi agu apai nga ga toro kurogo ko yo. Ho ko atona ka sona ni, ko atona kadu na nyemu agu apai du rogo Ziazia Kekeapai. Si asako berewe ko du na bakere tambuahe tipa gu baiiriwo gene ko abati ngbaha. Wo ko nidu na bakere nunga ti agu regbo ko naageda agu afugo Davide nayaa: ‘Ka buba mbure na nina, Yekova adiare adia.’​—Atambuahe 27:10.

Mbiko wa Renato aduna tambuahe tipa agu apai dunduko Yekova amangihe fuko, ko azi bapatiza rogo 2002, na ki tona tungusapai ti aregbo dunduko rogo gu garã nangbe tingbafuo zioko bapatiza. Da ku areme, ko atainongo boro ndikidi navunguko gbiati bavunguko te, na si nawira gupai nga ko ainongo yó berewe a te. Ono tie, Renato nabihe nga gu bawene gamahe ko agbiaha nga ka ino Yekova na kidu na idapase kuti gu gene ko angerafuoko ngbaha wa gu baagude duna nyemuse.

Isoke, si rengbe kadu nga oni naida ka mbeda na Mbori na kadu na wene pagume dagbaroni naako nga gu rengbe ka mbakada gaoni raka nirengo. Gu momu du tipa kadu na ngbatunga gu pagume re dagbaroni na Mbori gbiati Wiriko nga Yesu Kristo, si nizakizakihe fu airakumuko na rungorungo aboro dunduko. Si ayengo na aũkumuko furoni te, ono sangbanaha nikangia zezeredi berã na oni kidu na ngbarago be kina agu ahe du beroni nga agu apai marã arengbanga ka ye nani furoni wagusa ya. Agu afugo du rogo Asanza 10:22, si nga kina boro rengo mbiko si nayaa: “Gu maku nga ga Yekova nakumukosi boro, ko nagbia nga rungo kuti ni te.”

Yekova Mbori na bakere nyemu agu aboro naye koyo du ko ni. Fugoko nayaa: “Akõ! ka mo adege turo sa gimi arugute! Si du ka ga zereda adu ti ni wa di, na ga rurupai wa ngiri baime.” (Yesaya 48:18) Na ko nakido agu aboro naye fuoko na ruru ngbaduyó yo gbiati berãyo nga ko nika fu bakere mosoro fuyó niyaa: “Gu mosoro nga ga umbasitise na gunde ti Yekova nga aũkumuko na irisa na unga.”​—Asanza 22:4.

[Gu kpiahe du ti kpewaraga 5]

Wa avungu Yesu avurangia airarungo, Mbori aima fu maku fuyó

[Gu kpiahe du ti kpewaraga 6]

Ida kuti Mbori naye na zereda, ngbarago gbiati rengba be kina agu ahe du berani