Ga Yekova Arugute Ngbaa Kisusi
“Ahe dunduko si adu nga bangire ni he te mbiko gu wene pai nga inida Kristo Yesu.”—FRP. 3:8.
1, 2. Gini asásá kura aKristano amoihe na tipagine?
ROBERT angia tatamanatatamana gude ho ko atona wirikapai ni sukuru yo. Ho garãko aduni nga muambe, gako nayugupai sa aye ka biko kpuyo yo na ki pe gupai fuko nga apai dunduko rengbeko ka mangaha. Ri apepa gu maabangirise ri adu nani tipa ko nga, uru adu kinaho sa ko nika da nimunganga. Agu apai ko aawirikaha sukuru yo asako ko duna wene inohe na ki sako ko rẽ tipa i rimisiko kurogo gu yunivasiti nangba gbe rogo gako ringara. Ono tie, Robert ambu gu momu ambu aboro abihe nga si su fuko sukuru yo re, nga gu momu namanga bara sa gbua fu boro. Ko ambuhe tipa ka pekafuo gako sásá nga ga mangasunge nibazakigene.
2 Wakina Robert, aKristano dunduko duna momu beyo ka sona kumbatayo rogo gi zegino re. Beteyo nambu mangasunge na gu momu re tipa ka pekafuo agu asásá nga ga toro. (1 Kor. 7:29-31) Gine nafõngbadu agu aKristano yo duwa Robert i naamangasunge tungusapai? I natungusapai kakaka mbiko nyemu Yekova gudu tiyó, na mbiko i ima rugatiyo naapa gu bawene yugupai du beko. Ya mo oni aberẽnga tipa gipai re nga, wa ka oni agianga rengo ya, ka gaoni raka du awere wai? Pa berã ani kurii gu nyanyakipa amaku ani agbiaha nisangbana gu yugopai Yekova ayugoho furani nika undo rani ani berẽkuriipa wai nyakipa wene pangbanga na si nika undo rani a ani naatungusaha kakaka fu kura aboro.
Si Nimomu Nga Mbori Nayugupai Furani
3. Tipagine rengbe ani ti ni kadu naa kido nga Yekova na nyemu ka yugopai fu kpakpa aboro?
3 Yekova na nyemu ka yugupai fu kpakpa aboro mbiko gako wene sino. Yesaya 54:13 nafura tipa mbedimbedi aKristano kumbatayo ki yaa: “Awiro dunduko kina re nikayugo pai fu yo, ga awiro wenepía adú ni bakere he.” Agu afugo re nafura bakere gbe tipa ga Kristo “kura akandoro.” (Yo. 10:16) Gipai re ziazia nibipa gu sangbaanebi nadigiso tihe ti gi gaani regbo re. Yesaya abi arikaaboro rogo yuguyugupai i nigbe koyo du ndikidi irisombori ni. Ko afura tipa yó ki yawee i nafura dagbatiyo niyaa: “Ani dákpa ku ri ga Yekova bagangara yo, koyo du ga ga Yakoba Mbori bambu ni; ya ko raba rani na gako asino ani ki nipeke kina gako agene.” (Yes. 2:1-3) Nairiwo gu momu nga Mbori naayugopai furani re!
4. Ginipai Yekova aidaha be agu aboro ko ayugopai fuyó?
4 Ginipai si aida ani mangihe tipa ka gbia agi arugute re be Yekova? Si naida ani du na umbasitise. Davide akepai ki yaa: “Yekova du ni wene ko ni ruru ko; si du ko naraba aboro ingapai ti ni ngbagene.” (Tam. 25:8, 9) Na Yesu ayaa: “Mi natambua ro, Buba, Gbia ngbangbaturũ na sende, ya mo aoko agi apai re be airatatamana na airainahe, ki yugu he fu toni agude.” (Ruka 10:21) Ya mo si aidanga oni mbedi na gu Mbori “nafu undahe fu agu . . . [aboro] naumbasi tiyo” tee?—1 Pet. 5:5.
5. Gine nasaha furani taata ani gbia gu inohe nga ga Mbori?
5 Wangia ani ga Yekova amoyambu, ya mo ani rengbe ka yawee ani aini rengo mbiko gaani ome nitirani watadu mbiko gu tatamana du ani nani? Oó, wo duhe te. Nirengo, ka si angia kina mbiko gaani ome nitirani, ka ani arugunga tirani naapa gu inohe nga ga Mbori te. Yesu ayaa: “A nga boro sa ka ye kono du mi ni gbua te, kina Buba nakedi re ka gbe ni.” (Yo. 6:44) Yekova nagbe agu aboro duwa avusende, nga “agu ahe ngba bangiri arikaaboro dunduko” koyo du ko ni rogo tungusapai na kini gbe yó berewe na gu ome nga ga gako ziazia toro. (Agai 2:7) Ya mo oni atambuanga Yekova mbiko ko ye na oni ku dagba agu aboro ko nagbe yó fuo Wiriko tee?—Oni gedi Yeremaya 9:23, 24.
Ga Mbori Arugute Naʹaria Gaani Raka Si Du Niwenehe
6. Gini bakere ariapai rengbe ka manga ka aboro ‘hí be gu inohe nga ga Yekova’?
6 Yesaya amangisunge na wene kpiapai ka ringbisapa wai aboro ambu gbegberẽ asino areme kini tona wenehe. Agu aboro nanaamanga zuũ mbata ima sa tiyó ni aboro zereda. (Oni gedi Yesaya 11:6-9.) Agu aboro nanaasoga tiyó mbiko agu azanga giatise nadu dagbayó, watadu mbikopa angbatungayo, watadu tipa gu kura asino, i dunduko ima ino wai ka raka awere rogo pazereda na akurayó. Ka pepai nimasaku, “i atá gayo abasape ni marã sopabino.” (Yes. 2:4) Gine nasa yó i mangi gi bakere ariapai re? I amangi gu bakere ariapai re mbiko i “ahí be ina pa Yekova” na kini mangisunge na gu inohe re rogo gayó raka. Wa vura duhe nga, ga Mbori amoyambu nga kpakpa aboro, i rogo kodatise nga ga wirina rogo zagino dunduko. Gu wene pangbanga i atungusaha na arago dunduko na gu wene sangbanaha si akusaha, si nayugopa wai nyakipa gu yugopai nga ga Mbori.—Mt. 11:19.
7, 8. (a) Gine nga bete gu “nyanyaki agbata” gu yugopai nga ga Mbori aundo aboro i dibehe? (b) Ginipai nayugo nani nga, gu yugopai nga ga Mbori, si naye na taarimo fuko?
7 Pauro aringbisi gu dezirepai ga Mbori amoyambu amangaha areme kuti gu vura nga ga toro. Ko akepai ki yaa: “A nga aũ gaani vura ni ga borose te, ono si du na tandu barangba Mbori rengbe na bafa nyanyaki agbata. Ani nabafa aberã, na gu irisiirisi apai dunduko i nakiisa ha kuti gu inahe nga ga Mbori.” (2 Kor. 10:4, 5) Gine nga bete gu “nyanyaki agbata” gu yugopai nga ga Mbori akusa aboro behe? Agu ahe si akusa rani behe nga, ziree yugopai, sangbaatoro, na gu nyemu tatamana nga ga aboro. (Koro. 2:8) Gu yugopai nga ga Mbori naundo aboro i dibe gbegberẽ mangaapai na kini mangi agu apai ngbaa ti Mbori. (1 Kor. 6:9-11) Si nambakada ramukporo si du niwenehe. Na kini fu maabangirise fu agu aboro naainonga ndu gupai i araka ti ni ya. Gere nga ngbatunga gu yugopai aboro aidaha areme.
8 Sino sa dagba agu asino Yekova aida aboro du nani tiyó nga pe rengo, a wa ani ka bihe rogo gu kpiapai naye re. (Eb. 13:18) Dee sa India yo aidi pa wisigo Ziazia Kekeapai na ki da nigu natungusipai ataziongo bapatiza ya. Rogo uru sa, ri andu ka undo sunge dua Bambu Kindo, ho ri aaga ni ku kporo yo, ri abi fongo nga ga gose rogo dahabu sande ba dakpa baasi yo. Gino gu fongo re adu nga adorari muambe kama. Wa si avura du nga rungorungo boro nangia ri, ri adi gu fongo re ki ndu nani fu aborisi. Kina ngba gu borisi nadu basunge yo nazere ka bi gupai ri amangihe re! Kusa, gu kura borisi sa asanari ki yaa: “Tipagine idi mo ti ni ka karaga gi fongo re?” Ri asakirogoyo fuko ki yaa, “Gu yugopai du rogo Ziazia Kekeapai mangi aria rogo gimi raka yo, si du mi aidanga ka dihe ti ni ya.” Rago angba ti gu borisi re ko ki pe gupai fu gu bakumba nagasi ri ki yaa: “Bange agu aboro du rogo gi papara ringara re ima susa amirioni 38. Ka oni undo aboro kandara bawe gbua i aria asinoyo wa ga gi dee re, si du nibawenepai gbe.” Ho ani amakiapa gu dungu amirioni aboro ni mangi ariapai rogo gayó raka mbiko gu bawene yugopai nga ga Mbori, ya mo si afunga wene ndupai furani ani taasirimo Yekova tee?
9. Gine nasaha fu aboro taata i mangi bakere ariapai rogo gayó raka?
9 Gu ome du Fugo Mbori nani gbiati gu undo ko afuhe vuru be gako ziazia toro, si nasa aboro i naamanga nyanyakii ariapai rogo gayó raka. (Rom. 12:2; Gara. 5:22, 23) AKorosaio 3:10 nayaa: “Oni aukadi gu vovo boro, i ambakadi ni ni vovo ni sa inahe wa du kpia gu ko nafu ni.” Agu apangbanga du rogo Fugo Mbori nga Ziazia Kekeapai, si na ome ti ni ka kusa agu apai du kpoto boro yo, na ka aria gani berã na gu bipai du ní nani tipa apai. (Oni gedi AEbere 4:12.) Ho boro agbia ndikidi inohe ni nga ga Ziazia Kekeapai na kini raki ringbisihe kuti ni, si nasa gupai nga ní du nibakurea Mbori, na kidu na maabangirise ka raka nyeanye kindi.
Yekova Nambakada Rani Tipa gu Raka Du Kumbatayo
10. (a) Tipagine duhe ti ni nga, kina Yekova sa nga gu boro rengbe ka undo rani ani mbakaditirani tipa gu raka du kumbatayo? (b) Gini iiriwo ariapai nika manga auru kpotosende bambeda?
10 Yekova nga gu bangisa boro rengbe ka undo rani ani mbakadi tirani tipa gu raka du kumbatayo mbiko ko ini gupai nika manga kumbatayo. Ko nga gu boro namanga diaberã tipa agu apai du kumbatayo. (Yes. 46:9, 10) Gu sangbanebi nga ga Ziazia Kekeapai nayugo gupai nga, “gu bakere rago nga ga Yekova du mbembedi.” (Zef. 1:14) Nibipa gu uru re, Asanza 11:4 nayaa: “Kumuko au nga ti uru dingidingi ngbaduse te, ono rurupai nabatasa boro be kpio.” Ho regbo ga Yekova sarangbanga ka dani ko gbarasi gi ga Satana zagino re, gupai paha nika nyaka gbe nga gaani ruru mangaapai. Sunge adunga ti marã berewe te. Nirengo, Yezekere 7:19 nayaa: “I bafu gayo feda ku ngba agene bakporo, gayo dahabu du wa birikobiriko he.” Pa ino ani gupai re mbata fu regboho naundo rani ani naamangapai awere nitatamana.
11. Rogo gini gene gu yugopai nga ga Mbori aundo rani ani mbakaditirani tipa gu raka du kumbatayo?
11 Gene sa dagba agu akuraha gu yugopai nga ga Yekova aundo rani ngbaha ani mbakaditirani tipa gu gako uru naye kumbatayo, si nga peresapa agu apai nyakipaha kumbatayo. Gu mokedi nangia Pauro akepai fu Timoteo ki yaa: “Mo nirúgu agu aboro aruga nakumuko rogo gi zegino re, ka i énde nga ya, ka i mói nga bangiriyo ti ũkumuko wa si nago ni ipo a ya, ono koyo du Mbori ni.” Ka ani avuranga du na bakere marã berani ya, ani rengbe arengba ka gbia undo be gi ga Mbori arugute re. Ginipai si akodaha? Kuba gupai nga ani naaigo kina aũkumuko, si naida ani mangi bakere asadatise tipa ka ‘manga gupai ngba angba’ na ki “kúmuko na wene mangaapai.” Niperesa ani pa agu apai nga ga toro nibambatapai rogo gaani raka, gure nga ani ‘naiga wene nyanyaki he fu kina tirani sa gu rago nika ye.’ (1 Tim. 6:17-19) Ngbatunga gu diaberã re niruruhe nibi gupai Yesu apehe nga, “gini u du ti kumuko boro na gi zegino dunduko re, ki ingisi ungani?” (Mt. 16:26, 27) Wa duhe nga gu uru nga ga Yekova nambeda, ani dunduko nibasasa si aida ani sana tirani nga: ‘Wari mi aigo aũkumuko ni? Mi namangasunge fu Mbori watadu aũkumuko mi adunguraha?’—Mt. 6:19, 20, 24.
12. Tipagine si aidanga ti ni rago naagberã tirani ho aboro abisirapa gaani sunge tungusapai ni ya?
12 Gupai nyakipaha gbe dagba gu “wene mangaapai” Fugo Mbori azinahe fu aKristano i naamangaha, si nga gu sunge tungusapa Kindo nabatasa aboro gbiati sunge sa aboro ni abawiriki. (Mt. 24:14; 28:19, 20) A wa si adu rogo bambata sa kama agarã, kura aboro rengbe arengba ka bisirapa gaani sunge tungusapai. (Oni gedi 1 AKorindo 1:18-21.) Ono gure asanga gaani sunge tungusapai si du naapaha kusende te, na si aumbasinga pa gu momu du aboro nani tipa ka ida kuti wene pangbanga vuru gu regbo nye koyo re a te. (Rom. 10:13, 14) Wa ani kaa undo kura aboro tipa i gbia undo be gu wene yugopai nga ga Mbori, ani nika gbia badungu amaku agbia a tigaani.
Yekova Nafu Maku Afu fu Gako Amoyambu
13. Ginipai Pauro amangihe tipa wene pangbanga?
13 Mbata fu Pauro da ni Kristano, i ayugupai fuko rogo gu sukuru nga ga aYuda tipa ko duna diabese rogo gako raka. Ho garãko aduni nga 13, ko aguari rogo gako ringara nangia Taruseu ki ndu ku Yerusarema yo tipa ka wirika aNdiko be gu bakere bayugupai nangia Gamariere. (Amo. 22:3) Fuo bete regbo kusa, aboro atona ka inoko dagba akurako mbiko gako inohe. Wa ka ko aandu kindi nani kumbatayo, ka pako adu kuari rogo gu pambori nga ga aYuda. (Gara. 1:13, 14) Ho ko adi wene pangbanga ni kugume na ki tona kaa tungusapai, ko ambupa gu kura apai re dunduko. Ya mo Pauro abira tiko tipa gu diaberã ko amangihe re? Wagusa te! Nirengo, ko akepai ki yaa: “Ahe dunduko si adu nga bangire ni he te mbiko gu wene pai nga inida Kristo Yesu gi Gbia. Mbiko ko ahe aingi be re dunduko si ki du bangire wa kina mirĩ ahe.”—Frp. 3:8.
14, 15. Gini amaku ani agbiaha wa du ani ‘niga Mbori abadiasunge’?
14 AKristano nambupa kura gayó apai areme wakina Pauro tipa ka tungusa wene pangbanga. (Mk. 10:29, 30) Ya mo ani nabi tirani nga, gipai re ima bengeta rani ti kura apai? Robert, ani nifura tipa ko, ko afura tipa kina gu bangisa bipai du kura aboro nani niyaa: “Mi abiranga tire wagusa te. Pa manga mi sunge Kindo ti aregbo dũ ye na ngbarago fere na si sa re mi ‘ia Yekova na mi ki biko nga ko niweneko.’ Ti agu aregbo dunduko mi anaambupa kura apai kaa ndu gene agu apai nga ga toro, Yekova anaafu maku fere na ahe susi gu mi ambupaha. Mi abingo ho tigimi nga he ho paha nagberẽ bere te. Mbiko mi na badungu ahe bere!”—Tam. 34:8; Snz. 10:22.
15 Kangia oni aima digo nimangi sunge tungusapai watadu yugopai fu aboro tipa bete regbo, zanga kapa, oni aima du na gu momu beroni nga ka asada Yekova singia ngbako angba. Ya mo regbo adunga ho oni abi gupai nga, gako toro aundo roni oni ki fura na kura aboro riipa wene pangbanga tee? Ya mo oni bingo kura aboro i ningi mbiko Yekova zaki ngbaduyó yo i degetuyo kuti gu pangbanga re? (Amo. 16:14) Ya mo Yekova aundongo roni oni dibe akpakarapai gene ki zaki furoni oni ruho ka kiiso gaoni sunge tungusapai? Ya mo ko aundongo roni ti regbo fudifudiapai, nizaka ko gene furoni tipa oni ndu kumbatayo na sunge fuko zavura ho oni abi tironi ni nga ome tironi tee? (Frp. 4:13) Ho Yekova aundo rani ni ani mangi gaani sunge tungusapai, si nasa rani ani biko nga ko du nga gu boro naundo rani tipa ani mangi gu sunge re na kini mbedisi rani koyo du ko ni. (Yes. 41:10) Ya mo maku ngaha furani tipa ka du ‘niga Mbori abadiasunge’ rogo gu gako bakere sunge nga ga yugopai fu aboro ani amangaha tee?—1 Kor. 3:9.
16. Gini bipai du oni nani tipa gu asadatise oni amangaha tipa ka mbupa kura gaoni apai tipa gu sunge yugopai nga ga Mbori?
16 Badungu aboro naida ka manga nyanyakipa pai ti regbo gayó raka. Ono ani bi gupai nga, zavura gu nyanyakipa ahe aboro aotoka genehe yo areme, paha nago ago kusayo. Ono tie, gu sunge ga Yekova amoyambu amangaha areme tipa ka ziasi rimoko, si tigaha i nika bandaha abanda nipapara gu nyenye pangbanga du tipa gako aboro. I atingidapaha nyeanye kindi. (Snz. 10:7; Eb. 6:10) Si naida ani bi gu gaani sunge nga ga tungusapai na nyanyakipaha.
Gaoni Karagapai Nga Gine?
• Ginipai Yekova aidaha be agu aboro ko ayugopai fuyó?
• Rogo gini gene gu yugopai nga ga Mbori amanga ariapai rogo ga aboro raka?
• Rogo gini gene ani agbia amaku be undo kura aboro i gbia undo be gu yugopai nga ga Mbori?
[Gu kpiahe du ti kpewaraga 25]
Agu aboro Yekova ayugopai fuyó i nakodatiyo na awirinayo rogo zegino dunduko
[Gu kpiahe du ti kpewaraga 26]
Ya mo maku ngaha kadu ‘niga Mbori abadiasunge’ tee?