Zio Ndikidi Bakure Rogo Gi Zegino Adunga Nyemuse Rogoho Re Ya

“Agi apai re mi naruga roni kuti ni, oni kpi nyemu akuaroni akpi.”​—Yo. 15:17.

1. Tipagine si aidi ti ni agu aKristano nadu rogo bambata sa kama agarã nye niwene abakure?

ROGO gu yangara yuru Yesu adu auru kpotosende, ko angarasi gako abawiriki i nye kindi ni abakure. Mbata kusayo rogo gu nyemu re, ko ayawee gu nyemuse i adu nani, si nikaa yugo yó ni apefuoko. (Yo. 13:35) Si aidi amokedi nye niwene abakurea Yesu ka i aida ka hi aʹasada ki di behe na ka nyasa gu sunge si adu nga ko nika fuhe fuyó. Nirengo, i aini agu aKristano nadu rogo bambata sa kama agarã ti gu sinoyo nangia ga kakuti sinombori na kakuti abadiangbayo.

2. (a) Ginipai ani nadiberã tipa kaa mangaha, na tipagine? (b) Gini asanahe ani ka wisigopai tipaha?

² Nangbaa gu ngbarago du ani nani mbiko gu kodatise du rogo ga Yekova riigbu na agu aboro napekafuo gu kpiapai nga ga agu aKristano nadu rogo bambata sa kama agarã! Ani ima diaberã tipa kaa irisa gu ga Yesu azinahe du tipa kpinyemu akuarani. Ono tie, rogo gi yangara arame re, aboro akanga kuti abadiangbayo te mbiko nyemuse tiyó te. (2 Tim. 3:​1-3) Agu abakure i azioho, si gbua nga ngbanya bangiri ango. Tipa ani nye nindikidi aKristano, si naida ani mangi kurapai susi gu gbua nga ka yawee ani nga abakure. Ani wisigingo agipai naye re: Gine nga mburu wene bakure? Wai rengbe ani ka zio wene bakure? Na gini regbo rengbe ani ka gbuzuga pabakure? Na wai rengbe ani kaa sonosa gaani pabakure?

Gine Nga Mburu Wene Pabakure?

3, 4. Gine nga mburu gu pabakure nyaki gbe, na tipagine duhe ti ni wo?

³ Nyanyaki mburu pabakure naru rii nyemuse tipa Yekova. Gu Bakindo nangia Soromo akepai ki yaa: “Ka aboro di be kurani nga gu ni du ni sa ni rengo, ono agu yo du ue rengbe ka za ni. Gu gire udi yo ho biata ka si kati nga ni ipo te.” (Batu. 4:12) Ho du Yekova ni rogo bakure wa gu gire udiyo ho biata, gu pabakure re adigongo te.

⁴ Kina rengo ngaha nga, agu aboro akpingo nyemu Yekova ya, i nazio wene bakure azio. Ono ho du agu aboro re ni dunduko na nyemuse tipa Mbori, gayó bakure nadu ninyanyakihe gbe. Ka kpakarapai kuru dagba agu aboro nga ndikidi abakure, i nika manga apai dagbayó ngba gu gene nafu ngbarago fu Yekova. Ka asogo ga Mbori aboro asadi ka sa yó i tona akparakaro, i nika bi gupai nga gu pabakure du dagba ga Mbori aboro, si niguhe ka paha agberanga ya. Vuru agu aregbo yo nga ga ga aboro raka, ga Yekova amoyambu aima yugo gupai nga i na nyemu ka kpi kuba gupai nga ka kusa akurayó fu akare.​—Oni gedi 1 Yoane 3:​16.

5. Gine nasa gu pabakure nadu dagba Ruta na Naomi si nyaki gbe?

⁵ Zanga kapa, gu pabakure rengbe ani ka gbia ngbarago behe kisusi, si nga gu du dagbarani na agu aboro nakpinyemu Yekova. Ani dinga gu kpiapai nangia ga Ruta na Naomi. Agi adee re azi gu bakure nangba gbe du paha rogo Ziazia Kekeapai. Tipagine gayó bakure anyaki ti ni wa gure? Ruta afura tipaha ho ri ayani fu Naomi wee: “Gamo aboro nikangia kina gimi aboro, ga Mbori ki ngia kina gi Mbori a. . . . Yekova amánga ha fere, na gu ku ri he a, si ngia he ho du kia ti kpio nikakpara rani na mo.” (Ruta 1:16, 17) Si tie ziazia nga, aRuta na Naomi aduna bakere nyemuse tipa Mbori na i kini mbu gi nyemuse re si naayugo wai fuyó si aida i naamanga apai dagbayó. Yekova afu maku fuyó nisangbana gipai re.

Wai ka Zio Wene Bakure

6-8. (a) Gine nga mburu gu nyemuse azeranga ya? (b) Wai rengbe oni ka guari nibambata boro ka zio bakure?

⁶ Gu kpiapai nga ga Ruta na Naomi nayugo gupai nga, wene bakure ayenga nisaha te. Gu nyemuse du agu abakure re nani tipa Yekova, si nga mburuhe. Bakere asadatise aboro amangaha tipa gayó bakure nyeanye kindi. Zavura agu aboro nga awiri vuse sa na i kingia agu aboro nairiso Yekova, si naida i mangi asadatise amanga tipa ka nye niwene abakure. Wai tie rengbe ani ka zio wene bakure?

⁷ Ani guari nibambata aboro. Gu mokedi nangia Pauro angarasi agu abakureako nadu rogo gu dungurati nadu Roma yo i ‘naadia akurayó kugume.’ (Rom. 12:13) Pa dia boro kurani kugume nakoda dungu apai wakina nduge ti gene. Anga boro ho rengbe ka manga gipai re kuba roni te. (Oni gedi Asanza 3:​27.) Gene sa dagba agu akuraha rengbe oni ngbaha ka dia agu aboro kugume du rogo dungurati nga kaa yamba yó nibasasa tipa i naaye ka ngba be riahe na oni. Ya mo oni rengbe ka saha nisino roni kaa dia agu aboro kugume du rogo gaoni dungurati?

⁸ Gu kura gene rengbe oni ngbaha ka zio bakure nga ka yamba agu aboro du rogo dungurati tipa ka kura naayó gene tungusapai yo. Ho ru oni ni ngbadimo ku boro yo, gu wirinaroni oni nikuru nani ní kini tungusipai fu gu boro re tipa Yekova, fugo gu wirinaroni re nasa gupai nga oni kpinyemu ni.

9, 10. Gini kpiapai Pauro amoihe, na wai rengbe ani ka wirikako?

⁹ Oni zá ngbaduroniyo. (Oni gedi 2 AKorindo 6:12, 13.) Ya mo oni abingo tironi nga boro ho rogo dungurati ka oni zi bakure na ní tee? Kangia wo duhe, ya mo si wo mbiko kina roni nasiaka agu aboro asiaka oni aida ka zio bakure naayó? Gu mokedi nangia Pauro amoi wene kpiapai nibipa agu aboro si aida oni kpinyemu yó. Bakuru kusayo, ko aberãnga pa zio bakure na agu aboro naangianga aYuda ya te. Ono tie, i amoiko “ni ga aGendiria mokedi.”​—Rom. 11:13.

¹⁰ Kurigure, Pauro aziongo bakure na kina agu aboro garãko na gayó adu sa te. Nikpiapai, ko azi bawene bakure na Timoteo nangia tooni paranga na agu apai nadu tipa Timoteo kidu a kia. Dungu paranga aboro areme nabi gayó bakure na gu sosono aboro du rogo gayó dungurati na nyanyakipaha. Degude nga Vanessa garãri ambeda kuti 20 ayaa: ‘Nakureami ho garãri naima susa 50. Apai dunduko mi naagumbaha furi nga gu rengbe mi ka gumbaha fu gu nakureami du garãre na gari sa. Ri nangera angera fuo re bakere gbe.’ Aboro naawirapa zio ngbatunga gu bakure re wai? Vanessa nayaa: “Mi amangi asadatise amanga ka gbia gi nagbia re tipa ka zio bakure naari.” Ya mo oni naida ka zio bakure na agu aboro adunga garã roni na gayó sa ya? Ka oni mangihe wo, Yekova afu maku afu furoni nirengo.

11. Ginipai rengbe ani ka wirikaha be gu kpiapai nangia ga Yonatana na Davide?

¹¹ Oni du niruru roni. Soromo akepai ki yaa: “Badia ngbanya nakpi nyemu badiani na arago dunduko, ono i avungu wirina tipa unda ni rago gberãngbi.” (Snz. 17:17) Ho Soromo aagumba agu afugo ni re, ko avura kaa berãpa gu bakure nadu dagba bako na Yonatana. (1 Sam. 18:1) Bakindo Saura aaida wiriko nangia Yonatana sungu rii mbatabakindo kumboko. Ono tie, Yonatana aima ida kuti gupai nga Yekova aima sia Davide tipa gi sunge re. Yonatana akpingo Davide tipa gipai re wa bako nangia Saura te. Rago agberanga tiko mbiko gu taarimo aboro afuhe fu Davide te, na ko aaidanga a kuti gu ziree Saura aagbaragaha ti rimo Davide te. (1 Sam. 20:24-​34) Ani wa Yonatana? Ho abakurearani agbia amomu ni, ani nidu na ngbarago? Ho du yó ni rogo agberango, ani nafu wasa fuyó na kini songodi yó? Kangia ani gi gbegberẽ afugo bara yó, ani naida kuti gu gbegberẽ afugo re? Watadu ani nanyakasapai kubara yó yo wagu si adu tipa Yonatana?

Gu Regbo Si Aida Ani Gbuzuga Pabakure

12-14. Gini kpakarapai agu aboro nawirika Ziazia Kekeapai agbiaha, na wai rengbe ani ka undo yó?

¹² Ho gu boro ani awisigo Ziazia Kekeapai na ní amanga ariapai ni rogo gani raka, ní rengbe arengba kadu rogo kpakarapai nibi pabakure. Si rengbe kadu nga abakureani kinaho ní naambakada fugo naayó ono i arakanga ringbisihe kuti agu arugute nga ga Ziazia Kekeapai te. Si rengbe kadu nga bakuru kusayo, ní anaadia regbo na agi aboro re kaa sungo naayó. Awere tie, ní bihe nga agu apai agi akurani re amangaha, si rengbe arengba ka aria sino ní, sidu, ní naida ka zoga bete sungo naayó. (1 Kor. 15:33) Wa vura duhe wo, ní nabi gupai nga, ka ní kpara tiní tiyó, si yugu gupai nga ní ima samungu kutiyo.

¹³ Kangia oni nga gu bawiriki Ziazia Kekeapai du apai tipa roni wa gure, oni tingidi gupai nga, ndikidi bakurearoni adu na ngbarago ka bi roni oni nimbakadi gaoni raka. Si rengbe kadu nga ní naida aida ka koda tiní na oni ka wirikapai tipa Yekova. Ono tipa agu aboro nananga tiyó ananga ya i nga abakurearoni, i ‘nagbera ngbayo yo furoni’ mbiko oni “aora nga na yo . . . sa gi bakere bau re” te. (1 Pet. 4:3, 4) Nirengo, agi abakurearoni re du samungu kuti roni angianga oni samungu kuti yó ya.

¹⁴ Ho abakurea agu aboro nawirika Ziazia Kekeapai ambu yó ni, nga agu abakureayo adunga nyemu Mbori tiyó ya, agu aboro du rogo dungurati naye ka zio bakure naayó. (Gara. 6:​10) Oni ini agu aboro du rogo gaoni dungurati naye tipa adunguratise nga aguyo nawisigo Ziazia Kekeapai? Ya mo oni rengbe ka ndu ka bi yó ti kura aregbo ka ngarasa yó?

15, 16. (a) Ginipai si aida ani mangihe ka bakurearani mbu mangasunge fu Yekova? (b) Wai rengbe ani ka yugo gaani nyemuse tipa Mbori?

¹⁵ Ono tie, ginipai si aida ani mangihe ka bakurearani mbu Yekova isoke si ki sa gupai nga i kusi ni kusayo rogo dungurati? Agu apai re rengbe arengba ka fu gberarago furani. Wirinarani nidee afura tipa gupai nadu tipa ri ho nakureari ambu mangasunge ni fu Yekova. Ri ayaa: “Si adu wa hee rogo re yo nakpi. Mi aberẽ gupai tigimi nga nakureami aima nyaka rogo rengo yo, ono si adunga tie wo te. Si nawira ri aamangasunge fu Yekova gbua tipa ka fu ngbarago fu avunguri. Apai atadu were, mi kini tona ka wisigo ndu gupai mi amangasunge ti ni fu Yekova. Ya mo mi aamangasunge fu Yekova na wene nduhe?” Ginipai gi wirinarani re amangihe? Ri ayaa: ‘Mi atona ka kparakpee fu Yekova. Mi ima diaberã ka yugo gupai fu Yekova nga mi nakpinyemuko akpi angianga mbiko gupai nga ko afu wene abakure fere rogo dungurati ya.’

¹⁶ Ani arengbanga ka berã gupai nga ani nika nye ni abakurea Mbori ka ani angbe na agu aboro ima diaberã kadu ni abakurea zegino te. Gu bawiriki nangia Yakoba akepai ki yaa: “Oni aruga nga tironi na ni ya ngbanya na zegino si nga sogote fu Mbori, te? Si du gu ni ka kpi nyemu du ni badia zegino ni sa tini ni vura Mbori.” (Yak. 4:4) Ani rengbe ka yugo gupai nga ani na nyemu Mbori tirani nikido ani kutiko nga ko nika undo rani aundo ani dibe gu rungo du ani nani mbiko bakurearani samungu kutiko. (Oni gedi Atambuahe 18:25.) Gu wirinarani nidee ani nigumba pari ayaa: “Ani arengbanga ka sa boro ní kpinyemu Yekova watadu ka kpinyemu rani te. Boro nitiní naida ka mangaha.” Ono tie, ginipai rengbe ani ka mangaha ka banda gu pabakure du dagbarani na agu aboro nye rogo dungurati?

Wene Pabakure

17. Wai wene abakure afura dagbayó?

¹⁷ Wene fugodagbase nambakada pabakure. Wa oni ageda gu pangbanga du rogo Ziazia Kekeapai tipa aRuta na Naomi, aDavide na Yonatana, aPauro na Timoteo, oni nika kparia gupai nga, agu aboro nga ndikidi abakure, i nafura dagbayó wenengai na kidu na irisa dagbayó. Nibipa wai si aida ani naafura na aboro, Pauro akepai ki yaa: “Oni fúra na undahe dedede, si ki hii na tikpo.” Pauro aafura herẽ tipa wai si aida ani naafura na agu aboro “du zegi yo,” nga agu aboro angianga akuarani aKristano ya. (Koro. 4:5, 6) Kangia si naida ani naafu irisa fu agu aboro adunga ti idapase na ani ya, anga si naida ani fuhe bakere gbe fu agu akuarani du ani naayó rogo dungurati tee?

18, 19. Wai si aida ani bi gu rugute kuarani Kristano nafuhe furani, na gini kpiapai agu abaakumba nadu Efesa yo amoihe?

¹⁸ Wene abakure na irisa tipa agu aberã nga ga abakureayo, sidu, si naida i naapeka kina wene afugo na kini gumbaha zukazuka. Bakindo Soromo akepai ki yaa: “Nzeme mbeda na furũ nzeme nafu ngbarago fu kpoto yo, wo du gu wene rugute naye be badia boro.” (Snz. 27:9) Ya mo wogu oni abi agu arugute bakurearoni afuhe furoni? (Oni gedi Atambuahe 141:5.) Ginipai si aida oni mangihe ka bakurearoni fu rugute furoni tipa gu irairapai mangi oni? Ya mo oni nabi agu arugute re nigupai nga ga weneringise watadu si nafu kina gberarago furoni?

¹⁹ Gu mokedi nangia Pauro aduna wene ngbanya na agu abaakumba nadu Efesa yo. Si nawira ko aini bete agu akumba re ti gu bambata regbo i asa tiyó ni aidipase. Ono tie, ti gu yangara regbo ko agbia yó, ko afu arugute fuyó zanga ba kpe ti ni. Ginipai i amangihe? Ya mo rago agberẽ tiyó? Oó, rago agberãnga tiyó te. I aima ino gupai nga nyemu yó nadu tiko na i ki kpari ni aume fuo ino yó gupai nga i abingo ko berewe te.​—Amo. 20:17, 29, 30, 36-​38.

20. Ginipai gu bakure duna nyemuse amangaha tipa bakureani?

²⁰ Wene abakure naida na arugute na kini fuhe a. Rengo ngaha nga, si naida ani ini gu regbo si aida ani ‘naamanga kina agu apai nga gaani.’ (1 Tesa. 4:​11) Na si naida ani rugutirani na gupai a nga ani dunduko nika ‘ríngbisapa tirani aringbisa fu Mbori.’ (Rom. 14:12) Ho daha adani, wene sino bakure natingida bakureani naapa ga Yekova andiko. (1 Kor. 7:​39) Nikpiapai, ginipai ka oni mangihe ka oni bi gupai nga gu bakurearoni angianga gu boro mangi rogatise ya, ní kpasaka tiní na gu boro adunga ti idapase na ani ya? Ya mo oni furanga na ní te ono kini gunde agunde ya pa gaoni bakure andu ka gbera ka oni fu rugute funi? Ginipai ka oni mangihe ka ní basa gaoni rugute abasa? Wene sino bakure nga gu boro nika ndu fuo abaakumba ka gumba gupai re fuyó tipa i undo gu bakureani ingi re. Si naida boro duna wingbaduse ní kini mo ka manga gupai re. Gbegberẽpai ho nika manga agu aboro du mburu gayó pabakure rii nyemuse tipa Yekova te.

21. Ginipai ani naamangaha ti kura aregbo, ono tipagine duhe ti ni ninyanyakipa pai ani banda wene pabakure rogo dungurati?

²¹ Oni gedi AKorosaio 3:​13, 14. Ani naamanga irairaapai amanga kuti abakurearani na si kini ye na ‘pai kuti rani,’ na agu abakurearani re namanga agu apai amanga a nafu gberarago furani watadu ka gumba gbegberẽpai furani. Yakoba akepai ki yaa: “Ani nakota dunduko rogo dungu apai.” (Yak. 3:2) Ono tie, gupai nasa aboro i du ni abakure, si nga i nambupai fu bakureayo bangiriyo ki go ti ni. Si ninyanyakipa pai ani du na wene bakure. Ani namangaha niwene fugodagbase na kini mbupai fuyó bangirani ki go ti ni. Ka ani duna ngbatunga gu nyemuse re, si nikadu nindikidi “ũvodatise.”

Gaoni Karagapai Nga Gine?

• Wai rengbe ani ka zio wene bakure?

• Gini regbo si aida ani gbuzuga pabakure?

• Ginipai si aida ani mangihe tipa ka banda pabakure?

[Gu kpiahe du ti kpewaraga 25]

Gine nangia mburu gu wene pabakure nadu dagba Ruta na Naomi?

[Gu kpiahe du ti kpewaraga 26]

Oni naadia aboro kugume?