Bambata Zire Yugopai: Mbisimo Nga Guhe Akpingo Ya

Wari gi ziree re aenge ni? “Agu aKristano nadumbata nangia abangbasia abawisigipai, i adi gi ga aGiriki yugopai nga mbisimo niguhe akpingo re ya ki saha nigayo na kini berẽhe nga mbisimo niguhe Mbori ambakadaha na kini rimisihe kurogo kpoto boro yo ti gu regbo du yó na mobara ní.”​—The New Encyclopædia Britannica (1988), Volume 11, kpewaraga 25.

Ginipai Ziazia Kekeapai agumbaha tipa gipai re? “Gu mbisimo ka ainga pai si akpí akpi.”—Yezekere 18:4.

Ziazia Kekeapai nafura furani tipa mbisimo gu bambata boro Mbori akusi ní niyaa: ‘Yekova Mbori ki mangi kumba rogo nvutu sende, ki ongo onga unga ku õko yo; kumba kidu niunga mbisimo [du rogo pa-Ebere nga neʹphesh].’—Bambata Pai 2:7.

Gu pa-Ebere nga neʹphesh sayo ho kurogo pa-Zande nga “mbisimo,” rogoyo nga ‘gu ungahe naonga aonga.’ Ho Mbori akusi Adamu ni, ko arimisongo hee kurogo ko yo nangia mbisimo zanga kpio te, ono guhe ko arimisihe kurogo ko yo angia onga-unga. Sidu tie, ho Ziazia Kekeapai afura ni tipa pa mbisimo, si nafura tipa unga rakirakihe naabaha. Ho onga-unga, nga guhe Mbori afuhe aguari ni kusayo ti mbisimo, gu mbisimo re nakpi akpi.—Bambata Pai 3:19; Yezekere 18:20.

Gu yugopai nga mbisimo akpingo te, si nakusa badungu asanahe nga: Wari mbisimo naandu kuhoni fuo kpio boro? Na ginipai ninaamanga tipa mbisimo gbegberẽ aboro? Ho aKristano adi gu zire yugopai ni nga mbisimo niguhe akpingo ya, si asa yó i idi kuti gu kura zire yugopai berewe nga ga zo aboro rogo we.

Oni ringbisinga gipai re na agi averesi re: Batungusipai 3:19; Matayo 10:28; Amokedi 3:23.

RENGO NGA:

Ho boro akpi ni, ní arakanga berewe te