Ani Nadia Roni Kugume Kurogo Gu Sino Raka Ngbaa Kisusi!
“Wa du ani ni ungarani, ani ni ungarani fu Gbia; wa ani nikpi, ani nikpi fu kina Gbia.”—ROM. 14:8.
1. Ginipai Yesu ayuguhe tipa gu sino raka ngbaa kisusi?
YEKOVA naida ani duna ngbarago rogo gu raka ani arakaha. Aboro naraka ngba agene nibakiakia, ono wene sino raka kina sa. Gupai si aida ani mangihe na gaani raka nga ka raka ringbisihe kuti Fugo Mbori na kini wirikipai be Wiriko nga Yesu Kristo. Ko ayugu gupai fu apefuoko nga, si naida i naairisombori nitoro na kini irisiko na rengo, na ki zinahe fuyó i naasa aboro ni abawiriki. (Mt. 28:19, 20; Yo. 4:24) Ka ani araka ringbisihe kuti ga Yesu arugute, si nika sa gupai nga ani fu ngbarago fu Yekova na ani kidu na ngbarago mbiko agu amaku ko afuhe furani.
2. Rogo gini gene dungu aboro adi gu pangbanga nga ga Kindo kugume rogo bambata sa kama agarã, na rogo gupai yo nga ‘Gene’ nga gine?
2 Ho agu aboro ‘duna nyemu gbia nyenye unga’ adani ni aidipase na ki zi bapatiza, ani na wene ndupai berani tipa ka ya fuyó, “Ani nadia roni kugume kurogo gu sino raka ngbaa kisusi!” (Amo. 13:48, NW ) Rogo bambata sa kama agarã Fuo Batikayo Kristo, akutu ngbatunga aboro nibakiakia adi rengo kugume na ki yugupa gayó idapase kuti Mbori gbaiga rogo zio bapatiza. (Amo. 2:41) Agu abawiriki re anaayamba gayó irisombori nga ‘Gene.’ (Amo. 9:2; 19:23) Gipai re adaada mbiko agu aboro naanasa tiyo ni apekefuo Kristo, i aaraka gu raka mburuhe adu rii gu idapase i adu nani kuti Yesu Kristo na kini pekefuo gako kpiapai.—1 Pet. 2:21.
3. Tipagine ga Yekova aboro azio bapatiza ti ni, na aboro wai zii bapatiza vuru agu agarã 10 susi?
3 Gu sunge nga ga sa aboro ni abawiriki namanga rogo gi yangara arame re, si ima susa gu nadumbata na si namanga awere rogo aringara bangehe naima susa 230. Vuru agu agarã bawe susi, bange agu aboro nadiberã tipa ka mangasunge fu Yekova na ki yuguhe rogo kparayo tiyo fuko nga 2,700,000. Si nayugo gupai nga, rogo aposo nibasasa, namba agu aboro nazio bapatiza nga 5,000. Gu diaberã boro amangaha tipa ka zio bapatiza, mburuhe rii gu nyemuse du ní nani tipa Mbori, gu inohe ní nagbiaha rogo Ziazia Kekeapai, na kidu na idapase kuti gupai wiriki ní he. Bapatiza nga gu nyanyakipa ariapai ani amangaha rogo gaani raka, mbiko si nga tonatona gu wene pagume du dagbarani na Yekova. Gure a nga ani nayugopa gu bakere kido du ani nani kutiko nga ko nika undo rani aundo ani mangisunge fuko niruru rani, kina wai ko aaundo gu gako amoyambu nadumbata tipa i naata kina ngba gako gene.—Yes. 30:21.
Ndu Gupai Ani Azio Bapatiza ti Ni
4, 5. Oni gumbanga pa bete agu amaku gbiati aundo duti zio bapatiza.
4 Si rengbe kadu nga oni awere na inohe rogo Fugo Mbori, na ki ima manga ariapai rogo gaoni raka yo, na kidu awere nigu batungusipai ataziongo bapatiza ya. Ani na ngbarago tipa gu wene sonakumbatayo re. Ya mo oni ima kpara tironi fu Yekova rogo kpee yo na kini moibangironi tipa ka zio bapatiza? Ho oni aawirika Ziazia Kekeapai ni, si nawira wa oni aima ino gupai si aaida oni mangihe rogo gaoni raka nga ka taasarimo Yekova, angianga ka fu ngbarago fu kina tironi, watadu ka merafuo aũborose ya. (Oni gedi Atambuahe 148:11-13; Ruka 12:15.) Bete agu amaku gbiati aundo ani agbiaha ti zio bapatiza nga gine?
5 Wa du oni ni agu aKristano naima kparatiyo fu Mbori, gaoni raka nikadu nitumbatumbaha kuari na kidu na rogoyo ti ni. Oni adu na ngbarago mbiko oni namanga gupai Mbori akpinyemuhe. (Rom. 12:1, 2) Fugo Yekova nika kusa ngbatunga agu asino tironi nga zereda na idapase. (Gara. 5:22, 23) Mbori nika karagapai kuti gaoni akpee na ki fu maku furoni kuti gu asadatise oni amangaha tipa ka raka ringbisihe kuti Fugoko. Oni nikadu na bakere ngbarago rogo gaoni sunge tungusapai, na pa raka oni kuti gupai Mbori akpinyemuhe nika nyakasa gaoni maabangirise tipa nyenye unga. Kurigure, ka oni kpara tironi fu Mbori na ki yuguhe nizio oni bapatiza, si nika yugo gupai nga oni naida kadu ni Dezire Yekova.—Yes. 43:10-12.
6. Ginipai gaani bapatiza amangaha?
6 Ho ani akpara tirani ni fu Mbori na ki yuguhe rogo bapatiza, ani nayugoho gbaiga nga ani nga ga Yekova aboro. Pauro akepai ki yaa: “Boro ni ungani fu kina ni wa sa te, a nga boro sa ka kpi fu kina tini te. Bambiko wa du ani ni ungarani, ani ni ungarani fu Gbia; wa ani nikpi, ani nikpi fu kina Gbia watadu ani ni ungarani tie na ni kurugborani ani ni ga Gbia rani.” (Rom. 14:7, 8) Mbori ima kiiso parani nifuko ranirii furani. Ho ani adiaberã ni tipa ka raka gu ngbatunga raka ko akpinyemuhe, si nasa ngbadukoyo si du na ngbarago. (Snz. 27:11) Ho ani azio bapatiza ni, gure nga ani nayugo nani fu Mbori gbaiga kubangiri aboro dunduko nga Ko nga gaani Bazogo. Na si kini yugu gupai nga, ani nasongoda gako bakere pagbia. (Amo. 5:29, 32) Kurigure, Yekova kina ku giirani. (Oni gedi Atambuahe 118:6.) Bapatiza nazaka badungu kura agene furani tipa ani gbia gu kura amaku nga ga toro tona kina awere na kaa ndu kumbatayo a.
AKristano na Dungu Amaku Beyo
7-9. (a) Gini akidohe Yesu afuhe fu agu aboro nambu gayó ahe tipa ka peka fuoko? (b) Wai gu ga Yesu kidohe du rogo Marako 10:29, 30 ada ti rengo?
7 Gu mokedi nangia Petero aya fu Yesu wee: “Mo ngére nga, wa ani ambu ahe dunduko, ki nipeke ro; ani adía gine?” (Mt. 19:27) Petero aaida ka inopai tipa gako raka kumbatayo gbiati gu raka nangia ga ga Yesu abawiriki. Tipa ka fu tiyo tipa sunge tungusapa Kindo, i amangi nyanyaki asadatise. (Mt. 4:18-22) Gini akidohe Yesu akido yó nani?
8 Ringbisihe kuti gu pangbanga Marako akehe duwa kina ga Matayo, Yesu ayawee gako abawiriki nikadu dagba agu awirina nga ga toro yó du rogo zegino. Ko ayaa: “Ka boro he gani bambu, na awirinani, na adawirini, na nani, na bani, na awirini, na gani aati, tipa re, na tipa wene pangbanga ni ka abambu du be ni na awirina, na adawiri, na ana, na awiri, na aati, na arungo, wa du rago re, ki susi gu naadu mbata bara 100; na nyenye unga rogo gu ngbi nikadu yo.” (Mk. 10:29, 30) Agu aKristano nadu rogo bambata sa kama agarã wa Rudia, Akuira, Puriseka, na Gayó, i adu dagba agu aboro nafuku gayó “abambu” fu awirinayo na kingia ‘awirina, na adawiri, na anaa’ fu awirinayo aidipase a wa Yesu agumbaha.—Amo. 16:14, 15; 18:2-4; 3 Yo. 1, 5-8.
9 Agu apai Yesu agumbaha, si naringbisatihe areme ti gi regbo re. Agu “aati” apefuoko ambuhe, si nayugupa gu dungu ahe apefuo Yesu ambuhe tipa sunge Kindo. Agu apefuo Yesu re nakoda amokedi, agu aboro namangasunge Betere yo, agu amoyambu namangasunge dudua abambu rogo dungu aringara, gbiati kura aboro nga aguyo fuu tiyo tipa ka tungusapai rogo kura aringara. Badungu awirina naima mbu gayó akporo tipa ka sa gayó raka si du taata, na si naafu bakere ngbarago furani ho ani agia pa gayó mangaapai ni, si kini yugu wai Yekova angerafuoyo na wai pa manga yó sunge fuko afu ngbarago fuyó. (Amo. 20:35) Kurigure, gu ga Yekova amoyambu dunduko i nabapatizi yó rengbe ka gbia ngbarago be agu amaku nika ye fuyó mbiko ‘gbáta yó ga Mbori ngbii mbata, na gako rurupai’ na si nga papara gupai ani agbia ngbarago behe rogo gu kodatise nga ga aKristano rogo zegino dunduko.—Mt. 6:33.
Ga Mbori “Barondo”
10, 11. Gine nga “gu barondo nga ga gu Ko nga Bahe ki susi,” na wai rengbe ani ka rimo koyo?
10 Ho ani akpara tirani ni ki zi bapatiza, si naye na dungu amaku na ki sa rani ani nye “rogo gu barondo nga ga gu Ko nga Bahe ki susi.” (Oni gedi Atambuahe 91:1.) Gu ba nga ga bandahe na ngbabase re nga gu ba nabanda aboro rogo toro yo be gupai rengbe ka imisa yó. Si nga “barondo” mbiko si fu kina agu aboro sa duna nyemu agu apai nga ga toro na kini kido kuti Mbori. Niraka ani ringbisihe kuti gaani kparatise na kidu naa kido kuti Yekova, si nasa gupai nga ani ya fuko wee: “Mo nga gi bagbuko nga gi gbata; gi Mbori, nga gu ko mi nakida kuti ko.” (Tam. 91:2) Yekova Mbori nga gaani bagbuko. (Tam. 91:9) Wene ba ho ngbaa kisusi gu barondo nga ga Yekova te.
11 Pa ndu ani kurogo gu “bagbuko” nga ga Yekova nayugo gupai ngawee ani nazio pagume naako. Gi pagume re natona na kparatise fuko gbiati bapatiza. Fuo gure, ani kini nyakasi gu pagume re nimbeda ani naako rogo wisigo Ziazia Kekeapai, kparakpee, gbiati giasangbako. (Yak. 4:8) Anga boro ho nambedi na Yekova susi Yesu te, nga gu boro naakapanga kuti Yekova ya. (Yo. 8:29) Sidu tie, ka ani kapanga kuti agu apai Yekova agumbaha ya watadu ka kapa ki yawee ko na nyemu ka undo rani ani raki kuti gaani kparatise te te. (Batu. 5:4) Gu mbakadapai nga ga toro Mbori namangihe tipa gako aboro, si nga gu gopai duho nayugo gupai nga, ko nakpinyemu rani akpi nirengo na kini idi ani du na diabese rogo gaani sunge fuko.
Paradizo Nga ga Toro
12, 13. (a) Gine nga gu paradizo nga ga toro? (b) Rogo gini gene rengbe ani ka undo gu vovo aboro ye kurogo dungurati?
12 Kparatise fu Mbori gbiati bapatiza nasa rani ani naaraka rogo gu paradizo nga ga toro. Si nga gu ba dukia ti akuraha ani gbiati akuarani aidipase asungo rogoho, kidu na pazereda dagbarani na dagbarani na Mbori. (Tam. 29:11; Yes. 54:13) Pai ho rogo zegino ka i ringbisihe na gu paradizo nga ga toro te. Ani nabi gipai re ziazia ti regbo gu kikindigi adunguratise nga ga dungu aringara, nga gu ba ani abi awirinarani rogoho duna afugoyo nibakiakia na angbatunga yó nibakiakia i naye ki susungu rogo pazereda na rogo nyemuse.
13 Gu paradizo nga ga toro ani agbia ngbarago behe re, si nga gu ba dukia ti gu zegino hi be gbegberẽ apai areme. (Oni gedi Yesaya 65:13, 14.) Ho ani atakapande gu pangbanga nga ga Kindo ni fu aboro, gure nga ani nayamba yó i ye kurogo gu paradizo nga ga toro. Si a nipa ngbarago furani tipa ka undo agu awirinarani ye kurogo gu dungurati nga ga aKristano barambeda, mbiko si rengbe ka undo yó i gbia wene rabahe tipa sunge tungusapai. Abaakumba ima rengba ka fu gu momu furani nga ani asadi ka undo gu vovo awirina ye kurogo dungurati a wa si adu tipa Akuira na Puriseka nga agu aKristano ‘nayugupa ga Mbori gene fu Aporo wenengaĩ ti gu ko aini mbata.’—Amo. 18:24-26.
Oni Wirikipai Be Yesu
14, 15. Gini wene ndupai nasa rani ani naawirikapai be Yesu?
14 Wene ndupai kina berani si aida ani naawirikapai ti ni be Yesu. Ho Yesu aduni ngbangbaturũ yo, ko aima dia dungu akutu agarã kini mangisunge na Bako. (Snz. 8:22, 30) Ko aima ino gupai nga, mangasunge fu Mbori na kini mangisunge dezirepai, si nasa gupai nga boro raki wene raka. (Yo. 18:37) Yesu aima inoho ziazia nga, gu kura gene raka aboro aarakaha, si gbua nga kungbopai na kidu niwiri guruhe. Ko aima ino gupai nga ko nikadu niʹasadiʹasadiko daho i ka imoko ni. (Mt. 20:18, 19; Eb. 4:15) Niduko nigaani kpiapai, ko aima yugo wai si aida ani du niruru rani fu Mbori.
15 Ngbutuko fuo zio Yesu bapatiza, Satana aʹasadiko tipa ko mbu gu wene raka ko aarakaha ono ka Satana adunga na diabese ya. (Mt. 4:1-11) Gipai re nayugo gupai furani nga, ka Satana vura ye na dungu apai kuti rani, ani rengbe arengba ka diabe ko ki kakuti manga rurupai. Kina gu bangisapai re rengbe ko ka mangaha tipa agu aboro naida ka zio bapatiza watadu aguyo zihe barambeda. (1 Pet. 5:8) Agumerani rengbe ka sogote rani na gu berãpai riyo yo nga gbegberẽpai nika gbia rani ti gu pambori rimi ani he re. Ono, wa vura duhe wo, ngbatunga agu aʹasada re nasa rani ani yugu gu wene asino nga ga aKristano, ngbatunga gu duwa fu irisa fu aboro gbiati fura rogo birĩ, gbe, ho ani akaragapai ni kuti gayó asanahe watadu ho ani amanga dezirepai ni fuyó. (1 Pet. 3:15) Gi ngbatunga mangapai re rengbe kadu na wene sangbanaha kurii agu aboro nadegatuyo furani.—1 Tim. 4:16.
Oni Nye Kindi Kuti Wene Sino Raka!
16, 17. (a) Gini banguaapai biata tipa raka du paha rogo Pa Fu Rugute ni Ue he 30:19, 20? (b) Wai aYesu na Yoane gbiati Pauro asongodi gupai Moize akehe?
16 Mbata fu agarã wa 1,500 ti gu regbo Yesu adu auru kpotosende ane, Moize angarasi aYisaraere i sia gu bawene raka nangba gbe ti gu regbo re. Ko ayaa: “Mi yambu ngbangbaturũ na kpotosende si du ni dezire kuti roni areme, ya mi ringbisi unga na kpio fu roni, maku na motiwa, si du oni sía unga, oni ki nye ni ungaroni, oni na awironi a, ka akpi nyemu Yekova gaoni Mbori, ka agia fugoko, ka aka kutiko.” (Pa Rug. 30:19, 20) AYisaraere aanyenga niruru yó fu Mbori te, ono gu banguaapai biata Moize agumbapaha tipa raka, si anye kina kubaha. Yesu gbiati gako abawiriki agumbaha berewe.
17 Bambatapai nga, si naida ani ‘kpínyemu Gbia nga gaani Mbori.’ Ani nayugo gupai nga ani nakpinyemu Mbori nimanga ani pai ringbisihe kuti gako andiko. (Mt. 22:37) Uepai nga, si naida ‘ani degeturani kuti fugo Yekova’ niwisigo ani Fugoko na kini irisihe. (1 Yo. 5:3) Gipai re naida ani naandu kupati adunguratise yo dedede nga gu ba i asakapai rogoho rogo Ziazia Kekeapai. (Eb. 10:23-25) Biatapai nga, si naida ‘ani kakuti Yekova.’ Ka ani vura kaa gbiatirani na kina gini apai vurũ, si naida ani du na idapase kuti Mbori ti aregbo dunduko na kini pefuo Wiriko.—2 Kor. 4:16-18.
18. (a) Wai Ngbaõbambu Sinziri aringbisipa rengo rogo gu garã nangia 1914? (b) Wai si aida ani bi rengo areme?
18 Nangbaa gu maku nga ani naaraka ringbisihe kuti sangba Ziazia Kekeapai! Rogo gu garã nangia 1914, i akusi gi nyanyakipa pai re rogo Ngbaõbambu Sinziri: “Anga ani ni aboro maku duna ngbarago tee? Anga gaani Mbori nga ruru Mbori tee? Kangia boro ho inipa guhe ngbaa kisusi gere, ní dihe. Kangia boro ho dagbaroni inipa guhe ngbaa kisusi gere, oni gumbapaha furani. Ani tigaani ainongo pa guhe ngbaa kisusi gu bi ani he rogo Fugo Mbori re te. . . . Si nigasigasipai ka ringbisapa gu zereda, ngbarago, na maku gu inohe du rogo Fugo Mbori naye nani furani. Gu Pangbanga Du Tipa Ga Mbori Tatamana, Ruru Sarangbanga, Nyemuse, naapa gako Ome, si ima ngba tirani. Anga kurapai ho berewe ani aidaha te. Gupai ani aidaha gbua nga ka kiiso gi gaani inohe re.” (The Watch Tower, December 15, 1914, kpewaraga 377-378) Ani ambunga gaani tambuahe tipa gu imarago nga ga toro gbiati gu nga ga rengo te. Nirengo, ani awere na wene ndupai berani kadu na ngbarago mbiko ani ‘nata rogo ga Yekova imarago.’—Yes. 2:5; Tam. 43:3; Snz. 4:18.
19. Agu aboro naida ka zio bapatiza, tipagine si aidanga ti ni i naakeesa ya?
19 Kangia oni atakparanga gaoni raka fu Yekova ki zi bapatiza te, ono oni naidi kaa ‘ta rogo ga Yekova imarago,’ ka oni naakeesanga tie ya. Oni mangi agu apai Ziazia Kekeapai aidaha tipa oni rẽ ka zio bapatiza, nga gu gene boro ayugo gupai ngbaha nga ni na tambuahe fu Mbori na fu Kristo tipa agu apai i namangihe. Oni fu guhe fu Yekova kiipaha gbe nga gaoni unga. Oni yugu gupai nga oni naida ka manga gupai Mbori akpinyemuhe nipeka oni fuo Wiriko. (2 Kor. 5:14, 15) Zanga kapa, si nga gu raka ngbaa kisusi!
[Gu kpiahe du ti kpewaraga 29]
Pa zio oni bapatiza nayugo gupai nga oni sia gu raka ngbaa kisusi
[Gu kpiahe du ti kpewaraga 30]
Ngba ba roni angba rogo ga Mbori “bagbuko”?
[Gu kpiahe du ti kpewaraga 32]
Gaoni Karagapai Nga Gine?
• Gine gaani bapatiza ayugopaha?
• Kparatise fu Mbori na bapatiza naye na gini amaku?
• Tipagine duhe ti ni ninyanyakipa pai ani wirikipai be Yesu?
• Gine nika undo rani ani kakuti gu raka ngbaa kisusi?