Agu Apai Yesu Agumbaha Tipa Tiko

“Yesu aima ino gu boro nangia ko nzunzu, gu ba ko aye rogoho, gupai ko aye ti ni ku zegino, na gupai nadu tipa ko kumbatayo.”​—AUTHOR HERBERT LOCKYER.

MBATA fu ani idi kuti agu apai Yesu ayuguhe, si naida ani iningo bete apai mbata tipa ko. Da nzunzu nangia Yesu? Wari ko ayeni? Ginipai paha anyaki fuko gbe rogo gako raka? Rogo agu Akitabu Wene Pangbanga Matayo, Marako, Ruka, na Yoane akehe, ani nagbia karagapai yo kuti agi asanahe re nga gu kina boro Yesu agumbaha ningbako.

Ko aima raka mbata fu vungayo ko auru kpotosende no Yesu ayaa: “Mbata Abarayama nikadu mi adu kinaho.” (Yoane 8:58) Abarayama araki agarã wa 2,000 mbata fu vungayo Yesu. Ono Yesu ayawee ko aima raka mbata fu vungayo Abarayama. Wari du tie Yesu adu ni? Ko ayaa: ‘Mi aye ngbangbaturũ yo.’—Yoane 6:38.

Wiri Mbori Yekova na badungu awiriko ti ni nga amaraika. Ono Yesu tigako kia. Ko aya tipa tiko wee ko nga “bangisa Wiri Mbori.” (Yoane 3:18) Gupai re nayugo gupai nga, kina Yesu sa nga gu boro Mbori amangi ní nibeko. Gu bangisa Wiri Mbori re du Mbori amangisunge na ko ka kusa kura ahe dunduko.—AKorosaio 1:16.

“Wiri boro” Gere nga gu fugo Yesu agumbaha tipa tiko susi kura afugo dunduko. (Matayo 8:20) Gu fugo re nayugo gupai nga anga Yesu angia maraika nasa tiko niboro te, na anga ko aima raka mbataano rogo kura ngbatunga he te. Ono ko angia ndikidi boro. Mbori amangisunge na gako ziazia toro ki di ga Yesu unga ngbangbaturũ yo ki moihe ku rukumbu gu ngasu dee yo nangia Maria tipa ri vunguko sende no. Gipai re asa gupai nga i vungu Yesu nirengberengbe boro, ka ingapai adunga tiko ya.—Matayo 1:18; Ruka 1:35; Yoane 8:46.

Gu Masiya i agumba paye ko Dee Somorona aya fu Yesu wee: “Mi ini ya Masiya naye.” Ko akaragapai furi ki yaa: “Mi nga ko nagumba pai foro re.” (Yoane 4:25, 26) Gu fugo nga “Masiya,” watadu “Kristo,” rogoyo nga “Mbedimbedi Boro.” Mbori nambedi Yesu niziazia toro tipa ko mangi gu sunge ko akpinyemuhe tipa ka manga agu apai ko akidopaha.

Gupai paha anyaki fuko gbe rogo gako raka Ti kura regbo sa, Yesu ayaa: “Mi nandu ka tungusa gu wene pangbanga nga ga ga Mbori ngbi rogo kura akporo a; bambiko si du i akedi re tipa ha.” (Ruka 4:43) Wa Yesu avura manga badungu wene apai fu agu aboro nadu rogo zingo, pa tungusa gu wene pangbanga nga ga ga Mbori Kindo ko amoiberãko tipaha gbe. Ani nika fura kusa tipa agu apai ko ayuguhe tipa gu Kindo re.

Si tie ziazia nga, Yesu aangianga kungbo kumba te.a A wa ani ka bihe, pa raka Yesu ngbangbaturũ yo nasa gupai nga ko gumba kura apai auru kpotosende no. Si asa gupai nga ko tungusi gu pangbanga nika aria gu raka nga ga badungu amirioni aboro.

[Gu rukutu kekeapai du bandu kpewaraga yo]