Agu Apai Yesu Agumbaha Tipa ga Mbori Kindo

“Yesu amerẽ rogo abaakporo na akporo dunduko nitungusi . . . gu wene pangbanga nga ga ga Mbori ngbi.”​—RUKA 8:1.

ANI naida ka fura tipa guhe ngba tirani, watadu guhe anabihe. Zavura Yesu, ko ayaa: “Ngba boro nagumba gu pai du kpotoni yo.” (Matayo 12:34) Ka ani wisigi agu apai Yesu agumbaha ti regbo gako tungusapai, ani da ada kuti gupai nga pa ga Mbori Kindo nangia memepai fuko.

Ga Mbori Kindo nga gine? Kindo nga gu zogarago du gaha bazogo nga bakindo. Sidu, ga Mbori Kindo nga gu zogarago ko naima sigiraha. Yesu aafura gbe tipa ga Mbori Kindo, na si nangia memepai rogo gako pangbanga. I fura tipa ga Mbori Kindo rogo Akitabu Wene Pangbanga wa bara 110. Yesu aatungusanga kina tungusitungusi paha gbua te. Gako mangaapai ayugu dungu apai tipa ga Mbori Kindo na gupai si nika mangaha.

Da nga Bakindo? Gu bakindo nga ga ga Mbori kindo, anga wiri aboro nasia ko te, ono Mbori nasia ko. Rogo ga Yesu yugopai, ko ayuguhe nga Mbori nasia ko.

Yesu aima ino nga agu asangbaanebi nga ga Ziazia Kekeapai afura tipa Masiya ya ko nika zogarago kurii nyenye Kindo. (2 Samuere 7:12-14; Daniere 7:13, 14; Matayo 26:63, 64) Si airiwongo te nga Yesu ayugu tiko gbaiga nigu Masiya i agumba paye ko. Yesu aima idaha nitiko nga ko nga guko Mbori asia ko. (Yoane 4:25, 26) Yesu amangisunge na gu fugo nga “gi ngbi,” watadu gimi kindo.—Yoane 18:36.

Yesu agumba gupai nga kura aboro kinaho nikadu ti zogarago na ko. (Ruka 22:28-30) Ko ayambu agi aboro re nga “umba rika aboro” bambiko bangeyo nikina umbaha. Ko aya fuyó wee: “Si ngba ti Baroni ka fu ngbi fu roni.” (Ruka 12:32) Gu yangara kitabu nga ga Ziazia Kekeapai nayugo gupai nga bange agu aboro nika zogarago na Kristo re nga 144,000.—Yugoti 5:9, 10; 14:1.

Wari du gu Kindo re ni? Yesu aya fu gu ga aRomo bazogo nangia Pondio Pirato wee: “Gi ngbi aenga nga rogo gi zegino te re.” (Yoane 18:36) Gi ga Mbori zogarago du Yesu nga bazogoho re, si amanganga sunge vurube awiri aboro te. Yesu afura gbe tipa ga Mbori Kindo ki ya si nga “gu ngbi nga ga ngbangbaturũ.”a (Matayo 4:17; 5:3, 10, 19, 20) Ga Mbori Kindo nga gu zogarago nga ga ngbangbaturũ.

Yesu aduna maabangirise ka ga ku ngbangbaturũ yo fuo raka ko auru kpotosende no. Ko ayaa: “Mi nandu ka mbakada ba furoni,” ka zaka gene fu agu awirinako ko nika zogarago naayó.​—Yoane 14:​2, 3.

Ginipai ga Mbori Kindo nika mangaha? Yesu aya fu aboro wee i nikpari kini yaa: “Ga ngbi yé, Ani mángi rogo kpotosende wa mo akpi nyemu he, Wa du he ngbangbaturũ yo.” (Matayo 6:9, 10) Ngbangbaturũ yo nga gu ba gupai Mbori akpinyemuhe amanga ni. Vurube ga Mbori Kindo du ga Mbori ringbisapai nika manga auru kpotosende. Wadu he wo, ga Mbori Kindo nika ye na bakere ariapai kurii gi kpotosende re.

Gini apai ga Mbori Kindo nika mangaha auru kpotosende? Yesu agumba gupai nga, ga Mbori Kindo nika digiso gbegberẽ apai kusayo nidia agu aboro kusayo nagbarasa zegino. (Matayo 25:31-34, 46) Gure nikangia digido irairaapai na gbegberẽ apai dunduko. Yesu agumba gupai nga kpotosende nika hi be “bayee aboro,” ruru aboro, airahipai, ‘agu aboro du ziazia kpotoyo,’ na aboro azarõ.—Matayo 5:5-9.

Ya mo gu ruru aboro re nika raka rogo bibiriko zegino? Wagusa te! Yesu akidohe nga iiriwo ariapai nika manga amanga auru kpotosende tiibe ga Mbori Kindo. Gu kumba i aimi Yesu sa naako akpari fuko ki yaa: “Yesu, mo tíngidi pa re ho mo ka da ni ku rogo ga ngbi.” Yesu akaragapai fuko ki yaa: “Ya mi foro ni rengo, areme, ani adú na mo Paradizo yo.” (Ruka 23:42, 43) Zanga kapa, ga Mbori Kindo nika sa gi kpotosende re niparadizo wakina gu nadu ati Edene yo.

Gini kura apai ga Mbori Kindo nika mangaha fu aboro? Anga Yesu akido kina pa agu apai sa ga Mbori Kindo nika mangaha te, ono ko ayugu agu apai a si nika mangaha. Yesu amangi agu apai i aino apai ti ni wa gu nga ka husa aboro, na gure ayugu gu bakere apai ko nika mangaha kumbatayo tiibe gako Kindo. Gu wene pangbanga naye be ga Mbori toro nayaa: “Yesu ki ta ata rogo Gariraya yo kirikiri dunduko niyugu pai rogo gayo abambutiria, nitungusi pa gu wene pangbanga nga ga ngbi, nihusi ngbatunga akaza na awokote dunduko namanga aboro.”—Matayo 4:23.

Yesu ahusi dungu akaza. Ko ‘ahasi bangiri gu kumba i avungu ko na vurari.’ (Yoane 9:1-7, 32, 33) Yesu ahusi boro ngbataka nizada ko gbua. (Marako 1:40-42) Ho i ayeni “na kumba naadu na kisikisi tuko, ki nikongodi pai,” ko ayugu he nga ko gu duadu na rengba ka husa ‘airangbiängä gbiati airabubo.’—Marako 7:31-37.

Gu Bakindo Mbori asiako re aima rengba ka dia kpio kusayo a. Apangbanga biata nga gu du nikekehe nayugo gupai nga Yesu azingisi aboro bekpio. Ko azingisi wiri dekurugbo, na degude garãri adu 12, gbiati bakureako nangia Razaro.—Ruka 7:11-15; 8:41-55; Yoane 11:38-44.

Yesu afura rogo gu mokedi nangia Yoane tipa agu apai nika manga kumbatayo ki yaa: “Oni ngére, ga Mbori banye du na aboro, ko anyé na yo, i adú ni gako aboro, Mbori anyé na yo tigako, ki du ni gayo Mbori. Ko awéga aume ti bangiriyo ku sa yo dunduko. Kpio adú nga berewe te, rungo adú nga yo na akpe na ima a te, bambiko bambata apai aima nyasa.” (Yugoti 1:1; 21:3, 4) Ani makianga gupai nga kpee, gberarago, ima, na kpio te! Gu regbo re du aboro nika bi gupai pai Mbori akpinyemuhe si nimangi auru kpotosende nzunzu a wa duhe ngbangbaturũ yo.

Gini regbo ga Mbori Kindo nika ye? Yesu agumbapa agu apai nika manga i nika ino ‘pa gako ye ti ni.’ Ko asaki rogo asangbaanebi ka yugu gini regbo ko nika tona zogarago nibakindo. Si adu nga tonatona gi regbo re nikangia agberãngbi rogo zegino dunduko, kodihe na avura, angbongi, abazigizo, na riri akaza. (Matayo 24:3, 7-12; Ruka 21:10, 11) Agi apai re na agu kuraha Yesu apehe aima digo nimangi natona rogo 1914, nga gu garã Bambata Vura Nga ga Zegino amangi. Sidu, Yesu nazogarago awere nibakindo ngbangbaturũ yo. Barambeda, ga Mbori Kindo nika ye ka manga auru kpotosende ane wa duhe ngbangbaturũ yo.b

Gine paye ga Mbori Kindo nika mangaha furoni? Si naruriipa wai oni nakaragapai kuti ga Yesu pangbanga.

[Gu rukutu kekeapai du bandu kpewaraga yo]