Yesu Kristo Gu Pangbanga Du Ngbako Furoni

“Mi aye ami du ni ungara, ungara ki du na ome rengbe arengba.” ​—YOANE 10:10.

YESU KRISTO aye ku sende no gbe tipa ka fu he, angianga ka dia he ya. Ko afu nyanyakipahe fu aboro, nga gu pangbanga ko agumbaha tipa Mbori na tipa ga Mbori ringbisapai. Agu aboro nandu kuti sangba gu pangbanga re, i naraka wene raka araka awere, na amirioni aKristano naraka gi raka re.a Ono gu kura he kinaho nyakipaha gbe Yesu afuhe tipa aboro, nga ungako. Tipa ani raki wene raka kumbatayo nyeanye kindi, si naida ani duna idapase kuti gu motumo Yesu afuhe tipa rani.

Guhe Mbori na Kristo afuhe Yesu aima ino gupai nga avurako nika mangako gbegberẽe na ki imiko. (Matayo 20:17-19) Ono wa ko avura inoho, ko ape gupai du rogo Yoane 3:16 nayaa: ‘Mbori akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.’ Yesu aya berewe wee ko aye “ka manga pa aboro, ka tumo dungu yo ni ungako.” (Matayo 20:28) Tipagine ko aidi ti ni ka fu ungako tipa aboro?

Gu nyemuse adunga gu waha ya asa Mbori ko fu guhe nika kusa goro aboro be gu ingaapai ani adihe ti Adamu gbiati agu apai si aye nani, nga zangarengba gbiati kpio. Mbori amangi gipai re nikeda ko bangisa Wiriko ko ye ku sende no ka kpi nimotumo. Yesu aima ida na gupai re, na ko afu ungako tipa rani. Gu motumo tumorii ko afuhe re angia ga Mbori bakere gamahe fu aboro.b Si nga gu gamahe rengbe ka ndu na boro sa nyenye unga.

Gupai si aida oni mangihe Ya mo oni nabi motumo tumorii nigu gamahe i afuhe furoni? Wo si aida oni naabihe. Oni bingo gi kpiapai re: Boro ye na he furoni rogo korotoni. Guhe re arengba nga kadu nigaoni te da kinaho ka oni tai beroni ni ka diaha. Wakina gure a, Yekova afu motumo tumorii furoni, ono gu gamahe re arengbanga kadu nigaoni te kinagu ka oni dihe. Wai rengbe oni ka diaha?

Yesu ayawee kina agu aboro “idi pa ko” nika gbia nyenye unga. Idapase nasa boro ní naamangapai ringbisihe kuti ga Mbori agene. (Yakoba 2:26) Gu boro duna idapase kuti Yesu, ní naʹaria gani raka si du ringbisihe kuti agu apai Yesu agumbaha na gu ko amangihe. Tipa ka manga gupai re, si naida oni ini Yesu wenengai gbiati Bako. Yesu ayaa: “Nyenye unga nga gere, nga i ini ro nga bangisa ndikidi Mbori, na gu ko mo akedi ko, nga Yesu Kristo.”—Yoane 17:3.

Agarã wa 2,000, Yesu atungusi gu pangbanga aria gu raka nga ga badungu amirioni aboro auru kpotosende. Oni naida ka ino kura apai tipa gu pangbanga re na ki ini wai rengbe oni gbiati abadiangbaroni ka gbia undo behe, angianga kina awere ya ono nyeanye kindi? Ka oni aidaha, aDezire Yekova ima ida ka undo roni.

[Gu rukutu kekeapai du bandu kpewaraga yo]