3 Kparakpee Wai Si Aida Ani Mangihe?

NIBIPA kparakpee, gupai badungu aboro pambori aberãha gbe nga wai si aida boro ru ka kpara, gini ba si aida ní du rogoho, na gini apai si aida ní mangihe watadu ní pekehe. Ono tie, Ziazia Kekeapai naundo rani ani mbu ngbatunga gu bipai re, ki berẽkurii gu nyanyakipa sanahe nga, “Wai si aida ani kpari”?

Ziazia Kekeapai gumbapa ga Mbori ruru amoyambu nga aguyo nakpari rogo dungu aba na rogo dungu agene. I akpari kukiri watadu kuari ho si anida ada ni i kpari wo. I akpari nidua riyo kusende watadu ningere ku ngbangbaturũ yo. Kuba gupai nga i mangisunge na kpiahe rogo gayó kpee watadu akitabu kpee, i anaakpara kina boro gu kpee naye ngbaduyó yo. Gine nasa gupai nga Mbori gi gayó akpee?

A wa i nigumbaha rogo gu kekeapai ye mbata fu gere, i anaakpara sa fu kina bangisa Mbori nga Yekova. Kura nyanyakipa pai kinaho ani agedaha rogo 1 Yoane 5:14 nga gu nayaa: ‘Mbiko gere ani rengbe ka du zukazuka fuko, nga, ani ini ka ani ho gu he ku sangba gako nyemuhe yo, ko gi pa rani agia.’ Tipa Mbori gi gaani kpee, si naida ani kpari ringbisihe kuti gupai ko akpinyemuhe. Ginipai gipai re ayugoho?

Tipa ka kpara ringbisihe kuti gupai Mbori akpinyemuhe, si naida ani ini gupai ko akpinyemuhe. Wisigo Ziazia Kekeapai nga nyanyakipa pai tipa kparakpee. Ya mo gipai re nayugo gupai nga, kina gu kaani du mbata niwene abawisigi Ziazia Kekeapai si ka Mbori gi gaani kpee ti ni? Oó, ono ko naida aida ani wirikipai tipa gupai ko akpinyemuhe, na ki asadi ka rugatirani na gupai ani awirikaha na kini mangisunge nani. (Matayo 7:21-23) Si naida ani kpari ringbisihe kuti gupai ani awirikaha.

Wa ani kaa wirikapai tipa Yekova na tipa gupai ko akpinyemuhe, gaani idapase nika sona, nga gu kura nyanyakipahe berewe nasa gupai nga Mbori gi ga boro kpee. Yesu ayaa: ‘Ahe dunduko, guhe ka oni sana he tipaha rogo kpe yo, ni idapase, oni adía ha adia.’ (Matayo 21:22) Anga idapase nga ka ida kutipai gbua zanga gopai duho tipaha te. Ono si nga ida kuti gu he du ani na nyanyaki gopai ho tipaha, ka si vura du nga ani abingo ho abi te vurũ. (AEbere 11:1) Ziazia Kekeapai na badungu agopai rogo yo nga gu nayugo gupai nga Yekova kina ti ni, si aida ani kido kutiko, na ko na nyemu ka karagapai kuti agu akpee nga ga agu aboro nakpara fuko rogo idapase yo. Kurigure, ani rengbe arengba kaa sana Yekova ti aregbo dũ tipa ko kiisi gaani idapase, mbiko ko na nyemu ka fu guhe furani du ani na zingoho.—Ruka 17:5; Yakoba 1:17.

Kura nyanyakipa pai gere berewe nayugo wai si aida ani kpari. Yesu ayaa: “A nga boro sa ka ye koyo du Buba ni gbua te, kina mbiko re.” (Yoane 14:6) Yesu nga gene koyo du Bako ni nga Yekova. Si du Yesu aya ti ni fu apefuoko wee, i kpari nirimoko. (Yoane 14:13; 15:16) Gipai re ayugongo gupai nga si naida ani kpari fu Yesu te. Kuba gure, ani nakpara nirimo Yesu, kini tingidi gupai nga rogokoyo du rengbe ani ka fura fu gu rengberengbe ziazia Barani nga Mbori.

Ga Yesu abawiriki asanako ti kura regbo sa ki yaa: “Gbia, mo raba rani ani kpari.” (Ruka 11:1) I aaida ka ino boro gupai nzunzu si aida i kpari tipaha.

[Gu kpiahe du ti kpewaraga 6]

Agu akpee Mbori agiaha, i nafuhe na ngbanya kuti gupai ko akpinyemuhe, na niʹidapase, na nirimo Yesu