Oni Yugu Irisa Tipa Rogatise Nga Ga Mbori Gamunihe

“Si du boro nihe bani ti ni na nani, ki ka kuti diani, i ki du wa boro sa.”—BAM. P. 2:24.

1. Ndu ginipai du si aida ani fu irisa ti ni fu Yekova?

YEKOVA MBORI nga Baenge pa rogatise, si naida aida ani yugu irisa fuko. Wangia ko Bakusirani, Bakere Bakindo, na Barani, ko nga Bafu “wene gamahe dunduko, na ziazia ũgamahe.” (Yak.1:17; Yugo. 4:11) Gure nga gu gene ko ayugo gako bakere nyemuse rogoho. (1 Yo. 4:8) Agu apai dunduko ko nayuguhe furani, agu apai dunduko ko aidaha berani, na agu ahe dunduko ko nafuhe furani, si tipa kina gaani wenepai.—Yes. 48:17.

2. Gini arugute Yekova afuhe fu bambata arogotise?

² Ziazia Kekeapai nagumba gupai nga, rogatise du dagba agu ‘awene’ agamahe Mbori afuhe. Ho Yekova ambakadi Eva ni ki ye na ri fu Adamu nidiako, ko afu arugute fuyó nga gu narengbe ka sa gayó raka si du niwenehe. (Oni gedi Matayo 19:4-6.) Ka i andu kuti agu arugute re, ka i araki na ngbarago nyeanye kindi. Ono tie, i amangi pamungo ki basa ga Mbori arugute na sangbaha kidu nigbegberẽhe gbe.—Bam. P. 3:6-13, 16-19, 23.

3, 4. (a) Wai badungu aboro ayugo zanga irisa areme tipa rogatise na tipa Yekova Mbori? (b) Gini akpiapai ani ka wisigoho awere?

³ Wakina gu bambata arogotise re, dungu aboro namanga diaberã areme rogo gu ramukporo nga ga rogatise zanga berãpa ga Yekova arugute. Aguyo nazio kina badia gbua, na aguyo nasa rogatise si du kina wai i akpinyemuhe, wa gu nga kumba nadia kumba. (Rom. 1:24-32; 2 Tim. 3:1-5) I aberãnga gupai nga rogatise nga ga Mbori gamunihe te, na wa i airisanga gu gamunihe re ya, gure nga i airisanga Bafuhe nga Yekova Mbori te.

⁴ Ti kura aregbo, ga Mbori aboro kinaho bangiriyo naago ti gu bipai du Mbori nani tipa rogatise. Gu kura aKristano naakparaka, watadu ka mbutiyo na gu nduhe adunga rogo Ziazia Kekeapai ya. Wai rengbe arogotise ka ne gupai re? Wai rengbe gu rugute du rogo Bambata Pai 2:24 ka undo agu aKristano nga arogotise i nyakasi gayó ramukporo? Na wai rengbe agu aboro naberãpa rogatise ka mbakadatiyo tipaha? Ani bingo arogatise biata gumbayo paha rogo Ziazia Kekeapai nga gu nayugo wai padu arogotise na irisa tipa Yekova narengbe ka sa gayó rogatise si nyeanye kindi.

Kumba Kakuti Diako, Dee Ki Kakuti Kumbaari

5, 6. Ginipai nangia asada fu aZekaraya na Erizabeta, na wai Yekova afu maku fuyó mbiko nye yó niruruyo?

⁵ Zekaraya na Erizabeta amangi rurupai. I ue dunduko nasia gu boro du wenengai rogo toro yo nigani badiarogatise. Zekaraya aamanga gako sunge wenengai niboromotumo, na i dunduko nanaairisa ga Mbori aNdiko wenengai. Badungu weneapai nadu beyo i arengbe ka fu tambuahe fu Mbori tipaha. Ono tie, ka mo andu ku kpuyo yo, ka mo abi gupai nga he kinaho nakpa koyo beyo. Agude aadunga beyo te. Erizabeta angia irazangada, na i aima raka gbe.—Ruka 1:5-7.

⁶ Rogo gu ringara aYisaraere nadumbata, pa vungu aima nyaka gbe, na aboro anaarakanga gbe kporo gbua nga kumba na diani te. (1 Sam. 1:2, 6, 10; Tam. 128:3, 4) Ti agu aregbo re, akumba anaambu adiayo ambu ka i avunganga ya. Ono tipa Zekaraya, ko akakuti Erizabeta kindi. Ko aagbatanga gene tipa ka mburi te, na ri aamanganga ha wo a te. Wa rago avura gberã tiyo mbiko zanga yó agude, i akakuti tiyo kindi kini mangisunge fu Yekova wenengai. Kusa, Yekova afu maku fuyó gbe, nga ka fu gude fuyó ngba gbinza yó.—Ruka 1:8-14.

7. Rogo gini kura gene Erizabeta ayugu gari ranigose fu kumbaari?

⁷ Erizabeta ayugu gari ranigose a berewe ngba kura gene. Ho ri avungu wiiri ni, Zekaraya aarengbanga ka fura te bambiko Mbori akisi fugoko mbiko ti ko kango na maraika. Ono ko aima fura na diako ngba kura gene tipa ri ini gupai maraika apehe ki yawee i yambu rimo gu gude re nga “Yoane.” Gayó amurakporo gbiati agumeyo aidi ka yamba rimo gu gude re nirimo bai. Ono Erizabeta aidi i yambu rimoko nga Yoane a wa kumbaari agumbaha. Ri ayaa: “Wo te; ono i yámbu rimoko nga Yoane.”—Ruka 1:59-63.

8, 9. (a) Wai pa ka arogotise kuti tiyo anyakasa gayó rogatise? (b) Rogo gini bete agene rengbe arogotise ka yugo gupai nga i nakakuti gayó badiarogatise?

⁸ Wakina aZekaraya na Erizabeta, agu arogotise du areme nagbiatiyo agbia na fudifudiapai. Ka arogotise akanga kuti tiyo ya, gayó rogatise naima gburuwa. Bete agu apai rengbe ka sa gupai nga ka boro kidongo kuti gani badiarogatise ya nga, biko agu ahe nazingisa nyemu kodaba ti boro, ba nyemuro ti kura boro, na bäri. Na ho boro akidongo ni kuti gani badiarogatise ya, nyemuse natona ka zera. Ho arogotise aka ni kuti tiyo, gayó rogatise nadu wa gu kporo duna ndugu pati ni nga gu nabanda aborokporo be kereapai. Sidu, ho kumba aka ni kina kuti diako, diako ki kakuti kinako, i naraka wenengai guni ki za ngbaduni fu guni, nyemuse kini nyaki. Si ninyanyakipa pai gbe boro kakuti gani badiarogatise.

⁹ Yekova aya fu Adamu wee: ‘Boro nika he bani na nani, ki ka kuti diani.’ (Bam. P. 2:24) Rogo gupai yo re nga gine? Ho kumba na dee arogatiyo ni, si aidanga i kakuti abakureayo gbiati agumeyo wakina gu nadumbata te. Gu bambata boro si aida guni niberẽ pani na kini di regbo na ní nga gani badiarogatise. Si aidanga guni peresipa abakureani watadu agumeni mbatayo fu gani badiarogatise te. Na si aidanga i mbu avunguyo watadu agumeyo i rimisi tiyo kurogo agu apai nga ga gayó ramukporo te. Si naida agu arogotise re kakuti tiyo. Gure nga gupai Mbori akpinyemuhe.

10. Ginipai rengbe ka undo arogotise i kakuti gayó abadiarogatise?

¹⁰ Zavura rogo agu akporo adunga kumba na diako rogo bangisa pambori ya, ka guni nye niruruni fu guni, mosoro duadu. Dezire Yekova sa adunga kumbaari nidezire Yekova ya ayaa: “Mi nafu bakere tambuahe fu Yekova mbiko yugoko pai fere mi ra fu kumbaami na kini irisiko bakere gbe. Pa ra mi fuko sa gupai nga ani raki tipa agarã 47 nyemuse kidu dagbarani gbiati irisa.” (1 Kor. 7:10, 11; 1 Pet. 3:1, 2) Sidu, oni mangi asadatise gbe tipa ka sa gaoni badiarogatise ní nibihe nga ngba bani angba. Oni gbata agu agene rengbe oni ngbaha ka yugo gupai fu gaoni badiarogatise rogo mangaapai yo watadu rogo fugo yo nga, ní nga gu boro nyaki pani furoni gbe auru kpotosende. Ka oni mbunga pai watadu boro ní gberesipa gaoni rogatise ya. (Oni gedi Asanza 5:15-20.) Ron na diako nga Jeannette naima manga agarã susi 35 ni arogatise ayawee: “Pa manga ani gupai Mbori akpinyemuhe nasa gupai nga ani duna ngbarago na kidu na diabese rogo gaani rogatise yo.”

Kodatise Nanyakasa Ramukporo

11, 12. Wai aAkuira na Puriseka amangisunge sa (a) kpuyo yo, (b) rogo gu sunge i anaagbia marã mbikoho, (d) gu sunge nga ga Mbori?

¹¹ Ho gu mokedi nangia Pauro afura ni tipa gu bawene abakureako nangia Akuira na Puriseka, ko agumbanga pa guni ki mbupa guni te. Agi arogotise nadu na kodatise re nga wene kpiapai nibi gupai Mbori agumbaha ho ko ayani wee, kumbakudee na diakumba nga “boro sa.” (Bam. P. 2:24) I anaamanga gayó asunge kina sa kpuyo yo, na gu sunge i anaagbia marã mbikoho, gbiati sunge tungusapai. Nikpiapai, ho Pauro andu ni ku Korinda yo nibambataha, aAkuira na Puriseka adiko ku kpuyo yo, na yo du a nangia gu ba ko anaasungo ni tipa ka manga asunge. Kusa, ho i aduni Efesa yo, i aidi gupai nga aboro naamanga dunguratise kpuyo yo, na i kini undo vovo aboro, wa Aporo, tipa i sono rogo toro yo. (Amo. 18:2, 18-26) Ho agi arogotise re andu ni ku Roma yo, i aidihe berewe a fu aboro i naamanga adunguratise kpuyo yo. Kusa, ho i akaragatiyo ni ku Efesa yo, i angarasi awirina yo.—Rom. 16:3-5.

¹² Ti kura regbo, Akuira na Puriseka amangi gayó sunge sa na Pauro nga ga mbakada bamburoko. Na berewe a, Akuira na Puriseka amangisunge sa zanga wawaru. (Amo. 18:3) Si ziazia nga, gupai naundo yó i du kina sa nga manga agu apai nga ga aKristano. Si nasa gupai nga gayó ramukporo du wenengai rogo toro yo. Ho aAkuira na Puriseka adu ni Korinda yo, Efesa yo, watadu Roma yo, aboro aini yo ni “abadiasunge rogo Kristo Yesu” yo. (Rom. 16:3) I anaamangasunge kina sa tipa ka kiiso gayó sunge tungusapa Kindo rogo agu aba i amangasunge rogoho.

13, 14. (a) Gini apai rengbe ka sa gupai nga ka kodatise dunga dagba arogotise ya? (b) Gini bete apai rengbe arogotise ka mangaha si ki vo yó i du “wa boro sa”?

¹³ Nirengo, ho du aboro ni na kodatise rogo gayó asásá na rogo gayó mangapai yo, si nanyakasa gayó ramukporo anyakasa. (Batu. 4:9, 10) Si nipa gberarago nga, dungu arogotise nadia kina wiri bete regbo gbua na gayó abadiarogatise. I nadia dungu aregbo kina kutingba gayó asunge. Aguyo nandu tuturũu tipa sunge nga ga zegino watadu ku giingbii yo ka mangasunge yo kaa keda kina marã fu gayó abadiarogatise. Na rogo kura akporo, kura arogatise nidu nisayo mbiko i nadia gbanga regbo kina kupati terevizioni, ambaro, vidio, watadu internet. Ya mo kina gu bangisapai re du tipa roni? Ka ngia wo duhe tipa roni, ya mo oni mangi ariapai tipa kaa dia bakere regbo kina sa? Na gu nga ka dia regbo ka mangasunge sa wa gu nga manga riahe, zunda asiani, watadu giriso pangba kporo? Ya mo oni rengbe ka mangasunge sa ka ngerafuo agude watadu ka undo gaoni sosono aboro?

¹⁴ Gupai nyakipaha gbe, nga ka dia regbo kaa manga agu apai nga ga toro kina sa. Wisigo agu averesi du tipa aʹuru nibasasa kina sa na kini mangi gu irisombori nga ga aborokporo nafu momu fu aborokporo gayó aberã na gayó asásá du kina sa. Na berewe a, si naida i naamangasunge tungusapai kina sa. Ka gene du beroni, oni asadi ka mangasunge abazakigene sa, ka si vura du nga oni rengbe ka mangaha tipa diwi sa watadu garã sa gbua. (Oni gedi 1 AKorindo 15:58.) Wirinarani sa namangisunge abazakigene na kumbaari nayaa: “Sunge tungusapai nangia gene sa dagba agu akuraha nasa gupai nga ani naadia regbo gbe kina sa na kini fura a. Wa ani aduna sásá sa nga ka undo aboro rogo toro yo, si asa re mi niibi tire nga ani namangasunge sa. Si asa re mi inidi ko gbe, angianga kaa biko nikumbaami gbua ya, ono nibawene bakureami a.” Kaa oni amanga gaoni apai sa, si nika sa gupai nga agu apai du oni na nyemuhe, agu apai oni aperesapaha mbatayo, na gaoni asino tona kadu kina sa, oni ki tona kaa berã sa na kini mangiapai sa “wa boro sa,” a wa aAkuira na Puriseka adu.

Oni Peresi Mbori Mbatayo Rogo Gaoni Ramukporo

15. Ginipai rengbe ka sa arogotise i duna diabese rogo gayó rogatise? Oni sakingo rogoyo?

¹⁵ Yesu aima ino gupai duhe ti ni ninyanyakipa pai ka peresa Mbori mbatayo rogo ramukporo. Ko aima bi Yekova ko ni kpamia bambata arogotise, na ko ki ima bi wai Adamu na Eva aduna ngbarago ho i aandu ni kuti ga Mbori andiko, na gupai namangi yó ho i ambu mangasunge ni nani. Ho Yesu aayugopai ni fu aboro, ko ayugu ga Bako rugute nga gu ani agedaha rogo Bambata Pai 2:24. Ko agbia kurapai kuti ni ki yaa: “Gu Mbori akpamia re ka boro kpara nga ha ya.” (Mt. 19:6) Sidu, gu nyanyakipa pai rengbe ka undo arogotise i duna ngbarago rogo gayó rogatise nga bakere irisa tipa Yekova. Avungu Yesu nangia Yosefa na Maria amoi wene kpiapai nibi gipai re.

16. Wai aYosefa na Maria ayugu gupai nga i aperesi Mbori mbatayo rogo gayó ramukporo?

¹⁶ Yosefa aduna wene sino gbiati irisa koyo du Maria ni. Ho ko aini gupai ni nga ri duna mobara, ko aidi ka manga ri rogo wene gene yo mbata fu ga Mbori maraika saki gupai fuko namangi tipa ri. (Mt. 1:18-20) Agi arogotise re airisi ga Kaisara ndika na ki mangipai ringbisihe kuti ga Moize aNdiko. (Ruka 2:1-5, 21, 22) Wa si avura du nga akumba du si aidi i naandu tipa dunguratise Yerusarema yo, ono Yosefa na Maria gbiati gayó aborokporo anaadu pati agi adunguratise re na agarã dunduko. (Pa Rug. 16:16; Ruka 2:41) Rogo gi gene re na agu akuraha, agi arogotise re amangi asadatise ka fu ngbarago fu Yekova na ki yugu bakere iriso tipa agu apai nga ga toro. Si aruaru tie Yekova siayo tipa i ngerefuo wiriko nga Yesu auru kpotosende no.

17, 18. (a) Rogo gini agene rengbe arogotise ka peresa Mbori mbatayo rogo gayó ramukporo? (b) Wai rengbe gipai re ka undo yó?

¹⁷ Ya mo oni peresi Mbori wakina gure mbatayo rogo gaoni ramukporo? Nikpiapai, ho oni amanga nyanyaki diaberã ni, ya mo oni naagbata bangua arugute rogo Ziazia Kekeapai yo, na oni nikpari tipa gipai re, na ki sana gu wirina naima nyaka ní undo roni na arugute? Watadu oni naagbata gene ka nyasa na gaoni kpakarapai na kina gaoni aborokporo, abakurearoni watadu nisaroni? Ya mo oni naasada tironi ka maa agu aberãpai kurogo mangapai yo kangara moyambu afuhe na gaoni badiarogatise rogo ramukporo yo? Watadu oni na merafuo kina sino aboro watadu agu arugute aboro afuhe? Ya mo oni naakpara ti aregbo dũ na kini wisigipai kina sa, na ki moi asásá tipa agu apai nga ga toro, na kini fura tipa agu apai peresi oni paha mbatayo rogo gaoni ramukporo?

¹⁸ Ray naima manga garã awere 50 na ngbarago rogo rogatise yo nayaa: “Kpakarapai aakuranga dagbarani nga gu ka ani ambakadanga ha ya te. Si wo mbiko ani amoi Yekova ni gu ‘gire udi yo ho biata.’” (Oni gedi Batungusipai 4:12.) Danny na diako nga Trina idi kuti gipai re. Sangbayo nga: “Pa manga ani sunge fu Mbori kina sa ni arogotise ima nyakasa gaani rogatise.” I ima manga agarã susi 34 na ngbarago rogo gayó rogatise yo. Ka oni aperesa Yekova mbatayo rogo gaoni ramukporo, ko nika undo roni aundo oni duna diabese na ki fu maku furoni.—Tam. 127:1.

Oni Naayugo Irisa Kindi Tipa ga Mbori Gamunihe

19. Tipagine Mbori afu gu gamahe ti ni nga rogatise?

¹⁹ Tipa dungu aboro areme, gupai i aberãpaha nga kina agu apai nafu ngbarago fuyó. Ono gu bipai nga ga ga Yekova amoyambu ti gaha kia. Yesu aima ino gupai nga Mbori du namoi rogatise nigamahe, mbiko ko aidi gupai nga aboro moipai ki hikisi kpotosende. (Bam. P. 1:26-28) Ka aAdamu na Eva airisi gu gamahe re, ka sangbanaha adu nga, ka kpotosende asatihe niparadizo, na ka ga Mbori amoyambu raki na ngbarago.

20, 21. (a) Tipagine si aida ti ni ani mangi gaani abadiarogatise rogo irisa yo? (b) Gini gamunihe ani ka wirikapai tipaha rogo gu kekepai naye fuo gere?

²⁰ Kurigure, ga Mbori amoyambu nabi rogatise ni momu tipa ka fu taarimo fu Yekova. (Oni gedi 1 AKorindo 10:31.) A wa bi ani he, pa ka boro kuti gani badiarogatise, kodatise, na peresa Mbori mbatayo, nga agu apai nasa gu ramukporo nga ga arogotise si nyaki. Ka si du nga oni na mbakadatironi tipa rogatise watadu oni naasada tironi ka manga agu apai rengbe ka nyakasa gaoni ramukporo, si naida oni bihe nigu ziazia mbakadapai naye be Mbori. Pa ino ani gipai re nika undo rani ani mangi wene diaberã nga gu narurii Fugo Mbori. Ngba gi gene re, ani nayugo irisa tipa gu gamahe nga rogatise, na fu Bafu gu gamunihe re nga Yekova Mbori a.

²¹ Anga rogatise nga gu yangara gamunihe Yekova nafuhe furani te; na anga si a nga gu yangara he aboro agbia ngbarago mbikoho rogo raka yo te. Rogo gu kekepai naye fuo gere, ani nika bi kura bawene gamunihe berewe be Mbori, nga zanga rogatise.

Gaoni Karagapai Nga Gine?

• Wai pa ka boro kuti gani badiarogatise na rengbe kadu na ome kurii ga aKristano rogatise?

• Tipagine pa mangasunge sa rogo kodatise yo anyaka ramukporo ti ni?

• Gini bete agene rengbe arogotise ka peresa Mbori mbatayo ngbaha rogo gayó ramukporo?

• Wai rengbe ani ka yugo irisa fu Yekova nga Baenge pa rogatise?

[Gu kpiahe du ti kpewaraga 18]

Pa manga arogotise sunge kina sa naundo yó i duna kodatise