Oni Wirikipai Rogo Fugo Mbori Yo

Da Nga Mbori?

Gi kekeapai re nasakapai tipa agu asanahe dungu aboro naamakiaha berãyo yo na si nayugobara akaragapai kuti agu asanahe re rogo Ziazia Kekeapai. ADezire Yekova nikadu na ngbarago ka wisigo agi akaragapai re na oni.

1. Da nga Mbori?

Ndikidi Mbori nakusi ahe dunduko. Ziazia Kekeapai nayambako nga “Nyenye Bakindo,” du rogoyo nga ko aadunga na tonatona ko ti ni te, na digido ko adunga a ti ni te. (1 Timoteo 1:17) Wa duhe nga Mbori nga Baenge unga, si naida ani irisi kinako sa.​—Oni gedi Yugoti 4:11.

2. Wai gu du Mbori?

Boro ho nabi Mbori te mbiko ko nga Toro, nga gu ngbatunga kpoto du paha kuari ti gaani nga agurani naraka auru kpotosende. (Yoane 1:18; 4:24) Asino Mbori niyuguyuguhe furani rogo agu ahe ko amangihe. Nikpiapai, ho ani abi wai ni du rago nimbakadimbakadihe na zukuzuku ahe ngba-arikoho na ambumbudo, si nayugo ga Mbori nyemuse na tatamana. Bakio haurago nayugopa gu ome du Mbori nani.​—Oni gedi ARomo 1:20.

Ani rengbe ka wirikapai tipa asino Mbori gbe rogo Ziazia Kekeapai. Nikpiapai, si nape gupai furani Mbori aida nani na gupai ko aidanga nani ya, wai ko amangapai na aboro, na wai ko amangapai kuti apai nibakiakia.​—Oni gedi Atambuahe 103:7-10.

3. Ya mo rimo Mbori ti ni?

Yesu ayaa: “Barani du ngbangbaturũ yo, Ani írisi rimoro airisa.” (Matayo 6:9) Wa vura duhe nga dungu afugo i ayamba Mbori nani, rimoko gbua kina sa. I nayamba gi rimore nibakiakia rogo afugo yo. Rogo fugo Zande, si nga “Yekova.”​—Oni gedi Atambuahe 83:18.

Rogo dungu aZiazia Kekeapai, i aima dia rimo Mbori kusayo ki moi agu afugo kubaha nga Gbia watadu Mbori. Ono ho i ake Ziazia Kekeapai ni, rimo Mbori adu rogo yo wa bara 7,000. Yesu ayugu rimo Mbori nimangako sunge nani ho ko anaasakarogo Fugo Mbori yo ni fu aboro. Ko aundo aboro i ye ka ino Mbori.​—Oni gedi Yoane 17:26.

4. Ya mo Yekova naberã parani?

Yekova nayugo gako nyemuse tipa rani nidega ko tuko sa gaani akpee. (Atambuahe 65:2) Ya mo pa kumuko arungo nayugo gupai nga Mbori aberãnga parani te? Gu kura aboro naberãha nga Mbori naye na arungo ni asada furani, ono rengo ngaha te. Ziazia Kekeapai nayaa: “Ka manga gbegberepai, si turũ ti Mbori.”​—Eyobo 34:10; oni gedi Yakoba 1:13.

Mbori fu gu ranirii fu aboro nga ga siapai. Ya mo si aidanga ani yugu gaani tambuahe mbiko du ani na ranirii ka sia ka mangasunge fu Mbori te? (Yosua 24:15) Arungo moipai mbiko dungu aboro sia kaa manga akurayó na gbegberẽ apai. Ngbadu Yekova naima aima wa ko abi gu iraira mangaapai re.​—Oni gedi Bambata Pai 6:5, 6.

Barambeda, Yekova nika mangasunge na Yesu ka dia arungo kusayo na agu aboro naye nani. Wa du rago tie re, Yekova gu duadu na rengo beko ka mbugene fu arungo tipa wiri bete regbo. Kusa, ani nika ino ndu gupai Mbori nambu arungo ti ni si nimangi aboro.​—Oni gedi Yesaya 11:4.

5. Ginipai Mbori aida ani mangihe?

Yekova amangi rani na gupai kurogo rani yo nga ani iniko na kini kpinyemuko. Ko naida ani ini rengo tipa ko. (1 Timoteo 2:4) Ka ani wisigi Ziazia Kekeapai, ani rengbe arengba ka ino Mbori wa bakurearani.​—Oni gedi Asanza 2:4, 5.

Wa duhe nga Yekova fu unga furani, si naida ani kpinyemuko susi aboro dunduko. Ani rengbe ka yugoho fu Mbori nga ani nakpinyemuko nifura ani naako rogo kpee yo na kini mangi gupai ko akpinyemuhe. (Asanza 15:8) Yekova nakpinyemu ani mangipai na akuarani ninyemuse.​—Oni gedi Marako 12:29, 30; 1 Yoane 5:3.

[Gu sura du ti kpewaraga 23]

Ka oni aida ka ino dungu apai tipaha, oni bi gi buku re Gini Apai Nzunzu Ziazia Kekeapai Ayugoho?

[Gu sura du ti kpewaraga 23]

Ya mo wene ndupai ho Mbori ambugene ti ni fu arungo tipa wiri bete regbo?