Oni Wirikipai Rogo Fugo Mbori Yo

Da Nga Yesu Kristo?

Gi kekeapai re nasakapai tipa agu asanahe dungu aboro naamakiaha berãyo yo na si nayugobara akaragapai kuti agu asanahe re rogo Ziazia Kekeapai. ADezire Yekova nikadu na ngbarago ka wisigo agi akaragapai re na oni.

1. Da nga Yesu Kristo?

Yesu araki mbata ngbangbaturũ yo nitoro mbata fu i vunguko auru kpotosende. (Yoane 8:23) Ko nga bambata mangimangihe nga ga Mbori, na ko aundo Mbori ti kusaahe. Ko nga gu bangisa boro kina Yekova nitiko akusi ko, na si du i ayambako ti ni nga “bangisa vungu” nga ga Mbori. Yesu amangisunge wa bangbasia bagumba fugo Mbori, si du i ayambako ti ni nga “Pai.”​—Yoane 1:1-3, 14; oni gedi Asanza 8:22, 23, 30; AKorosaio 1:15, 16.

2. Tipagine Yesu aye ti ni ku auru kpotosende no?

Mbori akedi wiriko ku auru kpotosende no niaria gako unga ngbangbaturũ yo ku rukumbu gu ngasudee nangia Maria niboro Yuda. Si du, Yesu aadunga ti ni na bako niboro boro ya. (Ruka 1:30-35) Yesu aye ku auru kpotosende no (1) ka yugo rengo tipa Mbori, (2) ka maa kpiapai furani nimangako ga Mbori pai, na (3) ka fu gako rengberengbe unga ‘nimotumo.’​—Oni gedi Matayo 20:28; Yoane 18:37.

3. Tipagine ani aida motumo ti ni?

Motumo nga guhe i afuhe ka kusa boro be pai. Anga kpio na gbinza nga papara ga Mbori ringbisapai tipa aboro te. Wai ani aino gupai re. Mbori aya fu bambata kumba nga Adamu wee, ka ko mangi gupai Ziazia Kekeapai ayambaha nga ingapai, ko kpiakpi. Ka Adamu amanganga ingapai ya, ka ko akpingo wa sa te. Wa Adamu avura raka tipa kama agarã zanga kpi, ko atona kpi kina ti gu uru ko abasasangba Mbori ti ni re. (Bambata Pai 2:16, 17; 5:5) Adamu aye na ingapai kurii awiriko na sangbanaha nga kpio. Were, kpio “akuru” kurogo gi zegino nga ga ngbatunga aboro re vurube Adamu. Si nga ndu gupai ani aida motumo ti ni.​—Oni gedi ARomo 5:12; 6:23.

4. Tipagine Yesu akpi ti ni?

Da narengbe ka fu motumo ka ngbe rani bekpio? Ho ani akpi ni, gure nga ani natumo tipa gaani aingapai nitirani. Kpakpa boro ho rengbe ka tumo tipa ga akurani aingapai te.​—Oni gedi Atambuahe 49:7-9.

Wa duhe nga Yesu adunga na bako niboro boro ka ko adi ingapai tiní ya te, si du ko akpi ti ni tipa ga aboro aingapai, ono angianga tipa ko ya. Mbori akedi wiriko ko kpi tipa rani ka yugopa gako dudunguro nyemuse tipa aboro. Yesu ayugu nyemuse tipa rani nigiako sangba bako na nifuko ungako tipa gaani aingapai.​—Oni gedi Yoane 3:16; ARomo 5:18, 19.

5. Ginipai Yesu amangaha awere?

Pa husa Yesu aboro kaza, ki zingisi kangba aboro bekpio, na ki batasi aboro be kereapai ayugu gupai ko nika mangaha fu agu aboro dunduko duna giasangbaa. (Ruka 18:35-42; Yoane 5:28, 29) Fuo kpio Yesu, Mbori azingisiko nitoro. (1 Petero 3:18) Yesu asungo ku kumbabe bako ka pido gu regbo Yekova nika fu ome fuko ko zogorago ni Bakindo ku auru kpotosende dunduko. (AEbere 10:12, 13) Yesu nazogarago awere ni Bakindo ngbangbaturũ yo, na apefuoko auru kpotosende no kini takipande wene pangbanga rogo zegino dunduko.​—Oni gedi Daniere 7:13, 14; Matayo 24:14.

Bambeda, Yesu nika mangasunge na gako ome wangia ko Bakindo ka digiso arungo kusayo dunduko na agu aboro naye na arungo. Agu amirioni aboro duna gayó idapase kuti Yesu na kini gi sangbako nika gbia wene raka Paradizo yo auru kpotosende ane.​—Oni gedi Atambuahe 37:9-11.

Ka oni aida ka ino kura apai tipa gipai re, oni bi kapita 4 nga ga gi buku re Gini Apai Nzunzu Ziazia Kekeapai Ayugoho?, si nga gu buku aDezire Yekova akusaha.

[Gu sura du ti kpewaraga 11]

Agu amirioni aboro duna idapase kuti Yesu na kini gi sangbako nika gbia wene raka Paradizo yo auru kpotosende ane