Oni Wirikipai Rogo Fugo Mbori Yo

Ya Mo Maabangirise Ho Tipa Kpiki Aboro?

Gi kekeapai re nasakapai tipa agu asanahe dungu aboro naamakiaha berãyo yo na si nayugo bara akaragapai kuti agu asanahe re rogo Ziazia Kekeapai. ADezire Yekova nikadu na ngbarago ka wisigo agi akaragapai re na oni.

1. Gini maabangirise duho tipa kpiki aboro?

Ho Yesu adani Betania yo mbembedii na Yerusarema, bakureako nangia Razaro aima kpi ki di arame biama ku murã yo. Yesu andu kupati murã yo na Marata gbiati Maria, nangia adawiri Razaro. Si aaimanga te rimbasa aboro ki dunguratiyo koyo. Ya mo oni rengbe ka berãpa gu ngbarago Maria adu nani ho Yesu azingisi Razaro ni?​—Oni gedi Yoane 11:20-24, 38-44.

Marata aima ida kuti gupai nga i nika zingisa kpikpi aboro azingisa. Ga Yekova ruru aboro ima ino nga kumbatayo, Mbori nika zingisa agu aboro kpiki i raki auru kpotosende ane berewe.​—Oni gedi Eyobo 14:14, 15.

2. Ginipai ninaamanga ho boro akpi ni?

Boro na gu mbisimo tiní nakpi akpi. (Yezekere 18:4) Bambiko i akusi rani rogo nvutu sende. (Bambata Pai 2:7; 3:19) Ho dudu rani akpi ni, gaani berãpa apai nanyasa kusayo. Sidu, tifuo zingisayo Razaro bekpio, ko apenga gupai namangiko rogo kpio yo te, bambiko kpikpi aboro ainongo pai te.​—Oni gedi Atambuahe 146:4; Batungusipai 9:5, 10.

Si tie ziazia nga, ka kpikpi boro rungongo te. Sidu tie, gu yugopai nga Mbori nambusa aboro tingbafuo kpioyo nga ziree. Gu bipai nga Mbori nambusa aboro rogo we yo re, si nafu gberarago afu fuko.​—Oni gedi Yeremaya 7:31.

3. Ya mo ani rengbe ka fura na kpikpi aboro?

Ka kpikpi boro furanga te. (Atambuahe 115:17) Ho gbegberẽ amaraika afura ni fu aboro, i rengbe ka manga tiyo wa ka i ya gu boro nakpi du nafura. (2 Petero 2:4) Yekova aidanga ani asadi ka fura na kpikpi aboro te.​—Oni gedi Pa Fu Rugute ni Ue he 18:10, 11.

4. Ada i nika zingisayo bekpio?

Rogo vovo zegino, i nika zingisa amirioni aboro nga aguyo du rogo amurã yo. Zavura agu aboro namangi gbegberẽ apai mbiko i ainonga Yekova te, i nika zingisayo azingisa.​—Oni gedi Ruka 23:43; Amokedi 24:15.

Agu aboro i nika zingisayo bekpio nikadu adu na rengba beyo tipa ka wirika rengo tipa Mbori, na ki moi gayó idapase kuti Yesu ni giayo sangbako. (Yugoti 20:11-13) Agu aboro i nika zingisayo bekpio na i kini mangi weneapai, i nika raka nyeanye kindi. Ono tie, aguyo nikaa manga kina gbegberẽ apai kindi, i nika zingisayo sa gu “zingabekpio nga ga sapangbanga.”​—Oni gedi Yoane 5:28, 29.

5. Ginipai zingabekpio ayugoho furani tipa Yekova?

I nika zingisa aboro bekpio bambiko Mbori akedi wiriko ko fu unga tipa rani. Si nga ga Yekova weneringise nga gu arẽnga aboro tipaha ya.​—Oni gedi Yoane 3:16; ARomo 6:23.

Ka oni aida ka ino kura apai tipa gipai re, oni bi kapita 6 na 7 nga ga gi buku aDezire Yekova akusihe re.

[Gu sura du ti kpewaraga 22]

I akusi Adamu rogo nvutu sende