Ginipai Si Aida Agude Wirikihe Tipa Mbori?

“Ziazia Kekeapai dunduko si aye be ga Mbori Toro si ki rengbe tipa yugopai, tipa zapai, tipa ruga aboro, na tipa raba aboro rogo rurupai.”​—2 TIMOTEO 3:16.

SI NAIDA i yugu rengo ayugo fu agude tipa Mbori. Wari rengbeyo ka wirika gu rengo re ni? I rengbe ka wirikaha rogo gu iriʹiripa buku nga ga pambori du rogo zegino dunduko nga Ziazia Kekeapai.

Ziazia Kekeapai nga gu waraga naye be Mbori. Rogo gu waraga re, Mbori nayugo sinoko na kini fu arugute fu awiriko nga parangayo na gu sosono yó i nindu kuti ni. Oni bingo gu bete ayugopai du rogo Ziazia Kekeapai na agu apai rengbe agude ka wirikaha behe.

Ginipai Mbori aida ani inihe tipa Ko?

◼ Gupai Ziazia Kekeapai ayugoho: “Kina ro sa, du rimoro nga Yekova, nga gu Ko nga Bahe ki susi auru kpotosende dunduko.”​—Atambuahe 83:18.

Gupai ani awirikaha: Mbori nga ndikidi Boro duna kina rimoko a ti ni.

◼ Gupai Ziazia Kekeapai ayugoho: “Bambiko Yekova nawisiga kpoto aboro yo dunduko, ki nirugu tiko na gu wisigapai nga ga berã dunduko. Ka mo agbata ko, mo abí ko abi.”​—1 Pekapai 28:9.

Gupai ani awirikaha: Yekova Mbori nangera angera fuo rani nibasasa dunduko kodihe na agude. (Atambuahe 10:14; 146:9) Ko naida ani wirikipai tipa ko.

◼ Gupai Ziazia Kekeapai ayugoho: “Ka oni rúngosi nga . . . wirinyaure a ya. Ka oni rúngosi yo si avura du waĩ vurũ, ka i kpári fere mi agía gayo kpe agia ni rengo.”​—Gate 22:22-24.

Gupai ani awirikaha: Yekova nagia ga agude kpee agia. Ani rengbe arengba ka fura fu Mbori dedede na ki gumba agu apai du ngbadurani yo na berãrani yo fuko.

◼ Gupai Ziazia Kekeapai ayugoho: “I aasadi Mbori berewe na berewe, ki nizingisi ga Yisaraere Ziazia Ko.”​—Atambuahe 78:41.

Gupai ani awirikaha: Gaani afugo na gaani mangapai naimisa Yekova aimisa, si du, si naida ani berẽ aberã mbata fu fura ani na mbata fu manga ani pai.

Wai rengbe ani ka mangapai fu agu aboro du kia tirani?

◼ Gupai Ziazia Kekeapai ayugoho: “Mbori akpara nga aboro te; ono dagba rika aboro yo dunduko gu ni nagunde ti ko, ki nimangi rurupai, kina ni ngba ti ko.”​—Amokedi 10:34, 35.

Gupai ani awirikaha: Ka si du nga Mbori naida na ngbatunga aboro dunduko, si aidanga ani naasoga kura aboro mbiko rangi kpotoyo kia watadu bibi yó kia ti gaani te.

◼ Gupai Ziazia Kekeapai ayugoho: “Oni ki mbakadi tironi dedede tipa karaga pai fu agu yo dunduko ka sana roni tipa gu pai du maabangirise ti roni mbiko ho, ono ni zera na irisa.”​—1 Petero 3:15.

Gupai ani awirikaha: Ho ani afura ni tipa pambori, si naida ani gumba gaani bipai agumba na kido, ono angianga na imisiringbaduse ya. Si naida ani yugu irisa a fu agu aboro du gayo apambori kia ti gaani.

Wai si aida ani mangi gaani aborokporo?

◼ Gupai Ziazia Kekeapai ayugoho: “Agude, oni gí sangba avunguroni rogo apai dũ, bambiko gere ngba rogo Gbia yo.”​—AKorosaio 3:20.

Gupai ani awirikaha: Ho agude agiasangba ni, si nayugo gupai nga i nakpinyemu avunguyo na i naida ka sa ngbarago ti Mbori.

◼ Gupai Ziazia Kekeapai ayugoho: “Nihi pai fu akuaroni, nivu akuaroni, ka pai du bangiri gu boro kuti kura ni; wa Gbia avu roni, kina wo oni ka manga.”​—AKorosaio 3:13.

Gupai ani awirikaha: Kura aboro gbiati gaani aborokporo ima rengba ka ba gberarago tirani ti kura aregbo. Ono ka ani aida Mbori mbupai furani, ani duwa ka ani wiriki gu sino nga ga mbupai fu akurani.​—Matayo 6:14, 15.

Tipagine si aida ani du ti ni niruru rani na kidu na weneringise?

◼ Gupai Ziazia Kekeapai ayugoho: “Oni dunduko oni gúmba rengo fu akuaroni.”​—AEfeso 4:25.

Gupai ani awirikaha: Ho ani agumba rengo ni, gure nga ani nawirika Mbori na kini sa ngbarago tiko. Ka ani sonosi gu sino nga ga gumba ziree, ani da wakina vura Mbori nga Bakitingbanga nga ‘irazire, kingia baha.’​—Yoane 8:44; Tito 1:2.

◼ Gupai Ziazia Kekeapai ayugoho: “Agu apai dunduko oni akpi nyemu aboro nimangi he fu roni, oni nimángi kina ha fu yo a.”​—Matayo 7:12.

Gupai ani awirikaha: Si naida ani berãpa agu abipai, berãpai, na gu nyemuapai nga ga gaani aborokporo na agu aboro du rogo gaani dagbarago. Ho ani ayugo ‘nunga ni fu akuarani’ watadu ka berãpa yó, si nasa gupai nga i mangi rani a rogo wene gene yo.​—1 Petero 3:8; Ruka 6:38.

A wa agi akpiapai re ayugoho, agu apai ani awirikaha rogo Ziazia Kekeapai, si rengbe arengba ka undo agude i duna tambuahe, irisa, na kidu ni aboro nunga ho i nika sona ni. Ono ada si aida i yugu agi apai re fu agude?