Oni Wirikipai Rogo Fugo Mbori Yo

Wai Rengbe Oni ka Mbeda na Mbori?

Gi kekeapai re nasakapai tipa agu asanahe dungu aboro naamakiaha berãyo yo na si nayugobara akaragapai kuti agu asanahe re rogo Ziazia Kekeapai. ADezire Yekova nikadu na ngbarago ka wisigo agi akaragapai re na oni.

1. Ya mo Mbori Nadegatuko sa Akparakpee dunduko?

Yekova nayamba aboro rogo angbatunga yo dunduko i mbedi naako rogo kparakpee yo. (Atambuahe 65:2) Ono ko adeganga tuko sa akparakpee dunduko te. Nikpiapai, ho aYisaraere aninye ni kindi kuti manga gbegberẽ apai, Mbori aniká ka gia gayo akpee. (Yesaya 1:15) Gu kumba namanga diani ngba gbegberẽ gene, ka gani kpee danga yo du Mbori ni te. (1 Petero 3:7) Oni tie, Mbori nagia ga agu aboro kpee agia duna kere ingapai tiyo ka i saberã.​—Oni gedi 2 Pekapai 33:9-13.

2. Wai si aida ani kpari?

Kparakpee nga momu furani na si nga papara gaani irisombori, sidu, si naida ani kpari sa fu kina Yekova. (Matayo 4:10; 6:9) Wa duhe nga ani nga kpakpa aboro, si naida ani kpari tirimo Yesu bambiko ko nga “gene.” (Yoane 14:6) Yekova aidanga ani naadogoda gu kpee i agumbaha ngbarii watadu gu i akehe ake te, ono ko naida gu kpee naye kina boro ngbaduseyo.​—Matayo 6:7; AFiripoio 4:6, 7.

Bakusirani rengbe arengba ka gia gu kpee ani afuhe kukiri. (1 Samuere 1:12, 13) Ko naida ani kpari fuko ti aregbo dũ, wiso na nyemu, pati riahe, na ho ani agbiatirani ni na akpakarapai.​—Oni gedi Atambuahe 55:22; Matayo 15:36.

3. Tipagine aKristano naadungura tiyo ti ni?

Pa mbeda na Mbori nga taatapai te, bambiko ani naraka dagba agu aboro aidanga kuti Mbori ya na i nasawia pa gako kidohe du tipa zereda auru kpotosende. (2 Timoteo 3:1, 4; 2 Petero 3:3, 13) Si naida ani ngarasi tirani na akuarani aidipase ho ani kodatirani ni naayo.​—Oni gedi AEbere 10:24, 25.

Oni rengbe ka mbeda na Mbori ka oni zi bakure na agu aboro nakpinyemu Mbori. Agu adunguratise nga ga aDezire Yekova nafu amomu oni gbia undo be gu idapase nga ga kura aboro.​—Oni gedi ARomo 1:11, 12.

4. Wai rengbe oni ka mbeda na Mbori?

Oni rengbe ka mbeda na Yekova niberã oni kurii agu apai oni awirikihe rogo Fugoko yo. Oni berẽkurii gako mangapai, gako rugaapai, na gako akidohe. Kparakpee gbiati berãkuriipai nasarani ani duna ndikidi tambuahe tipa ga Mbori nyemuse na gako tatamana.​—Oni gedi Yosua 1:8; Atambuahe 1:1-3.

Oni rengbe ka mbeda na Mbori sa, ka oni kido kutiko na ki moi gaoni idapase kutiko. Ono idapase wakina rakirakihe si aida i naariga ha ariga. Oni duwa ka oni ariga gaoni idapase kindi nifugö agu apai oni awirikihe.​—Oni gedi 1 ATesaroniko 5:21; AEbere 11:1, 6.

5. Wai rengbe mbeda na Mbori ka undo roni?

Yekova nangerafuo agu aboro nakpinyemuko. Ko nabanda yó be agu apai rengbe ka gbarasapa gayo idapase naapa gu maabangirise du yó nani nga ka raka nyeanye kindi. (Atambuahe 91:1, 2, 7-10) Ko naza rani ti agu agene raka rengbe ka gberesa kpotorani naapa gaani ngbarago. Yekova nayugo gu bawene gene raka furani ngba kisusi.​—Oni gedi Atambuahe 73:27, 28; Yakoba 4:4, 8.

Ka oni aida ka ino kura apai, oni bi kapita 17 nga ga gu buku aDezire Yekova akusaha.