Asanahe Bawe Tipa Kodaba I Nakaragapai Kutini

1 Ya mo kodaba du nangia gu ingapai Adamu na Eva amangihe ati Edene yo?

▪ Karagapai: Badungu aboro naberã gupai nga gu zuzungua naadu ati Edene yo Mbori aya fu Adamu na Eva wee ka ringa ha ya, si aaru kuba kodaba. Ono tie, Ziazia Kekeapai ayugongo ho wo te.

Oni makianga gipai re: Mbata fu i kusi Eva, Mbori azinahe fu Adamu ki ya ka ko ringa zuzu “gu ngua nga ngua ina wenepai na gbegberẽpai” ya. (Bambata Pai 2:15-18) Wa Adamu adu ti gu regbo re nisako, gu zinahe Mbori afuhe fuko re aarengbanga kadu tipa kodaba te. Kurigure, Mbori agumba gupai fu Adamu na Eva nga i “zúga azuga, ki nge ange, ki hisi kpotosende.” (Bambata Pai 1:28) Ya mo Mbori nga boro nyemuse arengbe ka ruga gu bambata arogotise re nga i zúga azúga ki ‘hiisi kpotosende’ nga gupai naidi gupai nga i kodiba akoda ko kini ru berewe ka sarangbanga yó sa kpio mbiko mangayo gupai ko agumbaha?​—1 Yoane 4:8.

Kurigure, gu Ziazia Kekeapai i akehe nibambataha nagumba gupai nga ho kumbaku Eva adunga ni patiri ya du ri ‘akati zuzuhe ni ki rihe. Tifuo gure, ri ki fu he fu kumbari naadu na ri, ko ki ri he a.’​—Bambata Pai 3:6.

Niyangaraha, Mbori abiranga Adamu na Eva tifuo kodayo ba na ki vungu agude te. (Bambata Pai 4:1, 2) Si tie ziazia nga, gu zuzungua Adamu na Eva arihe angianga kodaba te, ono si angia ndikidi zuzungua.

2 Ya mo Ziazia Kekeapai nazahe ti kodaba?

▪ Karagapai: Gu bambata buku nga ga Ziazia Kekeapai nagumba gupai nga Mbori du nakusi aboro nga “kumba na de.” Ho Mbori aru ni ka bi agu ahe ko akusihe, “si ki du ni wene he gbe.” (Bambata Pai 1:27, 31) Kusa, ga Mbori toro adu kugii gu kura bake Ziazia Kekeapai sa ko fu rugute ki yaa: “Mo ningí tipa de parangaro . . . Gari nyemuse ki rengbe foro wa rago agira.” (Asanza 5:18, 19) Ya mo tiiworo agu afugo re nayugo gupai nga Ziazia Kekeapai nazahe aza ti kodaba?

Agu arengo du ti ni nayugo gupai nga kupati gene vunga agude, Mbori ambakadi agu abarapa boro du tipa kodaba ngba gu gene rengbe arogotise ngbaha kaa yugo nyemuse na ki gbia ngbarago ho i akodaba ni. Gipai re naye na bakere ngbarago fu agu arogotise du na dawedawe nyemuse dagbatiyo.

3 Ya mo Ziazia Kekeapai nambugene fu kumba na dee i naaraka wa sa ka i aroganga tiyo kuti andiko ya?

▪ Karagapai: Ziazia Kekeapai nagumba gupai ziazia nga ‘Mbori nika sapangbanga airameteka asapa.’ (AEbere 13:4) Gu fugo Giriki i amangisunge nani tipa meteka nga por·neiʹa, si nakoda agu angbatunga kodaba dunduko agu aboro amangaha angianga arogotise ya.a Sidu tie, si bangiri Mbori nigbegberepai ka kumba na dee aaraka wa sa nga aguyo angianga arogotise ya, ka si vura duadu vurũ nga i nika rogatiyo aroga kusa.

Ka kumba na dee vura kpinyemu tiyo akpi wai vurũ, Mbori naida gupai nga i rogo tiyo mbata i niru ka kodaba. Mbori du nakusi rani na gu rengba nga ga yugo nyemuse. Bangua sino Mbori nga nyemuse. Sidu tie, ko na wene ndupai beko ka nyakasa gupai nga kodaba du sa kina dagba arogotise a wa ani nika bihe rogo gu kekeapai naye fuo gere.

4 Ya mo ruhe aru boro rogo adee nidunguyo?

▪ Karagapai: Regbo adu kinaho Mbori ambugene ambu fu akumba i rogo adee susi sa. (Bambata Pai 4:19; 16:1-4; 29:18–30:24) Ono anga Mbori nagumba gupai fu aboro nga i rogo adee susi sa te. Ko afu dee fu Adamu gbua sa.

Mbori afu pagbia fu Yesu Kristo ko fura tipa dia dee gbua kina sa a wa ko asigiraha ti tonatonaha. (Yoane 8:28) Ho i asana Yesu ni nibipa rogatise, ko ayaa: “Gu ko namangi yo ho rago aenge ni ko amangi yo ni kumba na de, ki ya, ‘Bambiko si du boro nihe bani ti ni na nani, ki ka kuti diani; i ue i ki du wa boro sa.’”​—Matayo 19:4, 5.

Ga Mbori toro adu kugii boro sa dagba ga Yesu abawiriki yo ko kepai kusa ki yaa: “Akumba ka du na adiayo kperekese, ade ki du a na akumbayo kperekese.” (1 AKorindo 7:2) Ziazia Kekeapai nagumba gupai a nga gu kumba du na momu beni rogo gu dungurati nga ga aKristano nga kumbaku dee, si naida ní du “ni kumba ku de sa.”​—1 Timoteo 3:2, 12.

5 Ya mo si nigbegberepai ka mbira ngua tipa ka he du na gude?

▪ Karagapai: Yesu azinanga he fu apefuoko nga i vungu agude te. Gako abawiriki agumbanga ha a wo te. Ba ho rogo Ziazia Kekeapai nga gu i nazahe rogo kpadio ti mbira ngua tipa ka he du na gude te.

Sidu tie, arogotise na ranirii beyo ka manga siapai, singia i naida ka vunga agude watadu i aidanga ka vunga agude te. I rengbe a ka manga siapai tipa gu bange agude i aida ka vunga ra na gu regbo i aida ka vunga ra ti ni. Ka arogotise sia ka mangasunge na gu ngua abanga gude ya ono nasa dee ka ri dunga na gude ya, gure nga gu diaberã si aida kina yó mangihe. Si aidanga boro bira yó te.​—ARomo 14:4, 10-13.

6 Ya mo gbegberẽpai du nga ka ba gude?

▪ Karagapai: Unga ni ziaziaha bangiri Mbori, ho du dee ni na mobara, Mbori nabi gu gude du rukumburi yo re na nyanyakipa ru. (Atambuahe 139:16) Ti regbo aYisaraere gu boro naanifõ vuru dee ki sa gupai nga gari gude kpi rukumburi yo, ní ani tumo na kina ungani. Sidu, bangiri Mbori, ba gu gude i ata vunganga ru ya nga kina imo boro.​—Gate 20:13; 21:22, 23.

Ono na ka si du nga tunguotunguopai mangi ti regbo vunga gude nga gu naida gupai nga arogotise mangi siapai singia i nabatasa gude nai ki kpi watadu nai nabata gude ki kpi? Tipa ngbatunga apai wa gure, arogotise du si aida i mangi diaberã tipa gu unga i nika batasaha.

7 Ya mo Ziazia Kekeapai nambugene tipa mbutise?

▪ Karagapai: Ziazia Kekeapai nambugene ambu tipa mbutise. Ono wa vura duhe wo, Yesu agumba ndupai gbua sa tipa mbutise ki yaa: ‘Gu ni ka he diani tipa kura pai angianga pa bäri ya, ki di kura ri, ni namanga bari. Gu ni ka di gu de i nihe ri, ni namanga pa bäri.’​—Matayo 19:9.

Mbori ima soga mbutise zanga ndikidi nduhe ti ni. Ko nika sapangbanga agu aboro asapa nambu gayo abadiarogatise gbua zanga ndikidi nduhe ti ni, gbe aguyo namangaha wo tipa ka dia gu kura boro kia.​—Maraki 2:13-16; Marako 10:9.

8 Ya mo Mbori nabi pa kodaba kumba na kurani niwenehe?

▪ Karagapai: Ziazia Kekeapai nazahe ti meteka, gipai re nakodapa koda kumba ba na kurani. (ARomo 1:26, 27; AGaratio 5:19-21) Ziazia Kekeapai ima zahe ti gu ngbatunga mangaapai re, ono ani ima ino gupai a si agumbaha nga “Mbori akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.”​—Yoane 3:16.

Wa vura duhe nga ndikidi aKristano ambunga gene fu gu ngbatunga gbegberẽ mangaapai nga kumba naakodaba na kurani re te, i nayugo weneringise fu aboro dunduko. (Matayo 7:12) Mbori naida ani “írisi aboro dunduko.” Sidu tie, ndikidi aKristano asoganga agu akumba nakoda ba na akurayo te.​—1 Petero 2:17.

9 Ya mo pai ho gberẽ ti fura tipa kodaba, giapai tipaha na kekeda asura watadu avidio kodaba rogo terefuni watadu Internet?

▪ Karagapai: Ziazia Kekeapai afuranga afura nzunzu tipa ngbatunga agu apai re te. Ono gupai si agumbaha nga: “Ono bari, na pa meteka dũ, na kpihe, ka oni yámbu nga rimoho dagba roni wa sa ya, ni sino ga Mbori aboro; na wasiro, na mumungo fugo, na reogbo du na zee, are nga ya.” (AEfeso 5:3, 4) Ngbatunga agu apai duwa gure, si nasa aboro i du na iraira bipai tipa kodaba na kini ngarasi aboro i naakodaba na agu aboro angianga gayo abadiarogatise ya. Kuba gupai nga si undo aboro i banda tiyo ti wasiwasi kodaba, si nasa yó i mangi wasiwasi kodaba.

10 Ga Ziazia Kekeapai bipai tipa zapada barangbase nisase nga gine?

▪ Karagapai: Ziazia Kekeapai afuranga afura nzunzu tipa zapada barangbase nisase te. Ono tie, Ziazia Kekeapai nazinahe fu aKristano nga: ‘Oni ími apa kpotoroni yo du auru kpotosende no; pa bari, na meteka.’​—AKorosaio 3:5.

Zapada boro barangbani nisani nasa ní ní du na iraira bipai tipa kodaba na kini berẽ kina pa wai rengbe ní ka mbisa gani nyemupai nga ga kodaba. Ziazia Kekeapai nakido rani nga Mbori ima rengba ka fu “gu bakere tandu susi” fu gu boro namanga ngbatungapai wa gure tipa ní mbuhe.​—2 AKorindo 4:7; AFiripoio 4:13.

[Gu rukutu kekeapai du bandu kpewaraga yo]