Rago Ngba Tirani na Gaani Maabangirise

[Oni] nimoi bangirise tipa nyenye unga, nga gu Mbori, arengba nga na re zire ya, akido pa ha mbata rago nikaenga.”—TITO 1:2.

FUGÖPAI

Tipagine ini ani gupai ti ni nga ngbarago nidu ngbangbaturũ yo ho mbedimbedi Kristano sa aka ni kuti gani ruru mangapai?

Wai du gu maabangirise nga ga kura akandoro nikodikodihe kuti gu maabangirise nga ga mbedimbedi aKristano?

Tipa gaani maabangirise da ti rengo, gini ngbatunga ‘ziazia mangaapai’ na ‘kakuti manga sinombori’ si aida ani yuguhe?

1. Wai rengbe gu maabangirise Yekova nafuhe furani ka undo rani ani hipai?

YEKOVA nga gu ‘Mbori ninaafu maabangirise.’ Wo Pauro agumbaha, na ko agbia gu kurapai kutini nga, Yekova rengbe arengba ka ‘hiso rani na ngbarago na zereda rogo idapase yo gaani maabangirise moipai, mbiko tandu ziazia toro.’ (Rom. 15:13) Kangia gi gaani maabangirise re kina rirani yo, ani rengbe arengba ka hi agu apai dunduko rengbe ka kura, na ngbaduraniyo ki hi ahi be ngbarago gbiati zereda. A wa duhe tipa mbedimbedi aKristano, gu ngbatunga maabangirise re nikadu wakina “ũzada mbisimo, nga maabangirise du ni nyanyaki he nganganga” fu kura aKristano. (Eb. 6:18, 19) Gi gaani maabangirise re nga gu he si aida ani kakutini ti agu aregbo du ani rogo kpakaraapai, na si rengbe ka undo rani ka ani dunga na tikö ya.—Oni gedi AEbere 2:1; 6:11.

2. Gini amaabangirise ue du aKristano nani areme, na tipagine rago angba ti ni ti ‘kura akandoro’ naapa gu maabangirise nga ga mbedimbedi aKristano?

² Agu aKristano naraka rogo gi yangara areme re, i namaabangiriyo tipa pai sa dagba agu amaabangirise du ue. Gu yangara “umba rika aboro” nga mbedimbedi aKristano na gu maabangirise nga ka raka nyeanye kindi ngbangbaturũ yo ni abakindo na ni aboromotumo na Kristo rogo gako Kindo. (Ruka 12:32; Yugo. 5:9, 10) Gu “bakere rimbasa aboro” nga “kura akandoro” na gu maabangirise nga ka raka nyeanye kindi rogo paradizo auru kpotosende ni azogo nga ga gu Kindo nga ga Masiya. (Yugo. 7:9, 10; Yo. 10:16) Si aidanga bangiri gu kura akandoro go ti gupai nga gayo bata naru kuriipa undo yó agu ‘awirina’ Kristo nga mbedimbedi aKristano du auru kpotosende ane te. (Mt. 25:34-40) Mbedimbedi aKristano nika gbia gayo mosoro agbia, ono gu maabangirise nga ga kura akandoro nika digiso tihe adigiso. (Oni gedi AEbere 11:39, 40.) Nibambatapai, ani wisigingo gu maabangirise du fu mbedimbedi aKristano.

GU “UNGA MAABANGIRISE” NGA GA MBEDIMBEDI AKRISTANO

3, 4. Wai gu i ‘avunga mbedimbedi aKristano berewe kurogo unga maabangirise,’ na gu maabangirise re nga gine?

³ Petero ake awaraga ue fu mbedimbedi aKristano nga aguyo ko ya tiyo wee i nga gu “siasia yo.” (1 Pet. 1:1) Ko afura tipa gu futufutuapai du tipa gu bawene maabangirise du fu gu umba rimbasa akandoro. Petero akepai rogo gako bambata waraga ki yaa: “I táasi rimo Mbori, Ba gaani Gbia Yesu Kristo, wa du ko navungu rani berewe ni gako bakere inapai ku rogo ga unga maabangirise mbiko gu zingabekpio nga ga Yesu Kristo, ku rogo gu ũkumbo azirã nga ya, agberã nga ya, agbandaka nga a ya, du ni igiigi he fu roni ngbangbaturũ yo. Si fu agu roni i nabanda roni ni gu tandu nga ga Mbori, mbiko idapase, tipa gu bata i amangi he ka kusa ha rogo yangara rame. Rogo ho oni nangi angi na bakere ngbarago ti roni.”—1 Pet. 1:3-6.

⁴ Gu umba namba nga ga agu aKristano Yekova nasia yó tipa i zogorago na Kristo ngbangbaturũ yo, i ‘navunga yó’ berewe ni agu awiri Mbori du nimbedimbedi yó nitoro. I nambeda yó nitoro tipa i da ni abakindo na ni aboromotumo na Kristo. (Yugo. 20:6) Petero agumba gupai nga pa vungayo yó berewe nazakagene fuyo tipa i du na “unga maabangirise” nga gu ko aya tipaha wee “gu ũkumbo azirã nga ya, agberã nga ya, agbandaka nga a ya” du niigiigihe tipa yó “ngbangbaturũ yo.” Zanga kapa, si nga ndu gupai nasa mbedimbedi aKristano i du na ngbarago tipa gi gayo unga maabangirise re! Ono tie, pada gi gayo maabangirise re ti rengo naru kuriipa du yó niruruyo.

5, 6. Tipagine si aida mbedimbedi aKristano fu tiyo ti ni nyanyaki tipa pa yamba yó da ti rengo?

⁵ Rogo ga Petero ue waraga, ko azungodi mbedimbedi aKristano tipa i ‘fu tiyo nyanyaki pa yamba yó da ti rengo naapa siayo a.’ (2 Pet. 1:10) Si aida i fu tiyo nyanyaki tipa ka sonosa agu asino aKristano nga idapase, kakuti sinombori, nyemu awirina gbiati nyemuse. Ko ayaa: “Ka agi apai re du ni gaoni ki moi pai, si namanga gu pai fu roni nga oni adu nga ni aboro nyomoro, na ni aboro zanga zu” te.—Oni gedi 2 Petero 1:5-8.

⁶ Rogo ga Yesu waraga ko akehe fu agu abaakumba i ambediyo nitoro rogo gu dungurati naadu Firaderufia yo Asia Minor yo rogo bambata sa kama agarã, ko yaa: “Bambiko wa mo aka kuti gu pai nga ga gi hipai, mi abánda ro be gu rago asada, nga gu nikaye ku auru kpotosende dunduko, ka asada agu yo naraka auru gi kpotosende re. Mi naye ni ipo; mo ká kuti gu pai du be ro, ka i adía nga ga kpakpari bakindo ya.” (Yugo. 3:10, 11) Ka mbedimbedi Kristano adunga niruru ní ya, ní dinga gu “kpakpari taarimo, nga gu apaya nga ya” i nakido he tipa ka fuhe fu gu siasia yó nika nye niruru yó dati kpio te.—1 Pet. 5:4; Yugo. 2:10.

PA RIMO YÓ KUROGO KINDO

7. Gini bawene maabangirise Yuda afura tipaha rogo gako waraga yo?

⁷ Bara rogo gu garã nangia 65 F.B.K., wirina Yesu nangia Yuda ake waraga fu akurako nangia mbedimbedi aKristano na ki ya i nga “agu yo i ayambu yo.” (Yuda 1; oni ringbisinga ha na AEbere 3:1.) Ko ake gi waraga re fuyo tipa gu bawene maabangirise nga ga bata du fu agu aKristano “dunduko” i nayambu yó kurogo ga Mbori Kindo ngbangbaturũ yo. (Yuda 3) Wa si avura du nga ko aima du na dungu apai ngbako si aida ko gumbaha, ho ko adigiso gi gako guru waraga re ni, ko afura tipa gu bawene maabangirise du fu mbedimbedi aKristano ki yaa: “Awere fu gu ko rengbe na banda roni be tigo, na ka maa roni barangba gako taarimo ni zanga sirõ rogo gu ngbarago susi, fu bangisa Mbori Batasirani, rogo Yesu Kristo yo gaani Gbia, taarimo dú fu ko, na ome, na kindo na tandu, mbata rago nikaenga, awere, a nye anye kindi.”—Yuda 24, 25.

8. Nibi Yuda 24, gine nayugo nani nga ngbarago nidu ngbangbaturũ yo ho mbedimbedi Kristano aka ni kuti gani ruru mangapai?

⁸ Nirengo, ruru mbedimbedi aKristano naida aida Mbori bandayo be agu apai rengbe ka sa yó i koto na ki sa gupai nga i gbarasi yó. I na gu maabangirise nga Yesu Kristo nika zingisayo bekpio na ki sayo i du nirengberengbeyo barabangiri Mbori na bakere ngbarago. Ho mbedimbedi Kristano sa akpi ni niruru ní, ní na gu maabangirise nga i nika ‘zingisa ní na gu borose nga ga toro’ “zanga zirã . . . , na taarimo.” (1 Kor. 15:42-44) Wa duhe nga bakere ngbarago nidu “ngbangbaturũ yo ho boro ingapai sa asa gani berã” ni, oni berẽnga pa gu ngbarago rengbe ka du ngbangbaturũ yo ka mbedimbedi Kristano nyasi gani raka auru kpotosende ane niruruni! (Ruka 15:7) Yekova na gu gako ruru aboro nga atoro nangi wa sa na gu mbembedi Kristano nagbia gani mosoro na “bakere ngbarago.”—Oni Gedi 1 Yoane 3:2.

9. Wai i nika fu rimo kurogo Kindo “wenengai gbe” fu ruru mbedimbedi aKristano, na wai duhe na maapai kurii gu maabangirise du aguyo nani du kindi auru kpotosende?

⁹ Rogo kina gu bangisa gene re, Petero akepai fu mbedimbedi aKristano nga ka i futiyo nyanyaki tipa ka du niruruyo tipa gayo maabangirise da ti rengo, ‘kinawo a ka i fu rima wenengaĩ gbe fuyo kurogo gu nyenye ngbi nga ga gayo Gbia, nga Batasirani Yesu Kristo.’ (2 Pet. 1:10, 11) Pa rimo yó kurogo gu gayo mosoro nga ga ngbangbaturũ re nikadu “wenengai gbe,” na agu asinoyo nga ga aKristano kidu gbaiga. Paduhe “wenengai gbe” nayugopa gu bakere amaku nikadu fu aguyo nika manga ome nyanyaki ka du niruruyo rogo agu abaangira nga ga unga. I nikadu na bakere ngbarago ho i nika berã ni kuriipa wai i adu niruruyo rogo gayo raka yo. Zanga kapa, gi maabangirise re nika nyakasa gu mbedimbedi aKristano du auru kpotosende tipa i ‘mbakadi gayo aberã’ tipa gu sunge i nikaa mangaha.—1 Pet. 1:13.

MBURU GU MAABANGIRISE NGA GA KURA AKANDORO

10, 11. (a) Gini maabangirise du fu kura akandoro? (b) Wai du pada gu maabangirise ti rengo nga ga raka auru kpotosende ane nikodikodihe kuti Kristo gbiati pa “yugo awiri Mbori”?

¹⁰ Pauro akepai tipa gu bawene maabangirise du mbedimbedi aKristano nani nga kadu ni “awiri Mbori,” na ni “adikumbo” na Kristo. Fuani, ko afura tipa gu bawene maabangirise Yekova nafuhe fu bakere namba nga ga kura akandoro adunga bagedara ti ni ya, ki yaa: “Ũzegino nangera kakaka nisungudi yugo awiri Mbori [mbedimbedi aKristano]. Bambiko ũzegino adu tii kungba pai, si akpi nga nyemu he te, kina mbiko gu ko nafu he ku tii he, nimoi bangirise ya i batasi ũzegino tigaha a be du ni ga zirã kanga sa kura gu taarimo nga ga awiri Mbori.”—Rom. 8:14-21.

¹¹ Yekova afu maabangirise fu aboro ti gu regbo ko akidohe tipa ka batasa aboro be “bakere daragona” nga Satana Bakitingbanga vurube gu ‘tita dee’ i akido pako. (Yugo. 12:9; Bam. P. 3:15) Gu ‘tita dee’ re angia Yesu Kristo. (Gara. 3:16) Pakpio Yesu na pa zingako bekpio nga gu nyanyaki mburu maabangirise nakusi aboro tii gu sunge kanga nga ga ingapai na kpio. Pa da gi maabangirise re ti rengo nikodikodihe kuti pa “yugo awiri Mbori” nga mbedimbedi Kristano. Gu mbedimbedi aKristano du niyuguyugu yó nga ue papara gu ‘tita dee’ re. Gu gene i nikadu ngbaha niyuguyugu yó nga gu regbo i nika kodatiyo na Kristo tipa ka gbarasa gi ga Satana zegino re. (Yugo. 2:26, 27) Gipai re nika ye na bata fu kura akandoro nga agura nika kura rogo bakere gberãngbi.—Yugo. 7:9, 10, 14.

12. Pa du mbedimbedi aKristano niyuguyugu yó nikadu na gini undo fu aboro?

¹² Nairiwo gu undo ga Mbori “mangimangi ahe” nga aboro nika gbiaha vuru gu Zogarago Tipa Agarã Kutu re! Ti gu regbo re, agu “awiri Mbori” re nikadu ‘niyuguyugu yó’ ho i nika mangasunge ni ni aboromotumo na Kristo tipa ka sa aboro i gbia undo ti gako motumo tumorii. Nidu aboro ni agu azogo nga ga Kindo yó, i nika hu be sangbana agu apai nga ga ingapai na kpio. Aboro giasangba nika tona kaa hu tooni tooni be ‘sunge kanga na zirã.’ Ka i nye niruruyo fu Yekova vuru gu kutu agarã re dunduko na ti regbo gu yangara asada nika ye ti digido agu agarã kutu re, rimoyo nikadu nikekehe nyeanye kindi rogo “kitabu unga” yo. I nika rimo kurogo gu bakere “taarimo nga ga awiri Mbori.” (Yugo. 20:7, 8, 11, 12) Nangba gu maabangirise re!

ANI MBU GAANI MAABANGIRISE SI DU NIUNGAHA

13. Gaani mburu maabangirise nga gine na gini regbo Kristo nikadu ti ni niyuguyugu ko?

¹³ Gi ga Petero awaraga du ue re na dungu apai rogoho tipa ka undo mbedimbedi aKristano gbiati kura akandoro i banda gayo maabangirise niungaha. Ko agumba gupai fuyo nga, anga mburu gayo maabangirise rii gayo mangapai te, ono si rii ga Yekova weneringise arẽnga aboro tipaha ya. Ko ayaa: ‘Oni du na rugatise, ki nimoi bangironi nyanyaki sa gu undahe i ka ye nani furoni rago kusa yó Yesu Kristo gbayaga.’ (1 Pet. 1:13) Kristo nikadu niyuguyugu ko ti gu regbo ko nika ye ka fu mosoro fu ruru apefuoko na tipa ka sapangbanga kurii amangi gbegberẽpai.—Oni gedi 2 ATesaroniko 1:6-10.

14, 15. (a) Tipa ka mbu gaani maabangirise si du niungaha, ginipai si aida ani gbeberã rani kutini? (b) Gini rugute Petero afuhe?

¹⁴ Tipa gaani maabangirise du niungaha, si naida ani moi berãrani gbiati gaani raka kuti “gu uru nga ga Mbori” naye mbatayo. Gu uru re nika gbarasa “angbangbaturũ” nga gu narukuba gu zogarago nga ga aboro, na “kpotosende” nga gu narukuba gbegberẽ aboro na “agu ahe” du rogoho. Petero ayaa: “Oni ka du ni gini ngbatunga aboro . . . ? Oni ki ngere tipa ye gu uru nga ga Mbori ki niipisi he, nga gu angbangbaturũ agbandaka mbiko ho wa si nagbi be we, na agu ahe nga ga ngbangbaturũ si aźaraga be faarago.”—2 Pet. 3:10-12.

¹⁵ Gu “angbangbaturu” na “kpotosende” du awere, i nika diaha kusayo na ki ye na “vovo ngbangbaturũ [ga Kristo zogarago nga ga Kindo] na kpotosende [vovo rika nga ga aboro]” kubaha. (2 Pet. 3:13) Fuani, Petero afu arugute nibi gupai si aida ani mangihe wa ani ‘angera tipa ye gu uru’ re watadu ka banda gaani maabangirise si du niungaha tipa gu kidohe nga ga vovo zegino re ki yaa: “Were abadiangba, wa oni nangera tipa agi apai re, oni nifú tironi nyanyaki ya i bi roni zezeredi, ka wiri biriko he adú nga ti roni barangba ko na sirõ a ya.”—2 Pet. 3:14.

ANI RAKI RINGBISIHE KINA KUTI GAANI MAABANGIRISE

16, 17. (a) Gini “manga ziazia apai” gbiati ‘kakuti manga sinombori’ si aida ani yuguhe? (b) Wai gaani maabangirise nika da ti rengo?

¹⁶ Anga gupai gbua si aidaha nga ani mbu gaani maabangirise si du niungaha te, ono si naida ani raki ringbisihe kutini. Si naida ani asadi ka ino gini ngbatunga boro nga ani rogo toro yo. “Manga ziazia apai” nakoda padu ‘gaani mangapai niwenehe kubangiri aGendiria.’ (2 Pet. 3:11; 1 Pet. 2:12) Si naida ani du a na nyemuse dagbarani. Gure nakoda manga gupai rengbe ani ka mangaha tipa ka bandapa gu kodatise du dagbarani rogo zegino dunduko gbiati gu du rogo gaani adungurati. (Yo. 13:35) ‘Kakuti manga sinombori’ nakoda gu mangapai nabipa gaani wene pagume na Yekova. Gure nakoda ba ngbanya gaani kparakpee, geda Ziazia Kekeapai naʹauru dũ, wisigopai dudunguro, gu irisombori nga ga aborokporo, gbiati tungusa gu “wene pangbanga nga ga ngbi” kakaka.—Mt. 24:14.

¹⁷ Ani dunduko nibasasa naida ka du ni agu aboro Yekova naidi na gayo pai na nika bata ti gu regbo i nika gbarasa gi gbegberẽ zegino re. Gu regbo re du gaani maabangirise nika da ti rengo, gu ‘maabangirise du tipa nyenye unga, nga gu gu Mbori arengbanga ka re ziree ya, akido paha mbata rago nika enga.’—Tito 1:2

[Gu sura du ti kpewaraga 22]

I navunga mbedimbedi aKristano ‘berewe kurogo unga maabangirise’

[Gu sura du ti kpewaraga 24]

Oni mbu gu maabangirise nga ga gaoni aborokporo si du niungaha