Oni Irisi Gu Mbori Nga Ga Ranirii Ko

“Gi nga du na nyemu Mbori re, nga ka ani kuti gako rugute. Gako rugute asusa nga omerani te.”—1 YO. 5:3.

ONI RENGBE KA KARAGAPAI SA AGI ASANAHE RE?

Wai gu Satana aʹasada ka sa ga Mbori arugute si du bangirani wa tindiro?

Tipagine si aida ani du ti ni na rubangirise nibipa agu aboro ani akoda tirani naayo?

Gini he nika undo rani ani nye niruru rani fu gu Mbori nga Mbori ranirii?

1. Wai gu Yekova amangasunge na gako ranirii, na gini ranirii ko afuhe fu Adamu na Eva?

KINA Yekova sa du na gu ranirii beko adunga digidoho ti ni ya. Ono wa vura duhe wo, ko amanganga sunge nani ngba gbegberẽ gene te, ko amangasunge a na gako ranirii kaa gumba agu apai dunduko fu gako amoyambu ko aida i naamangaha te. Kuba gure, ko fu ranirii fuyo tipa i mangi gayo adiaberã na ki mbiisi gu gayo nyemuapai dunduko du niwenehe. Nikpiapai, Mbori afu zinahe gbua sa fu aDamu na Eva. Ko agumba gupai fuyo nga ka i ringa zuzu “gu ngua nga ngua ina wenepai na gbegberẽpai” ya. (Bam. P. 2:17) Nairiwo gu bakere ranirii i adu nani tipa ka manga gupai Bakusi yó aakpinyemuhe re!

2. Tipagine gu bambata avungurani azanga gu ranirii ti ni Mbori afuhe fuyo?

² Tipagine Mbori afu bakere ranirii ti ni fu gu bambata avungurani re? Ko akusi yó rogo kpiako yo na ki fu sangbakpotoseyo fuyo. Bambiko wa ko ambakadi yó ngba gi gene re, ko aida gupai nga i nimangi gupai ko akpinyemuhe mbiko gayo nyemuse koyo du ko ni. (Bam. P. 1:27; Rom. 2:15) Si nafu kina gberarago ka bi gupai nga Adamu na Eva ayugongo tambuahe fu gayo Bafu-Unga tipa gu ranirii ko afuhe fuyo te. Kuba gure, i asia gu ranirii Satana afuhe fuyo, gu nga ka sia gupai nangba tiyo na gu naangbanga ya. Ono kuba gupai tie nga i gbia ranirii, gu bambata avungurani re abagi tiyo na awiriyo dunduko ni akanga fu ingapai, nga gu naye na kere sangbanapai.—Rom. 5:12.

3, 4. Wai gu Satana aʹasada ka nanga rani nibipa agu apai Yekova nasigiraha?

³ Ka si du nga Satana arengbe arengba ka nanga rengberengbe aboro ue, ka ani agumba bange agu amaraika tie ko anangi yó ti ga Mbori bakere pagbia ya, gure nga ko rengbe arengba ka nanga rani a. Kina gu bangisa pai ko amangihe ka nanga yó, kinaha ko amangaha areme. Ko naʹasada ka nanga rani ani bi gupai nga agu apai Mbori nasigiraha furani, si naká aká na ani ti manga agu apai rengbe ka ye na ngbarago furani. (1 Yo. 5:3) Badungu aboro rogo zegino naberã wo, na ka ani adia regbo naayo dedede, ani ima rengba ka tona kaa berã wakina yó. Wirina sa nidee du garãri awere nga 24 nga guri naima manga wasiwasi kodaba agumba gupai nga: “Gbegberẽ kpamiatise aima du na bakere maapai kurire, gbe bambiko gupai nga mi aaidanga kadu na gu kura bipai kia ti akuare te.” Isoke, ngbatunga berã wa gure aima ye kurironi yo.

⁴ Si nafu kina gberarago ka bi gupai nga ti kura aregbo, gbegberẽ kpamiatise rengbe ka kura kina boro rogo dungurati. Wirina sa niparanga agumba gupai nga: “Mi ima ino pa kura paranga awirina rogo dungurati nga aguyo nazio gu bakure nga ga rogatise na aboro ngbi. Mi aye ka bi gupai, ho mi adia bakere regbo ni naayo, mi nada wakina yó. Mi atona kaa zera rogo agu apai yo nga ga toro. Mi aagbianga undo berewe ti gu riahe nga ga toro ba adunguratise yo te, na mi aandunga a berewe tipa tungusapai te. Gure nga gu regbo mi abi gupai nga si naida mi mbu koda tire naayo, na kina boro gupai re mi amangihe!” Ya mo oni ini pa gu maapai rengbe agu aboro oni akpamia tironi naayo kadu nani kurironi? Ani makianga gu kpiapai du rogo Ziazia Kekeapai nga gu rengbe ka undo rani areme.—Rom. 15:4.

KO ASA KPOTOYO YO

5, 6. Wai gu Abisaroma anangi kura aboro, na ya mo gi gako taburo re adu na diabese?

⁵ Ziazia Kekeapai na badungu akpiapai rogoho nga ga agu aboro nadu na gbegberẽ maapai kurii akurayo. Ngbatunga gu boro re nangia Abisaroma wiri Bakindo Davide. Abisaroma aima ngba ti kpotoko kisusi. Ono tie, fuo bete regbo kusa, wakina Satana, ko ambu ngbaduse si fu riko, ko atona kaa kpinyemu ga bako mbatabakindo, nga gu naadunga tipa ko ya.a Tipa ka dia mbatabakindo be bako, Abisaroma asa aboro i bere gupai nga ko aida ka undo yó ono bakindo aidanga ka undo yó te. Teketeke wakina gupai Bakitingbanga amangihe ati Edene yo, Abisaroma asa aboro i bere gupai nga ko aabaka bangiriko abaka tipa yó, ono kini gumba kere ziree ti kina gu bangisa regbo re tipa bako.—2 Sam. 15:1-5.

⁶ Ya mo Abisaroma adu na diabese rogo gi gako taburo re? Ko aima du na diabese ku gene bambiko Ziazia Kekeapai nagumba gupai nga: “Abisaroma asa kpoto aboro aYisaraere yo.” (2 Sam. 15:6) Ono niyangaraha tie, ko adunga na diabese te, si aye na kerepai kutiko. Gi gako sunge ruko re aye na kpioko gbiati gu kutu aboro naangbe naako.—2 Sam. 18:7, 14-17.

7. Gini apai rengbe ani ka wirikaha ti gu pangbanga du tipa Abisaroma? (Oni bi gu sura du ti kpewaraga 14.)

⁷ Tipagine Abisaroma anangi agu aYisaraere re ti ni taata wa gure? Si rengbe kadu nga i adu na nyemu agu ahe ko aakido paha fuyo. Watadu pa ngbanya ko nanangi yó. Singia ginigu dagbaha yo nanangi yó, ani ainongo ho te, ono gupai sa ani nainihe nga: I aadunga niruru yó fu Yekova na gu bakindo ko asiako te. Areme, Satana namangasunge kindi na ngbatunga agu aboro du wa “Abisaroma” tipa ka sa kpoto ga Yekova amoyambu yo. Agu aboro re nagumba gupai nga, agu apai Yekova nasigiraha tipa aboro naká aká naayo ti mangayo agu apai ngba tiyo. I rengbe ka gumba gupai nga, ‘oni ngananga agu aboro dunduko airisongo Yekova ya. I namanga agu apai dunduko ngba tiyo!’ Ho oni agia agi apai re, ya mo oni naino gupai nga ziree du na ki nye niruru roni fu Mbori? Ya mo oni aino gupai nga kina ga Yekova “ziazia rugute” sa, nga ga Kristo rugute rengbe ka ye na ndikidi ranirii furoni? (Yak. 1:25) Ka si du wo, oni bi gu rugute re na nyanyakipaha, ka oni ya mangingo sunge na gu ranirii du beroni nga ga aKristano ngba gbegberẽ gene ya.—Oni gedi 1 Petero 2:16.

8. Gini ndikidi apangbanga nayugo gupai nga boro arengbanga ka gbia ngbarago ti kua ní ga Yekova arugute te?

⁸ Paranga aboro gbe nga agu aboro Satana arẽ yó. Wirina nikumba du garãko awere gii 30 yo afura tipa agu aregbo ko aasona ki yaa: “Mi anaabi gu ga Yekova arugute du tipa sino mangaapai wakina gu he naaká aká na mi ti manga mi agu apai nangba tire, mi anaabingo ho nibandahe te.” Nisangbana gipai re, ko arimisi tiko kurogo wasiwasi kodaba. Ono gipai re ayengo na ngbarago fuko te. Sangbako nga: “Mi adu na gbegberẽ sangba kpotoseyo na ki bira tire tipa dungu agarã.” Gu kura wirina nidee nafura a tipa agu aregbo ri asona ti ni agumba gupai nga: “Tifuo boro mangi wasiwasi kodaba, ní nadu na bakere gberarago na ki bi tiní nga sunge tiní berewe te. Wa vura duhe nga agarã ima susa awere nga 19, gbegberẽ aberã naye kurire yo kindi tipa gupai re.” Gu kura wirina nidee agumba gupai nga: “Pa ino mi gupai nga gimi mangapai aima ba rungo ti agu aboro mi akpinyemuyo gbe aima fuda re nikerehe berãre yo, rogo toro yo, na kpotore yo. Ho boro azanga gu wene pagume ni du dagba ní na Yekova, si ima gberã nikerehe.” Satana aidanga boro berẽkurii gu gbegberẽ sangbanapai rengbe ingapai ka ye nani te.

9. (a) Gini asanahe rengbe ka undo rani ani ini gu bipai du ani nani tipa Yekova na gako andiko gbiati arugute? (b) Tipagine duhe ti ni ninyanyakipa pai nga ani ini Mbori wenengai?

⁹ Si nafu kina gberarago ka bi gupai nga dungu paranga aboro kodihe a na sosono aboro wiriki gupai ngba iigirã gene nga kua ga Yekova arugute naye na gbegberẽ sangbanapai. (Gara. 6:7, 8) Sidu, ono sananga tironi nga: ‘Ya mo mi rugu tire naapa agu abirĩ Satana amangasunge nani tipa ka nanga re? Ya mo mi nabi Yekova ni mbembedi Bakureami, nga gu ko nagumba kina agu apai fere ti aregbo dunduko nga rengo na naida kina gupai du niwenehe tipa re? Ya mo mi idi kuti gupai nzunzu nga ko arengbanga ka ká na gu he bere du niwenehe na nika sa gupai nga mi du na ngbarago te?’ (Oni gedi Yesaya 48:17, 18.) Tipa oni karagapai kuti agi asanahe re nga ii na ngbaduroni yo dunduko, si naida oni ini Yekova aino wenengai. Si naida oni ini gupai nga agu andiko gbiati arugute du rogo Ziazia Kekeapai nayugo gupai nga Yekova ima kpinyemu roni, na ko aidanga aida ka dia gaoni ranirii beroni te.—Tam. 25:14.

ONI KPARI TIPA TATAMANA GBIATI GIASANGBA

10. Tipagine si aida ani mangi ome ti ni tipa ka wirika paranga Bakindo Soromo?

¹⁰ Ho Soromo aduni kindi niparanga, ko akpari fu Yekova na umbasitise ki yaa: “Wa du mi ni toni gude mi aina nga waĩ ka mi kuru sa pai ki niyega a te.” Tifuo gure, ko akpari tipa tatamana gbiati giasangba. (1 Aba. 3:7-9, 12) Yekova aima karagapai kuti gu kparakpee Soromo amangihe kina boro ngbaduko yo re, na kina gu bangisa pai re Yekova nika mangaha furoni singia oni nga paranga aboro watadu sosono aboro. Rengo ngaha nga Yekova afunga tatamana furoni ngba iiriwo gene te. Ono ko nika sa gupai nga oni du nyanyaki ka oni awisigo Fugoko, ka oni akpara tipa ziazia toro, na ka oni amangapai kuti agu arugute oni agbiaha vurube gu dungurati nga ga aKristano. (Yak. 1:5) Nirengo, ngba agi agene re, Yekova nasa gu gako amoyambu du ni paranga yó i du na tatamana susi agu aboro nabasa gako arugute, zavura agu “airatatamana na airainahe” nga ga zegino yó.—Rk. 10:21; oni gedi Atambuahe 119:98-100.

11-13. (a) Gini nyanyakipa apai rengbe ani ka wirikaha rogo Atambuahe 26:4, Asanza 13:20, na 1 Akorindo 15:33? (b) Wai gu rengbe oni ka mangapai kuti agu arugute du rogo agu averesi re?

¹¹ Tipa ka ino pa nyaka wisigo Ziazia Kekeapai na berãkurii agu apai ani agedaha tipa wa ka ani ruho ka ino Yekova wenengai, ani wisigingo agi averesi re. Agi averesi re nibasasa dunduko na bangua rugute rogoho nibipa agu aboro ani akpamia tirani naayo: “Mi asunga nga na aboro sawia te, mi arima nga fuo airabiriki a te.” (Tam. 26:4) “Gu boro nata na boro tatamana ni adú ni iratatamana a, ono gu badiata nga ga mumungo aboro, ima azía yo wa sa.” (Snz. 13:20) “Gbegberẽ kpamiatise nagbarasa wene sino.”—1 Kor. 15:33.

¹² Gini nyanyakipa apai rengbe ani ka wirikaha rogo agu averesi re? (1) Yekova naida gupai nga ani sia agu aboro asi ani akpamia tirani naayo. Ko naida ka banda rani rogo toro yo na ki banda gaani wene sino mangaapai. (2) Agu aboro ani akoda tirani naayo rengbe kadu na maapai kurirani tipa wenepai watadu gbegberẽpai. Si tigaha nga gupai kaa akpanga rogo raka yo ya. Gu gene i nake agu averesi ngbaha du kuari re nayugo gupai nga Yekova naida aida si zi ngbadurani yo. Ngba gini gene? Oni makia gupai nga, dagba agu averesi du kuari re dunduko, gu ho dagbaha i naruhe ni ndiko ki gumba gupai nga “ka oni mangingo were ya” te. Ka pehe ngba kura gene, Yekova nagumba gupai furani nga: ‘Gu rengopai du ti ni nga gere. Ginipai oni nika mangaha? Ginipai du ngbaduroni yo?’

¹³ Niyangaraha, bambiko gupai nga i ake agi averesi re nikina boro gu rengopai du ti ni, afugo agu averesi re nikina boro rengo areme a wa si adu ho i akehe ni, na agu averesi re naundo aboro rogo dungu apai yo. Nikpiapai, oni sananga tironi na ngbatunga agu asanahe du wa: Wai gu rengbe mi ka ne koda tire na “airabiriki”? Gini apai rengbe ka koda re na ngbatunga agu aboro re? (Snz. 3:32; 6:12) Ada nga agu ‘aboro tatamana’ Yekova aida mi naakoda tire naayo? Ada nga gu “mumungo aboro” ko aida mi ne yó? (Tam. 111:10; 112:1; Snz. 1:7) Gini ‘wene asino’ mi nika gberesapaha ka mi akoda tire na gbegberẽ aboro? Ya mo kina rogo zegino sa rengbe mi ka gbia gbegberẽ kpamiatise ni? (2 Pet. 2:1-3) Wai gu rengbe oni ka karagapai kuti agi asanahe re?

14. Wai gu rengbe oni ka mbakada gaoni Irisombori Nga ga Aborokporo wenengai?

¹⁴ Rogo kina gu bangisa gene oni naberẽ ngbaha kurii agu averesi du kuari re, oni rengbe a ka geda kura averesi na ki berẽkuriihe kinawo tipa ka ino ga Yekova bipai tipa agu apai du na nyanyakipaha furoni gbiati gaoni aborokporo.b Avunguagude, oni berẽpa sakapai tipa ngbatunga agi apai re ti regbo gaoni Irisombori Nga ga Aborokporo. Wa oni kaa mangaha wo, oni banda gupai kurironi yo nga gaoni sásá nga ka undo gaoni aborokporo nibasasa dunduko tipa i rugu tiyo naapa ga Mbori dudunguro nyemuse tipa rani a wa duhe niyuguyuguhe rogo gako andiko yo gbiati arugute. (Tam. 119:72) Nirengo, ngbatunga agu awisigopai re, si naida si kodi aborokporo wa sa na ki mbedisi yó dunduko koyo du Yekova ni.

15. Wai gu rengbe boro ka inoho singia ní nada niboro tatamana na niboro giasangba?

¹⁵ Wai gu rengbe boro ka inoho singia ní nada niboro tatamana na niboro giasangba? Gene sa rengbe boro ka mangaha ngbaha nga ka ringbisa gani berã na ga gu ruru aboro naraki bakuru kusayo, wa Bakindo Davide, nga gu ko nakepai ki yaa: ‘Ako gi Mbori, rago ngba ti re ka amanga gu pai ngba angba ti ro; ii, ga rugute du kpotore yo.’ (Tam. 40:8) Teketeke a, bake Atambuahe 119 agumba gupai nga: ‘Ako, nyemu ga rugute namanga re amanga ni rengo! Si nga gu mi nabaka bangire tipa ha na uru pitipiti.’ (Tam. 119:97) Si naida boro mangi nyanyaki asadatise amanga tipa ka sonosa ngbatunga gi nyemuse re. Ngbatunga gi nyemuse re nasona ho boro awisigo Ziazia Kekeapai ni wenengai, kini kpari, na kini berẽkurii gupai ní agedaha. Si nasona a ho boro atona kaa kparia gupai ni rogo gani raka nga pekafuo ga Yekova arugute naye na dungu amaku.—Tam. 34:8.

ONI SOVURA TIPA GU GAONI RANIRII NGA GA AKRISTANO!

16. Ginipai si aida ani rugutirani nani ka ani aida ka diabe gu vura ani asoho tipa ndikidi ranirii?

¹⁶ Rogo gu pangbanga nga aboro dunduko, wo aringara naaso kere avura tipa ka gbia gayo ranirii. Ka si du nga aringara nasovura tipa gaha ranirii, angbatika ani tie, si naida oni sovura rogo toro yo nyanyaki tipa ka banda gaoni ranirii nga ga aKristano. Si naida oni tingidi gupai nga anga gaoni akare sa nga kina Satana, gi zegino re, na gaha gbegberẽ sino mangaapai te. Si naida aida a oni sovura kuti gaoni zangarengba, kodihe kuti gu kpotoroni yo nangihe kisusi. (Yere. 17:9; Ef. 2:3) Ono wa vura duhe wo, Yekova rengbe ka undo roni oni du na diabese rogo gu vura re. Kurigure, agu aregbo dunduko oni adu na diabese singia nikikiihe watadu niumbaha, si naye na wene sangbana apai ue. Bambatapai nga, oni nasa ngbarago ti Yekova. (Snz. 27:11) Uepai nga, agu aregbo dunduko oni aruga tironi na gupai nga irisa ‘gu ziazia rugute nga ga ranirii’ niwenehe tipa roni, si nasa gupai nga oni diberã ka nye ngba gu gene nandu sa nyenye unga. Fuo bete regbo kumbatayo, oni nika gbia gu bakere ranirii napido gu ga Yekova aboro nika nye niruruyo fuko.—Yak. 1:25; Mt. 7:13, 14.

17. Tipagine si aidanga gaani zangarengba zeresi rani ti ni ya, na gini undo Yekova afuhe?

¹⁷ Ti kura aregbo, ani namanga agu apai amanga angbanga ya. (Batu. 7:20) Ho pai amanga roni ni wa gure, si aidanga oni bi tironi nga sunge tironi berewe te te. Ka oni mangi ingapai, oni mangi gupai si aida oni mangihe tipa ka mbakadaha, ka si vura du vurũ nga si naida oni gbata undu agbata be abaakumba. Yakoba ayaa: “Gu kpe nga ga idapase abátasa gu ni nakaza, Gbia atúmba ni ku ari; si ngia ni amangi ingaapai, i avù ni avu ti ni.” (Yak. 5:15) Ka bangironi gonga ti gupai nga Yekova nga boro inapai ya, na ko du naye na oni kurogo dungurati bambiko ko aima bi wenepai rogo roni yo. (Oni gedi Atambuahe 103:8, 9.) Sidu, ka oni amangasunge fu Yekova na kpotoroni yo dunduko, ko nikaa undo roni aundo a kindi.—1 Peka 28:9.

18. Wai gu rengbe ani ka mangapai kuti gu ga Yesu kpee du rogo Yoane 17:15?

¹⁸ Ho Yesu akpara ni rogo gako yangara yuru auru kpotosende na gu gako ruru amokedi nadu 11, ko agumba gi wene afugo ka bangiri boro agonga ti ni re ya fu Mbori tipa yó: “Mo ka aka kuti yo ti gbegberẽ ko.” (Yo. 17:15) Anga Yesu abaka bangiriko sa tipa kina gako amokedi te, ono tipa apefuoko dunduko. Sidu, ani rengbe arengba kadu naa kido nga Yekova nika karagapai akaraga kuti ga Yesu kpee ningera ko kurirani rogo gi kere aregbo ani araka rogoho re. “Ko [Yekova] nga vurakube fu agu yo nata rogo rurupai . . . ki nibanda gu pai nga ga gako siasia aboro.” (Snz. 2:7, 8) Nirengo, pa ka boro kuti gani ruru mangaapai nitaatapai te, ono si nga gu yangara gene nandu sa nyenye unga gbiati ndikidi ranirii. (Rom. 8:21) Ka boro nangingo roni tipa ka dia roni ngba gu gene re wagusa ya!

[Footnotes]

[Pictures on page 19]

Wai gu rengbe ani ka ino agu aboro areme duwa “Abisaroma” na ki banda tirani tiyo?