Ya Mo Boro Rengbe ka pe Rengo Rogo gi Zegino hi be Biriki Re?

‘Ani nakpinyemu ka sunga na rurupai rogo apai dunduko.’—AEBERE 13:18.

WA VURA duhe nga gu nyemu gbegberẽ apai du tirani, gu zegino ani araka rogoho, na Bakitingbanga rengbe arengba ka ye na bakere soapai kurirani, ani rengbe arengba ka ká gu ome du agi apai re nani kurirani. Rogo gini gene? Nimbeda ani koyo du Mbori ni na kini mangi agu arugute du rogo Fugoko nga Ziazia Kekeapai nga gu niima undo aboro tipa akama agarã. Ani bingo akpiapai ue.

ARUGUTE NGA GA ZIAZIA KEKEAPAI: “Ka oni ríngbisi nga tironi na gi zegino re ya.”—ARomo 12:2.

Gu pangbanga namangi amanga: Guilherme nga gu kumba niima duna diabese rogo sunge bagaahe Brazil yo. Ko ape gupai nga, taatapai ngaha nga boro nipe kina rengo te. Ko ayaa: “Si taata fu gu boro nabagaahe nitona kaa pe ziree tooni tooni rogo gani sunge bagaahe yo, isoke mbiko ní naida gani sirika dati agu asásá ní aidaha watadu ka batasaha be gu sunge abaangira namanga rogo zegino tipa bagaahe. Badungu aboro abingo ho nigbegberepai tipa ka fu marã mobirimo watadu ka diaha te. Ho boro atona sunge bagaahe ni nawiri tooni marã beni, si ima kpakara funi ní pe kina rengo.”

Ono wa vura duhe wo, Guiherme ima sovura nyanyaki tipa ka zanga pe ziree. Sangbako nga: “Zavura rogo agu aba aboro abingo ho nigbegberẽpai tipa ka pe ziree ya, boro rengbe arengba ka pe rengo rogoho. Si naida ní duna nyanyaki arugute tipa ruru mangapai. Ziazia Kekeapai ima undo re mi bi gupai ngba pe rengo ti ni. Gu boro nape rengo, ní na wene sangbakpotoyo, gbiati zereda kpotoniyo, na ní nairisa tiní airisa. Gani mangapai rengbe kadu na wene sangbanaha kurii agu aboro ní amangasunge naayo.”

ARUGUTE NGA GA ZIAZIA KEKEAPAI: “Agu yo nakpi nyemu ka kumuko i atiwa ku rogo asada na gbina na dungu mumungo gbegberẽ nyemuahe nga gu narindasi aboro ku rogo gbarasa yo yo na kpio. Bambiko nyemu marã nga tarã ngbatunga gbegberẽapai dũ.”—1 Timoteo 6:9, 10.

Gu pangbanga namangi amanga: André nga gu kumba du na gu sirika beko nga ga banda arago. Gu ba ko naabanda ha nga gu bakere ba aboro naangi ambaro rogoho. Rogo kura uru sa fuo nyasa mbaro, André andu kurogo gu makatabu naangerakurii gu ba re tipa ka sanahe i fu marã fuko tipa gu sunge ko amangihe. Gu basunge nangerakurii marã aageda gu marã kindi i agbiaha rogo gu uru re. Wa duhe nga regbo aima susa, bangerekuriisunge adi marã ki fuhe fu agu aboro namangisunge kodihe na André a.

Sangbako nga, “Ho mi aaga ni ku kporoyo, mi abi gupai nga gu bangerekuriisunge re ima fu marã fere nibakerehe. Mi aima inoho nga ko arengbanga ka tingidapa gu boro ko nifu bakere marã funi te. Ono mi ainihe a nga, si nika ida ko kusi marã manguko yo tipa ka tumo kuba gu marã re nani! Mi adiberã ka karagatire kusayo. Mi amangi ome ki rimi dagba gu zegino aboro naadu yo na ki karaga gu marã re. Ngbako aima zera. Boro agasanga marã mbata fuko te.”

Fugo André nga, “Gupai mi amangihe re asa gupai nga ko tona irisa re. Dungu agarã ima susa awere, kina re sa nga gu boro gani sirika abanda rago ho kindi dagba agu aboro dũ nanaabanda rago ho. Mi na ngbarago nga manga mi agu arugute nga ga Ziazia Kekeapai du tipa ruru mangapai ima ye na wene rimo fere.”

Si nipa wasa ka ino gupai nga, Mbori rengbe arengba ka undo rani ani sovura kuti gu gbegberẽ maapai nga ga biriki. Ono tie, boro arengbanga ka nyasa riipa biriki ngba gani ome nitini te. Nirengo, si ima kpakara fu kpakpa aboro i nyasi riipa gayo apai nitiyo. Ya mo gure nayugo gupai nga biriki watadu rita marã anyasanga te? Gu yangara kekeapai naye fuo gere nafura furani tipa gu wene karagapai Ziazia Kekeapai afuhe.