‘Ka he Makingo Rani Ya’
“Ka ani mbú nga be manga rurupai ya.”—GARA. 6:9.
1, 2. Wai gu gaani kido anyaka be berã ani kurii gu ga Yekova riigbu du ngbangbaturũ yo na auru kpotosende ane?
SI IMA iriwo ka bi gupai nga ani nga papara gu riigbu du rogo zegino dunduko. Agu ayugoti du rogo Yezekere kapita 1 na Daniere kapita 7 nayugo gupai nga Yekova du namangapai tipa gako ringbisapai dati rengo. Yesu du nangbembatayo kaa ruga gu ga Yekova riigbu du auru kpotosende tipa si nitungusi wene pangbanga, tipa ka ngerafuo agu aboro namanga gi sunge re rogo toro yo, na tipa ka sa ndikidi irisombori si nindu kumbatayo. Nairiwo gu kido gipai re afuhe furani tipa ga Yekova riigbu!—Mt. 24:45.
2 Ya mo ani nandu sa na gi bawene riigbu re? Ya mo ani kindi zaaza tipa rengo wai ani adumbata watadu ani ima zera? Ho ani awisigo ngbatunga asanahe ni wa gure, ani rengbe ka bi gupai nga omerani ima tona ka bata watadu ani zaaza berewe te. Pai rengbe arengba ka manga wa gure. Rogo bambata sa kama agarã, gu mokedi nangia Pauro azungodi akurako aKristano tipa i wisigi ga Yesu kpiapai nga ga du zaaza. Pauro ayaa si nika undoyo ka i dunga na ‘mbugo tigayo ki nirungbura rogo gayo aberã’ ya. (Eb. 12:3) Teketeke a, kangia ani awisigi gu kekeapai ye mbata fu gere sirisiri nga gu nayugu gupai ga Yekova riigbu amangaha areme, si aima rengba ka undo rani ani bandapa gu wasa du ani nani gbiati hipai.
3. Ginipai si aida ani mangihe tipa ka ani mbunga ya, na ginipai ani nika wisigoho rogo gi kekeapai re?
3 Ono tie, Pauro ayugu gupai nga kura apai kinaho si aidaha ka si du nga ani aidanga ka mbu te. Ko ayaa si naida ani mangi “rurupai.” (Gara. 6:9) Sidu, si naida ani mangipai amanga. Ani wisigingo apai bisue nga gu rengbe ka undo rani ani ru nyanyaki tipa kaa ndu kina sa na ga Yekova riigbu. Fuani ani ki bingo singia bangiriba ho si aida ani watadu gaani aborokporo berẽkuriihe wenengai.
ANI DUNGURA TIRANI KA NYAKASA TIRANI NA KA IRISOMBORI
4. Tipagine rengbe ani ka ya ti ni wee dunguratise nga nyanyaki papara gaani irisombori?
4 Ga Yekova amoyambu aima digo nibipa dunguratise na nyanyakipaha. Ngbangbaturũ yo, Yekova naayamba amaraika kubara bangiriko dedede ti agu aregbo da beko. (1 Aba. 22:19; Eyo. 1:6; 2:1; Dan. 7:10) Agu aYisaraere nadumbata anaadunguratiyo tipa ka ‘giapai na ka wirikapai.’ (Pa Rug. 31:10-12) Agu aYudo naadu rogo bambata sa kama agarã adu na gu sino tiyo nga kaa ndu ku bambutiria yo tipa kaa geda Ziazia Kekeapai. (Rk. 4:16; Amo. 15:21) Gipai re na nyakasa gupai nga pa dungura aKristano tiyo adu na nyanyakipaha ho gu dungurati nga ga aKristano atona ni, na si kindi a nga nyanyakipa gaani irisombori areme. Ndikidi aKristano ‘naberãpa akurayo ka nyakasayo kuti nyemuse na wene mangaapai.’ Si naida “ani rúgu akuarani aruga; ki nimangi he susi, wa bi [ani] he ya [ga Yekova uru] nambeda.”—Eb. 10:24, 25.
5. Wai rengbe ani ka ngarasa tirani ba dunguratise yo?
5 Gu kura nyanyakipa gene ani angarasa akurani ngbaha nga ka karagapai ba dunguratise yo. Ani rengbe ka yugo gaani idapase gbayaga nikaraga ani sanahe ti regbo dunguratise, ka yugo wai si aida ani mangipai kuti veresi sa, ka fu wiri guru kpiapai nga gu nayugo gu wenepai duti pekafuo agu arugute nga ga Ziazia Kekeapai, watadu rogo kura gene. (Tam. 22:22; 40:9) Nirengo, ka si vura du nga ani aima digo niye kupati adunguratise tipa dungu agarã, ho ani agia agu akaragapai ni awirinarani afuhe nga sosonoyo na parangayo, si kindi nimburu ngarasaro furani.
6. Wai gaani adunguratise aundo rani tipa ani du nyanyaki rogo toro yo?
6 Gini kura nyanyakipa pai berewe gaani Mbori aida ani dungura tirani tipaha dedede? Gaani adunguratise gbiati agu akikindigihe naundo rani tipa ani du na wingbaduse tipa ka fura zaaza na tipa ka sovura kuti asogote watadu gu sakparakpa du rogo gaani dagbarago. (Amo. 4:23, 31) Agu asakapai nga ga Ziazia Kekeapai nanyakasa rani na kini sarani ani ru ngutete rogo idapase yo. (Amo. 15:32; Rom. 1:11, 12) Gupai i ayugoho furani na wai ani angarasa tirani ba gaani adunguratise yo, si naundo rani ani du na ndikidi ngbarago na kini fu ‘ongoda furani ti rago gbigbitapai.’ (Tam. 94:12, 13) Gu Rondo Nga ga Yugopai nga ga Riigbu Bipasunge nangerakurii agu ambakadapai dunduko du tipa agu apai nga ga toro du tipa ka yugopai fu ga Yekova boro rogo zegino dunduko. Nairiwo gu ngbarago du ani nani tipa gu mbakadapai du tipa gu riahe nga ga toro ani arihe na aposo dunduko ba gaani adunguratise vuru garã yo re!
7, 8. (a) Gu banguapai du tipa gaani adunguratise nga gine? (b) Wai adunguratise aundo ro rogo toro yo?
7 Ono tie, gu kurapai kinaho berewe nga gu nyakipaha gbe kisusi agu aundo ani agbiaha nitirani ba gaani adunguratise yo. Gu bambata ndupai ani adunguratirani tipaha nga ka iriso Yekova. (Oni gedi Atambuahe 95:6.) Nairiwo gu momu du ani nani nga ka taasarimo gaani bawene Mbori re! (Koro. 3:16) Yekova naida ani naairisoko dedede na kini karagapai ti regbo adunguratise nga ga toro. (Yugo. 4:11) Si du si airiwongo ti ni ya ka bi gupai nga i nangarasa rani “ka ani hé nga dungura tirani na akuarani, wa du sino agu yo ya”!—Eb. 10:25.
8 Ya mo ani nabi gaani adunguratise wagu undo Yekova afuhe furani tipa ani hipai daho ko nika gbarasa gi gbegberẽ sino raka re ni? Kangia wo duhe, adunguratise du dagba “agu pai nyakipaha gbe” ani abihe na nyanyakipaha rogo gaani raka yo. (Frp. 1:10) Sidu, si naida kina nyanyakipa pai sa sarani ani kpa ti gu momu nga ga dungurati tirani na awirinarani tipa ka airiso Yekova.
ONI GBATA AGU ABORO DU NA RURU NGBADUYO YO
9. Waigu ini ani he nga sunge tungusapai na nyanyakipaha?
9 Sunge tungusapai kakaka nasarani ani ndu kina sa na ga Yekova riigbu. Ho Yesu adu ni auru kpotosende, ko ambu gi sunge re si nindu kina kumbatayo. (Mt. 28:19, 20) Natona ti gu regbo re, sunge tungusapai na sunge sa aboro ni abawiriki nga gu nyanyakipa asunge ga Yekova riigbu adigi nimangihe. Gu vovo akpiapai du areme nayugo gupai nga amaraika nasongoda gaani sunge na kini nungusi rani koyo du agu aboro ni “i aima ringbisa yo sa nyenye unga.” (Amo. 13:48; Yugo. 14:6, 7) Gu ga Yekova papara riigbu du auru kpotosende gaha sunge nga ka mbakadapai na kini songodi gi nyanyakipa sunge re. Ya mo mo nabi sunge tungusapai na nyanyakipaha rogo gamo raka yo?
10. (a) Ani yugungo kpia wai rengbe ani ka bandapa gaani du zaaza tipa rengo? (b) Waigu sunge tungusapai aundo ro tipa ka mo mbunga ya?
10 Padu ani zaaza gene tungusapai yo naundo rani ani bandapa gu nyemu rengo du tirani. Ani bingo gupai Mitchel apehe nga gu wirina mangisunge nibakumba na nibazakigene tipa ngbanga regbo. Ko ayaa: “Mi na nyemu ka fura na aboro tipa rengo. Ho mi aberã ni kurii gu vovo kekeapai du rogo Ngbaõbambu Sinziri na Awake! kina ngbare nazera ka bi gu tatamana, dudunguro inohe na wai agu amagazini re afura tipaha nibasasa. Si nasa re mi ndu ku gene tungusapai tipa ka bi ga aboro karagapai kutini, na wai rengbe mi ka ba nyemupai tiyo. Tungusapai nasa re ka mi dunga utukuru ya. Mi naamanga ome ka pai dunga ho nika gberesa regbo bere mbata fu tungusapai na fuoho ya.” Teketeke a, tungusapai kakaka naundo rani ani ndu kumbatayo na ki ru nyanyaki rogo gi yangara arame re.—Oni gedi 1 AKorindo 15:58.
ONI RI GU RIAHE NGA GA TORO
11. Tipagine si aida ani mangisunge ti ni wenengai na gu riahe nga ga toro Yekova afuhe furani?
11 Yekova ima fu dungu kekeapai furani nga ga gudu na gu riahe nga ga toro rogoho nafu ome furani. Zanga kapa, oni ima rengba ka tingidapa gu regbo oni agedipai oni ki bihe nga ‘Boro gere, i akehe nzunzu tipa kina re! Si wa ka i ya Yekova aya i ke gere tipa kina re!’ Anga kungbo momu gbua nangiaha te. Yekova naruga rani na kini nungusi rani vurube agi apai re. Ko ayaa: “Mi arába ro ki yugu pai foro ngba gu gene mo ka ndu ngba ha.” (Tam. 32:8) Ya mo ani namanga ome tipa ka ri agu ariahe nga ga toro dunduko na kini berẽkuriihe? Manga ani he wo nika sa gupai nga ani ndu kumbatayo tipa ka hipai rogo toro yo angianga ka mbu akpakarapai si di berani ya.—Oni gedi Atambuahe 1:1-3; 35:28; 119:97.
12. Ginihe rengbe ka undo rani ka ani bingo gu gaani agamahe nga ga toro taata ya?
12 Si niwenepai furani tipa ani wisigi gu ome awirina amangaha tipa gupai nga ani gbia gi riahe nga ga toro re dedede. Gu Rondo Nga ga Keapai nga ga Riigbu Bipasunge nangerakuriipa wetekapai, kepai, gedapai, akpiapai, na saka agu apai du rogo gaani awaraga gbiati gu i amaaha rogo Internet. Agu abe-basunge na gbingbida awaraga na kekedaha kurogo agu adungurati du barambeda na agu du tuturũu. Ndu manga agi apai dunduko nga gine? Tipa ga Yekova aboro du rogo toro yo wenengai. (Yes. 65:13) Ani dunduko nimangingo ome amanga tipa ka ri gu riahe ani agbiaha rogo ga Yekova riigbu.—Tam. 119:27.
ONI SONGODI AGU AMBAKADAPAI DU ROGO RIIGBU
13, 14. Ada nasongoda ga Yekova mbakadapai ngbangbaturũ yo, na wai rengbe ani ka songodaha kinawo auru kpotosende ane?
13 Rogo gu yuguyugupai Yoane abihe, ko abi Yesu ko nioro ri pusi farasi na ko kidu na diabese kurii agu aboro samungu kuti Yekova. (Yugo. 19:11-15) Nairiwo wai si anyakasa gaani idapase ka ino gupai nga ruru amaraika gudu patiko na gu mbedimbedi aKristano niima dia gayo mosoro nga ga ngbangbaturũ! (Yugo. 2:26, 27) Nangba wai gi gayo wene kpiapai re aundo rani tipa ani songodi ga Yekova ambakadapai!
14 Wa kina gure a, kura akandoro nasongoda gu sunge agu awirina Kristo du kindi auru kpotosende ane amangaha, nga agu aboro nangbembatayo rogo apai rogo riigbu areme. (Oni gedi Zekaraya 8:23.) Wai rengbe ani nibasasa ka yugo nani nga ani nasongoda agu ambakadapai nga ga Yekova? Gene sa nga ka giasangba agu aboro nangbembatayo rogo apai yo. (Eb. 13:7, 17) Si natona nibasa kina rogo gaani dungurati. Ya mo agu apai ani apehe tipa abaakumba nafu irisa fuyo na gu sunge i amangaha? Ya mo ani nangarasa awirani i niʹirisi gi ruru akumba re na kini ndu fuoyo tipa arugute? Kurigure, ya mo ani nasakapai wa aborokporo tipa wai rengbe ani ka mangasunge na gu marã du berani tipa ka songoda gu sunge tungusapai namanga rogo zegino dunduko? (Snz. 3:9; 1 Kor. 16:2; 2 Kor. 8:12) Ya mo ani nabi gu momu nga ga ngerafuo Bambu Kindo na nyanyakipa ha? Gu ba du gu ngbatunga irisa na kodatise re rogoho, ga Yekova toro namangasunge yo wenengai. Vuru be gu toro re, ani nagbia gu undo rengbe ka undo rani ka omerani batinga ya rogo gi kusa arago re.—Yes. 40:29-31.
ANI RAKI RINGBISIHE NA GU PANGBANGA ANI ATUNGUSAHA
15. Tipagine si aida ani sota asota ti ni dedede tipa ka raka ringbisihe kuti ga Yekova ringbisapai?
15 Niyangaraha, tipa ani hipai na kini ndu kina sa na ga Yekova riigbu, ani duwa ka ani araka ringbisihe na kina gupai ani atungusaha na ki “nikpária pa gu he ngba ti Gbia.” (Ef. 5:10, 11) Mbiko gaani zangarengba na gu ome Satana amangaha gbiati gi gako gbegberẽ zegino re, ani nasovura kuti gbegberẽ apai dedede rogo gaani raka yo. Bete aguroni kinaho nasota naʹuru dunduko tipa ka banda gaoni pagume na Yekova. Gipai re nasako ko kpinyemu roni nibakerehe. Ka ome roni batinga ya! Ka ani araka ringbisihe kuti ga Yekova ringbisapai, si nika sa gupai nga ani du na ngbarago na ki sa gupai nga ko idi na ani.—1 Kor. 9:24-27.
16, 17. (a) Ginipai si aida ani mangihe ka si du nga ani mangi kere ingapai? (b) Wai rengbe ani ka gbia undo ti gu kpiapai nga ga Anne?
16 Ginipai rengbe ani ka mangaha ka si du nga ani mangi kere ingapai? Oni gbata undo niʹipiʹipihe. Ka oni okoho, apai nikaa gberã kina kumbatayo. Oni tingidi gupai nga, Davide ayaa, ho ko aoko gako ingapai ni, ‘amemeko akuruko be uko naʹuru pitipiti.’ (Tam. 32:3) Ii, oka ingapai rengbe ka sa gupai nga ani du na mbugo ti kpotorani na rogo toro yo, ono “gu ni nakusa ha ki nimbu he, ni abí inapai.”—Snz. 28:13.
17 Ani bingo gupai naadu tipa Anne.a Ho Anne angia sosono degude ni, ri amangisunge ni nazakigene. Ono tie, ri atona ka raka gu raka nga ga biriki. Gipai re aduna gbegberẽ sangbana kuriri. Sangbari nga: “Sangbakpoto re yo adunga wenengai te. Mi aduna bakere gberarago.” Ginipai ri amangihe? Ri ayaa rogo kura uru sa pati dunguratise, sakapai adu riipa Yakoba 5:14, 15. Anne abihe nga ri naida na undo na ri andu fuo abaakumba tipa i undo ri. Ri natingida gupai namangi niyaa: “Agu averesi re nga gu dawa Yekova afuhe tipa i husi agu aboro nawoka rogo toro yo. Si taata tipa ka mbira gu dawa re te, ono si nahusa boro ahusa. Gu he mi aaidaha nga agu arugute du rogo agu averesi re na si aima undo re.” Bete agarã ima susa awere, na Anne awere na ome tiri tipa ka mangasunge zaaza fu Yekova na wene sangbakpotoseyo.
18. Gini diaberã si aida ani mangihe?
18 Nairiwo gu momu nga ani du niunga rani rogo gi yangara arame re na nipapara ga Yekova bawene riigbu! Ka ani bingo pa gu momu du berani re na taatapaha ya. Kuba gure, ani mangisunge wa aborokporo sa kadu dedede pati adunguratise ka irisombori sa na awirinarani rogo gaani adungurati, ka gbata agu aboro du na nyemu rengo rogo gaani dagbarago, na kini bipa gu riahe nga ga toro na nyanyakipaha. Ani songodi agu aboro nangbembatayo rogo apai na kini raki ringbisihe kuti gupai ani atungusaha. Ka ani mangihe wo, anga kina nduge sa ka ani anduhe na ga Yekova riigbu te ono omerani abatanga ti manga rurupai a te!
a Ndikidi rimoko ngaha te.