“Mo Gúmbanga Ha Furani, Nigini Rago Agi Apai Ka Manga Re?”

1. Ginipai du ani na nyemu ka inoho kina wai si adu tipa abawiriki?

YESU aambeda ka nyasa gako tungusapai auru kpotosende, na gako abawiriki aduna nyemu ka ino gupai nikadu fuyo kumbatayo. Mbata fu kpioko, gako amokedi biama asanako ki yaa: “Ni gini rago agi apai ka manga re? gine i ka ina pa ga ye ti ni, na pa digida rago?” (Mt. 24:3; Mk. 13:3) Yesu akaragapai fuyo nipeko pa gu sangbaanebi duna dungu apai rogoho rogo Matayo kapita 24 na 25. Rogo gu sangbaanebi re, ko ape dungu ago apai rogoho. Agu afugoko re na nyanyaki rogoyo furani mbiko ani a na nyemu ka ino agu apai du kumbatayo.

2. (a) Ginipai i narugu gaani giarogopaiyo rogoho nga gu ani agianga rogoyo ya tipa dungu agarã? (b) Gini asanahe biata ani nika wisigoho?

² Tipa dungu agarã, ga Yekova amoyambu aima manga bakere wetekapai nibipa ga Yesu sangbaanebi tipa yangara arame na kini kpari fu Yekova tipaha. I aima gbata gene a ka giarogo ga Yesu sangbaanebi wenengai na ka ino gu regbo si nika manga ti ni. Tipa ka yugo wai i asadi ka ruga gaani giarogopaiyo, ani wisigingo asanahe biata na gu fugo nga “nigini rago.” Nigini rago “bakere gberãngbi” nika tona? Nigini rago Yesu nika sapangbanga “akandoro” na “ameme”? Na nigini rago Yesu ‘nikaye’?​—Mt. 24:21; 25:31-33.

NIGINI RAGO BAKERE GBERÃNGBI NIKA TONA?

3. Mbata kusayo, gaani giarogopaiyo angia gine tipa gu regbo nga ga bakere gberãngbi?

³ Tipa dungu agarã, ani aberẽ gupai nga bakere gberãngbi atona rogo 1914 na Bambata Vura Nangia ga Zegino. Na Yekova ‘agurusi gu rago re’ rogo 1918 tipa ka sa yangada mbedimbedi aKristano i duna momu ka tungusa wene pangbanga fu rikaaboro dunduko. (Mt. 24:21, 22) Fuo nyasa gu sunge tungusapai re, i ki gbarasi ga Satana zegino. Sidu, ani aberẽhe nga bakere gberãngbi nakoda apai biata nga: Si atona rogo (1914-1918), i ki rugusihe (tona ti 1918 ka ndu kumbatayo), na si ki digi na Aramegido.

4. Gini giarogopaiyo sa rani ani rugu tirani wenengai na gu ga Yesu sangbaanebi du tipa yangara arame?

⁴ Ono tie, fuo wisigo ani pai dudunguro tipa gu ga Yesu sangbaanebi du tipa yangara arame re, ani ye ka bi gupai nga si na digisidigisi arogoyo ue. (Mt. 24:4-22) Bambataha adigisitihe Yuda yo rogo bambata sa kama agarã, na gu kuraha nika digiso tihe ti gaani regbo. Gu giarogopaiyo re na dungu arugapai rogoho.a

5. (a) Gini kere regbo naatona rogo gu garã nangia 1914? (b) Gu regbo rungo re nawira gini regbo rogo bambata sa kama agarã?

⁵ Ani ima rugatirani a na gupai nga bambata papara bakere gberãngbi aatonanga rogo 1914 te. Tipagine? Mbiko Ziazia Kekeapai ayanga bakere gberãngbi nika tona na gu vura naadu dagba rikaaboro te, ono gu zubohe nikadu kuti ziree pambori nika tonaha. Sidu, agu apai namangi rogo 1914 angianga tonatona bakere gberãngbi te, ono “tonatona rungo.” (Mt. 24:8) Gu “tonatona rungo” re wakina gupai namangi Yerusarema yo na Yuda yo rogo agu agarã nangia 33 dakuti 66 rogo bambata sa kama agarã.

6. Ginihe nika sa gupai nga bakere gberãngbi tona?

⁶ Bakere gberãngbi nika tona wai? Yesu ayaa: “Ho oni ka bi gu gbegberẽ kere gbarasa rago ni, nga gu Daniere nga nebi agumbapaha, si ru rogo ziazia ba yo (gu ni nageda gipai re ni rugu tini nani), aguyo kadu Yuda yo i ki oro aora ku bagangara yo.” (Mt. 24:15, 16) Bambata sangbanaha adigisitihe rogo 66 rogo bambata sa kama agarã ho aRomo azubo gu yekaru ni naadu Yerusarema yo. Agu asekere nangia ga aRomo yó nangia ‘gu gbegberẽhe’ ‘naru rogo ziazia ba’ nangia Yerusarema na gaha yekaru nga (gu ba naadu niziaziaha bangiri aYudo). Gu bakerehe nika digiso tihe ho Yu-eni (gu vovo ‘gbegberẽhe’ du ti gaani regbo) nika zubo agu apambori i aya ti ni si nga ga aKristano (nga gu du niziaziaha bangiri agu aboro naya i nga aKristano). I fura tipa gu bangisa zubohe re rogo Yugoti 17:16-18. Pa zubo yó ziree pambori nika sa gupai nga bakere gberãngbi tona.

7. (a) Waigu mbedimbedi aKristano abatasi ungayo rogo bambata sa kama agarã? (b) Ginipai rengbe ani ka maabangirani tipaha nga si nika manga kumbatayo?

⁷ Yesu ayaa: “I agúrusa gu rago re.” Bambata digisidigisi gipai re amangi rogo 66 rogo bambata sa kama agarã ho aRomo ‘agurusi’ gayo vura ni. Sidu, gu mbedimbedi aKristano naadu Yerusarema yo na Yuda aoro ka ‘batasa’ ungayo. (Oni gedi Matayo 24:22; Mara. 3:17) Ginipai si aida ani moibangirani tipaha nga si nika manga ti regbo gu bakere gberãngbi nika ye re? Yekova nika ‘rugusa’ gu zubohe Yu-eni nika zubo ziree pambori nani tipa ka i gbarasinga ndikidi pambori wasa na ziree pambori ya. Gipai re nika sa gupai nga ga Mbori aboro bati.

8. (a) Gini apai nika manga fuo susa bambata papara bakere gberãngbi? (b) Gini regbo yangada boro dagba agu aboro nga 144,000 nika ga ku ngbangbaturũ yo? (Oni bi gu kekeapai du bandu waraga yo.)

⁸ Ginipai nika manga fuo bambata papara bakere gberãngbi tona? Yesu aya dungu apai nika manga mbata fu Aramegido tona. Ginipai nika manga tigu regbo re? Karagapai kuti gu sanahe re gudu rogo Yezekere 38:14-16 na Matayo 24:29-31. (Oni gedihe.)b Fuo gure, ani nika bi Aramegido nga nyanyakipa papara bakere gberãngbi wakina gu gbarasahe namangi Yerusarema yo rogo gu garã nangia 70 rogo bambata sa kama agarã. (Mara. 4:1) Gu vura nga Aramegido gbiati bakere gberãngbi nikangia agu apai naamanganga mbata ya “wa zegino aenge da awere si adu nga wo te, oó, si adú nga wo berewe a te.” (Mt. 24:21) Fuo susaha, ga Kristo zogarago tipa agarã kutu nika tona.

9. Gini ome du gu ga Yesu sangbanebi du tipa bakere gberãngbi nani kurii ga Yekova aboro?

⁹ Gi sangbanebi du tipa yangara arame re nanyakasa rani anyakasa. Tipagine? Bambiko si nakido rani nga, ka ga Yekova aboro vura kaa gbiatiyo na kina gini ngbatunga akpakarapai vurũ, i nika bata abata ti rago bakere gberãngbi. (Yugo. 7:9, 14) Sidu, ani na ngbarago mbiko ti regbo Aramegido, Yekova nika ziasi gako bakere pagbia gbiati rimoko.​—Tam. 83:18; Yeze. 38:23.

NIGINI RAGO YESU NIKA SAPANGBANGA AKANDORO NA AMEME?

10. Mbata kusayo, gaani giarogopaiyo angia gine tipa gu regbo nga ga sapangbanga akandoro na ameme?

¹⁰ Ani wisigingo gu kura ga Yesu sangbanebi nga gu sanza du tipa sapangbanga akandoro na ameme. (Mt. 25:31-46) Mbata kusayo, ani aberẽhe nga sapangbanga akandoro na ameme atona rogo 1914 kaa ndu kumbatayo. Ani anaaya agu aboro sogo gu pangbanga nga ga Kindo na aguyo kpiki mbata fu bakere gberãngbi nikangia ameme mbiko i namaabangirise tipa zingabekpio te.

11. Tipagine sapangbanga agu aboro nga akandoro na ameme aatonanga ti ni rogo 1914 ya?

¹¹ Rogo 1995, Ngbaõbambu Sinziri asakipai tipa Matayo 25:31, ki yaa: “Ho Wiri boro ka ye ni rogo gako taarimo, na amaraika dunduko fuoko, ko asúnga ri mbatabakindo nga ga taarimo.” Gu Ngbaõbambu Sinziri re ayaa Yesu ada nibakindo ga Mbori Kindo rogo 1914, ono ko ata ‘sungongo ri mbatabakindo nga ga taarimo’ tipa ka sapangbanga ‘arikaaboro dunduko’ te. (Mt. 25:32; oni ringbisinga ha na Daniere 7:13.) Ono tie, gu sanza nga ga akandoro na ameme nafura tipa Yesu nibasapungbanga. (Oni gedi Matayo 25:31-34, 41, 46.) Wa duhe nga Yesu atonanga sunge nibakindo rikaaboro dunduko rogo 1914 te, pa sapa ko ngbanga agu aboro nga akandoro na ameme aarengbanga ka tona rogo gu garã re te.c Gini regbo tie Yesu nika tona sapangbanga ti ni?

12. (a) Gini bambata regbo Yesu nika sapangbanga arikaaboro dunduko? (b) Gini apai i nasakipai tipaha rogo Matayo 24:30, 31 na Matayo 25:31-33, 46?

¹² Ga Yesu sangbanebi tipa yangara arame nayugo gupai nga ko nika sapangbanga rikaaboro dunduko nibasa fuo i gbarasi ziree pambori. A wa furayo tipaha rogo genewaraga 8, bete agu apai nika manga ti gu regbo re nikekehe rogo Matayo 24:30, 31. Ka oni wisigi agu averesi re, oni nika bi gupai nga Yesu afura tipa agu apai duwa kina gu ko afura tipaha rogo gu sanza du tipa akandoro na ameme. Nikpiapai: Wiri boro nika ye na taarimo na amaraika; i ki dungura arikaaboro dunduko; aguyo i nika sapangbanga yó wa akandoro nika ‘tumba riyo’ kuari mbiko ‘nyenye unga’ napido yó.d Aguyo i nika sapangbanga yó wa ameme i nika ‘rungo arungo’ mbiko i napido “nyenye mbusa [watadu gbarasayo].”​—Mt. 25:31-33, 46.

13. (a) Gini regbo Yesu nika sapangbanga aboro wa akandoro na ameme? (b) Gini ome du gi giarogopaiyo re nani kurirani nibipa tungusapai?

¹³ Sidu, gini digisopai rengbe ani kada kutini? Yesu nika sapangbanga agu aboro duwa akandoro na ameme ho ko nika ye ni ti regbo bakere gberãngbi. Sidu, ti regbo Aramegido, i nika gbarasa agu aboro duwa ameme nyeanye kindi kusayo. Gini ome du gu giarogopai re nani kurii rani nibipa gaani tungusapai? Si naundo rani tipa ani bi wai nyakipa tungusapai. Ani na regbo kindi berani tipa kaa undo aboro tipa i aria berãyo na ki tona ka ta ngba gu umba gene “nangbe koyo du unga ni” daho bakere gberãngbi ka tona ni. (Mt. 7:13, 14) Nirengo, aboro rengbe arengba kadu na agu asino tiyo duwa ga akandoro watadu ameme. Ono wa vura duhe wo, si naida ani ini gupai nga gu yangara sapangbanga du tipa agu aboro duwa akandoro watadu ameme si nikadu ti regbo bakere gberãngbi. Sidu, ani na wene ndupai berani tipa kaa aundo aboro i degetuyo kuti gu pangbanga nga ga Kindo.

NIGINI RAGO YESU NIKA YE?

14, 15. Gini averesi biama nafura tipa ga Yesu ye nibasapungbanga kumbatayo?

¹⁴ Ya mo pa wisigo ani ga Yesu sangbanebi dudunguro nayugo gupai nga gu gaani giarogopaiyo du tipa gu regbo du tipa kura apai naida ani ruguhe? Gupai gu sangbanebi re afura tipaha nika karagapai furani. Ani wisigingo ho awere.

¹⁵ Rogo gu papara sangbanebi du rogo Matayo 24:29–25:46, Yesu afura gbe tipa gupai nika manga tigi yangara arame re na ti regbo gu bakere gberãngbi nika ye. Rogo gu sangbanebi re, Yesu afura bara muambe tipa pa “ye” ko. Nibipa bakere gberãngbi, ko ayaa: I nika “bi Wiri boro ko niye rogo mai.” “Oni aina nga nigu uru gaoni Gbia ka ye te.” “Wiri boro naye ti gu saa oni aberãnga paha ya.” Rogo gu ga Yesu sanza du tipa akandoro na ameme ko ayaa: “Ho Wiri boro ka ye ni rogo gako taarimo.” (Mt. 24:30, 42, 44; 25:31) Agi averesi re dunduko nafura tipa paye Yesu ka sapangbanga. Gini kura averesi biama rogo ga Yesu sangbanebi ani abipa gako ye berewe rogoho?

16. Gini averesi berewe nafura tipa paye Yesu?

¹⁶ Nibipa ruru kangara moyambu, Yesu ayaa: “Boro maku nga gu moyambu gani gbia ka bi ni ni nimangi wo ho ko ka ye ni.” Rogo gu sanza nga ga ngasu adee, ko ayaa: “Wa i andu ka ngbeka ha, gu kumba nadi de ki da.” Rogo gu sanza du tipa ataranda, ko ayaa: “Fuo rago nigbangaha baira agu aboro sunge [re] ki ye.” Rogo kina gu bangisa sanza re, bairayo ayaa: “Rago yega mi ka mi adi gimi ra [watadu guhe nga gimi].” (Mt. 24:46; 25:10, 19, 27) Agi averesi du biama re nafura tipa gini ga Yesu ye?

17. Gaani giarogopaiyo angia gine mbata tipa gu regbo furayo tipaha rogo Matayo 24:46?

¹⁷ Mbata kusayo, ani afura tipa agi averesi re ki ya si nafura tipa gu ga Yesu ye naadu rogo 1918. Nikpiapai, ani bingo gupai Yesu apehe tipa gu “kangara moyambu tie du na tatamana.” (Oni gedi Matayo 24:45-47.) Ani ima rugatirani na gu pa “ye” ko du rogo veresi 46 nga si nafura tipa gu regbo ko aye ka wisigo gu yekaru nga ga toro nga gu naadu tipa mbedimbedi aKristano rogo 1918. Na rogo 1919 ko ki asia gu moyambu re kurii ga Bairani ahe dunduko. (Mara. 3:1) Ono tie, pa wisigo ani pai dudunguro riipa gi ga Yesu sangbanebi re yugu gupai nga si naida ani rugu gaani giarogopaiyo nibipa gu regbo du tipa gu kura papara ga Yesu sangbaanebi re. Tipagine?

18. Ginipai wisigo ani ga Yesu sangbaanebi aundo rani ani gitirani wenengai naapa ye ko?

¹⁸ Rogo agu averesi du mbata fu Matayo 24:26, gu fugo nga “ye” nafura dedede tipa gu regbo Yesu nika ye ti ni tipa ka sapangbanga ti regbo bakere gberãngbi. (Mt. 24:30, 42, 44) Berewe a, a wa ani niwisigihe rogo genewaraga 12, gu ‘paye’ ko du rogo Matayo 25:31 nafura kindi tipa kina gu regbo sapangbanga re. Sidu, daha ada tie ani ya gu paye Yesu du rogo Matayo 24:46, 47, si nafura tipa paye ko ka asia gu moyambu re kurii gako ahe dunduko gbiati gu paye ko nikadu kumbatayo ti regbo bakere gberãngbi. Nirengo, wisigo ani ga Yesu sangbanebi naabaha nayugo nani ziazia nga agi sangbaanebi du muambe nafura tipa paye ko re, si dunduko nafura tipa gu ye ko nika ye ka sapangbanga ti regbo bakere gberãngbi.

19. Gini vovo giarogopaiyo wisigi ani pai tipaha, na gini asanahe ani nika wisigopai tipaha rogo gu kekeapai naye fuo gere?

¹⁹ Ginipai wiriki ani he rogo gipai re? Ti tonatona gi kekeapai re, asanahe nidu biata na gu fugo nga “ni gini rago.” Nibambatapai, ani wisigipai nga bakere gberãngbi aatonanga rogo 1914 te, ono si nika tona ti gu regbo aYu-eni nika zubo Bakere Babera ti ni. Fuani, ani fugupai a tipa ndu gupai Yesu aasapanga ngbanga akandoro na ameme ti ni rogo 1914 ya ono si nika manga ti regbo bakere gberãngbi. Niyangaraha, ani wisigipai tipa ndu gupai Yesu aasianga kangara moyambu kurii gako ahe dunduko ti ni rogo 1919 ya ono ko nika mangaha ti regbo bakere gberãngbi. Sidu, agu asanahe biata nga “ni gini rago” re, si dunduko nafura tipa gu regbo nikangia ga bakere gberãngbi. Ginipai gi giarogopaiyo re amangaha na gu kpiapai du tipa kangara moyambu? Berewe a, ginipai si amangaha na gaani giarogopaiyo nibipa asanza, watadu gu ga Yesu akpiapai nga gu nadigisotihe ti gi yangara arame re? Ani nika wisigopai tipa agi asanahe re rogo gu kekeapai naye fuo gere.