‘Ka Oni Wónga Ti Gaoni Berã Niipo Ya’!

1, 2. Tipagine du bakere nangahe ti ni areme, na gini ngbatunga aziree ani abihe? (Oni bi tonatona sura.)

NANGAHE, biriki, gbiati ziree ima kio rogo zegino areme. Si aidanga agi apai re iriwo tirani te. Ziazia Kekeapai nape gupai ape ziazia nga Satana nga gu boro naye na agi apai re na ko nga gbia gi zegino re. (1 Tim. 2:14; 1 Yo. 5:19) Ga Satana zinga na kio kina ku mbatayo wa ani ambeda kuti digido gi zegino re mbiko “kina bete rago nye fu ko.” (Yugo. 12:12) Sidu, ani na maabangirise nga agu aboro Satana namoipai kuriyo i nikaa gberã kina ku mbatayo be biriki, gbe ka biriko agu aboro nairiso Yekova.

² Ti kura aregbo, wo apangbanga naape ziree tipa ga Yekova amoyambu ho i afura ni tipa gayo aida. I namangasunge na awaraga apangbanga, terevizioni, na gu kura abangiri aba rogo Internet kaa pe ziree tipa rani. Ni sangbana gipai re, bete aboro nadu ni fudifudiyo mbiko i naida kuti agi apai re mbata fu i inipai tipaha.

3. Ginipai rengbe ka undo rani ani sovura kuti aziree?

³ Tipa ka sovura kuti gi gbegberẽ birĩ nga ga avura rani re, ani na ngbarago nga Fugo Mbori kinaho “rengbe . . . tipa ruga aboro.” (2 Tim. 3:16) Si ni nyanyakipa pai nga ani wirikipai ti gupai Pauro akehe fu agu aKristano naadu Tesaronike yo naidi kuti gupai naangianga rengo ya. Ko angarasiyo nga ‘ka i wonga rogo gayo berã yo niipo ya.’ (2 Tesa. 2:1, 2) Ginipai rengbe ani ka wirikaha be gi ga Pauro wene arugute re, na wai rengbe ani ka mangapai kutini?

GU ZAHE DU TI REGBOHO

4. Waigu Pauro atingidi agu aKristano naadu Tesaronike tipa paye “rago Gbia,” na ginipai ani awirikaha behe?

⁴ Rogo gu bambata waraga Pauro akehe fu gu dungurati naadu Tesaronike yo, ko agbeberã yo kuti paye “rago Gbia.” Ko aaidanga awirinako du rogo bitimo zanga mbakadatiyo te. Kuba gure, ko azungodi yo ya “awiri haha rago” nga yo ‘i nikparia rago na kini rugutiyo’ na paha. (Oni gedi 1 ATesaroniko 5:1-6.) Areme, ani napido pa gbarasa Babera Duna Bakere Ome Ti Ni nga ziree apambori. Gipai re ni kangia tonatona gu bakere rago nga ga Yekova. Nirengo, ani ima du na bakere inohe tipa wai Yekova amangapai tipa gi gako ringbisapai re digisitihe. Ani nagbia atingidapai dedede vurube dungurati naundo rani tipa ani kpariapa arago. Ka ani amangasunge na agi atingidapai re dedede, si rengbe ka nyakasa rani ani mangisunge fu Mbori zanga ‘wó rogo gaani aberã yo niipo.’​—2 Tesa. 2:2.

5, 6. (a) Ginipai Pauro apehe rogo gako ue waraga yo fu aTesaroniko? (b) Ginipai Mbori nika mangaha vurube Yesu, na ginipai si aida ani sana tirani na ni?

⁵ Ngbutuko fuo Pauro kedi gako bambata waraga fu aTesaroniko, ko akedi gu kura ue waraga fuyo. Ko agbeberã yo rogo gu waraga re kuti paye gu gberãngbi si adu nga Gbia Yesu nika ye na ni ka sapangbanga kurii agu aboro “agia nga sangba wene pangbanga” ya. (2 Tesa. 1:6-8) Kapita ue nayugo gupai nga bete aboro rogo gi dungurati re aima du ni ‘fudifudi yo’ mbiko i aabihe nga gu uru re nika da nibasa ti kina gu regbo re. (Oni gedi 2 ATesaroniko 2:1, 2.) Agu aKristano re aaruganga tiyo wenengai na pa wai ga Yekova ringbisapai aamangasunge te, na Pauro aima ida kuti gipai re kusa nibipa sangbaanebi ki ya: “Ani ini bete apai, ani ki nigumba bete apai; ono ho gu he ka ye ni du ni nzunzu he, gu he nga bete he si ki digi adiga.” (1 Kor. 13:9, 10) Ono agu azahe ga Mbori toro adu kugii Pauro, Petero, na kura ruru amoyambu i kehe aima rengba ka undoyo tipa i banda gayo idapase.

⁶ Tipa ka ruga agi apai re, ga Mbori toro aundo Pauro ko sakipai fuyo tipa gu bakere asamungu na “gu boro nga ga gbegberẽpai ni” si adu nga i nika kura mbata fu ga Yekova uru da.a Fuo gure ngbutuko, Gbia Yesu “nikaimo” agu aboro dunduko Satana anangiyo ti gu regbo nika da bangiriko. Pauro ayugu ndu gupai i nika imoyo ti ni ki ya “i aka nga kuti nyemu rengo” te. (2 Tesa. 2:3, 8-10) Si naida ani sana tirani nga: ‘Ya mo mi nakpinyemu rengo? Ya mo mi ima rugatire na gu vovo giarogopai du awere a wa duhe rogo gaani awaraga yo?’

ONI SIA ABAKURE NA TATAMANA

7, 8. (a) Gini kerepai si adu nga agu aKristano naadu mbata nika sovura kutini? (b) Na gini kerepai du areme furani a?

⁷ Nirengo, anga aKristano nagbiatiyo na akparakapai kina be abasamungu na gayo ayugopai te. Pauro ake waraga fu Timoteo ki ya “nyemu marã nga tarã ngbatunga gbegberẽapai dũ.” Ko aya ‘aguyo nakpinyemuhe wo i aingi ainga ti idapase, ki nirupu tiyo arupa ni dungu arungo.’ (1 Tim. 6:10) “Agu apai borose amanga” nga gu kura kerepai.​—Gara. 5:19-21.

⁸ Gipai re nayugo ndu gupai Pauro aza agu aKristano naadu Tesaronike yo tipa gu kerepai agu akumba ko aya tiyo “zire amokedi” aandu ka kusaha. Aboro adu kina dagbayo ‘naagumba irairaapai ka gbefa abawiriki fuoyo.’ (2 Kor. 11:4, 13; Amo. 20:30) Kusa, Yesu atambua gu dungurati naadu Efesa yo mbiko i “aida nga na gbegberẽ aboro te.” Agu wirina re ayuguhe nga agu aboro re angia ziree amokedi na ni airaziree. (Yugo. 2:2) Rogo ga Pauro ue waraga fu aTesaroniko, ko angarasiyo nga: “Awere ani nagumba ha fu roni, awirina, ni rimo gaani Gbia Yesu Kristo, ya oni kparaka tironi ti agu awirina dunduko nata utukuru.” Ko afura a berewe a fu agu aKristano aidanga ka ‘manga sunge ya.’ (2 Tesa. 3:6, 10) Wa duhe nga si aaidanga i koditiyo na agu aboro naamanga utukuru te, kinawo a si adu ni nyanyakipa pai tipa i bandatiyo ti agu aboro namangaapai wa abasamungu. Nirengo, kodatise na ngbatunga agu aboro re aima du ni gu kerepai si aida i nehe ti agu aregbo re, kina gu bangisapai re du tipa rani areme a.​—Snz. 13:20.

9. Gini ngbatunga aboro si aida ani bandatirani beyo?

⁹ Ani ima mbeda kuti bakere gberãngbi gbiati digido gi zegino re, sidu, agu azahe i aafuhe rogo bambata sa kama agarã na nyanyakipa ha areme furani. Si aidanga ani bi ga Yekova undohe gbua taata na ki zanga gu maabangirise du tipa nyenye unga auru kpotosende watadu ngbangbaturũ yo te. (2 Kor. 6:1) Si naida ani bandatirani ti agu aboro naye kuba adunguratise yo kaa sana rani ani sakipai nayo rii agu apai i asakanga pai tipaha rogo Ziazia Kekeapai ya watadu aguyo nasarani ani bisirapa abaakumba na gu kura aboro.​—2 Tesa. 3:13-15.

ONI “NIKA KUTI AGU APAI I AYUGU HE FURONI”

10. Ginipai Pauro azungodi agu aKristano naadu Tesaronike yo i kakutini?

¹⁰ Pauro azungodi agu awirinako naadu Tesaronike yo i “ru nyanyaki” na ki kakuti agu apai i awirikihe. (Oni gedi 2 ATesaroniko 2:15.) Gine nangia “agu apai” i ayuguhe re? Anga si angia agu aziree ziree pambori aayugoho fu aboro si ki du wa agu apai naye rogo Ziazia Kekeapai yo te. Kuba gure, Pauro aafura tipa agu apai ko ayuguhe watadu gu kura aboro ainihe be Yesu kodihe na agu apai Mbori asa amokedi i kehe naada ni papara Ziazia Kekeapai. Pauro atambua awirinako rogo gu dungurati naadu Korinda yo ki ya: “Oni natingida pa re rogo apai dunduko, ki nika kuti asino nyanyaki a wa mi afu he fu roni.” (1 Kor. 11:2) Gi ngbatunga ayugopai re aye rogo gu ba narẽarẽ na i aima rengba ka kido kutini.

11. Waigu nangahe namoipai kurii dungu aboro areme?

¹¹ Ho ko akepai ni fu agu aKristano nangia aEbere, ko agbeberã yo kuti agene ue rengbe ka sa Kristano nimbupa gani idapase ka si dunga ní arunga nyanyaki te. (Oni gedi AEbere 2:1; 3:12.) Ko afura tipa wai rengbe boro ka “bitikpa” na ki “guari” kusayo. Kurungba rengbe ka guari pangba ime yeye zanga boro inihe. Tooni tooni si ki tona ka turo. Ono tie, kina ga boro mangapai rengbe ka tona turã gani kurungba yeye pangba ime ku dudunguro ime. Agi apai ue re nayugo wai aboro ambutiyo fu nangahe, ka i adunga na nyanyaki kido kuti agu apai nga rengo ya.

12. Gini apai rengbe ka gbarasapa rani rogo toro yo areme?

¹² Bete agu wirina naadu Tesaronike yo aima mbutiyo i nangi yo. Na ginipai namanga areme tigaha? Agu ahe aboro agbarasa gayo regbo kutini ima nge areme. Mo berẽnga kina pa gu bakio regbo aboro adiaha kuti Internet, kekeda awaraga rogoho na kini karagapai kuti agu aboro akedaha fuyo, agu ambaro ngbatiyo, watadu dia regbo dedede gene ta kandi yo. Pai dagba agi apai re rengba ka gbeberã Kristano na ki rungburasi padu ní zaaza fu Yekova. Sangbanaha rengbe kangia gine? Gene adunga berewe beni tipa ní nikpari kpee, ní wisigi Fugo Mbori, ní ndu tipa adunguratise, na ki nitungusipai dedede te. Ginipai rengbe ani ka mangaha tipa ka ani wonga rogo gaani aberã yo niipo ya?

ANI BANDATIRANI ANI ANDU KA WO

13. Gini bipai du ti dungu aboro areme, na ginipai rengbe ka banda gaani idapase ka si gberẽnga ya?

¹³ Gupai si aida ani moiberã rani fuoho gbe nga ka inopa gu regbo ani araka ti ni gbiati gu kerepai rengbe ka gbia rani ti koda ani tirani na agu aboro aidanga kuti gupai nga gere nga “yangara arame” ya. Petero akepai tipa gi regbo ani araka ti ni re ki ya: “Airasawia nikaye ki nipeke agu apai boroyo akpi nyemu he, niya, ‘Wari du gu kidohe ni tipa ye ko berewe? Bambiko tona ti rago ti abarani ni rame, ahe dunduko nanye wa si adu rago tonatona manga ahe.’” (2 Pet. 3:3, 4) Ka ani ageda Fugo Mbori dedede na kini wisigihe, si nika undo rani ani ini gupai nga ani naraka rogo “yangara arame.” Agu abasamungu i apepa yo aima kura tona bakuru kusayo na i kindi tigi gaani regbo re. “Gu boro nga ga gbegberẽpai ni” kindi ti gaani regbo re na ní nasogote ga Mbori amoyambu kindi. Mbiko gipai re, si naida ani ningere angera wa ga Yekova uru ambeda.​—Zef. 1:7.

14. Waigu du mangasunge fu Mbori kakaka ni bandahe furani?

¹⁴ Gu bambata pai rengbe ka undo rani ani ningere angera kindi na ki zanga wo rogo gaani aberã yo nga tungusapai dedede. Sidu, ho Yesu Kristo nga barii dungurati azinahe ni fu apefuoko i sa rikaaboro ni abawiriki na kini yugupai fuyo i kakuti agu apai dunduko ko ayuguhe, ko aafu agu arugute narengbe ka banda apefuoko. (Mt. 28:19, 20) Mangapai kuti gi rugapai re nangarasa rani ani tungusipai zaaza. Ya mo oni naberãha nga agu awirinaroni naadu Tesaronike yo arengbe kadu na ngbarago tipa kaa tungusapai na kini yugupai wa i adu nizizi yo kutini? Pauro aya fuyo wẽ: “Ka oni bísi nga Toro ya. ka oni páyasi nga agu apai i nagumba ni sangba Mbori ya.” (1 Tesa. 5:19, 20) Nairiwo wai ngba gu sangbaanebi ani awisigo ho na kini tungusipa ha fu kura aboro re!

15. Gini wene apai rengbe ani ka wisigopai tipaha ti regbo gu irisombori nga ga aborokporo?

¹⁵ A wa du sino aboro, si naida ani undo gaani aborokporo i ini wai ka tungusapai. Dungu awirina bi gupai nga gu gene rengbe ka sayo i mangi gipai re nga ka rimisoho ku rogo gayo irisombori nga ga aborokporo. Si adu ni wenepai ka si du nga oni sakipai na gaoni aborokporo tipa wai rengbe yo ka karagatiyo fuo gu boro du na nyemu rengo tiní. Ginipai i nika fura riipaha ho i nika ndu ni? Ginipai biyo ho nga si rengbe ka ba nyemupai tiní? Gini regbo ngba gbe tipa i karagatiyo fuoni? Gu kura aboro namangasunge na gu regbo nga ga gu irisombori nga ga aborokporo tipa ka mbakada adunguratise. Oni mbakadi adunguratise na kini karagapai baha yo. Ka oni mangihe wo oni nika nyakasa gaoni idapase na si nika banda roni ka oni wonga rogo gaoni aberã yo ya. (Tam. 35:18) Nirengo, du pati gu irisombori nga ga aborokporo rengbe ka banda roni ti wakana agu apai i asakanga pai tipaha rogo Ziazia Kekeapai ya.

16. Tipagine si aida mbedimbedi aKristano banda gayo aberãpai ti ni?

¹⁶ Ho ani aberã ni kurii wai Yekova naundo gako aboro tipa dungu agarã na vovo giarogo gu sangbaanebi nga ga Ziazia Kekeapai, si nasarani ani du na tambuahe tipa gu mosoro napido rani ku mbatayo. Mbembedi aKristano na maabangirise ka ga ku ngbangbaturũ yo fuo Kristo. Si adu fuyo ni wenepai ka i zanga wo rogo gayo aberã yo. Ani rengbe ka ya agi afugo Pauro akehe fu aTesaroniko re si tipa yo. Si naya: “Gaani pai nga fu tambuahe fu Mbori dedede tipa roni, awirina Gbia nakpi nyemu roni, bambiko wa Mbori asia roni . . . rogo gu sa boro ni ziazia ni nga ga Toro na idapa rengo.”​—2 Tesa. 2:13.

17. Gini ngbatunga ngarasaro ani agbiaha rogo 2 ATesaroniko 3:1-5?

¹⁷ Na zavura agu aboro du na maabangirise tipa ka gbia nyenye unga auru kpotosende, si naida i mangi ome ka zanga wo niipo rogo gayo aberã yo. Kangia oni na maabangirise tipa ka raka auru kpotosende, oni mangisunge na gu wene arugute Pauro afuhe fu gu mbedimbedi aKristano naadu Tesaronike yo. (Oni gedi 2 ATesaroniko 3:1-5.) Ani dunduko ni basasa si aida ani di agi arugute re kugume. Nirengo, gu waraga Pauro akehe fu aTesaroniko re nafu zahe furani tipa wakana agu apai i asakanga pai tipaha rogo Ziazia Kekeapai ya. Gere nga wene zahe fu agu aKristano du areme naraka rogo yangara areme.