Tipagine Gbegberẽ Apai Amanga Wene Aboro Ti Ni?

Wa duhe nga Yekova Mboria nga Bakusiahe dunduko na ko ngaMbori tandu apai dũ, dungu aboro nabihe nga ko du naye na agu apai dunduko namanga rogo zegino kodihe na gbegberẽhe. Ono tie, mo bingo gupai Ziazia Kekeapai apehe tipa ndikidi Mbori:

• ‘Yekova du ni ruru ko rogo gako apai dunduko.’—Atambuahe 145:17.

• ‘Ga Mbori mangasunge du ziazia; bambiko gako apai dunduko du ni ruru sarangbanga. Mbori nga irayososopai zanga irairapai, nga irarengo ni ruru ko.’—Pa Fu Rugute ni Ue he 32:4.

• ‘Yekova na bakere nunga ti ko, na bakere inapai.’—Yakoba 5:11.

Mbori asanga gbegberẽ apai si nimangi te. Yamo ko du naidaha fu kura aboro i nimangi gbegberẽ apai?Wagu sa te. Ziazia Kekeapai naya: “Ka boro du ni asadiasadi ni, ka ni yá nga, ‘Mbori naasada re ya.’” Tipagine? “Bambiko ka i asadi nga Mbori na gbegberẽpai te, ko aasada nga boro tigako wa sa te.” (Yakoba 1:13) Mbori a’asadanga boro na gbegberẽpai te, na ko asanga ni ni mangi gbegberẽ apai a te. Mbori asanga gbegberẽ apai si nimangi te, na ko asanga kura aboro i nimangi gbegberẽ apai a te. Da tie rengbe ani ka bira ni ho gbegber ẽ apai amanga ni?

DU ROGO GBEGBERẼ BA TI GBEGBERẼ REGBO

Ziazia Kekeapai nafura tipa ndupai sa dagba gu nduapai aboro arungo ti ni ki niya: “Rago gbia kuti mamu namanga fu yo dũ.” (Batungusipai 9:11) Ho tunguotunguopai amanga ni watadu béno, ka pai mangi borowatadu ka si amanganga ni ya, si rengbe ka ru gbe riipa gu ba du gu boro re rogoho. Agarã wa 2,000 kusayo, Yesu Kristo afura tipa gu gbegberẽpai namangi aboro ki kpi rogoho nga 18 ho gbanga bambu ati ni kuriyo. (Ruka 13:1-5) I aakpingo mbiko gu gbegberẽ raka i arakihe te; i akpiki mbiko i adu tii gbanga bambu ti gu regbo si ati ti ni. Barambeda kusayo, bakere bazigizo amangi rogo gu ringara nga Haiti rogo Ngi 2010; gu bazogo nga ga Haiti ape gupai nga agu aboro nakpi i aima susa 300,000. Anga agu aboro re dunduko akpiki mbiko i amangi gbegber ẽ apai te. Akaza naimo aboro ti aregbo dunduko.

Kura aboro rengbe ka sanahe nga: ‘Ya mo Mbori arengbanga ka rugusa ngbatunga gbegberẽ apaiwa gure ti manga te? Ya mo ko arengbanga nabanda wene aboro ti regbo agu apai re te?’ Tipa Mbori rimisi tiko ku rogo ngbatunga apai wa gure, si yuguhe nga ko ima inopai tipa gbegberẽ apai mbata fu si mangi.Wa vura duhe ngaMbori na kina gene beko tipa ka ino gupai du ku mbatayo, gu sanahe si aida ani wisigipai tipaha nga: Yamo gere ngaMbori naamangasunge na gu gako inohe du tipa ka ino apai ku mbatayo ti aregbo dunduko?​—Yesaya 42:9.

Ziazia Kekeapai naya: “Mbori du ngbangbaturũ yo; ko namanga kina agu apai dunduko ngba ti ko.” (Atambuahe 115:3) Yekova namanga kina gupai ngba tiko, anga apai dunduko ko akpinyemu ka mangaha te. Gipai re nakoda gupai ko aida ka inopai tipaha kumbatayo.Ni kpiapai, ho gbegberẽ emangapai amoipai ni rogo agu agbata nangia Sodomo na Amora, Mbori aya fu Abarayama wẽ: ‘Mi azórã awere ki bi he, singia i namanga pai rengbe na gu tawawa nga gu naye kono du mi ni; si ngia wo te, mi aína ha aina.’ (Bambata Pai 18:20, 21) Yekova aasianga ka inopai tipa gu gbegberẽ apai naamanga rogo agu agbata re te. Nirengo, anga apai dunduko Yekova aida ka inoho te. (Bambata Pai 22:12) Anga pamangakohowonayugogupaingakonazanga rengba watadu rungbura te. Wadu he nga “gako manga sunge du ziazia,” Mbori namangasunge na gu gako tandu du tipa inopa apai ku mbatayo rengbe arengba ringbisihe kuti gako ringbisapai; ko amanganga aboro ngbaome tipa imangipai a te.b (Pa Fu Rugute ni Ue he 32:4) Gini digisopai rengbe ani kadakutini? Ni wiri guruhe: Mbori nasia gupai asia ko aida ka inoho ti gu regbo ko aidaha.

YA MO ABORO DU NAYE NA GBEGBERẼ APAI?

Si naida ani bira aboro abira a tipa gu gbegberẽ apai namanga. Ani bingo wai Ziazia Kekeapai asakapai tipa gupai rengbe ka ye na gbegberẽ mangapai. “Boro du ni asadiasadi ni, ho gu nyemuhe ata gbe ni ni nga ga borose ku sa yo, ki ninangi ni. Gu nyemuhe nga ga borose, fuo du he na mobara, si ki vungu ingapai, ingapai ho da ha ni ti sosonoho, si ki kusi kpio.” (Yakoba 1:14, 15) Ho boro na boro amangapai ni kuti gu gbegberẽ nyemupai, i ima rengba ka gbiatiyo na gbegberẽ sangbanaha. (ARomo7:21-23) A wa pangbanga ayugoho, aboro aima manga kere gbegberẽ apai nga gu ye na bakere rungo. Kurigure, gbegberẽ aboro rengbe ka sa kura aboro i da ni gbegberẽ yo, tipa ka ye na gbegberẽ apai.​—Asanza 1:10-16.

Ya mo si naida Mbori rimisi tiko ku rogo gipai re tipa ka za aboro ti manga gbegberẽ apai?Mo bingo wai i akusi aboro. Ziazia Kekeapai naya Mbori akusi boro rogo kpiako, du rogoyo nga asinoko. Sidu, aboro na tandu beyo tipa ka yugo asino Mbori rogo gayo mangaapai. (Bambata Pai 1:26) Mbori aima fu ranirii fu aboro, i rengbe ka sia ka kpinyemu ko na kadu ni ruru yo fuko ni mangayo gupai du ni ruruhe bangiriko. (Pa Fu Rugute ni Ue he 30:19, 20) Ka Mborimangi aboro ngbaome i mangipai, anga gure nga ko nagbarasapa gu ranirii ko afuhe fuyo te? Ka komangihe wo, aboro du wakina gumasini i ambakadihe tipa si nimangi kina gupai i ambakadihe tipaha! Kina gu bangisapai re rengbe ka manga ka si du nga agu apai i aima ringbisaha tipa rani si du naye na agu apai dunduko namanga rani. Nairiwo gu ngbarago du ani na ni ngaMbori nabi rani na kikiipa rani si dumbuko rani ti ni ani sia gupai ngba tirani! Anga gere nayugo gupai nga gu gbegberẽ apai nayembiko ga aboromangaapai na gayo siapai nikaa mbusa aboro ambusa nyeanye kindi te.

YA MO KARMA DU NAYE NA ARUNGO?

Ka mo sana gu boro nga Hindu, watadu gu boro du rogo gu pambori nga ga aBuda na gu sanahe du ti kpoto gi waraga re, si nawira wa gani karagapai du nga: “Gbegberẽ apai namanga fu wene aboro mbiko gu ndiko nga ga Karma. I nagbia mosoro agu apai i anaamangahambata kusayo rogo gayo raka.”c

Nibipa gu yugopai nga ga Karma, si adu ni wenepai ani ini gupai Ziazia Kekeapai ayugoho tipa kpio. Aboro aenge Ati Edene yo, Bakusiahe aya fu gu bambata kumba ko akusi ko nangia Adamu wẽ: “Agu angua du ati yo dunduko mo nirí.zuzuhe ari a wa mo akpi nyemu he; ono gu ngua nga ngua ina wenepai na gbegberẽpai ka mo rí nga zuzuhe ya, bambiko ni gu rago kamo ri zuzuhe mo akpí akpi ni rengo.” (Bambata Pai 2:16, 17) Ka Adamu amanganga ingapai ki basasangba Mbori ya, ka ko araki nyeanye kindi. Kpio aye kuti aboro mbikopa basayo sangba Mbori. Fuo i batika awiriyo ‘kpio agbandaka agbandaka sa aboro dunduko.’ (ARomo 5:12) Sidu, ani rengbe ka ya “mosoro ingapai nga kpio.” (ARomo 6:23) Ziazia Kekeapai naya berewewẽ: “Gu ni kpi i di pa ingapai ri ni.” (ARomo 6:7) Ka pepai ngba kura gene, aboro atumonga tipa gu ingapai i amangihe fuo kpioyo te.

Amirioni aboro areme naya agu arungo namanga aboro areme si mbiko karma. Idipase rengbe ka idapa gani rungo kodihe na ga kura aboro zanga si fudi ni. Ono gu rengo duho nga gi yugopai re afunga maabangirise nga gu gbegberẽ apai namanga nika go ago te. Aboro idi kuti gupai nga boro rengbe ka gbia ongoda sa kina gu ka i batika ni berewe niki tona ka sona na gu kura asino tini kia gbiati inohe. Nirengo, gi berãpai re kia ti gupai Ziazia Kekeapaiapehe.d

BANGUA NDUPAI!

Gu bangua ndupai gbegberẽ apai amanga ti ni ayengo be aboro te. Satana Bakitingbanga adu mbata ni ga Mbori ruru maraika “ko anye nga na rengo te” na ko du naaye na ingapai ku rogo zegino. (Yoane 8:44) Ko du naaye na samungu ati Edene yo. (Bambata Pai 3:1-5) Yesu Kristo ayambuko nga “gbegberẽe ko,” (NW) na “kindo zegino.” (Matayo 6:13; Yoane 14:30) Aboro nadegatuyo fu Satana wa ko azayo ti gu wene agene nga ga Yekova. (1 Yoane 2:15, 16) 1 Yoane 5:19 naya: “Zegino dunduko du ni zogozogo ho be gbegberẽ ko.” Gu kura amaraika kinaho naasa tiyo ni gbegberẽ yo na ki koditiyo na Satana. Ziazia Kekeapai nayugo gupai nga Satana na gako adaimona “nga banangi aboro kpotosende yo dunduko.” (Yugoti 12:9, 12) Sidu, Satana na gako adaimona du si aida ani bira yo tipa gu gbegberẽ apai namanga rogo zegino.

Si tie ziazia nga, anga Mbori nasa gbegberẽ apai si nimangi wene aboro te; ko asanga yo i nirungo a te. Kuba gure, ko ima kidohe ka nyasariipa gbegberẽ apai wa peyo ho rogo gu kekeapai naye fuo gere.