Gu Ngua I Naima Dehe Kusande Ya mo si Rengbe ka Kura Berewe?

BORO arengbanga ka bi gu ngua eraya du ni nyaganyagaha watadu ni watawataha na kikiipaha wa gu bazigidiri ngua kedara nga ga Rebanona te. Ono ngua eraya na ome ti ni ka bata be kere wege. I nafura tipa agu akuraha nga si ima raka tipa agarã 1,000. Tarã ngua eraya nagbaraga tihe si kini sa gupai nga si tona kura ho i nade he ni kusande. Ka atarãha akpingo ya, si rengbe arengba ka kura berewe.

Gu iriiri bakumba nangia Eyobo aidi kuti gupai nga ka ko vura kpi vuru, ko araka araka berewe. (Eyo. 14:13-15) Isoke ko amangisunge na ngua eraya ka yugo gu kpia kido ko adu na ni tipa gu tandu du Mbori na ni ka zingisa ko be kpio. Ko aya, “bambiko maabangirise du tipa ngua, ka i de he ku sande, si ki kuru berewe.” Ho ugure adigo ni mai ki tona kaa na, ugu katakpa ngua eraya ima rengba ka zinga si ki tona ka kusa abehe kina ti tarãha, na ki kusi “abehe wa fogo rũrũ ngua.”—Eyo. 14:7-9.

Kina wai basopobino naakpinyemu ka bi gu ngua i nade he si ki kuru berewe, kinawo du a Yekova akpinyemu ka zingisa gu gako amoyambu naima kpiko na gu kura aboro. (Mt. 22:31, 32; Yo. 5:28, 29; Amo. 24:15) Nairiwo gu ngbarago ani ka du na ni ka dia gu gaani aboro naima kpiko kugume na ka biyo i ni raki wene raka berewe!