Bakabangirise Tipa Kerepai

Alona aya, “Ho mi agia woro mbaya ni, ngbadure natona ka kuo na mi ki oro ka ndu ka gbu. Zavura ho mi agbu ni, mi nadu kindi na bakabangirise. Gu gberẽ agberã gbe nga ka mi du zagi rogo gu ba ka mi agbunga rogoho ya. Rogo kura uru sa, ho mi aandu ni bangiri gene, mi atona ka kpara ka gene adunga berewe tipa mi ongo ya. Si adi re na gbanga regbo tipa mi zeredi. Fuo gure, gu mbaya re ki tona ka paa berewe.”

Vura nga gupai dagba agu apai yo naye na kerepai. Ni kpiapai, pa ino oni gupai nga oni watadu gaoni borokporo na kere kaza ima rengba ka saroni oni du wa gu boro i na nõ ni na bundu. Na kura aboro na bakabangiriyo tipa wai raka nika du ku mbatayo. I nabakabangiriyo nga ‘Ya mo awirani na awiri kura aboro nika raka rogo gu zegino du na vura, kuondiko, birikosi kpotosende, gbiati ririakaza?’ Wai rengbe ani ka sovura kuti ngbatunga agi abakabangirise re?

Pa ino ani pa gu kerepai namanga nasa gupai nga ‘ngangarã boro bi kerepai ki gbu.’ (Asanza 27:12) Kina wai ani naasada ka bandatirani, ani ima rengba ka banda berãrani gbiati kpotorani yo a. Agu aũngbarago nga ga zuu gbiati apangbanga ima hi be gbegberẽ asura nga agu apai nakiso gaani bakabangirise gbiati gu nga ga awirani kina ku mbatayo. Pa ne ani agu asura nga ga zuu ayugongo gupai nga ani ainongo gupai namanga ya te. Mbori aamanganga berãrani si berẽkurii gbegberẽ apai te. Kuba gure, si naida ani hiisihe “agu apai du ni rengo, . . . agu apai du ni ruru he, . . . agu apai nangba bangirise, agu apai i naya ti ni si ngba.” Ka ani mangihe wo, “Mbori zereda” nika fu zereda ku berãrani yo na ku ngbaduraniyo.—AFiripoio 4:8, 9.

PA NYAKA KPARAKPEE

Ndikidi idapase naundo rani ani sovura kuti bakabangirise. Ziazia Kekeapai nazungodi rani ani “niso gima kpe.” (1 Petero 4:7) Ani rengbe ka sana Mbori ko undo rani na ki fu tatamana gbiati wingbaduse ani mangipai kuti agu apai namanga rani, na ani kidu na kido nga “ko nagia pa rani, gu he ka ani ho.”—1 Yoane 5:15.

Ziazia Kekeapai nasaka gupai nga Satana nga ‘gbia gi zegino re’ angianga Mbori ya, na gi “zegino dunduko [re] du ni zogozogo ho be gbegberẽ ko.” (Yoane 12:31; 1 Yoane 5:19) Sidu, Yesu aamanganga sunge na sanza te ho ko aayugopai ni nga ani kpari ni ya: “Mo túka rani ti gbegberẽpai.” (Matayo 6:13) Alona aya, “Agu aregbo dunduko woro mbanya atona ka paa, mi nasana Yekova ko undo re ka mi gundenga ya. Na berewe a, kumbami anaayamba re na ki mangi kparakpee na mi. Nirengo, kparakpee naundo re aundo.” Si wakina gupai Ziazia Kekeapai apehe nga: “Yekova du mbembedi na agu yo dunduko nakpara fu ko, na agu yo dunduko ninakpara fu ko ni rengo.”—Atambuahe 145:18.

GAANI MAABANGIRISE TIPA KU MBATAYO

Rogo ga Yesu Tungusapai Rii Bagangara yo, ko ayugupai yo fu apefuoko i kpari ki ya: “Ga ngbi yé.” (Matayo 6:10) Ga Mbori Kindo nika dia abakabangirise dunduko kusayo nyeanye kindi. Vurube Yesu nga “Gbia Zereda,” Mbori nika nyasariipa vura na “digida kpotosende” yo dũ. (Yesaya 9:6; Atambuahe 46:9) “Ko [Mbori] asára ngbanga dagba dungu aboro, . . . rikaaboro amó nga basape kuti gu rikaaboro te, i awírika nga pa sovura berewe a te; . . . a nga boro sa nikagundesi yo te.” (Mika 4:3, 4) Aborokporo “adúdua abambu ki niraki rogo; i arũka bakakue aati yo ki niri zuzuhe.” (Yesaya 65:21) “A nga boro kporo sa ayá, ‘Mi nawoka’ te.”—Yesaya 33:24.

Areme, nibi agu arungosi dunduko namanga, si taata tipa ka bandatirani be “rago gbia kuti mamu” watadu ka bandatirani be du rogo gbegberẽ ba ti gbegberẽ regbo te. (Batungusipai 9:11) Vura, zuu gbiati akaza ima imo wene aboro tipa akama agarã. Gini maabangirise du agi aboro wenesa re na ni?

Dungu amirioni aboro kina Mbori nainipai tipa yo nika raka araka berewe. Ono awere, aguyo nga akandoro, i kina rogo ga Mbori berãpai daho gu regbo re kada ni “agu yo . . . dunduko du rogo amurã yo” ki kuru. (Yoane 5:28, 29) Ziazia Kekeapai nafura tipa zingabekpio na kini kido rani nga: “Gi du be rani re wa ũzada mbisimo, nga maabangirise du ni nyanyaki he nganganga.” (AEbere 6:19) Na Mbori fu “pai fu aboro dunduko i ini gere ti ni, wa ko azingisi [Yesu] be kpio dagba akangba.”—Amokedi 17:31.

Zavura awere, agu aboro naʹasada ka manga gupai Mbori akpinyemuhe, i agbiatiyo agbia na abakabangirise. Si naida ani mangipai amanga tipa ka mbeda na Mbori rogo kparakpee yo na ka sonosa idapase kuti agu amaabangirise du rogo Ziazia Kekeapai yo tipa ku mbatayo. Paul, Janet, na Alona dunduko nasovura kuti abakabangirise na diabese. A wa si adu tipa yo, “gu Mbori nga ga maabangirise ko ko hisi roni na ngbarago na zereda rogo idapase yo.”—ARomo 15:13.