Ndu Gupai Mbori Aida Ani Kpari ti ni Fuko

Mbori naida ani du ni abakureako.

Abakure naafura dagbatiyo tipa gayo pagume du ni bawenehe. Teketeke a, Mbori naida ani fura na ko, na gure nika sa gupai nga ani du na wene pagume na ko. Ko naya: “Oni ki yambu re ki ye ka kpara fere, mi ki gi paroni.” (Yeremaya 29:12) Wa mo nikaa fura na Mbori dedede, mo nika ‘mbéda na ko, ko ki mbedi na mo.’ (Yakoba 4:8) Ziazia Kekeapai nakido rani nga: “Yekova du mbembedi na agu yo dunduko nakpara fu ko.” (Atambuahe 145:18) Ka ani akpara fuko dedede, kinawo gaani pagume na ko nika nyaka.

Mbori naida ka undo ro.

Yesu aya: “Gini boro du dagba roni, ka wirini sana ni tipa riahe, ni ki fu mbia fu ni; ka ni sana ni berewe tipa tio ni ki fu wo fu ni? Wa du oni tigaoni . . . ini pa gama wene ahe fu awironi, Baroni du ngbangbaturũ yo ko susi na gama wene ahe fu agu yo nakpara fu ko te re?” (Matayo 7:9-11) Nirengo, Mbori naida oni kpari fuko mbiko “ko naberã pa roni” aberã na ko naida ka undo roni. (1 Petero 5:7) Ko naida oni ye fuoko na agu apai namanga roni. Ziazia Kekeapai naya: “Ka oni ídi nga fu pai si fudi roni wa sa ya; ono oni yúgu gaoni sanahe fu Mbori dunduko rogo kpe na zungaditise ni tambuahe.”—AFiripoio 4:6.

Aboro na agu azingo tiyo nga ga toro.

Abangbasia abainipai tipa gu mangapai nga ga aboro bi gupai nga akama amirioni aboro nabihe nga si naida i kpari akpara fu Mbori. Zavura agu aboro naya Mbori ti ni te na agu aboro naya i ainongo singia Mbori ti ni watadu ko ti ni te i nabihe abi nga si naida i akpari.a Gere nayugo gu rengo nga i akusi aboro na gu zingo nga ga toro. Yesu aya: “Aboro maku nga agu yo ini he ya i du ni zezere yo.” (Matayo 5:3) Gene sa rengbe ani ka mbisa gu zingo re ngbaha nga kaa fura dedede na Mbori.

Ka ani di gu yambahe nga ga Mbori kugume tipa ka kpara fuko, gini undo ani ka gbiaha ti ni?