Oni Vu Akuaroni

BANGUA ARUGUTE NGA GA ZIAZIA KEKEAPAI: “Oni nivu akuaroni, ka pai du bangiri gu boro kuti kura ni; wa Gbia avu roni, kina wo oni ka manga.”—AKorosaio 3:13.

Rogo gipai re yo nga gine? I ringbisi ingapai rogo Ziazia Kekeapai yo kuti bape, na mbupai kuti mbupa gu bape re. (Ruka 11:4) Gu kura buku sa naya gu fugo Giriki nga “mbupai” du rogo Ziazia Kekeapai yo, rogoyo nga “ka mbupa bape na ki zanga sanahe tipaha.” Sidu, ho ani asia ka mbupai ni fu gu boro ingipai kuti rani, ani nambupai funi ki zanga gupai nga ni mangipai furani kubaha. Pa mbupai fu gu kura boro ayugongo gupai nga ani naida na gupai ni namangihe re watadu ka bi gupai ni namangihe re na umba paha te. Kuba gure, ani nadia berã ka zanga kpipai, ka si vura du nga ani na wene ndupai ‘bangirani kuti kuarani’ vurũ.

Ya mo si na undo ti ni areme? Wangia ani kpakpa aboro, ani dunduko naingapai ainga. (ARomo 3:23) Sidu, si ni patatamana furani ani mbupai fu kura aboro, mbiko uru adu kinaho a si nika ida i mbupai furani. Kurigure, ho ani asia ka mbupai ni, ani nagbia undo agbia a behe. Wai du duhe wo?

Ho ani akpipai ni zanga mbupai fu kura aboro, ani naimisa kina tirani. Gu ngbatunga gbegberẽ aberã re ima rengba ka dia ngbarago tirani kusayo, ani ki zanga kodatirani na akuarani, na ani kidu na bakere gberãrago. Si ima rengba ka ye na kaza furani a. Waraga sa Amerika yo atingidipai nga: “Gupai ani nabihe nga kerepai kinaho dagba zinga gbiati sogote na kaza ngbaduse.”

Ono oni bingo gu wenepai duti mbupai. Ho ani ambupai ni fu kura aboro, ani nabanda kodatise na zereda gbiati gaani pagume. Gu nyakipaha gbe nga, ani na wirika Mbori nga gu boro nambupai fu agu aboro nasa gayo berã na ko naida ani mangi kina gu ngisapai re.—Marako 11:25; AEfeso 4:32; 5:1.