Agu Apai Nandu Na Gupai Du Ti Kpotoho
Wai du Mbori Abi Vura?
Wai du rengbe mo ka karagapai kuti gu sanahe re? Badungu aboro naberãha nga Mbori naida aida na vura. I nape gupai nga ko afu zinahe fu airisiko bakuru kusayo i sovura; Ziazia Kekeapai napepai ape wa gure a. Ono tie tipa gu kura aboro, i bi gupai nga Wiri Mbori nga Yesu ayugupai fu apefuoko nga i kpinyemu avurayo. (Matayo 5:43, 44) Sidu i nape gupai nga regbo aadu kinaho ga Mbori bipai tipa avura aye ka ariatihe na areme ko aidanga na vura berewe te.
Gamo bipai nga gine? Ya mo Mbori naida na vura? Kangia ko naida na ni, ada du ko angbe na yo rogo agu avura namanga areme? Ka mo gbia karagapai kuti agu asanahe re, si ima rengba ka aria gamo bipai tipa vura. Ni kpiapai, ka mo inihe nga Mbori naida na vura na ko nangbe na kina agu aboro ngba tiro rogo vura yo, si nawira wa mo ima rengba kadu na ngbarago tipa gamo diaberã, na mo kidu na kido nga agu aboro mo angbe na yo nika duadu na diabese. Ono wai du rengbe mo kadu kangia mo bi gupai nga Mbori nangbe na gu kura aboro rogo vura yo angianga gamo yo ya? Si nawira wa mo ima rengba ka berã berewe wenengai tipa gamo diaberã.
Nyanyakipa pai du nga gipai re. Ka mo ini wai Mbori abi vura, si ima rengba ka aria gamo bipai tipa ko. Kangia mo dagba agu amirioni aboro vura arungosiyo, zanga kapa, mo naida aida ka ino karagapai kuti gu sanahe nga, Ya mo Mbori nga gu boro nasa aboro i ni sovura wa gu kura aboro naidi kutini na si kini ye na rungo, watadu ko aberãnga pa agu aboro i arungosiyo te?
Kina ngbaro rengbe ka zera ka bi gupai nga Ziazia Kekeapai nakaragapai kia ti agu aberãpai re. Kurigure, tona bakuru kusayo kada ku awere, ga Mbori bipai tipa vura aˈarianga tihe te. Ani bingo gupai Ziazia Kekeapai apehe tipa ga Mbori bipai tipa vura bakuru kusayo na rogo bambata sa kama agarã, ho Yesu adu ni auru kpotosende ane. Si rengbe ka undo rani ani ini wai Mbori abi vura areme, na singia vura nika ngia papara ga aboro raka ku mbatayo.