Asanahe Be Agedihe
Gu mokedi nangia Pauro akepai ki ya, Yekova “aida nga i asadi roni susi gu ka oni rengbe na ni te.” (1 Kor. 10:13) Ya mo gure nayugo gupai nga Yekova nawisigo gupai kumbatayo rengbe ani ka hi he na fuoho ko kini sia gu asada ani ka gbiatirani na ni?
Mo bingo gu sangbanapai rengbe gi bipai re kadu na ni. Wirina sa wiriko aimi tiko asanahe nga: ‘Ya mo Yekova awisigi gupai awisigo kumbatayo nga mi na diare nika duadu na rengba ka hi pa imo wirani tiko? Ya mo si amangi mbiko gupai nga Mbori aima inoho nga ani rengbe arengba ka hi he?’ Ya mo wene ndupai ho ani idi kuti gupai nga Yekova nasa apai si nimangi rogo gaani raka wa gure?
Wisigo agu afugo Pauro berewe gbe du rogo 1 AKorindo 10:13 nada na ani kuti gu digisopai nga: Pai ho du rogo Ziazia Kekeapai yo nayugo gupai nga Yekova nawisigo gupai kumbatayo rengbe ani ka hi he na fuoho ko kini sia gu asada ani ka gbiatirani na ni te. Ani bingo nduapai biama nga gu nasa rani ani dakuti gu digisopai re.
Bambatapai nga, Yekova ambakadi aboro na ranirii ka siapai. Ko naida ani sia gu gene ani aida ka raka ngbaha. (Pa Rug. 30:19, 20; Yos. 24:15) Ka ani sia gu gene du ni wenehe, ani rengbe ka ngera koyo du Yekova ni tipa ko ngbe furani kumbatayo. (Snz. 16:9) Ono ka ani sia gu gene du ni gbegberẽ he, ani gbiatirani agbia na sangbana gaani siapai. (Gara. 6:7) Wa ka si ningia Yekova du nasia agu aʹasada ani agbiatirani na ni, ya mo ka gure du nzunzu nga ani na ranirii berani ka siapai?
Uepai nga, Yekova aokanga rani be “rago gbia kuti mamu” te. (Batu. 9:11) Kere abéno nga gu du na kere asangbanaha rengbe ka manga rani mbiko du ani rogo gbegberẽ ba na ti gbegberẽ regbo. Yesu afura tipa aboro 18 nga aguyo gbanga bambu ati kuriyo ki imiyo, na ko ayugu gupai nga, gu béno re angianga gupai naaye be Mbori te. (Rk. 13:1-5) Ya mo anga irairapai ngaha ka berã gupai nga Mbori nasia pai kumbatayo tipa da du nika raka na da du nika kpi mbiko agu apai namanga bau te?
Biatapai nga, ani dunduko ni ba sasa gupai du tipa padu ni ruruse abi rani. Mo tingidi gupai nga Satana atikango na gu padu ni ruruse nga ga agu aboro dunduko nairiso Yekova, ko aya ka ani nyenga ni ruru rani fu Yekova ho ani agbiatirani ni na aʹasada te. (Eyo. 1:9-11; 2:4; Yugo. 12:10) Ka Yekova banda rani be kura ngbatunga aʹasada mbiko gupai nga ko nabihe nga ani arengbanga ka hi he te, ya mo gure sanga gupai Satana apehe ni rengo nga ani nairiso Yekova mbiko kina agu ahe ko afuhe furani te?
Biamapai nga, Yekova aidanga ka ino agu apai kumbatayo dunduko du tipa rani te. Gu berãpai nga Mbori nasia agu aʹasada asia ani ka gbiatirani na ni, tiiworoho nayugo gupai nga ko ima ino agu apai dunduko du tipa rani kumbatayo. Ono gu ngbatunga bipai re andunga kuti gupai Ziazia Kekeapai ayugoho te. Nirengo Mbori ima rengba ka ino gupai du kumbatayo. (Yes. 46:10) Ono Ziazia Kekeapai nayugo gupai nga kura apai kinaho ko asia ka inopai tipaha kumbatayo. (Bam. P.18:20, 21; 22:12) Rogo gi gene re, ko nata mangasunge na gako tandu nga ga ino apai kumbatayo kini bi gupai abi a nga ani na ranirii ka siapai. Anga gure nga gupai rengbe ani ka idaha be gu Mbori nabi gaani ranirii na nyanyakipaha na nga guko namangasunge ti aregbo dunduko na gako tandu ngba ruru gene te?—Pa Rug. 32:4; 2 Kor. 3:17.
Wai du tie, si aida ani girogo agu afugo Pauro yo nga: “Mbori . . . aida nga i asadi roni susi gu ka oni rengbe na ni te”? Herẽ, Pauro aafura tipa gupai Yekova amangaha ti regbo aʹasada, angianga mbata fu aʹasada ya. Afugo gu mokedi nangia Pauro nakido rani nga ka kina gini aʹasada vura kura vurũ rogo gaani raka yo, Yekova nika undo rani aundo ka ani kido kutiko. (Tam. 55:22) Agu afugo wasa nga ga Pauro re naru kurii nyanyakipa arengo ue.
Bambatapai nga, agu aʹasada ani agbiatirani na ni nga “kina gu ka boro hi he ahi.” Sidu tie, ani nagbia tirani na kina agu aʹasada rengbe aboro arengba ka hi he. Ngbatunga agu aʹasada re afunga rii omerani te ka ani kido kuti Mbori. (1 Pet. 5:8, 9) Rogo agu averesi du kusayo mbata fu 1 AKorindo 10:13, Pauro afura tipa agu aʹasada aYisaraere agbiatiyo na ni ngbakungbo yo. (1 Kor. 10:6-11) Asada ho dagba agu aʹasada re nasusi gu asada rengbe boro ka hi he watadu nasusi gu rengba, ruru aYisaraere adu na ni ka hi he te te. Pauro ape gupai bara biama nga, “bete yo” abasasangba. Si nafu kina gberãrago nga, bete aYisaraere afutiyo sa ingapai bambiko gupai nga i akidongo kuti Mbori te.
Uepai nga, “Mbori du ni irarengo.” Wai Mbori amangipai mbata na gako aboro nayugo gupai nga ko nayugo gako nyenye nyemuse fu “agu yo nakpi nyemu ko ki nika kuti gako arugute.” (Pa Rug. 7:9) Si nayugo gupai a nga Mbori nabanda gako akidohe dedede. (Yos. 23:14) Nibipa wai Mbori amangipai ni ruruhe bakuru kusayo, agu aboro nakpinyemu ko na kini gisangbako rengbe arengba ka kido nga ko nika banda gako akidohe du ue abanda nibipa gu asada rengbe yo ka gbiatiyo na ni nga: (1) Ko ambunga gene fu asada si sono ki dati gu bangiriba nga ka i hinga ha ya te te, na (2) “ko ambakada gene kura be he” fuyo.
Yekova “nafu wasa fu rani rogo gaani gberãngbi”
Wai du Yekova ambakada gene kura be asada fu agu aboro nakido kutiko ho i agbiatiyo ni na aʹasada? Rengo ngaha nga, ka ko idi ka dia asada kusayo ko nadiaha adia. Ono mo tingidi agu afugo Pauro nga: ‘Ko [Yekova] ambakada gene kura be he a, ya oni rengbe ka hi he.’ Sidu, rogo dungu agene, ko nambakada “gene kura be he” nifu ko guhe furani ani aidaha tipa ka hi agu aʹasada re. Mo bingo bete agu agene Yekova narengbe ka mbakada gene kura rogo aʹasada ngbaha furani:
Ko “nafu wasa fu rani rogo gaani gberãngbi.” (2 Kor. 1:3, 4) Yekova namangasunge na Fugoko, gako ziazia toro, gbiakuti gu rigo nga ga toro ruru kangara moyambu afuhe tipa kafu wasa ku berãrani yo na ku ngbaduraniyo.—Mt. 24:45; Yo. 14:16, Rom. 15:4.
Ko rengbe ka ngbe furani kumbatayo vurube gako ziazia toro. (Yo. 14:26) Ho ani agbiatirani ni na aʹasada, gako toro rengbe ka undo rani ani tingidi agu apangbanga du rogo Ziazia Kekeapai yo na arugute na fuoho ani ki mangipai ni tatamana.
Ko rengbe ka mangasunge na gako amaraika i undo rani.—Eb. 1:14.
Ko rengbe ka mangasunge na akuarani airisimbori i ‘ngarasi’ rani na gayo afugo gbiati gayo mangapai.—Koro. 4:11.
Ginipai tie, rengbe ani kada kutini nga si nga rogo agu afugo Pauro du rogo 1 AKorindo 10:13? Yekova asianga agu aʹasada ani agbiatirani na ni te. Ono ho ani agbiatirani ni na aʹasada, ani rengbe kadu na kido nga: Ka ani kido kuti Yekova, ko ambunga gaani aʹasada si di berani te; ko duwa ka ko mbakadi gene kura behe tipa ani rengbe na hihe. Nairiwo gu fugo wasa nga ni re!