Oni Natingidaha?
Ya mo mo agedingo agu aNgbaõbambu Sinziri sirisiri kuru barambeda kusayo? Ani bingoho singia mo rengbe ka karagapai kuti agi asanahe re:
Ho arugapai aye ni be ga Mbori riigbu, gini sino si aida agu awirina, nga ababi adungurati gbiati abaakumba rogo adungurati du na ni?
Si naida i du ni agu aboro nagiasangba ni ipo. I rengbe ka sana tiyo nga: ‘Ya mo mi nafubee tipa agu aboro du patire du wenengai rogo toro yo? Ya mo mi naadia agu arugapai kugume ni ipo na kini songodihe nga gu agu awirina nangbe kumbatayo afuhe?’—w16.11, kpe. 11.
Gini regbo du ndikidi aKristano aye kutii gu zio nga ga aBabero?
Gipai re amangi ngbutuko tingbafuo kpio amokedi. Ti gu regbo re, i atona ka kusa gu rika nga ga abarumbatayo rogo pambori. Kanisa gbiati aGbia ngbii aasonosa gu ziree pambori nga ga aKristano na kini asadi ka sa aboro ka i ginga fugo agu aKristano naadu wakina morũ ya. Ono rogo agu abawe agarã naandu kuti 1914, mbedimbedi aKristano aakura tii gu zio nga ga Babera Du na Bakere Ome Ti Ni.—w16.11, kpe. 23-25.
Tipagine gu sunge nangia ga Lefèvre d’Étaples adu ti ni na nyanyakipaha?
Rogo agu agarã naatona rogo 1520, Lefèvre asa Ziazia Kekeapai ku rogo French [Faransée], tipa dungu aboro rengbe ka gbiaha. Gako sakarogo Ziazia Kekeapai yo aima du na maapai kurii Martin Luther, William Tyndale, gbiati John Calvin.—wp16.6, kpe. 10-12.
Gini kparakparapai du dagba kadu na “gu berã nga ga borose” na kadu na “gu berã nga ga toro”? (Rom. 8:6)
Gu boro du na gu berã nga ga borose namaa berãni naabaha kurii gu nyemuapai nga ga borose, kini fura tipaha ti aregbo dũ, na kini takipandehe. Gu boro du na gu berã nga ga toro namaa berãni gbe tipa agu apai nabipa Mbori gbiati gako aberãpai rogo gani raka yo, gu ngbatunga Kristano re nambu ziazia toro si du na maapai kurii berãrani. Gu berã nga ga borose nandu sa kpio, gu berã nga ga Toro nandu sa unga na zereda.—w16.12, kpe. 15-17.
Gini apai rengbe mo ka mangaha ka zogosa bete abakabangirise?
Mo peresipa agu apai mbatayo rẽarẽ, mo du na ruru bipai, mo moi regbo tipa ongoda na aʹuru dunduko, mo naagbia ngbarago ti agu ahe Yekova akusihe, mo du ni gu boro naba wia na aboro, na mo ni mangi mangonvo dedede na kini raʹara wenengai.—w16.12, kpe. 22-23.
Wai du “Mbori adi Enoka ya ka ko bi nga kpio ya”? (Eb. 11:5)
Si nawira gupai nga Mbori adi Enoka rogo raka yo ku rogo kpio yo zezeredi ka ko ainongo nga ko nakpi ya.—wp17.1, kpe. 12-13.
Tipagine du umbasitise ti ni kindi na nyanyakipaha?
Umbasitise nakoda du na ruru bipai tipa tirani, na ki ini agu apai ani arengbanga ka mangaha ya. Si naida ani inipa wai gaani sino narengbe ka mangapai na kura aboro, na si naida ani naamanga kina agu apai rengbe na omerani.—w17.01, kpe. 18.
Gini goapai duho nayugoho nga Mbori afu arugapai fu gu riigbu bipasunge naadu rogo bambata sa kama agarã kina wai ko afu arugapai areme fu Riigbu Bipasunge?
Ziazia toro aundo yo i girogo gu rengo yo nga ga Ziazia Kekeapai. Amaraika aundo yo i ngerekurii sunge tungusapai, na i anaakido kuti Fugo Mbori ho i anaafu arugapai ni. Gere nga kina gu ngisapai du areme a.—w17.02, kpe. 26-28.
Gini apai nafõrani ani bi ga Yesu motumo tumorii na nyanyakipaha?
Apai biama, du nga: Gu boro naafuhe, gu ndupai ni afuhe ti ni, guhe ni afuhe tipa ka manga gu motumo re, na gu ndikidi zingo si ambiisi he. Si naida ani berẽkurii gupai agu apai re akodaha.—wp17.2, kpe. 4-5.
Tingbafuo Kristano mangi diaberã, ya mo ni rengbe ka aria berãni?
Si naida ani kakuti gaani akidohe. Ono wa vura duhe wo, kura aregbo kinaho si aida ani aria gaani adiaberã aria. Tingbafuo aboro Nineve sa gayo berã, Mbori aʹaria gako diaberã tipa yo. Ti kura aregbo, vovo apai rengbe ka kura nga gu rengbe ka ida ani mangi kina gu ngisapai re.—w17.03, kpe. 16-17.
Tipagine du perimo ti ni ni kere gbegberẽ he?
Si rengbe ka sa tagbagapai si baraga na ki gbere kina kumbatayo. Singia ani du i naingi kuti rani watadu ingi kuti boro, peka gbegberẽ afugo arengbanga ka mbakada tagbagapai te.—w17.04, kpe. 21.